RAWNGBAWL TURA CHHANDAM

Bible : Marka 16:15; Luka 6:38, Malakia 3:10-11

Tunlai ringtute hian chhandam kan nih chhan kan hre chiang lo fo niin a lang. Chhandamtu rilru leh tum kan man fuh lo fo ṭhin a, a pawi hle a ni. Siamtu Pathianin khawvel leh a chhunga thil awm zawng zawng a siam khan chhan neiin engkim a siam a. Awmze nei lo leh chhan awm lovin engmah a siam lo tih hi kan hriat nawn fo a ṭha awm e. Ringtute hi Isua Krista thisena lei kan ni a, hna pawimawh bik thawk tura a tlanchhuah leh a kohchhuahte kan ni. Pathianin Adama a siam khan mawhphurhna lian tak mai a kovah a nghat nghal a, training hranpa a pek pawh kan hre lo. Pathian thilsiamte enkawla veng him tura mawhphurhna pek a ni a, mahse a mawhphurhna chu a hlen zo lo tih Bible-ah chiang takin kan hmu. Adama ang hi tunlai ringtu zingah kan tam ta hle mai.

Chanchin ṭha hril rawh u

Ringtute rawngbawlna leh tih tur pawimawh tam tak zinga langsar zual ber chu Chanchin Ṭha hril hi a ni thei awm e. Isua khan a ngai pawimawh hlein a lang. A zirtirte hnena a thupek hnuhnung ber leh tawp ber a ni tlat mai. Chu thupek chu ringtu dik tak chuan a ngai pawimawhin a tihhlawhtlinna kawngah theihtawp a chhuah ngei tur a ni. Ka hre ve lo emaw, tute emaw tih tur bika dah mai chi a ni lo. Amaherawhchu, mahni chauh emaw chhungkua chauha tihhlawhtlin mai chi erawh a ni lo tih kan chian a ṭul. Chuti a nih si chuan engtin nge ni ta ang le? Kan fellowship zingah tunge kal chhuaka Chanchin Ṭha hril thei awm le? Mahni chenpui leh ṭhenawmte hnenah pawh hril thei lo kan ni ṭhum mai. Mahni chauha tih theih loh hi thawhhona ṭha nen chuan a tihtheih ṭhin a, hlawhtlinna kawng pawh a zau zawk fo a ni. Pathian hian rem a ruat famkim thiam hle a, kan phaktawk leh tlin tawka a te ber aṭanga a lian ber thlenga a rawng kan bawl theihna tur hian kawng zau tak min hawnsak ruah a ni.

Thilpeka rawngbawl

Lal Isua khawvela a lenlai khan thilpek chungchang tihian a sawi a, “Pe rawh u, tichuan pekin in awm ang” tiin. Tin, zawlnei chuan sawma pakhat chungchangah Pathian mite a dem thu a sawi bawk a, dik taka pe tur leh pekna tur dik taka pe turin min zirtir bawk a ni. Tin, “englo lak aiin pekin lukhawng a nei zawk” tih ziak a ni bawk. A nih chuan mitin rawngbawlna kawnga kan tel vek theih nan Pathianin kawng awlsam tak min lo siamsak a ni tihna a nih chu. Pek nachang hre lo leh pe duh lote hi Pathianin a lawm vak lo tih zawlnei thuchhuak aṭang hian kan hre thei a. Tin, a nachang hriate pawhin Pathianin pe tura min duh dan kan hriat fiah a ṭul hle mai. Pathian chu a tlem leh tamah a buai ve lo a, a tehfung pawh mihring tehfung nen a inng nahek lo. Pathian Biak Ina thilpek keng khawm mi tam tak zingah khan hmeithai dere pahnih thawh kha Isuan pe tam berah a puang tlat mai. Pek tlem leh pek tam lamah ni lovin, pekna thinglung zawk hi Pathianin a en chu a ni. Pek tur kan nei tam lo pawh a ni thei, tin, pek fo tur kan nei lo pawh a ni thei. Amaherawhchu, kan neih ang tawk kan pek hi Pathianin a phut chu a ni. “Ka inah ei tur a awm theih nan Sawma Pakhat chu a bawmah rawn dah rawh u” a ti.

Kan Pathian hi a pachhe ta deuh a, eitur a tlachham ta em ni? 

