FIAMTHU

(Efesi 5:4, Mat. 12:36-37, Thuhriltu 3:4, Efesi 4:29)

LPS Comedian Search-a an fiamthu ṭhenkhat chungchangah mi pakhatin, “kohhran leh Bible thu hmanga fiamthu thawh hi ringtute tan a mawi lo”, tih lam hawia a comment chu a post-tu Mafaa Hauhnar chuan, “Synod leh OM bookroom-a fiamthu bu tam tak i hal fai phawt a ngai a nih chu, pulpit rawngbawlnaa thuhriltu tam tak tehkhin thute nen”, tih ang deuh khan a reply a. An ṭawngkam kha chiang takin ka hre ta lo naa khitiang deuh khi chu niin ka hria. 

He an inchhannaah hian tunge dik zawk a, tunge dik lo zawk sawi ka tum lova, keia lo endik turin endiktuah min ruai pawh ni lo pui chuan! Ama’rawhchu tun ṭumah hian thupuia kan hmuh ang khian, ‘Fiamthu’ tih hi tawite talin i’n luhchilh lawk te’ng u. 

Fiamthu hian mi a tihlima hrisel nan nuih fote pawh a ṭha a, midang nen infiam bawrh bawrhin innelna leh inpawhtawnna a thlen bawk. Fiamthu thiam nge nge chuan mi nel an hlawh a, an bula awm pawh a nuam nge nge ṭhin. Thuhriltu ngei pawhin, “Ṭah hun a awm a, nuih hun a awm;” (Thuhriltu 3:4) a lo ti bawk.

Tin, mihringte hi hlima nui thei tura siam kan ni a, ‘khawvela hmel ṭha ber chu nui hmel a ni’ te an lo ti ṭhin bawk. Thilsiam dang leh ran vulhte hi nui tura siam an nih ve kan hre lo va, an nuih ngai pawh kan hre lem lo. Ui-te hian min lo nuih vur vur se a hlauhawm zawk viau lo’ng maw? C-1 vela bawngte saw lo nui vur vur ṭhin se an rapawm viau maithei a ni.

Keini ngat phei chu fiamthu duh hnam kan ni lehzual a, khawi hmunah pawh chhuah khawmna deuh tawhah chuan fiamthu thawha nui dur dur ṭhin hnam kan ni. Hnatlang, thlanlaih nikhuaah pawh fiamthu thiamin a sirah fiamthu an lo thawh a, a hlimawmin hah hre lo lekin hun kan hmang liam ṭhin a nih hi.

Tunlaiah phei chuan sum tam tak lak luh nante hial a hman theih bakah, fiamthu thiam takte chu mi lar ber berte an rawn ni ta nawlh nawlh mai. Hetia sum lakluh nana hman theih a nih hma, hmanlai hun aṭang daih tawh khan kan society-ah hian a bet tlat tih theih hialin kan chulnel thung. Fiamthu avangin kan khawtlang nun a nuam a, kan inkungkaihna a ṭha a, ṭanrualna leh hmasawnna min thlentu pawimawh tak pakhat a ni kan ti thei hial awm e.

Tunah pawh news-ah te kan hmu ang a, LPS Comedian search an ṭan leh tawh. A ram pumin kan nui leh hluah hluah ang a, ram pawna awm keiniho thlengin mi nuih hnu kha Youtube-a an upload hnuah kan lo en ve anga kan lo nui ve leh dawn a ni.

Han lut thuk ta zel ila, hetiang lamah hian thilpek kan dawngin kan intodelh hle mai, ram pawn leh khawvel hmun kil tina Zohnahthlak chenna tawh phawtah chuan an hming kan hriat lar, heng – Thangkura, Tuarpuii, Mizo Charlie Chaplin, Zephyr Mapuia, Taituka, etc. te ho bakah, tunlaia lar Roluaha leh Lalnunsanga tih angreng vel hi kan nei ṭhin a nih hi.

Chutih mek lai chuan a chunga kan Bible chang tarlan Efesi 5:4 chuan, “zahmawh te, thu lawilo sawi te, FIAMTHU te pawh, chung chu a mawi lo a ni; chung tih ai chuan lawm thu hrilh zawk rawh u.” a ti mauh mai!

