NGILNEIHNA LEH THATNA

1. Sam 23: 6 “Matheilovin ṭhatna leh ngilneihnain ka dam chhung zawng hian mi zui zel ang a; tichuan LALPA inah kumkhuain ka awm reng ang”

2. Gal. 5: 22 “Thlarau rah erawh chu…ngilneihna te, ṭhatna te…”,

3. 2 Pet. 1: 5 “A ni, chumi avang tak chuan taihmak tinreng chhuahin, in rinnaah chuan ṭhatna telh ula…”

Thuhmahruai: Tu te kianga awm nge in chak ber ti ta ila, mi tu pawhin min hmusittu, tiduhdah ṭhintute kianga awm ai chuan mi ngilnei leh mi ṭhate kianga awm kan chak ṭheuh awm e. Mi ngilnei leh mi ṭhate kianga awm kan chak chuan mi dang pawhin chu chu an chak ve tho dawn tih a chiang a, keimahni ngei pawh mi ngilnei leh mi ṭha kan nih a ṭul a ni. 

Ngilneihna leh ṭhatna tih hi thu inkawp, a hran ve ve pawha awmze ril tak nei; mahse, Bible-in a hman kawp tlangpui ṭhin a ni a. Pathian zepui a nih rualin ringtu nuna thil pawimawh tak a ni bawk. Davida, Paula leh Petera-te pawhin he Pathian zepui hi ringtute rinna kawnga kan telh tur, Piantharna dik tak chang leh chang lo hriattheihna thlarau rah leh Pathian chuan he a zepui hi vawiinni thlenga zepui a la ni, tiin an sawi chhuak hial a ni. Ṭhatna tih hian a zilhhauna leh thununna thleng pawh a keng tel a. Ngilneihna tih hian a chhawm chhuak ṭhin. He zepui neitute chu thildangin a pawlh loh nunze ṭha tak nei an ni. 

1. Kan chungah Pathianin ngilneihna leh ṭhatna a lantir ṭhin 

Pathian ze pawimawh tak ngilneihna leh ṭhatna chu Davida chuan a fakna hlaah “Matheilovin ṭhatna leh ngilneihnain mi zui zel ang,” a ti. Pathian ngilneihna leh ṭhatna chu kan chungah faktlakin a lang ṭhin. Keini pawh mi dangte chunga ngilnei leh ṭha turin min duh a ni. 

Khawvela Isua rawngbawl dan kha kan en chuan a ngilneihzia leh mite chunga a ṭhatzia kan hmu thei a. Damlo te, mitdel te, ramhuai man te, zeng te a ensan ngai lo va, mirethei leh chanhai te, mi sual te chungah pawh ṭhatna a lantir ṭhin. Hmelmate huat a phal lo va, tiduhdahtute chu malsawm hlauh turin a zirtir ṭhin a. Misualte leh mi ṭhate chungah chuan ni a chhuahtir ṭhin a, mi fel leh fellote chungah pawh ruah a surtir ṭhin. Miin kan chunga an tih kan duh ang bawk chu midangte chungah pawh ti ve ṭhin turin min zirtir a ni. Mi ngilnei leh mi ṭhate bula kan awm chuan keimahni pawh kan ngilneiha, ṭhat a ṭul ve a ni. 

2. Ringtute nunah a lang chhuak ve tur a ni 

Ngilneihna leh ṭhatna hi ringtu nuna thil pawimawh tak a ni. Midangte chunga ṭhat chhuah leh ngilneihna lantir ve turin Pathianin min duh a ni. Miten kan kianga awm chak rawh se. Paula chuan ‘ngilneihna leh ṭhatna’ hi thlarau rah a nih thu min zirtir a ni. Mihring hian ngilneihna leh ṭhatna zia hi kan nei vek a; mahse sualna avang leh mahni hmasialna avangin lantir harsa kan ti ṭhin. Nimahsela Thlarau Thianghlim chuan keimahniah felna rah chi hrang hrang a lantir ṭhin a ni. Isua ringtu leh Thlarau Thianghlim hruaina dawngtute chuan he nun duhawm tak hi kan lanchhuahtir a ṭul ve a ni. Petera chuan kan rinnaah ‘ṭhatna’ telh turin min lo zirtir bawk. 

Pathian ringtu (Kristian) inti mah ila, ngilneihna leh ṭhatna hi keimahniah mi (ringtupui/ring duh lo/ring lotu) ten an hmuh loh chuan mi dang tana malsawmna nih a harsa ṭhin. Mite hmusit a, an rilru tinatu leh mi velh ching kan nih lek phei chuan Pathian duh angin kan nung lo tihna a ni. He ngilneihna leh ṭhatna zia pawimawh tak hi kan nunah lang chhuak rawh se. Lanchhuahtir kan tum pawh a ṭul tak zet zet. 

3. Mi ngilnei leh ṭhate awm dan leh awm dan tur

Mi ngilnei leh ṭha chuan mi dangte ṭhatna tur a ngaihtuah ṭhin. Mi dang tihhrehawm leh tihnat an duh ngai lo. Mi dang an na dawn a nih chuan anmahni an intina zawk ṭhin. Kan ṭawngkam khat lek pawh hi mi dangte tan tawrh hrehawm leh an rilru tina thei a nih avangin kan insum theih a ṭul hle a ni. 

Mirethei leh chanhaite kan ngaihsak tur a ni. Piangsual leh rualbanlote hi kan hmusit mai tur a ni lo. Ṭanpui an ngaih hun apiangah ṭanpui ṭhin zawk tur a ni. Piansual nan khua a tlai lo tih kha hriatreng a ṭha bawk awm e. 

He ngilneihna leh ṭhatna Pathian zemawi tak hi keini Isua ringtute nunah a lang chhuak tur a ni. He zemawi tak neitu kan nih chuan kan chenna khawvel hi Pathian ram a lo ni ang a, kohhran, fellowship, chhungkua, khawtlang leh ram tidamtu, tivultu, tinuamtu kan lo ni dawn a ni. Lalpan malsawm rawh se. Amen.

-F. Lalhmangaihzuala