ZO ZAN : 2016

ZoZan Banner

ZoZan Hunruat

ZoZan Kaihruaitu

Thlalak

Thlalak

Hming sign

NuHo Pawl

Mipui Zai

ZoZan : 2016

RAWNGBAWLTU NIH HREHAWMNATE

Karl Marx-an, “Sakhuana hi dawihzepna mai a ni” a tih hi a dik thei hle mai. Rawngbawltuten a mimal tak leh nihna, dinhmun, neih sum pawha an ngam em em mai, a rawng an bawl Isua vanga engtin mah an han tingam tlat lote hi a hrehawmin ka ring ṭhin. An sawi duh ang leh tih duh ang pawh an ngawihpuiin an han tingam ta lo ṭhin a nia! Hneh tur tih hriat reng ngam loh tlat hi a nuam hauh lovang. Kawng lehlamah thung chuan; lei leh vana thuneihna zawng zawng neitu, “Khawvel tawp thleng pawhin in hnenah ka awm zel ang” tia tiamtu rawng an bawl avang mi sawi leh tih ngam loh huai taka sawi leh tih a hrehawm chang a tam hle bawkin ka ring.

Mi nawmchennaa nuam ve thei lo, mi hlimnaa hlim ve remchang lo tak chunga hrehawm leh tlachhama awm hi thlan fo a har ka ring ṭhin. Mahni kal duhnaah pawh kal thei lo, it zawng pawh lei ngam lo leh duhzawng pawh nei thei lo, chak zawng hnar tlat a ṭul chang a tamin ka ring thin. Chutih rual chuan an duh loh zawng an tih leh sawi a ṭul chang a awm a, an chak ngai loh ti tura a pantu nih a ngaih chang pawh a tam ang.

Nula tlangval pawh ni lo, mi nu mi pa pawh lan zak thei khawpa duhtu hmuten an rawngbawlna daltu ni thei dawna an hriat avanga an duh leh hmangaih ber an kalsan a, hnar harsa tih chang an nei ve ṭhin ngei ang. Leng tura an duhzawng sawm a remchan loh laia an kawm peih tak ni lem lo dawnsawn a ngaih chang a tam ang a, lenluh an duhnaah an leng thei lova, an tlawh chak ngai lohte ina ṭawngṭaina hmang tur leh anmahni hawtute hnena malsawmna pek hrehawm tih chang an nei ve ṭhinin ka ring.

In leh lo ṭha nei, nuam taka khawsa thei, a changkang ber ber hmang theituten an neih rosum tirala emaw, an thlakhlelh em em kalsana midang tana inpek hi a nuam ang nge hrehawm ang le? Thil pawi tham pawh ni lovah mi tih ang tiin mi sawi ang tho sawi mah se, ‘Rawngbawltu si chuti khati..” tih an hlawh thuai avanga kawm tur leh pawl tur an haihchham fote hi hrehawmna chi khat chu a ni ve ngei ang.

Zin leh tlawh an chak hmunte chu an tan tlawh a rem lo ṭhin a, an rawngbawlna leh mawhphurhna kalsan ai chuan an châkna leh duhna chu hrehawm ti takin an beng dai zawk ṭhin. An laichin ni ngai hauh lote leh mimal taka an hlawkpui hauh lohte an tlawh a ṭul zawk ṭhin a, an zinpui a ngai ṭhin. Chungho vang chuan sum an seng a, an tha leh zung an hmang ṭhin a, mut an hmu lova chawei mumal loh chang an nei fo thin. An chhungtena ‘kan chhungkaw sakei’ an tih ngei tur, mi nawlpuiten an ṭih misual an thih pawhin hremhmuna tirliam tur ang hrima thlah a, vuina hun hmansak chi a ni si lova, ṭha taka chhuahte pawh hi a hrehawm ṭhinin ka ring.

Keini lah chuan kan nuna inrawlh fo atan kan duh lova, ‘It’s my life’, ‘It’s my style’ kan tihkhum lo chauh zawk ṭhin. Chutianga nun tladah leh zilhhau duh lo ṭhinte chuan, kan nunkhawloh vanga tuarna a lo thlen laia kan mi mamawh berte an ni tih kan hriat meuh chuan thil danga an buaina kan hriatthiampui tawh lova, “Beramte hmangaih lo leh ngaihsak lo” ah kan chhuah zui ṭhin. Nang leh kei min tlawha min buaipui nana an Rickshaw fare belhkhawm hi rethei deuhte dinchuahpui tham hial a ni maithei a sin.

An chhungkua, nupui/pasal fanau uap luma, an thlakhlelhte bula awm chak mah se an chhuahsan lawp lawp a, fate chanai mi fate an pe a, hmun khawharah an awm a, kawng reh takah an kal phah fo. An duh ang hna an thawk thei lo va, an hlawkna tur ai chuan midangte an ngai pawimawh tlat ṭhin. Chuti chung chuan sawisel bur an ni a, an tan chhanlet a rem ve lo. Hruaitu thlan ṭuma vote khat mah hmu ve lo tih takah hruaitu leh rawngbawltu nih hrehawmzia hi ka hrethiam pha ve lo a ni e.

-JL. Liana

LALPA I FAK ANG U (HLA)

1. Chun chawiloh hraileng an riang chuang e,
Fahrah khawngaihthlak nun an chan loh pawn,
Nuhrawn hrawnin thinlai phang reng rengin,
Chhingmittui nen khuavel an hmachhawn ṭhin.

       Chunnu dampui enkawlte,
       Hmangaih duhsakna dawngtu zawng ten;
       Malsawmna hlu vanneihna ropui,
       Kan chan hi hria in LALPA I FAK ANG U.

