NU LEH PA HMANGAIHNA (Competition on parental love)

Mihring hian nu pumchhunga awmlai aţangin enkawlna ţha a mamawh a. Khawvel eng a rawn hmuh phat aţangin a taksa, rilru leh thlarau ţanlennan, hmangaih leh duhsak taka enkawltu nu leh pa a mamawh a. A mizia leh nunphung, a thil duh zawng leh huat zawng, khawtlang nun leh rinna, a nun pumpui khalhtu, a nungchang chu a naupan laia zirtirtu neih hmasak ber a nu leh pa, a lei Pathian chungah a innghah tlat avangin, a tan an hluin an pawimwh em em a. Chu mawhphurhna la theitu awm chhun pawh a nu leh pa te chauh an ni.

Naupang chuan zirtirna a dawn tam poh leh a felin a nun dan a mawi dawn tihna a ni. Chu zirtirna rah chhuah chu midangte-ah hmangaihna leh duhsakna vekin a rawn par chhuak ţhin a, amah kaltlangin miten malsawmna an dawng ţhin. Chu hmangaihna chu inpek theih leh lei theih a ni lo va, khawvel thiamna hmanga siam theih pawh a ni lo. Pathianin chhungkaw tinte inpumkhatna atan a pek a nih avangin khawvel in a pe thei lo va, awm pawh a awm thei lo. Chu hmangaihna chuan, fate rualawh leh retheih hlauin a thim a var pawh thlu lovin, kawla ni chhuak chhiarin, chala thlan tui far zawih zawihin hna a thawhtir ţhin. Hnuntui ngaiin nau a lo ţap ang tih hlau reng rengin an lo sul haw pawh hmanhmawh takin an kal vat vat ţhin. Nu chu ţulin phibuai hle ţhin mah se, hnuntui ngai a nau a ţah tawh chuan, a thiltih laite kalsanin hnute pein chaw a hrai ţhin.

Naupang tam tak karah pawh mahni fate ţap ri chuan nu beng a verh ver thin a. Nau-in hnute a hnek laite hian nu thinlung chu hlimnain a khat a. Ţawngtheilo leh piangsual, kuttual hleichham leh natna khum-beta kan awm lai pawhin hmangaih leh lainat takin min enkawl ţhin. Kan khawhar hlau-in min kawm hlim ţhin a, hmangaihna chuan ţhawngaleivir angin min vel chhuak vek a, chuvangin mihringte’n nuam kan tih leh kan thlakhlelh ber pawh an bula awm a ni.

Retheih leh hausak, rilţam tuihal kan tawh lai pawha thlamuang taka min awmtir theitu chu kan nu leh pa te chauh an ni. Hei hian chhungkua hlimna leh nawmna hi in leh lo, sum-pai ah ni lovin, nu leh pa te-ah a inghahzia a tifiah hle. An neih zawng zawngin min enkawl mah se, a man min dil let leh ngai lo te hi hmangaihna mak mawi leh duhawm a va ni tehlul em! Nupui/pasal leh ţhiante inhmangaihna hi thuk hle ţhin mah se tawp chin a nei a, a ţanghma sialin, beisei let a nei ţhin. A beisei anga a dawn let loh chuan chu hmangaihna leh induhsakna chu romei iangin a tham ral leh mai ţhin.

Nu leh pa hmangaihna erawh chuan, phut let a nei lo va, pumrua leh hmel a en lo va, kan nihna ang angin min hmangaih mai a ni. Fate’n thihna kotlang an din laite hian, an nun chhan nan neihthinglung-khawng an huam a. Pathian lam an hawina tur a nih chuan engkim chan an huam a ni. Chuvangin an hmangaihna tlukpui hi khawvelah a awm thei lo a, nu leh pa hmangaihna hi engmahin a tidanglam thei lo. Nupa chu inţhenin, kawppui dang neiin, hmun dangah awm daih mah se, fate erawh chuan an thinlung an luah reng ţhin.

