ISUA HMING

Uttam Nagar P.S.

Kumin kum tir lam khan Uttam Nagar Police Station-ah vai vuak tuar police-a report tur ka kalpui ṭumin, an complaint letter rawn ziahsa chu luh hmain ka’n ensak a. Ka rei leh!! A chung berah chiang tawk maiin, “Greetings in the name of Jesus Christ” tih ang chi, Kristian Kohhrante ṭawngkam mawi, Fellowship/Kohhran lehkha inthawnnaahte chibai inbuk nana hman ṭhin ṭawngkam kha police complaint-ah an lo hmang anih chu! Thil kalphung hi a va’n ni lo ṭhin tak em! Ziahṭhatna hman awm tawk bawk si lo. 

Thil hi a hun leh a hmun thliar hran thiam ve tur a sin le. Ka ziak thiam e ka ti lo va, ka hna pawh a ni lo va, mahse mi pangai tan chuan application chi hrang hrang- hna dilna, kohhran leh khawvel lam thil ziah dante chu a hrang a ni tih hriat ve awm tak! Ring lo mi, Hindu kulmuk ramah kan awm a, BJP lal lai lehnghal.. RSS ho thikthuchhiat tehreng nen. Chubakah India ram hi secular state an tih angin, hetiang hmunah sakhaw intihbingna ang rawng kai ṭawngkam hman kha thil fuh ber niin a lang mawlh lo. Chumai a la ni lo, ka lo hriat ve danin tun hma aṭang tawh henglai kan chhehvela min bialtu Police Station zingah Uttam Nagar leh Dabri hi an sual ber, Janak Puri leh Vikas Puri hi an fel, an polite ṭhin. Chutiang zawng zawng ka ngaihtuah chuan, kan lehkha avang chuan police hmaisa ka tawng ngei dawn a nih hi, buainaah kan inbarh lut dawn a nih hi tiin thinphu chu a inthum rawn tlut tlut a.

“Pawi lo lut tawp phawt ila, an thinrim leh ngaihdam dil chungin ziah ṭhat leh nghal a ni mai”, tiin ṭi dêkin duty-te dawhkanah ka va pharh. Duty kha hmeichhe pahnih leh mipa 1 an lo ṭhu a, hmeiche officer hnenah chuan thil awmzia hrilh pahin, “Madam, ziah ṭhat a ngaih chuan paper min lo pe la kan lo ziak ṭha mai ang”, ka’n ti zui zat a. Lehkha chu uluk zeta enin a chhiar ta vang vang mai le! Chhei raw le..thin chu a phu dup dup mai.., mahse a va mak em! Hmel nelawm fêin, “a date hi in ziah theihnghilh a nih hi, in lehkha ziah dan kalhmang hi a va dangdai reng reng ve..etc. etc., a date kha ziak ula a tawk mai, ziah ṭhat a ngai kher lo vang” a rawn ti ta mai! Midang pawh chuan an lo chhiar ve a, a chung tlara ka hlauhthawn ‘Isua hminga chibai bukna’ kha an chhiar hmasa ber zel a, ka hmuh dan chuan chu chuan an rilru a thlak danglamsak daih zel a ni. Thinlung thar an pu daih zel!

An nelawm ta em em mai a, nui sang chungin min chhawn a, thil thleng chungchangte min zawtfiah a, “lungngai suh u, Police kan awm alawm, an lo tihbuai leh che u chuan hei..” tiin case IO number te min pe nghal a nih chu! Nidangah hetiang case report te a har theih ṭhin nen aw! Chhawnchhaih leh hmusit tih hriat zet, ringhlel deuha biak nawmnahte kha kan tawng fo a, case pawh an file duh lawk ṭhin lo kha ania. Receiving te chu min tihsak zung zung a nih chu! Chumai a la ni lo, chutia kan awm lai chuan keimahni lam mi FRRO renew tur, police verification ti tur an lo kal a. Uttam Nagar P.S. an nelawm loh tih hre ve rengin ṭi dâkin an rawn lut de de a. Mahse chu’ngte thleng chuan kan Isua hming chuan a pui ta zel a. Vai police fel laklawh tawh laileng chuan an sawi tam pawh ngai lovin tihtur zawng zawng an tihfelsak nghal vek mai. “Vawiin chu a va mak ve, an va fel em em ve” tiin an hrilhhai letling hial zawk a. A chhan dik tak kha han hrilh ve hrep tak ka nap a, mahse han hrilhna hun a awm si lo, min rawn nuih sâk pahin an chhuak leh ta nghal a. 

