BEIHRUAL THLIRLETNA

Beihrual 2016 chu kham lo takin kan lo hmang zo leh ta reng mai! A hmasain kan ruahmannate min tihhlawhtlinsaka, tluang taka min hmantirtu leh mal min sawmsaktu kan Lalpa Isua Krista hming chu fakin awm rawh se.

Kan Fellowship din tirh aṭangin kum tin Beihrual hi kan la hmang ve deuh zel a. Kha’ng kum kaltaa kan hman ṭhinah pawh khan taksa leh thlarauah kan hlawkpui ṭhin hle. Kan thil chin ṭha lo Krista avanga bansan hlen ta te, ringtu nunah kan tih tur ngei ngei kan lo la tih ngai loh tih ṭan phah nana hmang ta te, rawngbawlna kawnga hmasawnna nasa tak chang leh a dang tam tak sawi tur a awm awm e.

Ama’rawhchu, tun ṭum 2016 Beihrual hi kan hlawkpui lehzual bik niin a lang! Taksaah damna ropui tak chang kan awm laiin, a ṭhenin ringtu nuna min tihnufumtu thil chin ṭha lo, zuk leh hmuam, ruihtheih thil an chin ṭhin an bansan thu kohhran leh Pathian hmaah an han intiamin an han puang dum dum mai kha chu a ropui thlawt a ni. Lawm avangin biangah mittui a luang lo chauh a ni ber e.

Chumai ni lovin kan thupui zirho ang zelin rawngbawlna/mawhphurhna hlen leh mahni chanvo hlen chungchangah te, thilpeka rawngbawl lamah te, kan vanglaini kan hman dan tur chungchang etc. ah te testimony ropui tak tak kan ngaithla chamchi a, Pathian rinchhana hmasawn tura thu tiam la engemaw zat kan awm bawk. Heng zawng zawng hi a hmulo tan chuan awih a har deuh hial maithei. Mahse a hmuna kala, hmua hriate chuan mihring mihrinnaa ti ve mai mai an/kan ni lo, keimahniah thawktu Thlarau Thianghlim a awm a ni tih fiah takin kan hre thei thung si a ni. Lalpa ropui ber rawh se.

Kumg dangah kha chuan Mizoram Synod Beihrual bu kha kan lo zir ve mai ṭhin a. A nih loh leh chumi behchhan deuha tlema tihdanglam leh siam ṭhat deuh changte pawh kan nei awm e. Amarawhchu nikum 2015 kum tawp lam aṭang khan kumin beihrual thupui tur hi keimahni context nen inmila, keimahni irawm chhuak ngei siam ni ve tawh se tiin hruaitute thinlungah a awm tawh a, chutiang tak chuan E.C. meeting in a lo passed ta a ni.

Tichuan, Fellowship Committee ten an phak ang tawka an ngaihtuahnate senga an ngaihtuahho hnuin heng thupuite hi an thawhkhawm ta tliar tliar a:-

1)      Ringtu nun kawng ṭhuampui

2)      Thilpek rawngbawl hna

3)      Vanglai nun hman ṭhat

4)      Rawngbawlna hlen

5)      Ruihhlo ngawl vei laka fihlim

Heng thupui thawhkhawmte hi a khaikhawmna hming atan ringtu nun tihin a huam theih vek angin, kumin beihrual thupui atan leh a bu hming atan pawh, “Ringtu Nun” tih chu hman a lo ni ta a.

Tichuan heng thupui thawhkhawmte hmanga zirlai lo buatsaih tur hian Fellowship Chairman, F. Lalremruata chu lungrual takin ruat a ni a. Ani’n mahni hna ṭul tam tak karah tlawmngai takin a’n buatsaih a, duh anga inbuatsaihna hun leh lehkhabu rawn tur tam tak pawh rawn hman lova buatsaih a inti chungin heti khawpa zirlai ṭha, kan hlawkpui hi a rawn chhawp chhuak thei a, a lawmawmin a ropui tak zet a ni.

