NUNNA TUIKHUR : JUNE 2016 : EDITORIAL

Lalmanga nu lawm rawih ni, khawvel hmar lam (northern hemisphere)-a ni rei ni ber, June 21 (summer solstice) te chu kan lo hmang zo leh ta a, kum chanve/chawhnu lam kan lo hmang ṭan leh ta! Tun aṭang chuan ni khat hun chhung pawh zawi zawiin a tawi chho leh hret hret ang a, kum khata ni rei loh ni ber lam panin hunin min herpui leh ṭan ta muai muai chu a nih hi.

Mihring nun pawh he khawvel ëng hmua kan lo pian chhuah tirh phat aṭangin chak lo tak aṭanga bul ṭanin kan vanglaini, kan chak lai hun chu zawi zawiin kan rawn thleng chho va. Mahse chutah chuan ding reng thei lovin kan hriat loh karin kan nun chawhnu lam panin kan tawpna ni kan lo hnaih tial tial ṭhin.

Tuna i kum leh i hun hman mekah khan mahni tawkah thei inti, chak vanglai tak hmang mek, taksa pawh mam nalh tawk tak tiin inchhuangin induh ve ṭhin mah la, i vanglai pawrmawi vul nite chuan i hriat loh karin chuai lam an panpui dawn che. I nunhlimna chen mekte chuan parchhuang ve ṭhin mah se la, a la ral dawn si.

Mahse aw ṭhalai, i ṭhatlai hun ṭha kha nakina a la zur hun tur ngaihtuah avanga lungngaiin indawm kun kher suh. “In ṭhatlai chen ula, in la naupan viau lai hian hlim rawh u” tiin, Thuhriltu 11:9 in min chah a lawm! Hlim la, i vanglai hun kha äm takin chen rawh.

Chutih rual vek chuan i vanglaini i hman dan kha lungngaia indawm kun ni hauh si lovin fim takin han ngaihtuah ve ṭhin teh le! “Amaherawhchu Pathianin in chungah ro a rel dawn tih hre reng ang che u.” (Thuhriltu 11:9b), “Tin, i vanglai hian i siamtu hre reng rawh, Ni ṭha lote a lo thlen hma leh ‘lawmna reng reng ka nei lo ve,’ i tihna tur kumte a lo hnaih hma hian.” (Thuhriltu 12:1).

Vanglaini ṭhatlai hun tia hahipa i sawi ve-ah chuan ṭhing takin i thle liam ve mai mai em ni? Engmah lovah i chaklai hun ṭha chu i her liamtir mai mai em? Chu i vanglainiah chuan i siamtu i hre reng em? Nge, hmelma pa Setana buma awmin hriatreng tlak loh thilah i inhmang ral zawk? I phak tawkah Pathian tana i rawngbawlna turte phatsanin ho takin i nunsan mai mai ṭhin zawk em ni? 

I vanglaini i hman mek tawiteah khan hlim takin Pathian hre reng chunga a tan thil ṭha tiin awm la. Ral leh mai tur i vanglaini kha engmah loa raltir mai mai lovin, thil ṭha ti tura siam i nihna angin i siamtu i Pathian bakah, i ram leh hnam tante pawh thil ṭha engemaw tal hnutchhiah tur i nei ve dawn lawm ni?