Paula chuan ringtu Pathianin a kohchhuahte chu kan ṭhatna turin engkim min ruatsak thu Rome ziakah min hrilh a. Pathianin thilpek a mite hnena a phut tlat chhan chu a pachhiat vang ni lovin, malsawmna chhiarseloh khawp kan dawn theihna tur a ni zawk. Amah ngeiin van tukverhte hawnga malsawmna chhiarsen loh pek let a intiam a ni. Tin, “Isuan pe rawh u”, a tih khan a tawp mai lo va, “tichuan pekin in awm ang” a ti a nih kha. Nem muka liam zawih zawihin a la ti ta deuh deuh leh nghal. Pek chuan lukhawng a nei ṭha dawn hle tih chiang takin kan hre thei awm e. Chuvangin Pathian hian malsawmna chhiarsen loh khawpa tam mi pek a duh a, chu malsawmna lo luanluh nan chuan tukverh kan lo hawn a ngai thung a ni. Pe tura thupek a siam rual hian malsawmna thutiam pawh a telh nghal a ni. Hei hi kan hmufiah lovang tih a hlawhawm hle mai. Kan sumdawnna leh eibar zawnna kawngah leh kan thil tihna kawng hrang hrangah tluang lo riaua inhriatna kan nei em? A nih loh leh tute emaw tluang bik riaua hriatte kan nei em le? Chhan leh vang a awm ngei ang. Chhungkua kan damtlangin kan hlim tlang em?  Chik takin i ngaihtuah ṭhin ang u. Min kotu Pathian hi a rinawma, thutiam hlen lo ngai lo a ni tih hi i hre nawn leh ṭheuh teh ang u. Chuvangin, keini pawh kan mawhphurhna leh chanvote hlen chhuak tur hian theihtawp chhuah ila, kan theih ang tawk leh phak tawk ṭheuhin Lalpa rawng i bawl zel ang u. Hla siamtu chuan, “kal chhuak thei lote pawhin mawhphurhna lian tak kan nei, thilpeka rawngbawl turin Lalpan min ko”, a tih kha. Chanchin Ṭha hril tura feh chhuah chu kan tan a rem lo pawh a ni thei e, mahse thilpek hmangin hre lo hnenah Chanchin Ṭha hril hna kan thawk thei reng a ni. Pathian tehnaah chuan tlem lua a awm lova, kan pek duhna thinlung lam a en zawk ṭhin. Van tukverhte hawnga, liam zawih zawiha malsawmna min pek duh em emtu hi kawng i hawnsak ang u hmiang. Tichuan kan Fellowship boruak, kan chhungkaw boruak leh kan mimal nun kawng thlengin hma a sawn zel dawn a ni.

- James Fanai

ISUA HMING

Uttam Nagar P.S.

Kumin kum tir lam khan Uttam Nagar Police Station-ah vai vuak tuar police-a report tur ka kalpui ṭumin, an complaint letter rawn ziahsa chu luh hmain ka’n ensak a. Ka rei leh!! A chung berah chiang tawk maiin, “Greetings in the name of Jesus Christ” tih ang chi, Kristian Kohhrante ṭawngkam mawi, Fellowship/Kohhran lehkha inthawnnaahte chibai inbuk nana hman ṭhin ṭawngkam kha police complaint-ah an lo hmang anih chu! Thil kalphung hi a va’n ni lo ṭhin tak em! Ziahṭhatna hman awm tawk bawk si lo. 

Thil hi a hun leh a hmun thliar hran thiam ve tur a sin le. Ka ziak thiam e ka ti lo va, ka hna pawh a ni lo va, mahse mi pangai tan chuan application chi hrang hrang- hna dilna, kohhran leh khawvel lam thil ziah dante chu a hrang a ni tih hriat ve awm tak! Ring lo mi, Hindu kulmuk ramah kan awm a, BJP lal lai lehnghal.. RSS ho thikthuchhiat tehreng nen. Chubakah India ram hi secular state an tih angin, hetiang hmunah sakhaw intihbingna ang rawng kai ṭawngkam hman kha thil fuh ber niin a lang mawlh lo. Chumai a la ni lo, ka lo hriat ve danin tun hma aṭang tawh henglai kan chhehvela min bialtu Police Station zingah Uttam Nagar leh Dabri hi an sual ber, Janak Puri leh Vikas Puri hi an fel, an polite ṭhin. Chutiang zawng zawng ka ngaihtuah chuan, kan lehkha avang chuan police hmaisa ka tawng ngei dawn a nih hi, buainaah kan inbarh lut dawn a nih hi tiin thinphu chu a inthum rawn tlut tlut a.

“Pawi lo lut tawp phawt ila, an thinrim leh ngaihdam dil chungin ziah ṭhat leh nghal a ni mai”, tiin ṭi dêkin duty-te dawhkanah ka va pharh. Duty kha hmeichhe pahnih leh mipa 1 an lo ṭhu a, hmeiche officer hnenah chuan thil awmzia hrilh pahin, “Madam, ziah ṭhat a ngaih chuan paper min lo pe la kan lo ziak ṭha mai ang”, ka’n ti zui zat a. Lehkha chu uluk zeta enin a chhiar ta vang vang mai le! Chhei raw le..thin chu a phu dup dup mai.., mahse a va mak em! Hmel nelawm fêin, “a date hi in ziah theihnghilh a nih hi, in lehkha ziah dan kalhmang hi a va dangdai reng reng ve..etc. etc., a date kha ziak ula a tawk mai, ziah ṭhat a ngai kher lo vang” a rawn ti ta mai! Midang pawh chuan an lo chhiar ve a, a chung tlara ka hlauhthawn ‘Isua hminga chibai bukna’ kha an chhiar hmasa ber zel a, ka hmuh dan chuan chu chuan an rilru a thlak danglamsak daih zel a ni. Thinlung thar an pu daih zel!

