NUNNA TUIKHUR : JANUARY 2016 : EDITORIAL

Kum 2016 dam takin min hruaithleng a, a zahngaihna leh a khawngaihna kan chunga lantirtu kan Pathian hming chu fakin awm rawh se.

Pathian zarah Nunna Tuikhur News pawh tun kumtharah a vawikhat nan kan han khawrpum leh thei ta chu a ni a, a lawmawm hle mai. Tluang taka kan tihchhuah chhunzawm zel theih nan chhiartu zawng zawng ten min lo ṭawngṭaipui a, thurawn ṭha leh chhuah tur ṭhate min pe ṭhin turin kan ngen hmasa duh che u a ni.

Kumin 2016 atana Fellowship hruaitu thlan tharten charge an lak hnuin, ni 17/1/2016 khan E.C. Conference chu tluang takin kan lo nei zo leh ta a. Kumin chhunga kan rawngbawlna tur hrang hrang kan relte zingah, Mission rawngbawlna chungchangah kan sum leh pai neihsa aṭang ringawt chuan a thlaphanawm hle rualin, kan thlen chin aṭanga hmasawn zel tur kan nih hriain, rinngamnain kan Missionary chawm mekte bakah a thar pakhat chawmbelh kan han passed ta rup mai a! 

Tichuan, kan Fellowship hmingin Missionary pa riat (8) heng- Taunggyi, Shan State, Burma ah te, Varanasi, Odisha leh Delhi-ah te kan chawm dawn ta a ni. Mission thawhlawm lamah tha thlah miah lova ṭan kan lak sauh sauh zel a ngai dawn a ni.

Heng kan theih tawk te tea awm hmun aṭanga kan rawngbawl vena, Mission thawhlawm kan thawhte hi a thlawn reng reng lo va. Kum tawp Fellowship General Meeting-ah pawh Mission incharge-te hnen aṭanga report kan ngaihthlakah kan hriat ṭheuh kha. Kan rawngbawlna Lalpan min hriatpuiin mal min sawmsak a, Mission field hrang hrangah Krista la hre ngailo ten lo hriat phahin Kristianah an inpe a, Baptisma mi tam takin an chanzia te pawh kan hriat kha!

India ram chhunga kan Missionary chawm mekte hlawh Rs. 500/- theuha kan tihpunsak dawn bakah, field tharah pakhat chawm belh kan han rel hi mihring chhiarkawp zawnga chhut chuan zawh lo tur nghawngkawlah kan inbat ni te pawhin a inngaih theih rum rum awm e. Marawhchu “Pe rawh u chutichuan pekin in awm ang” (Luka 6:38) titu kan Pathian chu a thutiamah a rinawm em a, kan rorel aṭanga thlakhat chu sawi loh, kar khat em pawh a vei hmain Lalpa chu a rawn inpuang nghal hmiah mai! Chhungkaw pakhatin, “kan Fellowship kaltlangin Missionary pakhat chu kan lo chawm ange” an rawn ti a nih chu! Lalpa hming chu fakin awm rawh se.

“Rinnaa i pek tur chu Lalpan a nghak reng a ni, ‘engzatah nge min rinngam dawn le’ a ti?”. Engzatah nge a thuthiama rinawm kan Pathian chu i rin ngam ve dawn le?