Engvangin nge he Bible chang hian fiamthu chu ringtute tan sawi a phal loh mai le? Helai bung leh chang ka chhiar lai hian a chung lama kan sawi takte khi rilruah a rawn lut zut zut a, chhiar zawm lawk thei lovin ka ngaihtuahna a vak kual ruai a, ka chawlh lailawk deuh reng phah nghe nghe. 

Chutih rual chuan Bible hian fiamthu thawha nui duai duai turin ringtute hi min zirtir lutuk viau lo niin a lang thung. Vawi tam tak thianghlim tur te, Lalpa ṭih tur te, hmangaihna nei tur te, Lalpa fak tur te, etc.-a min tih laiin, fiamthu thawha nui hluah hluah tura min tihna a vang khawp mai. Thuhriltuin ‘ṭah hun a awm a, nuih hun a awm’, a tih zeuh hi a ni deuh mai angem? Tin, Lal Isua kha a chanchin kan hmuh phak chinah a nuih thu a lang tlat lo. Tak rem rawm, mahse nelawm leh thuhnuairawlh tak siin a awm ṭhin tih kan hmu.

Bible lehlin tharah chuan helai bung leh chang hi, “zahmawh, ṭawng mawi lo leh fiamthu tenawm” a lo ti kher a, kan zuk belh chian chuan a tum hi a lo ril fu mai niin a lang. Ka Bible-te bakah Zohnahthlak ṭawng dang Bible hmuh theih ang ang ka’n en mil ve ngial bawk a. Heta FIAMTHU a tih tawp mai hian, hemi kan fiamthu thawha kan nuih hluah hluah hi a zuk khap bur tihna a ni em tih lai taka hi zuk hriatfiah a chakawm hlein ka hria.

A hnampui ṭawng lamte phak ang anga han en ve ngial pawhin helai bung leh changin a sawi hi, ‘filthiness’ (bawlhhlawh/tenawm), ‘foolish talking’ tih leh ‘coarse jesting’ tih leh a dangte a ni hlawm a, ṭawng bawlhhlawh/zahmawh, thu atthlak leh ṭawngkam tuihnai lo lam chi hlir sawina vek a ni. Chutiang zahmawh/ṭawng bawlhhlawh leh thu lawilo pui pui, ṭawngkam bawraw tak tak lo chhuahna thinlung chu finna tlachham/mi â a nih loh vek pawhin, thinlung khâkna aṭanga rawn irhchhuak a ni tiin min hrilhfiah bawk.  Chung thu bawlhhlawh sawia, ngaihthlak reng chuan mihring hi kawng ṭhaah min hruai mawh khawp mai. Nun tladah leh pawisak nei lo, zelthelna a thlen a, sualah bawk a ni min hruai ṭhin ni. Kan sawi ṭhan leh kan hriat ṭhan, kan environment-in mihring nunzia min hruai thuizia pawh a hretu vek kan ni.

Thu atthlak sawitu chu hriatna tlachham leh mi â, thluak thâwl, finna nei lo tihna a ni a, a thu mawl tak pawh chu a thinlung mawlna aṭanga rawn chhuak ṭhin a ni. Chung chu Matthaia 5:13 a kan hmuh, chi da tawh ṭangkaina nei lo, paihchhuah a, kawnga mi rah mai mai tur ang lek nen dinhmun inang reng an ni.

A enga pawh chu ni se, chung thu lawi lo chuan midang zirtir ṭhat aiin ngaihtuahna sualah a hruai lut a, chu chuan thil ṭha lo tih duhnaah hruailutin mi an lo tlûk phah leh ṭhin. Efesi 4:29 ah midang siamṭha thei chauh kan kâ aṭanga chhuak turin min duh thu kan hmu a. Mite tlûkna thlentu chungpikzia te, titlutu nih ai chuan kan mit ngei pawh kher chhuaka kan kutte pawh tan hial mai tur kan nih zawkzia pawh Matthaia 18:7-9 ah kan hmu. 