2. Harsatna leh chak zawng kan neihin,
Lam hmasak ber chu NU an ni ṭhin a;
Lawmna thlen hmasakna ber chu Nu te,
An hlutna erawh kan ngaih thah fo ṭhin.

3. Ka nu ṭawngṭai, enkawlna zarah,
Kawngdik zawhin ṭhenrualte zingah pawh;
Lungphang lovin ka leng, ka hlim ve ṭhin,
‘Lalpa ka lawm e’ Nu tha min pek vangin.

(He hla hi Tv. JL. Liana hian ni 30/04/2016 tlai dar 5:50 ah Pathian pawlna a dawn aṭanga a phuah chhuah niin, kum 1991 a lo boral san tawhtu a Nu a ngaihna a enkawl dan te a ngaihtuah chhuah a, a damlaia alo hlut thiam loh zia leh inchhirna a neih hmang te a a phuah chhuah a ni. Tv. JL. Liana hi tunah hian MCF Ṭhalai Vice President leh Zaipawl Conductor nihna chelh lai mek a ni a, a thiamna te Lalpa’n malsawm zel rawh se.)

- JL Liana

KHAWIAH NGE I AWM?

“Tin, LALPA Pathian chuan Adama chu a ko va, a hnenah,“Khawiah nge i awm?” a ti a. Tin, ani chuan,“Huana i thawm ka hria a, saruaka

awm ka nih avangin ka hlau ta a; tichuan ka biru ta a ni,” a ti a.

(Gen. 3:9,10)

Nazaret khua aṭangin Jerusalemah kalhlen kut hmang turin Isua nu leh pate chu an kal a, kum 12 mi an fapa Isua chu an hruai ve a. Dan pangngai angin kalhlen kut an hman chu a tawp hnuah Isua nu leh pate chu an khawlam panin Jerusalem leh a chhehvel khuaa unaute leh ṭhian ṭhate nen hlim takin an hawng a. Ni khat lai an kal hnuah an zingah an fapa Isua a awm ve lo tih an hrechhuak ta a. Tichuan an fapa zawngin an kir leh a. An unaute an zawt a, a hnuah Jerusalem Temple chhungah puithiamte thu lo zawta thuin an va hmu a. A nu chuan, “Ka fa, engati nge hetia min tih? Ngai teh, i pa leh keiin thlaphang takin kan zawng che a ni,” a ti a. Isua chuan, “Engah nge mi zawn ni? ka Pa ina ka awm tur in hre lo vem ni? tiin a lo chhanlet avangin a nu leh pate chuan mak an ti hle!

Nu leh pa ṭhenkhatte chuan kan fate khawiah nge an awm a? Eng nge an tih? tih pawh ngaihtuah ngai lem lova fate thlah zalen an awm nuk mai! A ṭantirh aṭanga khuahkhirh ṭha si lo hian an sual hnuah/pawi an khawih hnuah kan khuahkhirh leh chauh ṭhin a, ‘se bo hnu a se kawng khar’ ang maiin a tlai zo ta ṭhin a ni. Tin, Isua nu leh paten an fapa an zingah a awm leh awm loh pawh hre lova an ṭhian ṭha leh unaute nen hlim taka ti ti chunga khawlam an pan ang leh ni khat hnuah chauh an fapa an zingah a tel ve lo tih an hriatchhuah chauh ang khan; nang leh kei pawh hian kan hlim ni leh lawm niah chuan kan Lalpa Isua Krista hi kan theihnghilh fo ṭhin a, a tel lovin thui tak kan kal hnuah harsat, manganna leh buaina kan tawh hunah kan zawng buai leh chauh ṭhin. Mahse a hmangaihna leh khawngaihna chuan min um zui zel a, kan sualna ang leh kan tlin lohna angin min thungrul lo hi Lalpa zahngaihna a ni. Mahse tlai luatin pawina a neih hma leh ‘Ka khawngaihna i tan a tawk’ a tih hma hian Isua nu leh pa ang khan i zawng let leh vat ang u.

Thlaphang taka a nu leh paten an zawn thu a hriat hnu khan Isua chuan,“Ka Pa ina ka awm tur in hre lo vem ni?” tiin a lo chhang let a nih kha! Kum 12 rual lekin a nu leh pate a chhan dan chuan a nu leh pate mang a ti ang hle! Naupangte hian inkhawm leh sande sikul kal hi nuam an ti thei hle a, mahse nu leh paten kan inkhawm peih loh vang leh zing thawh hma peih loh vangin kan ṭhulhtir fo. Inkhawm an châk ngawih ngawih pawhin kan inkhawm peih loh vang zawkin ‘kan chhangchhe si emaw, ni a sa/ruah a sur/khua a lum/a vawt si’ tiin kan ṭhulhpui mai ṭhin. Sande sikul pawh ni se, ‘a vawt si kal lo mai rawh’ emaw ‘kalpui tur i nei si lo, thlahtu i nei si lo kal lo mai rawh’ tiin kan ṭhulhtir fo bawk. An peih loh chang leh an damsam loh changin kal ṭang ṭang rawh, keimahin ka hruai ang che tih a hnekin kal lo mai rawh kan ti awlsam mai ṭhin. “Lehkha thiam thei leh zir sang pawh ka ni lo, pawl 6 thleng chauh ka zir. Mahse ka tet laia sande sikul ka kal ṭhin kha Bible School kal angah ka inngai a, tlem a ka lo puitlin hnuah ṭhian ka kawm tam lova, ka kawm ṭhin te chu: Kohhran upate, pastor-te, missionary-te, evangelist-te, thlarau mite leh kohhrana hruaitute ka kawm ṭhin. Chu chu ka Bible College kalna a ni mai” tiin Evan. Hrangchhunga chuan a lo sawi hial a ni. “Naupang chu a kalna awm kawngah chuan zirtir ula, a puitlin tleng pawhin a thlah lovang” tih ziak ang khan biak inah kan tlangneltir a ngai a, an awmna tur dik tak pawh a ni bawk. Mahse an awmna hmun an hriat chian a ngai ang bawkin, eng vanga awm nge? Eng ti tura awm nge an nih tih kan hriat nawntir fo an ngai a, nungchang mawi leh awm dan mawi taka awm turin kan hrilh nawn fo an ngai a ni. A chhan chu naupang mai an la ni a, hrilh hrilh pawhin rei lote chhung chauh thuawih takin an awm ṭhin a, a hnu lawkah an harh leh nghal mai ṭhin. Tuna i zilhhauna leh nungchang mawi i zirtirna kha a rah seng nghal mai tum suh. A rah seng nghal i tum chuan i beidawng ang a, kut i thlak duh nghal mai ang. Dimdawi takin zilhhau fo la, nungchang mawi zirtir fan fan rawh. Tunah ni lovin a lo puitlin hunah a rah chu i seng em em ang. Tin, puipun ni khuaah leh biak inchhunga kan fate awm dan hian kan inchhung khawsak leh in relbawl dan an hailang tih hi kan hriat reng a ṭha. Nu leh pate mizia hailanga timualphotu an nih theih rualin chawimawitu an ni thei bawk.