An nelawm ta em em mai a, nui sang chungin min chhawn a, thil thleng chungchangte min zawtfiah a, “lungngai suh u, Police kan awm alawm, an lo tihbuai leh che u chuan hei..” tiin case IO number te min pe nghal a nih chu! Nidangah hetiang case report te a har theih ṭhin nen aw! Chhawnchhaih leh hmusit tih hriat zet, ringhlel deuha biak nawmnahte kha kan tawng fo a, case pawh an file duh lawk ṭhin lo kha ania. Receiving te chu min tihsak zung zung a nih chu! Chumai a la ni lo, chutia kan awm lai chuan keimahni lam mi FRRO renew tur, police verification ti tur an lo kal a. Uttam Nagar P.S. an nelawm loh tih hre ve rengin ṭi dâkin an rawn lut de de a. Mahse chu’ngte thleng chuan kan Isua hming chuan a pui ta zel a. Vai police fel laklawh tawh laileng chuan an sawi tam pawh ngai lovin tihtur zawng zawng an tihfelsak nghal vek mai. “Vawiin chu a va mak ve, an va fel em em ve” tiin an hrilhhai letling hial zawk a. A chhan dik tak kha han hrilh ve hrep tak ka nap a, mahse han hrilhna hun a awm si lo, min rawn nuih sâk pahin an chhuak leh ta nghal a. 

Ka’n sawi duha chu police complaint leh thildangah pawh Isua hming chu ziah tel zel tawh tur a ni ka ti lul lo va, a hun leh a hmuna zira formal taka thil ziah dante hi hre hram hlawm ila ka duh (Bible-ah pawh Lalpa i Pathian hming i lam mai mai tur a ni lo a tih kha). Chutih rual chuan kan chhandamtu, min tlantu Isua Krista hming hian thil a lo va tithei tak em! PS khirh bera duty-te rilru min tihnemsak a, keimahni bakah kan mi leh sa rawn kalte tan pawh kawng a lo hawnsak ta zel a nih kha. Kan Lalpa Isua Krista hming chu fakin awm rawh se. 

He ka testimony hi ka ṭhiante hnenah hahipin ka sawi a, ka tlangaupui a ni ber e. Mak an ti ve hlawm khawp mai, Police complaint-ah chutiang han ziah re’ re’ pawh chu awm ang lo an ti ve hle a, an chek tlawk tlawk a, mahse Isua hmingin chutianga kawng min hawnsak takzia an hriat chuan ropui an ti ve hle mai. A tawngtu ka ni pawh chu ka inchhuang hle a ni. Thil tithei tak kan Lalpa Isua Krista hming chu fakin awm rawh se.

Hming hi nalh leh ropui tak takte kan pu hlawm a, a putuin a put zawh loh em emte a awm ṭhin. Ṭhenkhat vethung chu hming ho tak ni si, a putu ropui avanga he leia hming chungnung, khawvel awm chhunga dai leh tawh ngai lo turte pawh an awm nual bawk. Kan Lal Isua hian a hming hi a ropui leh chungnun ang ngeiin a pu zo va, hnehna leh nunna a keng tel nghal a ni. Hming zawng zawnga hming chungnung ber a ni si a (Philippi 2:9-10).

Vanram lehkhabu-ah Zikpuii Pa pu hming

Khawvela ka mi ngaihsan berte zinga mi Pu KC Lalvunga (India Ambassador), Zikpuii Pa tia a pen name-a indah ṭhin kha kan hriat vek ka ring. Ka ngaisang mai ni lo vin, a thu leh hla hian ka nunah thu a sawi ringin min hneh em em a, ka hmuh phak chin chin chu ka hmaih ngai lo va, a style hi ka copy nasa hle bawk.

A lehkhabu, a boral hnua Pu B. Lalthangliana ten a thuziak dahkhawmna bu an siam ‘Zikpuii Pa Hnuhma’ (A Collection of Zikpuii Pa Essays) tih lehkhabu kha kan hre deuh furin ka ring. Khami lehkhabua a thuziak pakhat, “Vanram lehkhabu-ah ka pu hming” tih a ziah kha kan chhiar ve tawh hlawm em aw? Tuna kan thupui khel mek nen hian a inhmeh em avangin ka’n zep tel ve zawk ange.

Zikpuii Pa pu chu an hunlaia khawkhat mi awmthei ve tawk tak, ‘rahsi babu’ ni pha ve ngat, ‘kei ka ni’ inti ve larh thei chin kha a ni awm a. A pianphungah pawh sa nghet ve tawk tak, mi huaisen, hlauh nei lo, mi ngawhngawl, zu leh sa duh ve tak, mi naranin an tihthinrim ngam loh ni bawk kha, British-in Zoram an awp hnua Kristianna luh tirh lai vela mi kha a ni a. Kristian do em em, Kristian-ho chu misual tia vel ṭhin ngei mai kha a ni. Vawikhat chu a lusun hlimah inriak a neih laiin ramhuaiin a inchhungah a rawn luhkhung ta tlat mai! Zan reiah khanchhukahte lawnin rapthlak tak takin a rawn chhiatkhum a, a hring a hrana inlarin a rawn tibuai ṭhin a ni. A inriak zawng zawng ten tlawm leh zah pawh dawn lovin an rauhsan zo ta! A nihna takah chuan mahni chauha riah chu a hreh ve tak zet a. Mahse mi tumlum a ni a, patlinga pumpa mahni in riahchhuahsan em chu tlawmpaekah lain a duh miah lo thung.