Thupui buatsaihtuin a zawh hnu hian Nunna Tuikhur publication lamah a’n pe chhawng leh a, anni’n uluk taka edit leh layout design te neiin, a bu mawi takin an rawn khwar pum ta a ni. Zirlai thupui buatsaihtu kan Chairman ni bawk, F. Lalremruata leh a published lam buaipuitu Nunna Tuikhur Editor-te inpekna a fakawm thlawt a, midang hriat loha an hahpuina zawng zawngte a thlawn lova, Lalpan mal a sawm tih a chiang. An chungah hian kan lawm hle a, Beihrual hawn zanah Biak Inah lawmthu sawina pawh neih a ni nghe nghe. Lalpan a let tam takin malsawm rawh se.

Kan hriat tawh angin kumin kan beihrual hi a hawn zan leh a tawp kharna lam Biak Inah kan hman ho tih loh chu mahni she she mual hranah tiin, bial 2-ah inṭhen a ni a, mahni bial bialah in hrang hrangah inkhawm ṭhin a ni. Bial 1-na hi Leaderah Fellowship Chairman leh thupui buatsaihtu ni bawk, F. Lalremruata hovin ‘40 ft. Road’ kalkawng aṭanga Chanakya Place/Sitapuri lam side zawng leh Asalatpur veng leh Vikaspuri veng te inhlawm khawm an ni a. Heng in hrang hrang:-

1.      Pu Lalropara te in

2.      Pu Lalnunmawia te in

3.      Tv. F. Lalremruata in

4.      Pu Lalhminghlua te in

5.      Pu Lalrinawma te in-ah te hian inkhawmin, inneitute hian ei leh in tuihnai tak tak hnianghnar takin an hlui zel a. Tin, Chairman ina an inkhawm zan phei hi chuan KFC te hial pawh an ei ve niin thlalak an rawn post aṭang chuan a lang. An bial bik activities recorder leh report petu atan Tv. JL. Liana hmangin, ani hian an inkhawm chanchin leh thlalak lamte a rawn report ṭha thei hle a, thlalak phei chu a phe deuh zawng zawng nen lam a rawn post kim biai ṭhin a, mit a tlai ṭhin hle. Amarawhchu, a pawimawh ber, a tawp zanah erawh a hmel kan hmu ta lo hlauh thung a (nula a lo rim bo daih ni lovin, mimal thil pawimawh vangin a lo inkhawm hman lo ni ngeiin a lang), an bial leader-in report a pe ta zawk a ni.

Tin, Bial 2-na hi ’40 ft. road’ kalkawng aṭanga Jeewan park lam side zawng zawng- Chanakya Place veng ṭhenkhat, Mahindra Park, Jeewan Park leh Om Vihar lam te an ni vethung a. Bial leader hi Upa Hrangauchhunga a ni. Anni bial hi an ṭha ṭhe ṭhawin, sawihona lamah pawh vai thei tak tak vek an ni hlawm lehzual a, zan dar 11/12 velah pawh an la debate laih laih hial ṭhin a ni awm e. Heng in hrang hrang:-

1.      Pi Henny Lalbiakchhungi te in

2.      Pi Lalthanzami te in

3.      Pi PC. Lalbiakzuali te in

4.      Pu C. Lawmkima te in

5.      Pu Lalchhanchhuaha te in-ah te hian inkhawmna an nei a. Chhung tinte hian refreshment tuihnai tak tak an lo hlui ṭhin. Tin, Pi Juliet Zamveli’n zan khat phei chu KFC a treat thut mai a, an tlai tlang hle (hei vang hian Pi Julieti hi inkhawm ve angah an pawm phah ta mai niin thu kan dawng). An bial lam inkhawm record-tu hi Pu Jerome Lalhruaitluanga niin, a ni hian kar tluana an inkhawm chanchin leh sawihona te ngaihnawm takin group lamah a report ṭhin bakah, a tawp zanah kimchang takin kohhran hote hmaah report a pe bawk a ni.

