INBUATSAIHNA

Ṭhalai ṭawngṭai tlaivar zan khan kan fellowship sum kawltu thusawi tawi, ziak leh chhiar leh inbuatsaihna ṭha tih thupui hmang a, a thusawi kha ka rilruah a awm reng a, khatiang lam hawi inzirtirna leh sawi hi keini lamah hian nei ve tho mah ila kan nei zen zen ngai mang si lo tiin tlem a zawng han thailang ve hrim hrim ṭha in ka hria a, mi sawina engah leh ziak a awm te bih zauin tlem i han sawi ho dawn teh ang.

Mizote hi Kristian zingah chuan inkhawm uar ber pawl tak kan niin a rinawm. Heng Delhi tlangah pawh Kohhran leh Fellowship ṭhenkhatah phei chuan chawlhkar khatah hian vawi 4/5 lai inkhawmna nei thei te pawh an awm. Inkhawmnaa tih dan mumal lo leh thil a nih tur ang ni tawk lo hian rilru a ti hahin, inkhawm boruak a tichhe thei tih tuman kan hai awm lo ve. Tirhkoh Paula’n Korinth khuaa Kohhran hote tih dan mumal a zirtir kha tihawm reng pawh a lo ni. (I Kor. 14:26-35).

Vawiina Kohhran hruaitu, ṭhalai leh nuho hruaitute hian kar lovah ṭuan ṭulna avangte leh chhan dang avangte pawhin min liam san hun an la nei anga, rawngbawltu ni tura inring pha ngai lo leh inngai ngai lote kovah pawh rawngbawlna hna hi a innghah hun a la thleng ngei ang. Kan ṭhalai rual leh naupang lam aṭanga rawn ṭhang thar chho zelte tan pawha puitu pakhat a lo nih theih nan tlem a zawng han tarlang ila –

1. Inkhawm Hruaitu Tan:

1. Inkhawm hruaitu chuan inbuatsaihna ṭha inlamah a neih a pawimawh a, inrin tawkna thlengin inbuatsaihna ṭha neih hian min siam a ni. Inbuatsaihna pawh nei mang lova, hla thlan tur pawh zai hruaitute kutah awm mai se ti tawk kan la awm fo hi inkhawm kan tui tawk lohna pakhat a tling a ni. Tin, kan Pathian thu chhiar tur chenin inpuahchahna neih loh chuan a lamrik dan dik lo leh bahlah deuhin chhiar mai a awl bik a, hetiang thil ho tham te anga lang si hi midang tan inkhawm nuam lo tih rawihna a tling tih hriain inbuatsaihna ṭha tak neih hian kawro a su khawp mai.

2. Inkhawm kaihruaitu chu midang aiin kal hmasak zel theih nise a ṭha. A tello chuan mipui an hawihai a, boruak a heng bik bawk.

3. Pathian thu chhiarah uluk a ngai hle a, dik tak, rang lutuk si lo, muang fan lutuk si lova chhiar tum hram ila. Pathian be tura sawmnaah phei chuan “Pathian chibai i buk ang u” tia mipui lam hawi chhuak thei tur khawpa kan chhiar tur hi hriat hneh theih nise a mawi bik a, mipui pawh a hneh bik ṭhin.

4. Thunawi ngah lutuk leh midang thusawi tlip zen chinte hi mipui tan a ninawm thei tih hriat reng tur.

5. Ṭawngkam thiam leh thiam loh chu thuhranah dah ta ila. Chairman chuan ṭawngkam hman dan a ulukin, a fimkhur a pawimawh hle. Hriat thiam theih si, a awmzia leh kalhman dik si lova kan lam chang a tam thei awm e. ‘Bible chang i lo chhiar ang u’ tih aiah ‘Pathian thu thianghlim i lo ngaithla ang u’ tih te ‘Chanchin Ṭha Luka’ tih ringawt aiah ‘Chanchin Ṭha Luka ziak’ tih te, ‘Korinth thawnkhatna’ tih tawp aiah ‘Korinth khuaa mite hnena Tirhkoh Paula Lehkhathawn Pakhatna’ tih hman te hi a mawi zawk a, ‘Thuhriltu koh nan hla i lo sa ang u’ tih aiah ‘Pathian chhawimawi nan hla kan sa ang a, kan sak tawpah kan Thuhriltu tur pawh lo ding chhuak nghal se la’ tih ang chi te hi hman zawk ṭhin ni se la, tin, ‘Ban hla atan emaw kan inkhawm ṭan nan hla ilo sa ila’ tih ai chuan ‘Kan hla hnuhnung atan emaw Pathian kan fak leh chawimawi nan hla ilo sa ila’ tih te pawh hi a ngaithlatu tan pawh ngaihthlak a hahdam zawk tih hriatreng i tum ang u.