A tawpah an khaw pasalṭha huaisen ram riak lai chu ko hawin, an riahpuitir ta tawp mai le. Zanlaiah a rawn chet leh chuan a tirah an pasalṭhatna chhuangin ngam luih hram tum eng ang mah se, mihringte cho chi rual a nih si loh avangin mualpho taka baklenga tlanchhiat bak tihtheih an nei ta bik lo! Zikpuii Pa pu chu a mihring mihrinna chuan a mangang ta tak zet a, a ngaihtuahnain kil tin a hawl, chhantu a ngai, puitu a mamawh, tumah an awm si lo. Chutih lai tak chuan a huat em em, misualho “Kristiante” hla sak ṭhin pakhat, “Isua hming kan lamin ramhuai an tlanchhe ṭhin..” tih kha a hrechhuak ta thut mai. ‘Misualho’ tia a tihduhdah em em ṭhinte nunah chuan awh ruk a nei ta a, a ngam loh ngamtu an nei tlat a lawm. Tlawm thlak ti tak chungin a ngaihven ru ta a, khawiah nge Kristian-ho kha an awm?! Aizawla sap Missionary, Pu Zosaphluia hnenah a han kal ta tawp a, “ka pu Kristian-ah ka inpe ve duh” a han ti ta tawl mai a ni! Mission sap chuan a chanchin a lo hriat ve ṭhin avangin, “a theih loh, etc. etc.” a lo ti tlat mai si! 

Hlawhchhama a haw chuan zan lamah a ina rawn lenglut leh tur ramhuai khan a tiril a tikhur zawih zawih mai bawk si. Patlinga pumpa ṭah aw meuhin a chanchin leh tuna a dinhmun, zan lama a thil tawn ṭhinte lam chuan beidawng takin a hrilh fai ta leuh mai a. Mission sap chuan a mitah uluk taka enin alo ngaihthlaksak a, a ti tak zet a ni tih a hre ta. Tichuan, chu’ng hunlaia Mizo Kristiante hming an ziahna lehkhabu lianpui mai chu lain a keu ta a, Zikpuii pa pu hming chu a ziak lut ve ta a!!

Chu veleh, a thinlungah thlamuanna leh huaisenna, ramhuai ngamna chu chawp leh chilhin a nei ta, Isua neitu a ni tawh tlat alawm! Phur takin zan rawn thlen leh hun nghakhlel takin a thil neih thar Isua nen chuan a haw ta vang vang a, kalkawngahte chuan ‘Isua hming kan lamin ramhuaiin an tlanchhe thin..’ tihte chu a rilruin a sa phei a. Chumi zan aṭang chuan rawn tibuai ṭhintu ramhuai chu thehmeh angin a reh ta hmak mai a, ṭik ṭak pawh a rawn ti chhunzawm tawh lo reng reng. A reh hlen ta vang vang a, hlate khuaah a tlanchhe ta a ni. Kan Lalpa Isua Krista hming chu an lo hlau duai duai teh e. Zikpuii pa pu pawh chu Kristian ṭha tak a rawn ni zui ta a, miten ‘mi ang lo’ an tih phah hial khawpin thlasik zingkar khawvawt dai tla karah pawh khawlai fangin, in tinahte lut kualin ‘Isua hi lo ring ve rawh u’ tih ringawt sawiin thu a hril kual ṭhin a ni.

Isua hming kan lam hian Isua kan ko a ni ringawt lo va, hming hian a putu nihna a keng angin, Isua hmingah hian Isua nihna a tel a, a thiltihtheihna a keng tel bawk a ni. Isua hming kan lam hian a hminga thiltihtheihna chu kan ko a, Pathian lalzia leh ropuizia kan puang nghal bawk a lo ni.

Ka hming sak chhan

Kan hming sak chhan hi chi hrang hrang a ni hlawm ang a, a ṭhen chu hming phena thawnthu ngaihnawm tak awm an awm laiin, tunlaia kan hming sak dan tam zawk hi chu a satuin nalh a tih vanga a sak, sakchhan thawnthu bik lutuk awm lem lote a ni awm e. A bikin hmanlaia an hming sak chhante khan awmzia a nei deuh zawkin a lang a, lal hmingsak dal lo tih ṭawngkamte a awm hi. Kei ka hming pawh hi nalh ka ti lutuk lo va, a common lutuk lo bawk a, mahse thawnthu nei ṭha ber pawl a nih ka ring thung.

Ka hming satu hi ka pu (ka pa pa, ka pu pa), Darringvunga (Sena) a ni daih a, pasalṭha, mi huaisen leh inbuan chak, palian ruakhau pui mai, sawi ve hat tling pha a ni awm e. Hrisel leh damrei tak pawh a ni, a tuchhuan min hmu phain a dam tlat. Kei chuan thlalakah tih loh chuan ka hre pha ve chuang lo va. Pasalṭha hmingthang Vana Pa thisen aṭangin an la hla lutuk lo nghe nghe awm e. An hunlai chu a la hmanlai ve viau ang a, a chanchin leh pasalṭhatna, an thangchhuahna lam chu sawi ka tum lo va. Ka sawi duh zawka chu thlahtute aṭang tawha pasalṭha, mi huaisen, thei ve tawk inti ve tho an ni, Zikpuii pa pu kan sawi tak ang khan. Kristianna lo luh tirh pawh khan a do pawl, a hawtu a ni. A nupui, ka pa-te pi ngei pawh hi harhna hmasa lamah mihlim zinga mi a ni awm a, chu pawh chu Kristiante inkhawmnaa a kal turte hi a phalloa, kutte hial a thlak ṭhin niin an sawi. Mahse kan pi (ka pa-te pi) chuan Krista avangin a tuar lui a, mâk hial tawh inhuam chungin rawngbawlin a penchhuak lui ṭhin. Chuvang chuan ka pute unau zinga pakhat (ka pa patea) hmingah pawh ‘Sualthimtawnluia’ tiin an sa hial a ni.

