Zawhna: “Ka pu, hmeichhe tam tak mutpui tawh mipa hi ‘Luck’ an ti a, mipa tam takin an mutpui tawh hmeichhia hi ‘Hmeichhe ṭha lo’ an ti leh daih si a, a fair lo i ti ve em?
Chhanna: “Aw Bawihte, Tala tam tak hawng thei chahbi hi ‘Master Key’ an ti a, chahbi tak tak/chi hrang hrangin a hawn theih Tala hi chu ‘Tala ṭha lo’ an ti ṭhin. A fair lohna a awm em ni?
Zawhna leh chhanna khi Facebook-a FIAMTHU HUANG FTH aṭanga ka lak chhawn mai a ni. Inthlahrung tak chungin kan thupui sihhawn nan ka rawn zep tel hram. Mahse i ngaihtuah lam hawi zawng erawh chuan sawi ka tum lem lo. Khi zawhna leh chhhanna khian ka rilru a luah ve tlat anih chu! A zawttu leh a chhangtu thinlung aṭang chuan thil ni thei tak, zawhna leh chhanna awm ve reng a ni. Zawhna zawh dan kan thiam ang bawkin, achhanlet dan pawh kan thiam sawt hle. Thil awmang leh ni ve thei tak hmangin thu kan sawi fo ṭhin a, hei vang hian dingnghet taka inngai si, tlu tur a awn mek kan tam phah. Eden huana zawhna leh chhanna kha thlirkir lawk ila.
Zawhna: “Pathianin, ‘Huana thing rah reng reng hi in ei tur a ni lo,’ a ti elo maw?”
Chhanna: “Ti lo ve, huana thing rahte hi kan ei thei asin: huan lai taka thing awm rah erawh chu Pathianin, ‘In ei tur a ni lo, tawh pawh in tawk tur a ni lo, chutilochuan in thi ang,’ a ti a ni”
Pathian sawi dan: “Huana thing tinreng rahte hi i duh duhin i ei thei e, a chhia leh a ṭha hriatna thing rah erawh hi chu i ei tur a ni lo. I ei chuan i ei ni la lain i thi ngei tur a ni”
Setana’n Pathian thu hmangin Evi chu zawhna a zawt a, Evi pawhin Pathian thu hmang vekin alo chhanglet a. Zawhna leh chhanna te khi ngaihtuah chiang lem lo tan chuan Amen pek a awl viau ang. Mahse chhutchianga ngaihtuah chian chuan Pathian thu dik ziktluak lo, thu dik hmang si dik loh rukna nei a ni tlat mai. Chuvangin full mark pek theih loh ni mai lovin thu dik awm sa herdanglam hlek avangin exam-naa pass tura inring an fail leh ṭhinna chhan a ni a, mark pek tlak loh, Amen pekna chi a ni lo tihna ani ta ber mai. Keini pawh Setana hian Pathian thu hmangin min bei ṭhin a, Pathian thu hmang vekin kan beilet ve bawk ṭhin a, kan Pathian thu hman erawh a dik ziktluak lovang tih a hlauhawm khawp mai.
Thiamna, finna a sang zela, Bible pawh mi thiam ten an chinglet nasa hle ni tur a ni. Isua hi Virgin Birth anih leh nih lovah inhnialna namenlo alo awm phah a. Thu dik zawk inchuhin an thu hmuh dan chu an tlangzarh a, keini zirna sang rap pha ve lote leh thiamna leh finna nei tlem zawkte min sawinghing a, kan ngaihtlak hnuhnun apiang a dik zawkah ngaiin kan lo Amen leh mai ṭhin. Kan Mizo Bible pawh ‘a ziak a dik tawk lo, a thu hman a ril lo/a dik lo’ ‘a heti lai hi siam ṭhat a ngai’ an rawn ti a, hre ve lo tan chuan a luhai thlak ta hle. Hetiang anih tak nuaih avang hian zeldin thu takin, tun hnu kum 50 hnuah chuan kan Mizo Bible pawh hi ngaihhlut nachang hre lovin kan la thehdarh vek mai thei a ni.