Ka’n sawi duha chu police complaint leh thildangah pawh Isua hming chu ziah tel zel tawh tur a ni ka ti lul lo va, a hun leh a hmuna zira formal taka thil ziah dante hi hre hram hlawm ila ka duh (Bible-ah pawh Lalpa i Pathian hming i lam mai mai tur a ni lo a tih kha). Chutih rual chuan kan chhandamtu, min tlantu Isua Krista hming hian thil a lo va tithei tak em! PS khirh bera duty-te rilru min tihnemsak a, keimahni bakah kan mi leh sa rawn kalte tan pawh kawng a lo hawnsak ta zel a nih kha. Kan Lalpa Isua Krista hming chu fakin awm rawh se. 

He ka testimony hi ka ṭhiante hnenah hahipin ka sawi a, ka tlangaupui a ni ber e. Mak an ti ve hlawm khawp mai, Police complaint-ah chutiang han ziah re’ re’ pawh chu awm ang lo an ti ve hle a, an chek tlawk tlawk a, mahse Isua hmingin chutianga kawng min hawnsak takzia an hriat chuan ropui an ti ve hle mai. A tawngtu ka ni pawh chu ka inchhuang hle a ni. Thil tithei tak kan Lalpa Isua Krista hming chu fakin awm rawh se.

Hming hi nalh leh ropui tak takte kan pu hlawm a, a putuin a put zawh loh em emte a awm ṭhin. Ṭhenkhat vethung chu hming ho tak ni si, a putu ropui avanga he leia hming chungnung, khawvel awm chhunga dai leh tawh ngai lo turte pawh an awm nual bawk. Kan Lal Isua hian a hming hi a ropui leh chungnun ang ngeiin a pu zo va, hnehna leh nunna a keng tel nghal a ni. Hming zawng zawnga hming chungnung ber a ni si a (Philippi 2:9-10).

Vanram lehkhabu-ah Zikpuii Pa pu hming

Khawvela ka mi ngaihsan berte zinga mi Pu KC Lalvunga (India Ambassador), Zikpuii Pa tia a pen name-a indah ṭhin kha kan hriat vek ka ring. Ka ngaisang mai ni lo vin, a thu leh hla hian ka nunah thu a sawi ringin min hneh em em a, ka hmuh phak chin chin chu ka hmaih ngai lo va, a style hi ka copy nasa hle bawk.

A lehkhabu, a boral hnua Pu B. Lalthangliana ten a thuziak dahkhawmna bu an siam ‘Zikpuii Pa Hnuhma’ (A Collection of Zikpuii Pa Essays) tih lehkhabu kha kan hre deuh furin ka ring. Khami lehkhabua a thuziak pakhat, “Vanram lehkhabu-ah ka pu hming” tih a ziah kha kan chhiar ve tawh hlawm em aw? Tuna kan thupui khel mek nen hian a inhmeh em avangin ka’n zep tel ve zawk ange.