Tin, nupa inhmangaihna chu ţawngkam inbahsual leh pakhat zawk rinawm lohna avangin a reh leh mai ţhin. Chuvangin, fate hmangaihna hi nupa inkar inzawmna aiin a inthlung nghet zawk. Tin, pianpui unaute inhmangaihna pawh ro thil leh an kawppuite boruakin a sawi danglam thei bawk. Ram leh hnam tana zalenna sualtute paw’n nunna hlan ţhin mah se, an beisei anga thil a kal loh chuan, a tawpah rawng takin an che ţhin. Faten sual rawngbawlin, nawmchenna khurah tlan lut ţhin mah se hmangaihtu thinlung chuan a ngaidam zel a. An thiltih angin an thungrul ngai lo va, an neih rohlu ber pawh an pe phal zawk a ni. Chuvangin, nu leh pa hmangaihna chu tiam chin nei lo, tawp chin nei lo hmangaihna a ni.

He hmangaihna hi khawela hmangaihna ţobul, englai maha inthlak danglam ngai lo a ni. Hmangaihna chu hmangaihna vekin chhang let lo mah se, a hmangaih reng tho ţhin avangin a danglamin a hlu bik a ni. Fate hmangaihna hi pa-in nu a hmangaihna leh nu-in pa a hmangaihna aiin a thuk zawk. Thisena nun inzawm an nih tlat avangin nu leh pa rilru chu hliam ţhin mah se, hmangaihtu thinlung chuan a ngaidamin, tan in thim leh thihna kotlang thleng pawhin chatuan nunna an neih theih nan Pathian hnenah mittui nen an um zui zel zawk ţhin a ni. Nu leh pa hmangaihna chuan an lo pian phat aţanga upat thlengin a hmangaih a, an lo upa deuh deuh a, an hmangaih tulh tulh mai zawk a ni. Chu hmangaihna chuan thlei bik leh duhsak bik a nei lo va, tihtawp sak leh bantir theih pawh a ni lo. A chana chan fiah chi a nih avangin mihring ţawng hian a sawifiah zo lo. Chuvangin nu leh pa hmangaihna hi khawvela ropui ber a ni.

Nu leh pa hmangaihna hi fahrahte dinhmun aţang hian a fiah lehzual. Nikhaw hriathma chuan a danglamna a tam lo. Mahse, thing delh loh lung delh loh nafam chu an rawn seilian ve a. Naupang dangte ang bawkin tlai ni nemah tual chaiin an han hlim ve thin mah se, ni a lo tlak meuh chuan a ţhiante’n an nute an han ko sap sap a. Ani erawh chuan ‘nu’ ti a koh tur a neih ve loh avangin inthlahrung takin ţhutthleng sir kil lam chuhin a chhungte mitmei vengin a ding zum reng ţhin. A ţhiante’n an nute mal chunga an mut huat huat a hmuh changte hian a rualawt hle ţhin.

Hunpui lo thleng turte hi a va huphurhawm em! Krismas kawr mawi leh naupang lawm te hi tu lo hmuhchhuah kher kher nge ni? An dinhmun hi a va’n lainatawm tak em! Ei-in leh silh-fen, awmna tur in nei ve mah se, an thinlung erawh nu leh pa hmangaihna chakin a rum reng ţhin. Fahrah enkawlna hmunah nui-in ţhenrual pawl ve ţhin mahse hlimna tak tak an hmu ngai lo va. Heng naupang khawngaihthlak leh chanhai takte hian an zai lai leh lam laite hian hlim angin lang ve ţhin mah se, an thinlung erawh hmangaihtu ngaiin a tuihal reng thin a. Hmangaihtu ngai reng rengin tlai ni an vui liam thin. An thiante’n ‘Nang fahrah, nu leh pa pawh nei lo’ an tih changte hian an rilru na-in lungchhe takin an ţap a. He dinhmun khawngaihthlak tak hian an rilruah mahni insitna chatuan ser nung a siam sak ţhin a ni.

Hmangaihna an dawn ngai loh avangin hmangaihna awmzia an hre pha lo va, aia upte zahna an tlachham bawk. Mi ‘ei rawh, in rawh’ tih nghaka seilian an nih avangin mahni inrintawkna an nei lo va, mi karah inthlahrungin an inkiltawih em em ţhin. Hmuhsit leh endawng an tawrh ţhin avangin an rilru a no-in an thlaphang hma em em a, chu chuan zirna lamah a tihhnufual phah ţhin. Khawngaihtu han dawng ve ţhin mah se, hmangaihna dik tak Pathianin leia a dah ang erawh an dawng thei tawh lo. A chhan chu, nu leh pate chauh hi hmangaihna dik tak neitu awm chhun an nih vang a ni. Chanhaite dinhmun aţang hian mihringte hi hmangaihtu ţânga seilian tur kan nihzia leh a ţulzia a tifiah hle.