Lalpa chuan Adama ang khan, “Kawiah nge i awm?” tiin nang leh kei hi min zawt a, engtin nge kan chhan ve dawn le? Khawiah nge i awm? Eng hmun nge i ngainat? Chu hmunah chuan engnge i tih ṭhin? tih zawhnate hi ṭhenkhat chuan zam miah lovin mar zeta chhang mai thei an awm laiin, ṭhenkhat chuan kan chhang ngam lo mai thei bawk. Khawi hmun nge kan ngainata, chu hmunah chuan eng nge kan tih ṭhin? tiin han ngaihtuah kir leh i la, kan awmna hmun leh kan tih ṭhin te chu chhuang taka kan sawi ngam ka ring meuh lo. “Zan khuain hna kan thawk a, weekend-a ruih loh hi chu a uiawm e” ti a inthiam lohna pawh nei miah lova sawi chhuak phawng phawng ṭhinte nun hi han chik chiang i la, kohhrana inhmang tak an vang hle. Kohhranah inhmang ve tawh ṭhin mahse mahni thu duh mi, kohhran tan leh Lalpa tana ṭhahnem ngai tak a thawk hram hram duh mi an ni lo chawk. Thinlung leh ṭhahnem ngai taka kohhrana inhmang ṭhin leh Lalpa rawngbawlnaa tih tak zeta bei ṭhintute hi tlu leh ṭhin mahse an thil tihsualah an inthiam thei lova, inthlahrung takin an awm ṭhin a. Tisual nawn leh ṭhin mahse an inthlahrung tawlh tawlh a, Pathian thu lamah an tuihal a, a tawpah chuan Lalpa hnenah an kir leh thin.

Tum khat chu kan ṭhian zahovin Camp-ah kan lut a, counsellor pakhat chuan kan ṭhian pakhat chu thu a zawt a. “Camp a i lo luh chhan hi i fel vang nge, i sual vang?” tiin. Ani chuan, “Ka sual vangin” tiin a chhang let a. Counsellor chuan, “Engvanga sual nge i nih? I nu leh pa vang em ni?” tiin a zawt leh a. Ka thianpa chu a ngawi vung vunga, “Ka nu leh pa vang ka tih dawn chuan ka pa hi Pastor a ni a, ka nu lah ṭawngṭai mi a ni bawk si a, ka nu leh pa vang chu a ni lo phawt a. Ka awmna hmunin a zir loh vang a ni” tiin a chhang leh a. Counsellor chuan, “Khawi hmunah nge i awm ṭhin?” tiin dilchhut takin a zawt leh a. Ani chuan, “Zu zawrhnaah” tiin a chhang a. Counsellor chuan, “A hma aṭang tawhin zu hi i duh ve hrim hrim em ni?” tiin a zawt zel a. Ani chuan, “A hma chuan zu hi ka in ngai lo. Ka ṭhian kawm zir loh vang a ni. Ṭhian ngaina mi ka ni a, ka zin te hian ka chhungte aiin ka ṭhiante ka ngaina zawk ṭhin. Ka ṭhian kawmte hi zu in deuh vek an ni a, zu zawrhna hi an awm tamna ber ṭhin a nih vangin ka zui ve zel si a; ‘In ve rawh’ min tiha ka duh loh hnuah ‘no khat chiah’ an ti leh a, ka la duh loh cheu hnuah pawh ‘lem khat chauh’ an la ti hram ṭhin a, chuvang chuan ka in ve phah ta a ni.” tiin a chhang a.