Zikpuii Pa pu chu an hunlaia khawkhat mi awmthei ve tawk tak, ‘rahsi babu’ ni pha ve ngat, ‘kei ka ni’ inti ve larh thei chin kha a ni awm a. A pianphungah pawh sa nghet ve tawk tak, mi huaisen, hlauh nei lo, mi ngawhngawl, zu leh sa duh ve tak, mi naranin an tihthinrim ngam loh ni bawk kha, British-in Zoram an awp hnua Kristianna luh tirh lai vela mi kha a ni a. Kristian do em em, Kristian-ho chu misual tia vel ṭhin ngei mai kha a ni. Vawikhat chu a lusun hlimah inriak a neih laiin ramhuaiin a inchhungah a rawn luhkhung ta tlat mai! Zan reiah khanchhukahte lawnin rapthlak tak takin a rawn chhiatkhum a, a hring a hrana inlarin a rawn tibuai ṭhin a ni. A inriak zawng zawng ten tlawm leh zah pawh dawn lovin an rauhsan zo ta! A nihna takah chuan mahni chauha riah chu a hreh ve tak zet a. Mahse mi tumlum a ni a, patlinga pumpa mahni in riahchhuahsan em chu tlawmpaekah lain a duh miah lo thung.

A tawpah an khaw pasalṭha huaisen ram riak lai chu ko hawin, an riahpuitir ta tawp mai le. Zanlaiah a rawn chet leh chuan a tirah an pasalṭhatna chhuangin ngam luih hram tum eng ang mah se, mihringte cho chi rual a nih si loh avangin mualpho taka baklenga tlanchhiat bak tihtheih an nei ta bik lo! Zikpuii Pa pu chu a mihring mihrinna chuan a mangang ta tak zet a, a ngaihtuahnain kil tin a hawl, chhantu a ngai, puitu a mamawh, tumah an awm si lo. Chutih lai tak chuan a huat em em, misualho “Kristiante” hla sak ṭhin pakhat, “Isua hming kan lamin ramhuai an tlanchhe ṭhin..” tih kha a hrechhuak ta thut mai. ‘Misualho’ tia a tihduhdah em em ṭhinte nunah chuan awh ruk a nei ta a, a ngam loh ngamtu an nei tlat a lawm. Tlawm thlak ti tak chungin a ngaihven ru ta a, khawiah nge Kristian-ho kha an awm?! Aizawla sap Missionary, Pu Zosaphluia hnenah a han kal ta tawp a, “ka pu Kristian-ah ka inpe ve duh” a han ti ta tawl mai a ni! Mission sap chuan a chanchin a lo hriat ve ṭhin avangin, “a theih loh, etc. etc.” a lo ti tlat mai si! 

Hlawhchhama a haw chuan zan lamah a ina rawn lenglut leh tur ramhuai khan a tiril a tikhur zawih zawih mai bawk si. Patlinga pumpa ṭah aw meuhin a chanchin leh tuna a dinhmun, zan lama a thil tawn ṭhinte lam chuan beidawng takin a hrilh fai ta leuh mai a. Mission sap chuan a mitah uluk taka enin alo ngaihthlaksak a, a ti tak zet a ni tih a hre ta. Tichuan, chu’ng hunlaia Mizo Kristiante hming an ziahna lehkhabu lianpui mai chu lain a keu ta a, Zikpuii pa pu hming chu a ziak lut ve ta a!!

Chu veleh, a thinlungah thlamuanna leh huaisenna, ramhuai ngamna chu chawp leh chilhin a nei ta, Isua neitu a ni tawh tlat alawm! Phur takin zan rawn thlen leh hun nghakhlel takin a thil neih thar Isua nen chuan a haw ta vang vang a, kalkawngahte chuan ‘Isua hming kan lamin ramhuaiin an tlanchhe thin..’ tihte chu a rilruin a sa phei a. Chumi zan aṭang chuan rawn tibuai ṭhintu ramhuai chu thehmeh angin a reh ta hmak mai a, ṭik ṭak pawh a rawn ti chhunzawm tawh lo reng reng. A reh hlen ta vang vang a, hlate khuaah a tlanchhe ta a ni. Kan Lalpa Isua Krista hming chu an lo hlau duai duai teh e. Zikpuii pa pu pawh chu Kristian ṭha tak a rawn ni zui ta a, miten ‘mi ang lo’ an tih phah hial khawpin thlasik zingkar khawvawt dai tla karah pawh khawlai fangin, in tinahte lut kualin ‘Isua hi lo ring ve rawh u’ tih ringawt sawiin thu a hril kual ṭhin a ni.