Nu leh pa hmangaihna a danglam lehna em em chu: khawvelah mahni aia midangte fel leh thiam zawk duh an awm lo va, a theih chuan thiam ber, ţha ber, hausa ber nih kan duh vek. Mite’n kan ai an thiam a, sum leh paia an hlawhtlin changte hian thinlung takin kan lawmpui ngai lo. Mahse, nu leh pa te erawh chuan, an aia kan thiam leh kan san zawk pawhin thinlung takin min lawmpui ţhin. Anmahni aia fing, thiam leh dinhmun sang zawk ni turin min duh vek zawk.

Mahni aia dinhmun hniam zawka fate awmtir duh nu leh pa an awm lo a. Fa ropui neih duh lo tunge awm? Tunge fate thil ţha lo zirtir ngai? Kan rual ban loh hlau-vin, an ei leh in, silh-fen ai lehkha min zirtir zawk ţhin. Mihringte hian min hmangaihtu kan nu leh pate aia kan fate kan hmangaih zawk vek hi thil mak tak a ni. Hei hian kan fate hi he leia Pathian laka kan ro chan awm chhunte an nihzia a tichiang hle.

Khawvel leh mihring nun hi inthlak danglam ţhin mahse nu leh pa hmangaihna erawh kum sangtel atanga vawiin thleng hian a hlutna a danglam ngai lo va, englai mahin a danglam dawn lo a ni.

-Vanlalherliana

KELKANG HARHNA KA HAN CHHIM VE A

Kelkang hi Zahau Lal Liannawla khua a ni a, Ţiau lui thlang lama Zahau lal khaw lian ber a ni. Lal in pawh a lian em em a, a dung hlam 16 leh a vang hlam 5 lai a ni a, a ram a remin fehkawng chhuk chho pawh a awm lova, a ram a ţhat avangin buh leh balah pawh khaw intodelh tak an ni. Champhai aţanga chhimthlang hret mel 10 ah a awm a, a mi chengte hi chi (hnam) buk fâl bik an awm lovin- Pawi, Zahau, Fanai, Tlau, Chawnghlut, Ralte te an ni ber a, Duhlian ţawng an hmang ber a ni.

Kelkang a Kohhran lo din ţanna chu 1912 ah a ni a, tunah hian Presbyterian kohhran pahnih a awm a ni. Harhna lo thlen dan tlangpui chauh lo tarlang ila. Kum 1919-1920 ah harhna hlimpui a lo thleng a, hemi kuma harhna hi a nasa em em a, he harhna an dawn lai hian Lungdup ah an awm lai a ni. Harhna lo thlen lai hi Kristmas lai a ni a, ţahna leh sual inpuanna a langsar hle a, Saidan bawkah buhseng laiin hlimna chu a nasa ta hle mai a, khuang nen thlawhhma an fang chiam mai ţhin. Hlimte chu an khur a, an lam a, sual hriatna an chang a, an inngaina em em a, mikhual haw turte hi ţap chungin an inthlah ţhin. 1919 Christmas-a hlim ţan kha 1920 buhseng an kai a ni.

Kum 1921 ah hlimna sawi tham deuh a thleng leh a, he hlimna ah hian “chhi chhi” lâm hlimna a lo chhuahna bul a ni. A hma chuan ‘chhi chhi’ a telloa, lam pawh ngawi rengin an lâm mai ţhin. Heta ţang hian ‘chhi chhi’ tih hi a lo awm ta a, Zoram hmundangah pawh a thleng rual vek niin a lang. He hlimna hian Kohhran a tiharh thar a, zai a tui a, lam a nuama, zaikhawm a nuam em em a, mitin mai hi tirh ngailovin Biak in lamah an kal zung zung mai a ni.