Mi tam tak chuan kan thil tih sualah kan nu leh pate kan dem leh mai ṭhin. Ni e, nu leh pa demawm tak tak an awm rualin, kan nu leh pate vang ni lovin kan awmna hmun zir loh vang leh kan ṭhian kawm zir loh vang zawka thil sual ti ta hi kan tam zawk ka ring. Kan awm duhna hmun/kan ngainatna hmun leh kan ṭhian kawmin a zir loh chuan mifel sa pawh kan sual thei a, kan awm duhna hmun/kan ngainatna hmun leh kan ṭhian kawmin a zir phawt chuan misual sa pawh kan fel thei a ni tih hi kan hriat reng a ṭha. Chuvangin kan awm duhna/kan ngainatna hmun leh kan ṭhian kawm duhzawngte chenin kan thliar thiam a ngai a, kan duh tui ve deuh a ngai a ni. Kan Pathian khi ‘LALPA, LALPA’ tiin kan ko fo ṭhin a, mahse kan nunah thu a va nei leh si lo ve! Kan nunah kan va laltir chuang si lo ve! A duhzawng ti lovin kan duhzawnga thil tih hi nuam kan ti zawka, chuvangin ‘LAL LO PA’ ti ta zawk i la a dik zawk ka ring. LALPA kan ti dawn a nih chuan kan nunah hian lalna leh thuneihna pumhlum i hlan ngam ang u.

Pathianin a thil siam zinga ṭha a tih leh ama anpuia a siam mihring, Adama leh Evi chu ei tur, thing tin reng rah awmna hmun Eden huanah amah nena lengza turin a awmtir a. Mahse Pathianin Adama hnenah, “Khawiah nge i awm?” a tih khan Adama chuan, “Huana i thawm ka hria a, saruaka awm ka nih avangin ka hlau ta a; tichuan ka biru ta a ni,” tiin a lo chhang anih kha! An ei tura thing tin reng rah awmna Eden huan kha an biruk nana siam a ni lo va, anmahni siamtu nena hlim taka lenna hmun atana buatsaih a ni zawk. Mahse biruk nan an hmang ta a nih kha! A chhan chu, thing tin reng rah an ei tur a tana a dah zingah pakhat an ei loh tur mai ni lovin an ei ni la la a an thihna tur thing rah a dah tel thu a hrilh vek hnuah ei loh tura a tih thing rah chu an ei avangin an biru ta ang khan; keini pawh ei tur leh in tur tam tak min pek zingah kan taksa tana ṭha lo leh chatuan thihna min thlen theitu, ei loh tur leh in loh tur min hrilh chu kan eiin, kan in tak avangin a hmaa kohhran leh khawtlanga inhman nuam ti em em ṭhin kha tunah chuan inthlahrunnain hmun a khuar ngheta, kohhran hruaitute leh khawtlang hruaitute hlauvin biruk a lo ngai ta. A hmaa min hmangaihtute leh kan ṭhian ṭha ten hnutiang min chhawn a, hmangaihtu leh kawm tur ṭhian ṭha kan vai zo ta. Mahni inchhung khurah pangchang tak leh ngampa takin kan awm ngam loh phaha, inthlahrung reng rengin mahni inchhungah pawh awm a lo ngai ta a. Ar-in a chuk tur buh pho ven a ngai ang maiin ven ngaiin kan awm phah hial ta anih hi.

Tin, Adama leh Evi kha thing rah tin reng mai ei tur awmna hmun Eden huanah an biru ang khan, nang leh kei pawh Lalpan thing tin reng rah; damna, hriselna leh sum leh pai mai bakah malsawmna tin rengin min vur a. Mahse dam lovin damna a chan avangin a rawngbawl nan a taksa chu hmang lovin damna petu chu a hlat leh si a. Hrisel taka awm te pawhin hriselna petu tan a hun hmang lovin ama hlawkna umin a tlan ta zawk a. Sum leh paia malsawmna dawng ten a petu hnena pek let leh aiin khawvel hlimhlawpna leh nawmchennaahte leh party-na hmunah an pheikhai then a zang zawk bawk a. Damna, hriselna leh malsawmna petu aiin a thil pek kan buaipui zawk niin a lang. Chu a thil pek kan dawnte chu amah hnaih nan ai mahin amah hlat nan leh biruksan nan kan hmang zo ta. A hnuaia hla siamtuin a lo tih anga nun neitu hi Lalpan a zawng mek a ni:

Thil petu, i thil pek ni lovin,

Thil petu, nangmah zawk ka duh che;

I thil pek ka enin, nang ka theihnghilh ṭhin che,

Thil petu, nangmah zawk ka duh che.

“Thil ṭha ti atan Krista Isuaah chuan siama awmin ama kut chhuak kan ni si a; chu thil ṭha tih chu kan awmna turin Pathianin a buatsaih lawk a ni” (Eph. 2:10) tih ziak angin sual ti tura siam kan ni lova, thil ṭha ti tura siam kan ni a, chu thil ṭha tih chu kan awmna tur chu a ni tih hi i hre reng ang u. Khawiah nge i awm? ti a zawhna hi thil sual titu tan chuan hlauthawng tak leh inthlahrung takin chhuanlam siamin chhan a ngai ṭhin a, thil ṭha titu tan chuan chhan nuam tak a ni thung. Ka inkhawm, bial fannaah ka kal, hla zirnaah ka awm, ṭawngṭainaah ka kal, kohhran hnatlannaah ka kal etc.., tia huaisen taka kan chhan ṭheuh theih nan kan awm duhna hmun duh tui deuh i la, chu hmunah chuan eng ti tura awm nge ka nih tih hi hrechiangin kan ṭhian kawm duhzawng pawh duh tui ve tawh i la. Kan awm duhna hmun leh chu hmuna kan thil tih chu Krista Chanchin Ṭha nen lo in mawi zel rawh se.

Chhiartute Lalpan malsawm che u rawh se, Amen.

- Alex ZL. Hualngo

ZU RUIH

“…Buai, mangan, retheih, tlakranna thlentu;

Nun titawitu, tualthahna nen,

Hnam mualphona, sual tinreng bul a lo ni e.”

tia Pi Lalsangzuali Sailo hla kan sak liam ṭhin, ‘Zu’ leh a ‘Ruih’ chungchang hi pehhel kual ṭit ṭet lovin i’n luhchilh tak tak teh ang.