Isua hming kan lam hian Isua kan ko a ni ringawt lo va, hming hian a putu nihna a keng angin, Isua hmingah hian Isua nihna a tel a, a thiltihtheihna a keng tel bawk a ni. Isua hming kan lam hian a hminga thiltihtheihna chu kan ko a, Pathian lalzia leh ropuizia kan puang nghal bawk a lo ni.

Ka hming sak chhan

Kan hming sak chhan hi chi hrang hrang a ni hlawm ang a, a ṭhen chu hming phena thawnthu ngaihnawm tak awm an awm laiin, tunlaia kan hming sak dan tam zawk hi chu a satuin nalh a tih vanga a sak, sakchhan thawnthu bik lutuk awm lem lote a ni awm e. A bikin hmanlaia an hming sak chhante khan awmzia a nei deuh zawkin a lang a, lal hmingsak dal lo tih ṭawngkamte a awm hi. Kei ka hming pawh hi nalh ka ti lutuk lo va, a common lutuk lo bawk a, mahse thawnthu nei ṭha ber pawl a nih ka ring thung.

Ka hming satu hi ka pu (ka pa pa, ka pu pa), Darringvunga (Sena) a ni daih a, pasalṭha, mi huaisen leh inbuan chak, palian ruakhau pui mai, sawi ve hat tling pha a ni awm e. Hrisel leh damrei tak pawh a ni, a tuchhuan min hmu phain a dam tlat. Kei chuan thlalakah tih loh chuan ka hre pha ve chuang lo va. Pasalṭha hmingthang Vana Pa thisen aṭangin an la hla lutuk lo nghe nghe awm e. An hunlai chu a la hmanlai ve viau ang a, a chanchin leh pasalṭhatna, an thangchhuahna lam chu sawi ka tum lo va. Ka sawi duh zawka chu thlahtute aṭang tawha pasalṭha, mi huaisen, thei ve tawk inti ve tho an ni, Zikpuii pa pu kan sawi tak ang khan. Kristianna lo luh tirh pawh khan a do pawl, a hawtu a ni. A nupui, ka pa-te pi ngei pawh hi harhna hmasa lamah mihlim zinga mi a ni awm a, chu pawh chu Kristiante inkhawmnaa a kal turte hi a phalloa, kutte hial a thlak ṭhin niin an sawi. Mahse kan pi (ka pa-te pi) chuan Krista avangin a tuar lui a, mâk hial tawh inhuam chungin rawngbawlin a penchhuak lui ṭhin. Chuvang chuan ka pute unau zinga pakhat (ka pa patea) hmingah pawh ‘Sualthimtawnluia’ tiin an sa hial a ni.

Vawikhat chu ka pa tleirawl chhuahtirh hian, ‘Thitchhoh’ (Burma), kawl khuaah school a kal laiin an ramvahnaah ramngaw-a (tun hma, kan pute hunlai chuan Tahan khawpui chhehvel ngei pawh hi sai ramngaw pik tak a ni an ti ṭhin) an riahna kha huai awmna, hmun hrang lutuk a lo ni kher kher a, zanah thawm neiin an rawn tihṭhaih a, mihring mihrinnaa intihhuaisen luih theih pawh a ni ta lo. An zinga pakhat chuan tlawm mai chu hrehin, a ngam chuan rawn inlara inbei turin a cho ta chher chher mai! Mahse chupa chu sam tlakawlh rawt khawpin a na ta mai a ni. Tichuan loh theih lohvin an tlawm a, an tlanchhiatsan chu a ni ta ber a. A hnuah a pianthar hnuin vawikhat chu ka pa chuan a rilrua thi thei lo, tlawmthlak taka an tlanchhiatsan, khalai hmunah khan a Bible nen, a neih thar Lal Isua nen a va kal leh ta ngat a, ṭawngṭainate hmangin chu’ng huaiho chu a um chhuak ta zawk a ni! Mihring pasalṭhatna ringawtin a ngam loh chu Isua hmingin a ngama hnehtu a ni ta! 