6. Thu puang tura Secretary sawm hian, “Tunah puan tur ṭul awm apiangte puang turin kan Secretary ilo sawm ang u,” tih duah aiin “Kohhran thupuan ilo ngaithla ang u,” tih mai hi a fiahin hun a heh lo zawkin a lang.

7. Inkhawm ‘thawhlawm’ hi ṭhenkhat chuan ‘thilpek’ tizawngin kan sawi ta mah mah niin a lang. A dik tho rualin ‘thawhlawm’ tih hi Kohhranin ṭawngkama kan lo hman ṭhan zawk niin kan Pastor senior ṭhenkhat chuan an sawi thung.

8. Inkhawm hruaitu ṭhenkhatin ‘Solo turin ilo sawm ang’ emaw ‘Kohhran Zaipawl Pathian fak hla hlan turin i lo sawm ang u’ an ti ṭhin a. Hei ai hian ‘Pathian fak hla sa turin i lo sawm ang/ang u’ tih hi a dik zawk niin a lang bawk.

9. Thil ṭul tak anga lang ve deuh si mahse a zawng a za a tih atana ninawm leh mawi lo chang ṭhin chu, hun neitu hrang hrang ṭantu, thawhlawm khawntu leh hlantu, Pathian fak hla satu leh adt. pawh an hun an hman zawh apianga Chair aṭanga duhsakna leh malsawmna lo hlan vek leh comment lo pek ve vek zel hi chin loh atan a ṭha khawp mai.

10. Keini Biakin chu Pulpit/Lectern awmna leh mipui ṭhutna a in hlat lutuk lo bawk a, inkhawmnaa thiltih nei, inkhawm ṭantu, thupuangtu, testimony sawi, Zaipawl/mal zai leh adt. khan an tih tur an tih zawhah an ṭhutna an thlen thleng chu Chairman tan lo nghah rih a mawiin a zahawm hle bawk.

11. Inkhawm hruaituin hla a thlanin, a thlan chhan a sawi tel chu a sual lo, mahse a hla chang zawng zawng chhiar chhuah vek hi a ṭul lem lo a, hun a heh bawk. Amaherawhchu hla hruaitu ten inpuahchahna, a key an zawn chhung hun siamsak nan a hla chang duh lai han chhiar chhuah chu remchang tak a ni ve thung.

12. Hla thlan chungchangah pawh a hla bu (eng hla bu ber nge) chiang taka sawi a, hla namber mai bakah a hla tlar khatna tal sawi tel ziah hi chin atan a ṭha a bakah hei hian hriat pawlh palh lakah min veng. Tin, lo hriat loh palh a awm theih avangin kan hla thlan nambar sawi nawn fo pawh hi a ṭha khawp mai.

13. Inkhawm hruaitu thatchhe taka ṭhu ṭhinte hi hmuh an hahthlak a. Chuvangin, inkhawm chhung chauh tal chu taimak chhuah hram hram a ṭha. Inthlahdahna hian mut pawh a tichhuak duh bik ṭhin. Inkhawm hruaitu ber a mutthluk lup lup chuan inkhawm boruak a tichhe vek thei tih hriat tel bawk a ṭha khawp mai.

14. Inkhhawm hruai dan pawh hi a ngai ngawr ngawr chu mipui tan leh a bik takin a thil ngai ngawr ngawr ning vat ṭhin ṭhalaite tan hian a ninawm ve thei a, tih dan han thlak ve zauhh zauhte pawh hi thil ṭha tak a ni.