Zirna lama Zofaten kan chhuanvawr Pu P.C Biaksiama chuan, “Kan Bible lehlin thar berah chuan Virgin Birth kan thurin pawimawh tak pawh a awm tawh lo a ni” tiin rilru na hmel takin a sawi a. Revd. Chuauṭhuama chuan, “Isaia.7:14 hi a ziaka kan pawm anih chuan Hebrai Bible-ah chuan ‘Almah’ hmang miau hek; chu chu hmeichhe rai thei tawh sawina mai a ni a, nula thianghlim kan tih (virgin) hi chu Hebrai chuan ‘Bethulah’ a ni a, Isaia hian hmang miau hek lo,” tiin alo chhang sam et a. Chuvangin Hebrai ṭawnga ‘Almah’ leh ‘Bethulah’ hi kan hriatchian apawimawh ta tihna anih chu.
‘Almah’ tih leh ‘Bethulah’ tih chungchangah inhnialna hi hmanlai aṭanga lo awm tawh a ni a, vawiin thlengin mithiamte in beihna tawp thei lo chu ala ni fo mai. Liberal leh Jews Scholar te chuan ‘Almah’ tih thumal hi Virgin tihna ni lovin nula naupai thei tawh sawina a ni a, Isaia. 7:14-ah ‘Almah’ a hmang a, chu ziak ngei chu Matthaia’n Isaia lehkhabu chu Matthaia’n Isaia lehkhabu aṭanga la chhuak siin Virgin (nula thianghlim) tih ṭawngkam a hmang hi a dik lo a ni an ti. Virgin tihna chu Hebrai ṭawng chuan ‘Bethulah’ a ni a, hei hi Isaia hian a hmang lo hrim hrim tiin an lo ṭangkawh ve viau bawk. Chuvangin Bible lehlin hrang hrang (version) thenkhat NEB, RVS, NRSV leh GNB te chuan nula hmeichhe pasal nei thei tawh Young Woman tiin an dah a. Mahse a tam zawk, KJV, ESV, NKJV, KJ21, ASV, NASB, Dohay Rheims, Dardy, YLT, New Life, NIV, CEV, New Living, NIRV, Holman etc.., chuan Virgin tiin an dah vek thung. Mizo Bible lehlin thar ber hian eng version ber nge an hman ka chiang chiah lova, mahse translation version hrang hrang a tam zawk chuan Virgin tiin an letling a ni.
Awle, Bible pumah hrim hrim hian Hebrai thumal ‘Almah’ tih hi hmun 7 laiah hman a ni a. Chungte chu Gen. 24:43; Exod. 2:8; Sam. 68:25; Thuf. 30:19; Tah hla. 1:3; 6:8; Isaia. 7:14. Heng English Bible bung leh chang kan en chuan ‘Almah’ chu Virgin tiin an let deuh vek. Heng kan sawi tak Bible changte hi Hebrai original text aṭanga lehlin te an ni lawi si. Bible khawilaiah mah ‘Almah’ hi nula thianghlim tawh lo emaw pasal nei tawh emaw ang a sawina ala awm lo zawk a ni. ‘Bethulah’ tih ve thung hi Hebrai Bible-ah chuan hmun 50 laiah a lang ve a. Hebrai Lexicon and Modern Translations-ah chuan ‘Bethulah’ chu Virgin tiin a hrilhfiah. Mahse heta Virgin tih hian hmeichhe Virgin tihna satlaih mai a kawk lova, vantlang lak aṭang pawha inserh hrang, a pa emaw ten inchhunga an khungbeh emaw, inkulh bikte emaw lam a kawk a ni. Hmeichhe rinhlelhawmte sawi nan ‘Bethulah’ a ni em ti a an inzawhna thumal mai a ni.
Mari erawh chutiang hmeichhia a ni ve lo. Thingtlang nula, nu leh pate khungbeh avanga Virgin ni lovin, thinlung thianghlimna aṭanga Virgin zawk a ni. Isua Virgin Birth hi Kristiante chauh ni lovin Islam sakhua pawhin a pawm (Quran.3:47). Amaherawhchu Chanchinṭha pawm lotute, a bikin Jews Scholar tam zawk leh Anti-Christian Greek Philosopher Celsus te chuan an pawm lo. An pawm lo mai ni lovin, Isua chu sawn Roman sipai Panthera sawnah an ngai hial a ni. Virgin Birth (Isua nula thianghlim hrin) a nihna hi Matthaia leh Luka ten an ziak ve ve a. A pahnih hian chunglam aṭanga Pathian Vantirhkohte hnathawh dan an sawi ve ve. Vantirhkohin Mari chu “I rai ang a” a tih chuan a zawhna hmasa chu “Engtin nge ni ang? Mipa ka nei si lova” tih chu Mari zawhna a ni. Vantirhkoh hmaah pawh mipa ka nei lo tingam chu a Virgin loh chu a rinawm loh hrim hrim a ni. Pathian hnathawh, thlarau thianghlim hnathawh liau liau a ni.