He ka pa thil tawn hi ka pu-in a lo hriat chuan a lawmpui hle a, tunhma hun kal tawha amahin a lo tawn tawh thil tam tak a hrechhuak nghe nghe awm e. Mihring huaisenna leh pasalṭhatnate pawhin a ngam loh ramhuaite hneha ngamtu, Isua Krista ropuizia hretu leh a hnungzui tura Kristiana inpe ve tawh ‘ka pu’ a ni si a. Tichuan, ka pa-in nupui a’n neih a, a fa hmasa ber, a fa hming koh chu ka pu (ka pa pu) chuan hming a saksak ta a, “ka Lal chhar hi a lo a lo lian em a, ramhuaiho pawh ngama hnehtu a nih hi” tiin, ‘Lalchharliana’ tih chu a tupa (a tuchhuan) hming atan a lo sa ta a ni an ti.

Rinnaa Isua hming kan lam hian Amah ngei chu a awm nghal a, hna a thawk nghal ṭhin a ni. Chutiang khawpa ropui Isua neitute kan ni hi kan vannei mange! A hmingin thil a tihtheihziate hi kan lo hre phak lo zawk ṭhin a, kan lo hmang ṭangkai pha lo zawk ṭhin a lo ni. Amaherawhchu, thiltihtheihna atan Isua hming hmang tur chuan a hmingah rinna kan neih a pawimawh hle (Tirhkohte 3:16). Thiltihtheihna chu a hming lam vang ringawtin a lo kal a ni lo va, Isua hnathawh rinna avang leh Pathian thu zawmna aṭanga a hming kan lam erawh chuan thiltihtheihna chu a lo awm ṭhin.

Ṭawngṭainaah Isua hmingin kan dil tur a ni

Kol 3:17 “Tin, in tih apiang chu thusawiah emaw, thil tihah emaw ama zarah Pa Pathian hnena lawmthu hril chungin Lalpa Isua hmingin ti vek rawh u.”

“Nangnin ka hmingin eng pawh mi dil chuan, chu chu ka ti zel ang.” (Johana 14:14).

Kan ṭawngṭainaahte hian kan fimkhur a ṭha hle mai. Bible ngeiin chiang takin min hrilh a ni si a. Mi tam tak chuan kan ṭawngṭai tawp kharnaah Isua hming kan lam theihnghilh (palh) fo ṭhin.

Kristian Hla Bu hnunglama ringtute ṭawngṭai dan tur kaihhruainaah pawh khan kan en chuan, Lal Isua hminga dil vek a ni. Kan hman dan tur erawh chu kohhran hrang leh tih dan hrang hrang nei kan nih angin a inang lo thei hle ang a. Entir nan- “Kan Lalpa Isua Krista hmingin” emaw, “Chhandamtu Isua hmingin” emaw, “I fapa Isua Krista Hmingin” emaw, “Nazareth Isua hmingin” kan ti emaw, “Isu i hmingin” emaw pawh lo ti ila, a pawimawh ber chu ‘Isua hming’ tel ngei kha a ni pawimawh ta chu ni. 

Kan hriat loh vang te, kan lo theihnghilh vang te, kan hamhaih vangtea kan ṭawngṭai tihtawpnaah Lal Isua hminga kan lo dil theihnghilh palh/kan chham theihnghilh palhte hi theihnghilh loh hram i tum tawh ang u. Eng anga chham duah nalh pawh ni ila, a tawpah Isua hminga dil kan theihnghilh leh tlat si chuan kan dilna chu awmze nei lo, chhan tlak loh a ni hial awm e. A hnampui ṭawng tak phei chuan kan dilna kha a ‘valid’ lo zo ta vek ṭhin dawn a lo ni.

Rinnaa a hming kan lam chuan Isua a lo cheng ve nghal a, thil min tihsak a, kan mamawh min pe ṭhin. Tichuan, Pathian chu Isua hming kaltlangin a famkimin a inpuang chhuak ṭhin a lo ni. Chhiartu zawng zawng Lalpa’n malsawm rawh se, kan Lalpa Isua Krista hmingin, Amen.

- Nanaua Chawngthu