Zu chu eng zu pawh niin, eng aṭanga siam pawh ni se, ethanol/ethyl alcohol a tel tawh phawt chuan mihring te tan ruih theih a ni ta phawt a. Whisky a ni emaw rum, vodka a ni emaw, rakzu, buhzu, grape tui sawr (wine), beer te thlengin mihringin a ina a ruih theih miau chuan a huam vek. Dawidim telh leh telh loh lam a ni lo a, zu leh uain hi sawi hran theih pawh a ni lo.

Chu zu chu a ṭangkai zawnga hman chuan thil ṭangkai tak a ni tehmeuh a. Hmasang Thuthlung hlui hunah pawh vawi 194* kan hmu a, “Pathian leh mihring tilawm ṭhintu ka uain..” ti hialin Roreltute 9:13-ah pawh kan hmu. Hman thiam chuan mihringte tan chaw ṭha tak a ni thei a, sipaite pawhin ṭangkai taka hmangin an ration pakhata an dawnzia pawh kan hre ṭheuh awm e. Mizo nunhlui lamah pawh hmanlai kan pi leh pute nun nen inzawmna thuk tak a neih thu kan hmu. Kȗt ni vangthla leh chawngchen nikhuaah te, pasalṭha tlawmngai huaisen chawimawina an hlan ṭhin pawh ‘zu nopui’ ngat a ni.

Mahse hetia ka sawi avang hian zu ruih sawi mawi turah min lo ngai ringawt suh. Pi pute nun ka sawi pawh khi ka la sawi zo lo. Khatiang khawp khan zu leh an nun kha inzawm nghet angin lang mah se, tunlaia zu in mi leh zu in sawi mawiho angin an nawiin an zahpuiawm ve lo va. Kȗt ni vangthlaah intihhlim nan zalen takin in mah se a hun lovah an in ngai lo va, ruih nan an in bawk hek lo. Hunpui nikhuaah hlim takin an inhoa, khual ṭha inlawmnan hahzute an inzuktir ṭhin, sechhun khuangchawinaahte an leklam hle a, mitthi inah te pawh zubel an pu lut ṭhin. Mahse rui buai an awm kan hre ngai lova, mahni inthunun zo lo khawpa rui chu mite nuihzat leh khawtlanga mualphona nasa tak a ni zawk.

RUIH

Zu chauh ni lovin thildang pawh a ruiha ruih hrim hrim chu engmah ṭha leh nuam a awm awm lo ve, kuhva ruih a hrehawm a, motor ruih a hahthlak a, party ruihchilhte paw’n khua an hmu lo va, mawi leh mawi lo lah an dawn seng hek lo. Sakhaw ruihchilhho lah âtna chi khat, mahni mihringpuite tan pawha hnawksak an tling a. Tunlai khawvela firfiak pawl chimawm tak takte pawh sakhaw ruihna aṭanga rawn irhchhuak ti ila kan sawi sual lovang. Chutiang zelin zu ruih pawh hi a ropui lua lo mai pawh ni lovin hmuhsitawm a ni. Sap thufing pakhat chuan, “zu ruih hi mahni duhthu ngeia mi â a insiamna a ni” a lo ti hmiah bawk. Âtna a thlen thei (Jer. 51:7) a, nuihzatbura mi siamtu a ni (Thufingte 20:1).

Ngun takin han chhut neuh neuh ila a hman ṭangkaina chu awm bawk mah se, a tam zawk feah zu vanga chhiatna leh buaina thleng ka hre tam zawk tlat zu nia! Chawei tuina tih thu belhchian dawl lo te hi… Mi fing leh mi thiam, changkang taka zu in ṭhinte ngei ngei pawhin keinina ‘saa-kaung’ kan tih hi rilṭam laia in a ṭhat loh thu an sawi fo. Pumpui na thlen theitu leh chawei tuina ni lovin chawei tui lohna a ni zawk. Ui sa tuizia hahipa sawia ui talh, zu inho hi han belchiang ila, an ei tak tak hmain zu an ruihsana, tui titaka ei thei pawh zuk awm leh ṭhin si lova, a tuina (taste) tak tak hre chunga eitu chu an bula an nupui fanaute emaw an ṭhian zu rui ve lo te kha an ni leh daih! A ruia te chuan nawi fein hmelchhiat belhchhah zetin an chahthlaksan vel mai mai ṭhin.

Tin, zet-u-zu hi ethanol tam dan leh siam dan azirin chi hrang hrangah an ṭhen a lo ni awm a. Distilled spirit an tih whisky, rum, vodka, brandy-ah te hian a tlangpuiin 40-75% ethanol a awm a, wine chi hrang hrangah hian 12-22% ethanol a awm. Kan uar em em BEER-ah hian 8% ethanol vel a awm a (Beer bur pawn lam label-a inziak ai hian a takah alcohol awm zat hi a lo tam fo ṭhin – www.livescience.com), local zu/rakzu kan tih mai ṭhin tui pawlh lohah 20-45% ethanol a awm thei a, grape wine an zawrh chhuahah hian 18% thleng te a awm thei bawk.