Vawikhat chu ka pa tleirawl chhuahtirh hian, ‘Thitchhoh’ (Burma), kawl khuaah school a kal laiin an ramvahnaah ramngaw-a (tun hma, kan pute hunlai chuan Tahan khawpui chhehvel ngei pawh hi sai ramngaw pik tak a ni an ti ṭhin) an riahna kha huai awmna, hmun hrang lutuk a lo ni kher kher a, zanah thawm neiin an rawn tihṭhaih a, mihring mihrinnaa intihhuaisen luih theih pawh a ni ta lo. An zinga pakhat chuan tlawm mai chu hrehin, a ngam chuan rawn inlara inbei turin a cho ta chher chher mai! Mahse chupa chu sam tlakawlh rawt khawpin a na ta mai a ni. Tichuan loh theih lohvin an tlawm a, an tlanchhiatsan chu a ni ta ber a. A hnuah a pianthar hnuin vawikhat chu ka pa chuan a rilrua thi thei lo, tlawmthlak taka an tlanchhiatsan, khalai hmunah khan a Bible nen, a neih thar Lal Isua nen a va kal leh ta ngat a, ṭawngṭainate hmangin chu’ng huaiho chu a um chhuak ta zawk a ni! Mihring pasalṭhatna ringawtin a ngam loh chu Isua hmingin a ngama hnehtu a ni ta! 

He ka pa thil tawn hi ka pu-in a lo hriat chuan a lawmpui hle a, tunhma hun kal tawha amahin a lo tawn tawh thil tam tak a hrechhuak nghe nghe awm e. Mihring huaisenna leh pasalṭhatnate pawhin a ngam loh ramhuaite hneha ngamtu, Isua Krista ropuizia hretu leh a hnungzui tura Kristiana inpe ve tawh ‘ka pu’ a ni si a. Tichuan, ka pa-in nupui a’n neih a, a fa hmasa ber, a fa hming koh chu ka pu (ka pa pu) chuan hming a saksak ta a, “ka Lal chhar hi a lo a lo lian em a, ramhuaiho pawh ngama hnehtu a nih hi” tiin, ‘Lalchharliana’ tih chu a tupa (a tuchhuan) hming atan a lo sa ta a ni an ti.

Rinnaa Isua hming kan lam hian Amah ngei chu a awm nghal a, hna a thawk nghal ṭhin a ni. Chutiang khawpa ropui Isua neitute kan ni hi kan vannei mange! A hmingin thil a tihtheihziate hi kan lo hre phak lo zawk ṭhin a, kan lo hmang ṭangkai pha lo zawk ṭhin a lo ni. Amaherawhchu, thiltihtheihna atan Isua hming hmang tur chuan a hmingah rinna kan neih a pawimawh hle (Tirhkohte 3:16). Thiltihtheihna chu a hming lam vang ringawtin a lo kal a ni lo va, Isua hnathawh rinna avang leh Pathian thu zawmna aṭanga a hming kan lam erawh chuan thiltihtheihna chu a lo awm ṭhin.

Ṭawngṭainaah Isua hmingin kan dil tur a ni

Kol 3:17 “Tin, in tih apiang chu thusawiah emaw, thil tihah emaw ama zarah Pa Pathian hnena lawmthu hril chungin Lalpa Isua hmingin ti vek rawh u.”

“Nangnin ka hmingin eng pawh mi dil chuan, chu chu ka ti zel ang.” (Johana 14:14).

Kan ṭawngṭainaahte hian kan fimkhur a ṭha hle mai. Bible ngeiin chiang takin min hrilh a ni si a. Mi tam tak chuan kan ṭawngṭai tawp kharnaah Isua hming kan lam theihnghilh (palh) fo ṭhin.

Kristian Hla Bu hnunglama ringtute ṭawngṭai dan tur kaihhruainaah pawh khan kan en chuan, Lal Isua hminga dil vek a ni. Kan hman dan tur erawh chu kohhran hrang leh tih dan hrang hrang nei kan nih angin a inang lo thei hle ang a. Entir nan- “Kan Lalpa Isua Krista hmingin” emaw, “Chhandamtu Isua hmingin” emaw, “I fapa Isua Krista Hmingin” emaw, “Nazareth Isua hmingin” kan ti emaw, “Isu i hmingin” emaw pawh lo ti ila, a pawimawh ber chu ‘Isua hming’ tel ngei kha a ni pawimawh ta chu ni. 

Kan hriat loh vang te, kan lo theihnghilh vang te, kan hamhaih vangtea kan ṭawngṭai tihtawpnaah Lal Isua hminga kan lo dil theihnghilh palh/kan chham theihnghilh palhte hi theihnghilh loh hram i tum tawh ang u. Eng anga chham duah nalh pawh ni ila, a tawpah Isua hminga dil kan theihnghilh leh tlat si chuan kan dilna chu awmze nei lo, chhan tlak loh a ni hial awm e. A hnampui ṭawng tak phei chuan kan dilna kha a ‘valid’ lo zo ta vek ṭhin dawn a lo ni.

Rinnaa a hming kan lam chuan Isua a lo cheng ve nghal a, thil min tihsak a, kan mamawh min pe ṭhin. Tichuan, Pathian chu Isua hming kaltlangin a famkimin a inpuang chhuak ṭhin a lo ni. Chhiartu zawng zawng Lalpa’n malsawm rawh se, kan Lalpa Isua Krista hmingin, Amen.

