NUNNA TUIKHUR : SEPTEMBER 2016 : EDITORIAL

Hun tam ala liam lo emaw tih laiin kum khat a thla hmawr lampang kan lo chuangkai leh ta der mai! Nunna Tuikhur lam pawh a thla telin kan chhuah har tulh tulh emaw tih mai turin hei tum ṭum pawh thla nawi lamah kan tichhuak leh thei hram e. Chhum lo chat lovin kan la tichhuak ve thei zel a, ala lawmawm tho tho e. Amaherawh chu kan ti teh ang, thuziak lam bawk hi a ni buaithlak ṭhin! Hei tum ṭum pawh keimahni kutchhuak in a daih thlawt lova midang thuziak kan han khawn khawm leh nual e.

Beihrual thla a ni a, kan fellowship pawh kum dang zawng aiin Beihrual thliin min nuai naa kan hlawkpuiin sawizui leh sawihona pawh kan nei hnem narawh e. Tin mimal leh mipui hmaa thu intiamna nei thei leh damna chang pawh an awm nual hian a hlawk zia a tarlang chiang hle awm e. A kal a ten a hlawk zia an chiang a, a tel a ten an nuna hna a thawh nasat zia pawh an hre ber ang. Kei, a tel ve hman lo hian ralkhat aṭanga rei an daih lovang, a hman vang mai mai a tel an ni hlawm, ti a ka lo sel ve chiam hi ka tih tur a ni hran lova ka lawmpui anga ka chhawm nung zawk tur a ni. Ka tih tur ka lo hai leh ṭhin hian midang âwngrawpna alo siam fo ṭhin.

Kan beihrual zirlai leh sawiho tur aṭang tho hian zir tur leh thu ṭha tak tak sawiho kan va nghah tak em! A bikin ṭhalai lam tan phei chuan hriat a zawm nghal mawlh mawlh mai tur a va tam tak em! Tunlaiin C1 velah Mizo ṭawng hmang si, kohhran leh community lama an hming hmuh tur awm si lo, kawrsir a ṭhu tlar pet ṭhin zingah sawn kan unau te an tel ve ṭhin em? Ngaihtuah hi an ti thui ṭhin ngawt mai. Ṭhahnemngaih luatah han zilh ve ngawt dawn ila, min liak let zek ang tih hlauhawm khawpin an fin hmelin English lah an thiam si, an hawi chhe chhe a, an nun hman liam dan hi ka lo ui pui ngawih ngawih ṭhin.

Pathian zarah kan vannei a, kan member hming ziak te chu hmuh tur an awm ve ngai lo amaherawhchu fellowship member tin te hian tih tur kan va ngah si em! Kan ṭhiante an lo awm palh hlauh chuan kohhranah te hming ziak a, remchan apianga inkhawm tur te in i sawm fo ṭhin teh ang u.

Hunruat leh chanvo hlen chungchangah kan peng leh lawk teh ang. Kan fellowship kan vanneihna chu member kan tam tham loh avangin mi pakhat pawhin chanvo eng eng emaw hi thla bi kim hian kan chang emaw tih mai tur hian kan chang ngun a, hei vang emaw ni hian chanvo hlen loh kan ching fo mai. Damlohna leh loh theih loh thil a nih lem loh hi chuan Pathianin hruaitute kal tlangin chanvo min pek a ni tih hriain hlen hram hram i tum thar leh ang u. Tin, kan remchan dawn loh pawhin a hma lam in hunruattu te i hrilh ṭhin ang u.