Chu zu chu kan in hian kan pumpui leh ril bangah te a inchiah zawp (absorbed) a, chuta ṭang chuan kan thisenah lutin thisen zamah a kal kual ta ṭhin a. Thisen zam aṭangin thinah a lut leh a, chutah chuan kan thina enzymes chi khat alcohol dehydrogenase te chuan chemicals chi khat, tur hlauhawm tak acetaldehyde an tihah a lo let ṭhin. Kan ruih ber chu acetaldehyde hi a ni a, zu ngawl veina thlentu leh zu avanga natna leh harsatna chi hrang hrang thlentu a ni bawk.¹

Zu ruih ṭhin avanga a ngawlvei ta leh chumiin natna a ken tel vei te chu i hmu ṭhin a ni lo’m ni? Hnar ṭawk hler hlur, hmai puam el ul sen ter tur, hnathawk peih tawh si lo kut khur dur dura chiri, nunphung pangai ang thei tawh lote dinhmuna din ve i duh chuan han in rui chhap zel teh le. I chan tur chu Bible-in a lo sawi diam tawh. Thufingte 12:33 “I mitin thil mak takte a hmu ang a, i thinlungin thu chaltlai takte a chhakchhuak ang..”. I hriain i hmu ve fo tawh ṭhin em? Ramhuai tereuhte te hmua an tihbuai fo ṭhinte kha zu rui/zu ngawlvei te an ni ṭhin a ni lawm ni? A tirah ngawlvei tumin an in bik lo. Chhungkuaah, khawtlangah, kohhranah mawilo tak taka ṭawng a, ṭawng chaltlai tak tak chhakchhuak ṭhin, buaina chawk chhuak ṭhinte hi ‘zu rui’ ṭhinte an ni reng lovem ni?!

ZU RUI ṬHINTE BIBLE CHANG ṬANCHHAN

‘Zu’ ṭhat lohna sawi changa a in miten Bible chang innghah nana an lakchhuah ve chhen hi i’n bihchiang lawk teh ang.

(1) Johana 2:1-11 “Kanan khuaa Inneihnaah Isua’n uain a tipung”

Bible-in Zu leh Uain a sawi dan hi i hrefiah ang u. Hebrai ṭawngin Zu leh Uain sawi dan chi 3 a awm a:-

• Yayin: Greek-in ‘Oinos’ tih a ni tlangpui, Sap ṭawngin Wine an ti a, Uain tihna a ni.

• Tiros: Sap ṭawngin New Wine an ti a, Uain thar, Uain thlum (ruih theih loh) tihna a ni.

• Sekar: Sap ṭawngin strong drink an ti a, Zu, Zupui, Rakzu tihna a ni.

Heng Zu chi thumte hi thliar hran thlip thlep har mah se, Sekar tih hi chu a ṭha lam sawi nan Bible-in a hmang lo hrim hrim. Keinin zu kan tih Whisky, Rum, Beer, Zupui, Rakzu etc. te hi eng hming pawh vuah mah se, Zu (alcohol) a ni vek. Hengte hi a ṭha lama hman a ni ngai lo.²

Bible hian Uain (wine) leh rakzu (strong drink) hi a hrang deuh hlekin a sawi ṭhin a. Uain chungchang vawi 228 a sawi laiin zu pangai chu vawi 19 chiah a sawi thung. Wine-ah hian alcohol tlemte lo awm ve pawh ni se, Thuthlung thar (Kana khuaah ngei pawh)-a an in ṭhin hi tui no 3 leh uain no 1 inpawlh a ni tlangpui a, chaw nena an in ṭhin, an ‘antui’ ve mai a ni. Rui tur chuan no 22 vel in a ngai an ti hialº. Refreshment-ah grape tui- Tropicana leh Real Juice i in tel ang ṭhin lekah khan ngai la, a nih loh leh KFC i ei a lem tinuamtu atan Pepsi tui ti taka i in tel angah khan ngai la a fuh zawk hial awm e. Zu in leh ruih bȗng bȗng hi Biblein a kalh loa ngaih phahna tur lam a nih hmel loh.

(2) Tirhkoh Paula’n Timothea hnenah damdawi atan uain a chawh.

Ni reng e, ṭangkai taka hmang duh tan chuan damdawiah te hial pawh a hman theih ang chu. Thil reng reng hi a lutuka tih chuan thil ṭha pawh thil tha lovah a chhuak thei angin zu pawh ‘thil’ a ni ve mai a, amaha a awm mai mai kha a va sual lova, a va ṭha tehchiam chuang lo va, a hmangtu thinlung leh a hman dana kha a ni pawimawh chu. A hrim hrimin helai bung leh chang hi i’n bih chiang reng reng teh ang.

“Tui chauh in mi ni tawh suh la, i pum avang leh i dam loh fo avangin Uain tlêm tê hmang ṭhin ang che” (I Timothea 5:23). “Uain tlêm tê hmang ṭhin ang che” tih khi “in la, rui ṭhin rawh” tihna a ni reng reng lo. Pumna damdawi Digene tui (syrup) hi tuman no 3/4 velin an tlak pawp pawp ngai lo, chhin 2/1 tein an in ṭhin. Khuh/awmna damdawi te pawh Doctor in tlêm tê, chhin 2/1 vel lek leka in turin an chawh ṭhin. A bura tlak pawp pawp chuan ruih nan an hmang a, Drug abuse (damdawi hman khawloh) a ni daih tawh, chu chu dan phal loh a ni. Zu ruih duh vanga henglai thu lo lakchhuaha, ṭanchhana hman ve ringawt hi a fuh viau lovang. Lehlamah chuan Bible bung leh chang ṭanchhana hman nachang an la hriat ve hrim hrimna kha a lawmawm fu a, an la bo thui lutuk lo tih a hriat, Bible zahna chang êm te chu an la hriat ve avangin.