Hetih hun lai hian Kristian an la tlem em em a, an nun a chep hle. Zankhat pawh Zawlbukah an zai tui em em lâiin lal chuan a ngaithei lova, zawlbukah a kal thut a, an hlau lutuk chu Zawlbuk awkpaka-ah an put chhuak zung zung a ni awm e. An khuang pawh lal chuan a laksak nghe nghe a ni. Mual inkhawm an uar em em a, mualah Pathian thu an sawi ţhin a, mahse lal leh ringlo miten an um darh chum chum ţhin.

Kum 1937 ah hlimna nasa tak a lo thleng leh a, hei hi hlimpui kum an ti bawk. Ţawnghriatloh a lo thlenna bul a ni nghe nghe. 1936 hmalamah khan khawthlang lamah chuan ţawnghriatloh hi an lo nei tawh a. Pu Thanghnuaia, Vandawt khua chu 1937 March thlaah a farnu man ţhing turin Kelkangah a kal a, amah hi mihlim ţawnghriatloh nei mi a ni a, haw leh mai tura zin a ni nghe nghe. Kelkang upa ţhenkhat ho nen an inkawm ţhinin, a thusawi te an ngaithla ţhin a, “kan mikhual hi mihlim a lo ni reng a lawm mawle” tiin, kawmtu an pung ta zel a ni. Ţawng hriatloh a awm thute a sawi a, an kawm tam telh telh a, amah pawh vawi tam tak haw a tum a, kawtchhuah a va thleng a, haw thei ta lo chuan a lo let leh ţhin a, chutiang chuan vawi tam tak a awm nghe nghe a ni. March thla a ral a, April a lo ni leh a, May thla a lo nih phei chuan a thusawi a darh zel a, inkawm chakna, zaikhawm chakna alo hring chhuak ta zel a, a tira mi tlemte kha an lo pung hret hret a, ringlotute chuan an dodalin an hnial luai luai a, mahse kâr lovah lam hlimna a lo thlenga mi 60 lai an tling chho ta a, dan rual lohvin “Kelkang an hlim e” tiin a lo thang ta a ni.

A lo inţan dan chipchiar deuhin: An inkawm khawm ţhinna in neitupa, Pu Thanzinga chuan inlarna ang chi hriatna hi May thlatir lamah tlai khat chu a dawng thar a. Ama khumpui tungchaw bulah chuan chhuatah zangthalin a mu duai mai a, ka a ang huau mai a, a lu a thing nur nur a, “Mi zawng zawng ko khawm rawh u, Pathian malsawmna ropui tak a lo thleng dawn e” a ti a, a mut ngai chuan a mu reng si a. Tichuan an inhrilh darh a, an lo kalkhawm zel a, Pu Thanzinga in chu sumhmun nen, kaiţen nen, an tual zawl zawng zawng chu an khat ta vek mai a, lo sul haw pawh an lo thleng a, an lo kal khawm zel a, mi chevel ena, enge an tih, tih hre duha lo kalte pawh an awm bawk a. Tichuan hla sak tur an ti a, “thisen hlu thisen hlu” tih an thlanga, he hla an sa chiah hi hlimna a lo thleng ta ur ur mai a ni. He hla hi Pathian Thlarau Thianghlim chuan hriak a rawn leih a ni ber e. Zai chu an tui ta em em, ţawngţai thilpek a lo thlenga, an ţawngţai ta chur chur mai a, tichuan a alh chho ta zel a, a chhun a zanin an ţawngţai in an zai ta reng mai a ni. Ram lama hnathawkte pawh lo lamah an ţawngţai a, thlamahte pawh an zai zel bawk a, in lama awmten lo sul hmuah hunah kawtchhuahah khuangpui leh khuangte nen ram lama hnathawkte an lo hmuak ţhin a, a ropui em em a, hlimna chu a fawn hlup lup a ni ber mai. Tichuan July a lo thlen chuan Thlarau thilpek a lo thleng ta chur chur mai a, ţawnghriatlohte, mit-a hriatna, hnar-a hriatna (hei hi rim hriatna ramsa leh vawkte hriatna ang hi) chu chu “a chhi li” an ti. Benga hriatna te, kuta hriatna te, thinlung lama hriatnate inlarnate, lemchannate a ni.