- Nanaua Chawngthu

INBUATSAIHNA

Ṭhalai ṭawngṭai tlaivar zan khan kan fellowship sum kawltu thusawi tawi, ziak leh chhiar leh inbuatsaihna ṭha tih thupui hmang a, a thusawi kha ka rilruah a awm reng a, khatiang lam hawi inzirtirna leh sawi hi keini lamah hian nei ve tho mah ila kan nei zen zen ngai mang si lo tiin tlem a zawng han thailang ve hrim hrim ṭha in ka hria a, mi sawina engah leh ziak a awm te bih zauin tlem i han sawi ho dawn teh ang.

Mizote hi Kristian zingah chuan inkhawm uar ber pawl tak kan niin a rinawm. Heng Delhi tlangah pawh Kohhran leh Fellowship ṭhenkhatah phei chuan chawlhkar khatah hian vawi 4/5 lai inkhawmna nei thei te pawh an awm. Inkhawmnaa tih dan mumal lo leh thil a nih tur ang ni tawk lo hian rilru a ti hahin, inkhawm boruak a tichhe thei tih tuman kan hai awm lo ve. Tirhkoh Paula’n Korinth khuaa Kohhran hote tih dan mumal a zirtir kha tihawm reng pawh a lo ni. (I Kor. 14:26-35).

Vawiina Kohhran hruaitu, ṭhalai leh nuho hruaitute hian kar lovah ṭuan ṭulna avangte leh chhan dang avangte pawhin min liam san hun an la nei anga, rawngbawltu ni tura inring pha ngai lo leh inngai ngai lote kovah pawh rawngbawlna hna hi a innghah hun a la thleng ngei ang. Kan ṭhalai rual leh naupang lam aṭanga rawn ṭhang thar chho zelte tan pawha puitu pakhat a lo nih theih nan tlem a zawng han tarlang ila –

1. Inkhawm Hruaitu Tan:

1. Inkhawm hruaitu chuan inbuatsaihna ṭha inlamah a neih a pawimawh a, inrin tawkna thlengin inbuatsaihna ṭha neih hian min siam a ni. Inbuatsaihna pawh nei mang lova, hla thlan tur pawh zai hruaitute kutah awm mai se ti tawk kan la awm fo hi inkhawm kan tui tawk lohna pakhat a tling a ni. Tin, kan Pathian thu chhiar tur chenin inpuahchahna neih loh chuan a lamrik dan dik lo leh bahlah deuhin chhiar mai a awl bik a, hetiang thil ho tham te anga lang si hi midang tan inkhawm nuam lo tih rawihna a tling tih hriain inbuatsaihna ṭha tak neih hian kawro a su khawp mai.

2. Inkhawm kaihruaitu chu midang aiin kal hmasak zel theih nise a ṭha. A tello chuan mipui an hawihai a, boruak a heng bik bawk.

3. Pathian thu chhiarah uluk a ngai hle a, dik tak, rang lutuk si lo, muang fan lutuk si lova chhiar tum hram ila. Pathian be tura sawmnaah phei chuan “Pathian chibai i buk ang u” tia mipui lam hawi chhuak thei tur khawpa kan chhiar tur hi hriat hneh theih nise a mawi bik a, mipui pawh a hneh bik ṭhin.

4. Thunawi ngah lutuk leh midang thusawi tlip zen chinte hi mipui tan a ninawm thei tih hriat reng tur.

5. Ṭawngkam thiam leh thiam loh chu thuhranah dah ta ila. Chairman chuan ṭawngkam hman dan a ulukin, a fimkhur a pawimawh hle. Hriat thiam theih si, a awmzia leh kalhman dik si lova kan lam chang a tam thei awm e. ‘Bible chang i lo chhiar ang u’ tih aiah ‘Pathian thu thianghlim i lo ngaithla ang u’ tih te ‘Chanchin Ṭha Luka’ tih ringawt aiah ‘Chanchin Ṭha Luka ziak’ tih te, ‘Korinth thawnkhatna’ tih tawp aiah ‘Korinth khuaa mite hnena Tirhkoh Paula Lehkhathawn Pakhatna’ tih hman te hi a mawi zawk a, ‘Thuhriltu koh nan hla i lo sa ang u’ tih aiah ‘Pathian chhawimawi nan hla kan sa ang a, kan sak tawpah kan Thuhriltu tur pawh lo ding chhuak nghal se la’ tih ang chi te hi hman zawk ṭhin ni se la, tin, ‘Ban hla atan emaw kan inkhawm ṭan nan hla ilo sa ila’ tih ai chuan ‘Kan hla hnuhnung atan emaw Pathian kan fak leh chawimawi nan hla ilo sa ila’ tih te pawh hi a ngaithlatu tan pawh ngaihthlak a hahdam zawk tih hriatreng i tum ang u.

6. Thu puang tura Secretary sawm hian, “Tunah puan tur ṭul awm apiangte puang turin kan Secretary ilo sawm ang u,” tih duah aiin “Kohhran thupuan ilo ngaithla ang u,” tih mai hi a fiahin hun a heh lo zawkin a lang.

7. Inkhawm ‘thawhlawm’ hi ṭhenkhat chuan ‘thilpek’ tizawngin kan sawi ta mah mah niin a lang. A dik tho rualin ‘thawhlawm’ tih hi Kohhranin ṭawngkama kan lo hman ṭhan zawk niin kan Pastor senior ṭhenkhat chuan an sawi thung.