Chutia Bible bung leh chang kan lakchhuah dawn chuan, mihringte phuahchawp mai mai ni lo, Bible ngeiin a ziah aṭangin zu rui ṭhinte dinhmun chu tlêm tê i’n en ve teh ang u.

a) Pathian ram luah theih lohna a ni (I Kor. 6:10) : “Zu ka in ṭhin avanga midang aia ka sualna bik ka hre lo va, a in lote an felna bik ka hre lo” i ti maw? Hre lo chungin Pathian ram i luah ve thei dawn lo tihna a lo nih reng chu le! Tun aṭang chuan lo hre ve tawh rawh aw, a chhan chu I Korinth 6:10 list-ah hian chiang takin a ziak si a.

b) Midangte tluktirtu a ni (Rom 14:20) : Zu rui ṭhenkhat hian inti Pathian thu hre deuhin, “zu ka in vang hian ka chhandamna a bo thei lo” tih te an ching a, mahse an zuruih avang khan an fate emaw, an chhehvela mite an tluk phah chuan atan sualna a ni thei tih chiang takin kan hmu.

c) Hnam mualphona a ni : Afghan pa pakhat chuan ka beng hriat ngeiah “nangni lam mi (Chin) hmeichhia ka kawm tawh 90% hi chu zu ka inpui hnuah ka mutpui theih vek an ni” a ti. Zu an in hma chuan mutpui an duh kher bik lo, mahse an ruih hnu chuan insum theihna an lo nei tawh lova, Joela 3:3-a mi angin mualpho takin hnamdang (Afghan) mutpui theih an lo ni ta vel mai mai ṭhin a nih chu. Zu hian min va timualpho thei tak em!

March 2015 khan Dabri Police Station-ah Police pakhat chuan, “in nulate zu rim nam ther therin zanrei deuh deuhah an vak a, an kalna han zawh hian ‘Churh-ah programme kan nei’ an ti ve ziah lehnghal. Church ah hian zu in leh party in nei ṭhin em ni?” tiin min zawt tawh bawk. Chung zuruiho chuan kan hnam leh kan Kristianna an tihmualphozia chu in hrethiam ve mai em?

Genesis 9:18-28 ah Nova zurui mu sual saruakna tihlanin a awm a, a tupa Kanaana’n a pu anchhia an dawn phah tak thu kan hmu. Tin, Gen. 19 ah Lota chu a fanu ten a hrai ruih hnuin an inmutpuitir a, an thlahte Moab leh Amon chu hnam anchhe dawng an lo nih tak thu kan hmu bawk. Zu Ruih avang hian a hnampum tan pawha thil pawi tak a va thleng thei tak em!

Zu in mite an uiawm!

Chhiatni ṭhatni leh mitthi lumenna, thlanlaihnaah te inti mifel aiin zu in mite an tlawmngai zawk tih ṭawngkam hi kan hre fo ṭhin. Zu in mi a nih vanga fel leh tlawmngai a ni lo va, amah kha mi fel leh tlawmngai chi hrim hrim a ni zawk. Zu in lo phei sela chuan kohhran leh khawtlangah pawh hruaitu fel leh tlawmngai tak ni thei tur kha, zu rui duh tawk leka mawlnain a hneh zawk avangin tuma hriat hlawh loh level hniam, mite bawla awm kual vel mai mai a ni ta a nih kha! A va uiawm tak em! Kohhran leh khawtlanga a dinhmun sang tak tur kha zu vangin a luah pha ve ta si lova, tuma hriatzui hlawh lovin a thamral ta chu a ni.

Delhi khawtlangah ngei pawh hian lehkha thiam, mi fing, ṭawng thiam tak tak, mahse zu-in a tihbuai avanga dinhmun sang luah zo ve ta lo an tam mai. Foreign an kal liam hnuah pawh an thiamna chu sang hle mah se, kohhran leh khawtlangah kan hre zui ve ngai lo. Bible-in “sum tam tak aiin hming ṭhat hi thlan zawk tur a ni” a tih hi an chang zo ve ta si lova.

Zu Rui Mite hi Mi dawihzep leh mi hnuaihnung an ni!

Kohhranah hruaitute rorel dana an duh loh leh ṭha lova an hriatte hi rorelnaah emaw harh fim pangaiin an sawichhuak ngam ve si lova, huaisenna turin zu an han in rui te tea, zu dawiin a chiah ât hnu, mihring pangai an nih phak tawh loh hnuah an rilrua an vei te chu an han chhakchhuak ve ta ṭhin a, mi khawngaihthlak tak an lo ni. Han khinglet dawn ila mi â khinglet kan ni dawn bawk si. An harhfim hnuah han ti dawn ila, “ka ruih vang a ni” tiin zu kha thiam loh an chantir daih ṭhin zui! Zu tan pawh hian an ngeiawm ṭhin ngawt ang. Chu chu mi level hniamho, kohhran leh khawtlanga mi chuan-hnuaiho an ni tlangpui a. An tih theih tawk chu mi chanchin sawi chu a ni. Sap thufing pakhatin, “Great minds discuss Ideas; Average minds discuss Events; Small minds discuss People” (mi fing chuan ngaihdan an sawi a, mi vantlang chuan thilthleng chanchin an sawi a, mi hnuaihnung chuan mi chanchin an sawi/mi an rel ṭhin) a lo tih ang khan.

Lehlamah chumi ep chiah chuan, Kohhran leh khawtlang hruaitute zingah ‘zu ruih’ hmang an lo awm ve thei tho bawk a, member satliahin a lang a pauin an in a, mi vangtlang chunglam deuhin style deuhhlek leh a rukin an inho a ni mai a. Member satliah zurui hovin kohhran/khawtlang hruaitute zahna chang an hre lo leh, ualau taka rui chunga dengkhawng taka an ṭawngkhum ngam ṭhin nachhan pawh hi han chhui chiang ila, hruaitute zingah rui (a ruka rui leh a ruk lova rui te pawh) an hriat vang a lo ni ṭhin. Rui ṭhin ve ve chu an lo inhre ru ṭhȗm si a, han inzah der vak bik tur chuang an awm miau si lo alawm.