Thlarau thilpek hi hrilhfiah vek lo ila, a ţhen chauh tarlang teh ang. Kuta hriatna ang chi hi lehkha chhiarthiam lo pawh ni se, he hriatna thilpek dawngtu hian Bible chang chhiar turte hi a kutin a khawih fuh chat chat thei a, thlarau chuan an kut kha a rawn hmanga, ţawngţai tur an awmna hmunahte an lu chungah kut an nghat a, ţawngţai tur kha a hriat ta vek ţhin. Ranbo zawnnaah te an hruai a, kut khan a awmna a hruai thleng ve mai ţhin a ni. Mi in-a kal a ţul pawhin kut khan a hruai mai ţhin a, a hmun an thlen khan a fiah mai ţhin. Heng hriatna chang tur hian hlim fe nih loh chuan a chan phak loh a ni.

Ţawngţai thilpek dawngte chuan ţawngţai tur an dawng ţha em em a, an tui em em a, mihlimho chuan an dawng vek niin a lang. Damlo chunga an ţawngţai pawhin an dam dawn leh dawn loh a hriat theih ţhin a ni. Thil lo thleng tur hriatna te pawh an nei ţhin a, an ţawngţai lai khan an sawi zung zung ţhin. A chang ve lo tan chuan hriatthiam theih pawh a ni lo.

He harhna hian Inpumkhatnate, zalennate, thil inpek tawnnate, chaw inei tawnna te a thlen bawka a ropui em em a ni. Heng ri lo chhuahna Amen, Halleluiah, Hosana te hi a keng tel bawk a, an ka kha a rawn tihtir ta mai ţhin a ni.

Tichuan, kum 1965 ah thu lama harhna a lo thleng leh ta a, hei hi Lalchungnunga rawngbawlna aţanga lo thleng a ni a, lam pawh lawm lam a ni a, lam dan a tluanga, hlimna zia a keng tel lo. Hei hi khawdangah pawh a thleng nual a ni.

Kum 1974 ah Kelkang khua Nl. Zaitluangi’n Pathian aw a hre leh ta a, “I rin chuan Pathian ropui zia i hmu ang ka ti lo che em ni?” tih hmangin a fehna ah, a bung ţan tihin boruak ah awin a rawn hrilh a, “chutiang thute engnge i rawn sawi? Setana i ni ang” a ti a. Aw chuan a sawi ngai a rawn sawi leh a, Setana chuan chutiang chuan a sawi dawn emni a ti leh a, “keizawng ka mawl em mai, kei aia mifel an tam si a”, a ti a. mahse ‘aw’ chuan, “kei chu thinlung leh rilru entu ka ni, sawi dan tur chu ka hrilh zel ang che. Kohhran upate hnenah sawi la, in tinah lutin sawi rawh” a rawn ti leh a. Bible chang chhiar tur a kawh hmuh bawka, tichuan a thu dwn ang chuan a ti ta a. Hemi kum hian an hlim nasa ta em em a, an ţawngţai nasa em em bawk a ni.

Kum 1982 ah harhna a lo thleng leh a, hlim thar eng emaw zat an awm a, hlim tawhte an hlim thar leh a, khawlaia thusawi an uar a, tawngtai an uar a, lam pawh an lam nasa hle. Kum chanve vel a awh a, a ropui hle. M.A. val te pawh an tap kuang kuang mai a ni.

Kum 1992 ah Harhna a lo thleng leh a, hetah pawh hlimthar an awm a, hlim tawh te an hlim thar a, khawlaia thusawi an uar leh bawk a, tlaivar ţhak ţhaka Biak ina ţawngţai an awm a, Bethel an uar a, khuangpui nen mi tam tak an bethel ţhin a, he hlimna hi kum chanve vel a awh a ni.

Kelkang hi harhna zia hian a chenchilh deuh reng a, mihlim ho zingah Pathian pawla ṭawngṭai an awm reng thin. Bethel an uar chho zel a, kum 2004 ah phei chuan khawte tlangah Bethel-na (ṭawngṭaina) in an sa ta hial a ni.