8. Inkhawm hruaitu ṭhenkhatin ‘Solo turin ilo sawm ang’ emaw ‘Kohhran Zaipawl Pathian fak hla hlan turin i lo sawm ang u’ an ti ṭhin a. Hei ai hian ‘Pathian fak hla sa turin i lo sawm ang/ang u’ tih hi a dik zawk niin a lang bawk.

9. Thil ṭul tak anga lang ve deuh si mahse a zawng a za a tih atana ninawm leh mawi lo chang ṭhin chu, hun neitu hrang hrang ṭantu, thawhlawm khawntu leh hlantu, Pathian fak hla satu leh adt. pawh an hun an hman zawh apianga Chair aṭanga duhsakna leh malsawmna lo hlan vek leh comment lo pek ve vek zel hi chin loh atan a ṭha khawp mai.

10. Keini Biakin chu Pulpit/Lectern awmna leh mipui ṭhutna a in hlat lutuk lo bawk a, inkhawmnaa thiltih nei, inkhawm ṭantu, thupuangtu, testimony sawi, Zaipawl/mal zai leh adt. khan an tih tur an tih zawhah an ṭhutna an thlen thleng chu Chairman tan lo nghah rih a mawiin a zahawm hle bawk.

11. Inkhawm hruaituin hla a thlanin, a thlan chhan a sawi tel chu a sual lo, mahse a hla chang zawng zawng chhiar chhuah vek hi a ṭul lem lo a, hun a heh bawk. Amaherawhchu hla hruaitu ten inpuahchahna, a key an zawn chhung hun siamsak nan a hla chang duh lai han chhiar chhuah chu remchang tak a ni ve thung.

12. Hla thlan chungchangah pawh a hla bu (eng hla bu ber nge) chiang taka sawi a, hla namber mai bakah a hla tlar khatna tal sawi tel ziah hi chin atan a ṭha a bakah hei hian hriat pawlh palh lakah min veng. Tin, lo hriat loh palh a awm theih avangin kan hla thlan nambar sawi nawn fo pawh hi a ṭha khawp mai.

13. Inkhawm hruaitu thatchhe taka ṭhu ṭhinte hi hmuh an hahthlak a. Chuvangin, inkhawm chhung chauh tal chu taimak chhuah hram hram a ṭha. Inthlahdahna hian mut pawh a tichhuak duh bik ṭhin. Inkhawm hruaitu ber a mutthluk lup lup chuan inkhawm boruak a tichhe vek thei tih hriat tel bawk a ṭha khawp mai.

14. Inkhhawm hruai dan pawh hi a ngai ngawr ngawr chu mipui tan leh a bik takin a thil ngai ngawr ngawr ning vat ṭhin ṭhalaite tan hian a ninawm ve thei a, tih dan han thlak ve zauhh zauhte pawh hi thil ṭha tak a ni.

15. Kohhranin hunpui deuhva kan neih heng Good Friday, Easter Sunday, Chrismas leh adt. ah te hian Chair aṭanga Kohhhran mipui chibai han bukte leh duhsakna han hlante hi a mawi hle a, boruak pawh a siam bik a ni.

16. Inkhawm hruaitu ṭhenkhat, lu thak lo pui hiah ching deuhte leh khawih ṭul lem lo khawih chingte pawh awm theih tak a ni a. Mahni tih dan ṭha tawk lo lai leh mawi lo laite mite hnen aṭanga insiamṭhat ngam hi thil pawimawh tak a ni.

17. Thuhriltu apiang Chairman-ina hun tawp pek hi a remchang lo fo. Thu inhriattir leh ṭuldangte pawh thil awm thei a ni. Tin, inkhawm hla hnuhnung hi thuhriltu hlan kan duh a nih chuan inkhawm hma in emaw zawh lawk phawt hi thil chin ṭhan atana pawi lo a ni.

18. Pulpit hi phuba lakna atan leh thinrim hrikthlak nana hman tur a ni lo tih hi vawn reng a pawimawh hle. A bik takin hminghmerh a inkhawm thusawi leh hruaina aṭangte a inkhak leh inzilh fo hi a sawng-saw-hlawtna ai chuan in tih vui vaina a tam zawk tih hriat fo a ṭha.

19. Mipui hma aṭanga mei nei taka thusawi a inzilh ai chuan a ruk te a inzilh leh inhrilh hriat hian kan tum a fuh ṭha zawk tih hi theihnghilh miah lo tur.

2. Ṭantu tan:

1. Awlsam taka chhuah a nih theih nan tlar hmawr lamah emaw a hmalam deuhah ṭhut ṭhin a ṭha a, hun a hek lovin inkhawm a tizahawm.

2. Ṭan tura kal leh let lamah hmanhmawh lutuk lova kal tur a ni.

3. Mipui hmaa buai hrep loh nan Bible chang chhiar tur ṭha taka chhinchhiah a, fel taka ṭanna hman tum a ṭha.

4. Thuhmahruai sawi ṭeuhte leh Sermon pate thlak vak maite hi a chang chuan chakawm tak a ni ṭhin. Mahse hetiang hi pumpelh tum hram zel a ṭha khawp mai.