Tin, kan kâa chhuak ngei hi kan sawifiah a la ngai dawn a, thiam loh min chantir theitu a la ni thei tiin warning kan dawng bawk. “Tin, ka hrilh a che u, miten thu lawilo an sawi apiang, chung thu chu rorel niah chuan an sawi fiah a la ṭul ang. I thu chuan thiam a chantir ang chia, i thu vek chuan thiam loh a chantir bawk dawn che a sin”, (Matthaia 12:36-37).

Rilru lam daktawr lar tak Dr. Hrekima thuziak pakhat ngaihtuahna tikal thui deuh mai chu hmeichhe pakhat chanchin a ziah kha a ni. A nun leh a thiltawn dik tak zuk hriatpui si lovin vantlangin a dinhmun chu fiamthu thawh nan an hmansak a, a pawnlangah chuan ani pawh a nui liam ve mai mai ṭhin. Mahse chu chuan a chhungrilah erawh chuan ‘nâ’ a thlen a, chu rilru nâ inkhawlkhawm zel chuan rilru daktawr pan ngai hial khawpin a nun a khawihchhia a ni. Ho mai maia kan ngaih kan fiamthu avang hian mi rilru chhungril kan hliam em?! Mite tisawttu ni lo fiamthu tlahawlh deuh deuha kan pawt mai mai hian midang a siamṭhat chu sawi loh, midang a tih nat chuan kan Pathian tan chuan a va tenawm dawn em!

Tin, ‘Fiamthu’ tia kan sawi tam tak lo chhuahna bulte hi han chhui chiang ila, tam tak chu mi er vangte, itsik ruk vangtein elsenna thu, fiamthu anga lantirin an chhak chhuak bawk ṭhin. Thinlung kha tak aṭanga rawn chhuak fiamthu chu, a hre lo tan nuihzatthlakin lang mah se a lo va tenawm dawn em! Chu ngei chu kan Pathianin a huat, tenawm a tih chu a ni.

Mi pian nalh lohna lai fiamthua laksak te, an têtna emaw, an cherna emaw, an hmelchhiatna leh an hanna te lo nuihsawh a, koh-elna atana hmante hi thil tenawm, Pathian huat zawng tak a ni thei ang. A thau lutuk avanga i nuihsawh kha a duh vang a ni bik kher lo thei a sin! A mitkalhna emaw an piansualna emawte ilo nuihzat avang khan dam hrehawm ti ngawih ngawih khawpin i awmtir thei, chu chu fiamthu bawlhhlawh leh tenawm tak a ni.

Amarawhchu, heng kan sawi avang hian fiamthu reng reng thawh loh tur tihna a ni lova, kan nui lo tur tihna a ni hek lo. Fiamthu tluangtlam, thinlung thianghlim tak aṭanga chhuak, mite tihlim thei, mite rilru hahna chhawk thei, kawng dika hruai thei a nih chuan kan Bible hian min khap kher lo niin a lang. I Lalte 18:21-40 thlaa zawlnei Elija’n Baala puithiamte a au-elna kha fiamthu chi khat, satire, sarcasm (deusawhna, tih-elna, ṭawng elna) an tih ang chi tho a ni a. Tin, Lal Isua’n, Matthaia 7:4-5 thu-ah, ‘mite mita hmawlh te tak te aiin i mit ata khanchhuk la chhuak hmasa rawh’, a tihte hi an hriatfiah awlsamnan, tehkhin thu, elsenna, fiamthu chi khat tho a hmang a ni an ti bawk.

Chuvang chuan, engpawh ni se la, fiamthu kan thawh dawn a nih pawhin fimkhur takin ngaihtuah hmasa ila, midangte/ringtute siamṭha thei, rah ṭha chhuah thei tur a nih loh vek leh fiamthu tluangtlam, tu natna mah thlen lo tur tal ni rawh se. Chutiang thawh tur kan hre ngang lo a nih chuan thawh loha, lawmthu hrilh mai zawk kha midang tan leh keimahni tan ngeia ṭha zawk tur a ni a. Kan Bible min zirtir dan leh kan Pathian duhzawng pawh ni ngeiin a lang.

- Nanaua Chawngthu