15. Kohhranin hunpui deuhva kan neih heng Good Friday, Easter Sunday, Chrismas leh adt. ah te hian Chair aṭanga Kohhhran mipui chibai han bukte leh duhsakna han hlante hi a mawi hle a, boruak pawh a siam bik a ni.

16. Inkhawm hruaitu ṭhenkhat, lu thak lo pui hiah ching deuhte leh khawih ṭul lem lo khawih chingte pawh awm theih tak a ni a. Mahni tih dan ṭha tawk lo lai leh mawi lo laite mite hnen aṭanga insiamṭhat ngam hi thil pawimawh tak a ni.

17. Thuhriltu apiang Chairman-ina hun tawp pek hi a remchang lo fo. Thu inhriattir leh ṭuldangte pawh thil awm thei a ni. Tin, inkhawm hla hnuhnung hi thuhriltu hlan kan duh a nih chuan inkhawm hma in emaw zawh lawk phawt hi thil chin ṭhan atana pawi lo a ni.

18. Pulpit hi phuba lakna atan leh thinrim hrikthlak nana hman tur a ni lo tih hi vawn reng a pawimawh hle. A bik takin hminghmerh a inkhawm thusawi leh hruaina aṭangte a inkhak leh inzilh fo hi a sawng-saw-hlawtna ai chuan in tih vui vaina a tam zawk tih hriat fo a ṭha.

19. Mipui hma aṭanga mei nei taka thusawi a inzilh ai chuan a ruk te a inzilh leh inhrilh hriat hian kan tum a fuh ṭha zawk tih hi theihnghilh miah lo tur.

2. Ṭantu tan:

1. Awlsam taka chhuah a nih theih nan tlar hmawr lamah emaw a hmalam deuhah ṭhut ṭhin a ṭha a, hun a hek lovin inkhawm a tizahawm.

2. Ṭan tura kal leh let lamah hmanhmawh lutuk lova kal tur a ni.

3. Mipui hmaa buai hrep loh nan Bible chang chhiar tur ṭha taka chhinchhiah a, fel taka ṭanna hman tum a ṭha.

4. Thuhmahruai sawi ṭeuhte leh Sermon pate thlak vak maite hi a chang chuan chakawm tak a ni ṭhin. Mahse hetiang hi pumpelh tum hram zel a ṭha khawp mai.

5. Ṭantu ni hauh loh thildang kan zep tel daih teh ang. Kan thawhlawm lakhawmtute hriat tur atan. Thawhlawm lakhawmtu kan nih a, mipui ding/ṭhu chunga zai laia khawn tur a Chair in min ti a nih chuan hla hruaitu in hla an lak hnu, hla tlar khat tal an sak hnuah chiah kan thawhlawmte lakhawm tura chhuah hian inkhawm a ti zahawm bik ṭhin. Mipui zai ṭan hma hma aṭanga kan lo khawn nghal deuh mawp mawp mai chuan alang mawi lo hma bik em em tih hriat tel a ṭha khawp mai.

3. Ṭawng fimkhur:

Biak in leh Kohhran huangah hi chuan ṭawngkam pangngai leh zahawm hman hram a ṭha. Hei hi Kohhran zahawmna leh Mizo ṭawng dik humhim nan a ṭul a ni. Ṭhalaiho ṭawng lerh (slang) entir nan – bon top, chhass, confi, contri, cial, dap, regu, star leh adt. te hi khawlaiah hman nuamin awlsam hle mahse Biak in chhungah leh Kohhran huangah chuan i hmang lo hram ang u.

Heng ka han thailangte hi ṭhenkhat tan chuan hriat hnu vek ni tho mahse kan ṭhang leh thar, kan hruaitu thar tur te in hlawkpuina an lo neih ngei beisei chungin ka han tarlang a ni a, a ṭhen hi chu kan hun leh hmun in a zir tawk loh vang te a practice theih loh nei tho mah ila a tam zawk hi chu kan hriat loh vang a ni thei ṭhin a, tunah chuan kan hre ta a, a hlawhtlinna leh kan inkhawm zahawmna chu kan kutah a awm ta e.

Lehkhabu rawn:

1. Hruaitute ṭhian – Rev. K. Lalpiangthara

- JLh Ralte