“Kohhran, Department-a rawngbawltu ni si, zu in ching chu mi nalh taka inchei, a hnunglam ena, ‘Eheu’ tih, a hmalama ‘A ha’ tih ang vel a ni.” tiin fiamthu thawh nan te an lo hmang thin a. Kan Bible phei chuan fiamthu lovin kohhran hruaitu leh roreltute tana zu in a duh lohzia chiang takin a ziak (Thufingte 31:4, I Tim. 3:8).

Kohhran hruaitu, Women Dept., Youth Dept. leh NSS hruaitu lawk leh challang tak ni chunga ualau taka zu ruih ngam te, zu kam nam chunga Biak Ina kal ngam te, zu in tur thu kohhran group-a uangthuang deuha post ang chite hi sim nachang hriat a hun ta khawp mai. Mihring kan zah peih lo a nih pawhin Pathian tal chu i zah hram ang u. Kan nghei theih loh leh rawngbawlna aṭangin bang ngam ila, Bible-in zurui mite tawrh tur a sawi kan tawrh thleng rakin rui chhap chhap zel ila a nimai alawm.

“Tute nge chungpik ṭhina, tute nge lungngai ṭhina, tute nge inhau ṭhin? Tute nge thubuai nei ṭhina, tute nge a vang awm lova hliam tuar ṭhina, Tute nge mit sen rem rum ṭhin le? Zu hmuna awm reng ṭhinte, Zu chawhpawlh in ṭhinte an ni.” (Thufingte 23:29-30).


FootNote:
*Uain/Zu chungchang Bible-a kan hmuh dan – Rev. Dr. K. Lalrinthanga
¹Zu tha a awm lo - K. Vanlaldinpuia, Dept. of Chemistry, NEHU
²Zu Ṭhat lohna – C. Tlana
ºZu leh Ruihhlo: Thlarau nun a nghawng dan – RE Ralte Blog

-Nanaua Chawngthu

NUNNA TUIKHUR : MAY 2016 : EDITORIAL

“Bawihte, i nat ai hi na thei ila ka va ti em?” tia an fate dam loh natna zawng zawng pawh hmangaihna avanga tawrh huam ‘Nu’ hmangaihna thuk tak, he khawvel hmangaihna zawng zinga thuk ber leh rulh let sen chi rual pawh ni lo hmangaihna dawngtute vek kan ni a. Nu tellova kan pian theih miau loh avangin. Nute Ni a lo thlen hian hmangaihnaa an fate leh chhungkua kuahkhawmtu Nute zahna chibai kan buk a ni.

Kum a vei a, dan pangaitein Mother’s Day chu kan lo thleng leh ta a. He hun a lo thlen apiang hian he Nunna Tuikhur News ngeiah pawh Mother’s Day lo chhuah dan ṭobul leh a chanchin mithiamte ziah kan chhiar fo ṭhin. Nute hlutna leh hmangaihna lam hawi pawh kumtin kan chhiar ṭhin bawk.

Tun ṭumah chuan heti zawng hian thu i’n kaiher dawn teh ang. Mother’s Day kan hman ṭhin hi a ṭobul kan thlir pawhin ‘Hmeichhiate Ni’ ni lovin ‘Nu’ thisen pal tawh, rila rah fanauten ‘ka nu’ tia an koh leh chu hawrawp pahnih lek ‘Nu’ tihin a ken tel mawhphurhna sang tak chelhtute pual a ni a. Mizo Upain, “Hmeichhe nau vei leh mipa lo vat chu hlang chunga chuang ang an ni” an lo ti mathlawn lovin, harsa taka fa nei an ni. Chu’ng an harsa taka an neih an rila rahte tana hmangaihna thuk tak chu Nu zawng zawng hian an neih tlangpui a rinawm.

Chutih rual chuan ‘Nute Ni’ a nih anga Nute chawimawina dawng ve ṭhin zingah hian Bible-in Kristian Nu Ṭha a tih phawkchhuak zo hi engzat tak awm ang maw? Nu chuan inchhung khur a vawng nung em, a tinuam em? Pasal a neih dan aṭang rengin bul a ṭan fuh em, ruk rukin em ni bul a ṭan? Rinna kawngah a puitling em? Kristian chhungkaw din duhtu Nu a ni em? Mahni nawmsakna leh hlimna ngawt aiin a pasal fanaute a dah pawimawh hmasa zawk ṭhin em? Khawvel finna leh thiamna lamah chhuan tur nei lo mah se a fate tan a nun entawn tlakin a thianghlim em? An tan a ṭawngṭaisak ṭhin em? A mo emaw a pasal chhungte chungah a ṭha em? Chhungkaw enkawl danah mahni intodelh tum tlatin, mite bantu ni lovin ṭanpuitu nih a tum zawk ṭhin em?

Famkim lo mihring tan chutiang zawng zawng chu nih kim biai a har maithei. Bible-in nu ṭha leh entawntlak a sawi heng- Hani te, Naomi te, Ruthi te, Estheri te, Abigaili te, Mari, Loisi leh Euniki etc. te nun entawn hram hramtu nih a. Thufingte 31:10-12 in nupui fel leh Nu ṭha chungchang a sawi nunpui tumtu ‘Nu’ nih a pawimawh hle a ni.