I.J Mikulski chuan “Thuthlunghlui ziaktute hian eng thumal nge hman tur tih chu an hre lutuk. Hebrai Sacred Writing-ah chuan ‘Almah’ tih chu nula thianghlim lo sawina pakhat mahah a lang lo. Chutiang bawkin Matthaia pawhin eng thumal nge hman tur tih chu a hre lutuk ngei ang. Isaia ziak Greek Stepusgint Version 250 BC a Jews Scholars ten Jews hnam, mahse Greek ṭawng hmang Egypt a awmte tana an lehlin a ni a, tah chuan Greek thumal Parthenos (virgin) tiin an let a ni” a ti. Isua pian hma kum tam takah Catholic emaw Presbyterian emaw ten Kohhran Doctrine-ah an la rawn hmang dawn a ni tih pawh an hriat hmaa Isaia ziak tawh a ni. Chutiang ngaihtuahna pawh a la pian hma khan Zawlnei Isaia chuan Almah-Parthenos-Virgin tiin an lo letling tawh zawk a ni. Jewish Tradition ngaihdan pakhatah chuan Isaia ziak 7:14 hi ama nupui sawina a ni e an ti bawk.
Kan tan naupang apiang a tih hi Isaia.8:3 ah a lo thleng dik ta a, a hming pawh Emmanuela ni lovin Maher-Shalal-Hashbaz a ni. He ngaihdan hi Jews Scholar ngaihdan a ni bawk. He ngaihdan hi Jews Scholar ngaihdan anih chuan ‘Almah’ chu Virgin lam hawi a sawi chi rual a ni lo reng a ni. Jews ho Culture-ah chuan hmeichhia chu pasal a neih ni thlenga thianghlim (virgin) tura ngaih sa zawk a ni. Pasal an neih hnuah an lo Virgin lo anih chuan inbumna rapthlak takah ngaih a ni zawk hial. Chuvangin hmeichhia nula pasal nei rual direct ṭawngkam ‘Bethulah’ chu hman kher lo pawhin an thinlunga awm sa a ni. ‘Almah’ hian nula Virgin tawh lo tihna lam a kawk lova, pasal nei thei tawh, nula neih tlak tih a kawk zawk a ni. Chuvangin Isaian nula thianghlim sawi nan ‘Almah’ a rawn hmang hi a awm hliah hliah zawk a ni.
Tunlaiah “Jona dawlhtu sangha kha tak tak a ni thei lo. Katiang em em a sangha lian leh Jona ni thum lai a dam theihna chhan tur a awm lo” tiin an chhui chiam ṭhin. Jona ni thum lai nghapui kawchhunga a awm theihna tur sangha kha, tuifinriat a sangha chi hrang hrang zir aṭanga hmuhchhuah tur chi a ni lo. Bible-ah vek a chhanna a awm. Chu chu Jona.1:17 ah “Lalpa chuan Jona dawlh turin sangha lian tak a lo ruat (siam) tawh a” tiin min hrilh a, hei hi a chhanna chu a ni mai. Pathianin a lo ruatlawk tawh sangha a ni. Lalpa mi hman leh ruat lawk a nih avangin nghapui kawchhungah khan thi lovin a awm tih hi kan pawm ngam a ngai. Billy Grahama chuan “Jona nghapuiin a dawlh tih aiah Jona’n nghapui a dawlh pawh ti se, Pathian thu anih chuan ka awih tho vang” a ti. Chuvangin Isua Virgin Birth a nihna hi Pathian remruat leh a lo ruahmansa anih vangin kan pawm ngam tur a ni.
(Thu lakna: Revd. L.R Colney, Isua Virgin Birth a ni chiah em?)
-Alex ZL. Hualngo