Heng a chunga inkhawm thlengtu chhungkuate leh ei leh in min tumsaktute zawng zawng chungah hian kan lawm tak zet a, Lalpan a let tam takin malsawm mawlh rawh se.

Tichuan, September 18, 2016 Sunday zan khan a tawp kharna chu Biak Inah neih a ni a. Mipui ten kan kham loh em avang leh testimony sawi duh te, kan zirlaia thupui sawiho turah sawi tur la sawi zo lo te bakah, kar tluana kan beirual inkhawm chhim ve hman ta lo zan lam hnathawkte tan hun zalen tak hmang turin hemi zana thuhriltu tur, Upa Hrangauchhunga chuan a hun chu mipuite tan a kian ta tawp a. Hun kan ren avanga mi tak takin sawi kan insum chungin, a sawi chhun chhunte chu a puahin kan puak ṭhuai ṭhuai a, kan boruak chu a alh hluah hluah a ni ber e. Kan zai te reng reng pawh crusade nei hlim thar tam tak aiin kan tui zawk ti ila kan sawi sual lo hial awm e.

Kan Beihrual thupui zir sawiho tur kan sawiho zinga a hot zual deuh deuh ni-a langte chu:

1. Thilpek kan pek ṭhin avanga hlawkna leh lawmna kan chante sawiho ni se.
2. Kan Delhi khawtlang nun enin kan ṭhalaite hun hman dan hi ṭha kan ti em? Ṭha kan tih leh ṭha lo ka tih laite sawiho ni se.
3. Kan Pathian biak inkhawm chanvo nei ṭhenkhat ten an hlen lo fo hi engtia hmalak tur nge ni ang?
4. Kan mawhphurhna leh chanvo te kan ngaih pawimawha kan hlen ṭheuh theih nan engtia hmalak tur nge ni ang?
5. Ruihhlo ngawlvei mekte chhanchhuak turin kan fellowship hian tih theih kan nei em?
6. Meizial, Sahdah, Tuibur ngawl veite hi Zu leh Drugs ngawlvei aiin Pathian mithmuhah an ṭha bik ang em?

Inkhawm banah refreshment hlim taka ei-in hovin, taksa leh thlaraua kan hlawkpui leh puarpui em em kan Beihrual 2016 chu kham lo takin kan mangṭha leh ta ruai ruai a ni. Kha’ng kan beihrual aṭanga damna chang te, testimony ropui tak tak sawitute leh Pathian hminga hmasawn zel tura intiam zawng zawngte kha Lalpan awmpui se la, huaisen taka ke pen zel thei turin i ṭawngṭaipui mawlh mawlh ang u. Tin, he kan beihrual hian a chhim ve hman ta lo kan memberte zingah leh kan chhehvela kan unaute hnenah hian kan nun leh kan chetzia leh kan thiltih hmangin a hlawhtlinzia chu lo puangchhuak zel se la, rah ṭha chhuah zel rawh turin Lalpan mal min sawmsak mawlh rawh se.

Beihrual Chungchanga titi ṭhenkhat:-

1.      Vikaspuri veng kha an tlem leh tamah innghat lovin kum danga kan tih ṭhin angin bial hranah lo siam ve ila, anmahniin lo inṭuk khawm ve ta se tun ai hian kan hlawkpui tlang lehzual zawk ang em?

2.      Beihrual kan hman tawh zawng zawngah tun ṭum hi a ropui leh a hlawhtlin zualna bik nia ka hriat chu, testimony ropui tak tak leh intiamna ropui tak tak neite bakah, kum danga la awm ngai lo, taksa ngeia chawp leh chilha Pathian tihdamna chang kan awm kha a ni.

Kumin kan beihrual chu damlohnain kan khawtlang a tihbuai lai tak a ni kher kher a, in tinah kan dam lo emaw tih mai turin kan bawrhsawm hlawm a, dam lohna avanga member tam takin an chhim ve thei ta lo hi a uiawm hle mai. 



- Nanaua Chawngthu