5. Ṭantu ni hauh loh thildang kan zep tel daih teh ang. Kan thawhlawm lakhawmtute hriat tur atan. Thawhlawm lakhawmtu kan nih a, mipui ding/ṭhu chunga zai laia khawn tur a Chair in min ti a nih chuan hla hruaitu in hla an lak hnu, hla tlar khat tal an sak hnuah chiah kan thawhlawmte lakhawm tura chhuah hian inkhawm a ti zahawm bik ṭhin. Mipui zai ṭan hma hma aṭanga kan lo khawn nghal deuh mawp mawp mai chuan alang mawi lo hma bik em em tih hriat tel a ṭha khawp mai.

3. Ṭawng fimkhur:

Biak in leh Kohhran huangah hi chuan ṭawngkam pangngai leh zahawm hman hram a ṭha. Hei hi Kohhran zahawmna leh Mizo ṭawng dik humhim nan a ṭul a ni. Ṭhalaiho ṭawng lerh (slang) entir nan – bon top, chhass, confi, contri, cial, dap, regu, star leh adt. te hi khawlaiah hman nuamin awlsam hle mahse Biak in chhungah leh Kohhran huangah chuan i hmang lo hram ang u.

Heng ka han thailangte hi ṭhenkhat tan chuan hriat hnu vek ni tho mahse kan ṭhang leh thar, kan hruaitu thar tur te in hlawkpuina an lo neih ngei beisei chungin ka han tarlang a ni a, a ṭhen hi chu kan hun leh hmun in a zir tawk loh vang te a practice theih loh nei tho mah ila a tam zawk hi chu kan hriat loh vang a ni thei ṭhin a, tunah chuan kan hre ta a, a hlawhtlinna leh kan inkhawm zahawmna chu kan kutah a awm ta e.

Lehkhabu rawn:

1. Hruaitute ṭhian – Rev. K. Lalpiangthara

- JLh Ralte

NUNNA TUIKHUR : JULY 2016 : EDITORIAL

European Cup-2016 chu kham lo takin kan lo en zo leh ta. A rampum huapa cricket atchilh, football-in hmun a chan ve mang lohna India vairam rila awm kan nih angin mahni khuaa a boruak ang chu tawng pha ve loh mah ila, a tui mite chuan kan chhehvela vaiho tu khaw-kha hriatpui lohvin kan lo khȗkpui ve a, a manhla thawkhat tho e.

Tun ṭum Euro-a mit latu leh ngaihtuahna titam zui ta chu thildang ni lovin ‘Tattoo’ hi a ni. Kan hmuh ve phak chinah pawh tunhma aiin an uar chho telh telh niin a lang. A chhu tawh sain an chhut belh zel a, a la chhu ngailo lahin an lo chhu thar zel bawk a. In lo chik ve emaw, ram tin player te kha en ila, kei ka ni inti chin chu an inchhu rang ruai deuh vek mai niin a lang.

Chutiang karah mite ngaihsan rawn leh lar zual bik, an champion zui bawk avanga chanchin ngah ta ber nia sawi ngam, Cristiano Ronaldo-a’n Kristian a nih ang ngeia a inthairang ve duh lo hi a ngaihsanawmin fak a phu thlawt a ni.

Hetianga khawvel infiammi lar ber ber leh kan ngaihsan ten an chhut miau avang hian lo inchhuttir ve mai pawh a awl dawn hle mai. Tun apangin kan zingah ngei pawh a hmei a pa sawi lovin tattoo kan uar takzia hi! A ṭhen phei chuan langsar tak takin kan chhuttir a, intihtheih nan tak kan la hmang zawk zui niin a lang. Kan inenchian a kan fimkhur a ṭha hle mai, Setana’n thiam taka ram a zauhna a ni thei tlat.

Tattoo chanchin chhuitu zinga ropui bera an sawi Dr. Hambly-a chuan, “Tattoo hi ring lote thlarau leh sakhuanaah a innghat tlat a. Ngun taka a lo chhuah dan chhuitu reng reng chuan ramhuai thiltihtheihna danglam bikte nen a inzawmzia an hmuchhuak zel ang” a ti a. Michelli Delio-a paw’n, “Taksaa tattoo chhutna lai hi thlarau sualho chenna temple a ni” a ti bawk. Kan rin kan Bible pawhin kan taksa inṭial lo turin min hrilh (Leviticus 19:28).

Mithiamten an sawi dan chuan a bikin sapram USA ṭhalai tattoo nei an zir chiannaah, hengho zinga a tam ber hi mipat hmeichhiatna hmang khawlo te, ruihhlo bawiha tang te, suahsualna eng emaw taka inhnamhnawih, school aṭanga hnawhchhuah kal zawm thei lo, nungchang hloh tawhte etc. an ni tlangpui an ti.

Tattoo neih avang hian sorkar hna ṭha hmuh ve theih loh bakah, foreign ramdang kal chungchangahte harsatna an tawk bik ṭhin niin an sawi. Tin, hriselna lamah pawh tattoo chhutna hriau inṭawm aṭangin HIV/AIDS, Hepatitis B leh C, Tetanus leh natna ṭha lo dangte pawh a kai theih lehzel an ti a. Thisen pe tur pawhin hmun ṭhenkhat strict-na deuhah chuan an duh tawh lo an ti hial.

Ringtute chu hetiang tattoo lakah hian kan fihlim tur niin a lang. Kan lo nei tawh a nih pawhin Pathian hnenah ngaihdam i dil ang u.