Hetiang khawpa harhna hlimpui thlarau ze ken hrang hrang lo thlenna Kelkangah hian hlimna lo thlen avanga hlim ruihna kalsual- innausenna, khurbing, thiangzau, thianghlim famkim, zirtirna diklo, inremlohna etc. a thlen hriat tur a awm lo. Thlir let vang vang pawhin a lo thianghlim mange tih tur a ni.

Pathian chu buaina Pathian a ni lo va, Felna Pathian a ni zawk tih a tilang.

Tichuan, Harhna in vawi engemaw zat a luh hnu- kum 2013 ah harhna a rawn inmung chho leh ta. May 14, 2013 ah Kelkang khua mipa naupang kum 14 mi (Sacrament zirlai) hnenah Pathian thu a lo thleng a, a thu dawn chu simna thu niin, “Zoram pum dengchhuak tur harhna Kelkangah a lo thleng dawn” tih a ni. Khawlaiah a au thin a, mi ¾ velin an zui ţhin. Biak in-ah te, khawlaiah te a au vin, harhna hi a lo thleng chho ta a ni. He harhna, Zoram dengchhuak tur hi hun hnuhnung a ni dawn tih a ni bawk. Tichuan, harhna chu a inmun chho zel a, 12th June, 2013 aţang khan tun thlengin (3rd June, 2015) zantin inkhawm Biak inah an la nei ta zel a ni.

Hetiang hi Kelkang harhna lo chhuahdan tlangpui tak meuh chu a ni a, harhna lo thlen kum hrang hrangah hian, thil ropui leh harsatna lo thleng te tam tak sawi tur a awm. Mahse a tlangpui chauh, Kelkang harhna tih bu aţanga lakchhuah a ni a, sawi tur tam tak a awm a, kan ziak vek seng lo vang. (Thulakna: Kelkang Harhna, buatsaihtu- CHHAWNTLUANGA).

*** Keipawh 21st May, 2015 ah Kelkangah hian ka han kal ve a, Aizawl venglai Kohhrn ho rualin 21st May zing dar 6:00 A.m. ah kan chhuak a, tluang taka kalin 2:00 Pm velah kan thleng a. Aizawl venglai Kohhran hian Bus lian 8 leh mimal motor 11 hmangin, mi 302 kan ni.

Kelkang khaw Biak in kawt zawl bulah, Ţhalai hoin thingpui thlum leh hang tui tak nen mikhual min lo dawngsawng a, hah a dam sawng sawng mai. Mikhual lo awm sa, a thleng thar, a lo kal mek chu ngaihtuah sen chi pawh a ni lo. Kan zi nuaih nuaih mai a, information lam aţangin mikhual hming an rawn lam lauh lauh a, kan thlenna tura min hruai tur mipa naupang a lo lang nghal vat a. Mipa naupang thil leia tirh theih chin chu tumah an awl lo, mikhual semtu an ni vek a ni. Tichuan kan thlenin tur kan thlenga thlen-in nu, Nu Lawmi’n (in neitupa hming ka theihnghilh palh) hlim takin min lo lawm a. Hmai te kan phih fai a, “chawei nghal rawh u” an ti a, “a la hma si a tuna chawei chu.. 4 P.m. chauh a ni si a..” ka ti rilru neuh neuh a, mahse kan ei ta thova, ei khamah inkhawm turin kan kal nghal a. Inkhawm hi 6:30 P.m. ah dar hmasa a riin, 7:00 P.m. ah ţan a ni. Biak in kan thleng chu a chhung chu sawi loh, a pawn takngial pawh kan chang ta lo mai! A pawnah pandal zar chhung chu kan chang hman chiah, an lo khat hmur tawh a, inkhawm tan hma, darkar hnih aia hmaah an khat vek a nih chu!!

Inneituten min lo hmanhmawhpui nachhan a lo lang ta uar uar mai. Aw!! Khatiang reng reng khan tlailam ei tur leh zinglam ei tur buaipuiin, mutmu pawh tuah mumal lo leh buai reng renga mikhual an buaipuina pawh ‘kum khat leh thla sawm’ lai a tling tawh tih kan ngaihtuah thleng ta zel a! An va’n zahawmin, an tlawmngaihna te hi Lalpa hnathawh a va’n ni chiang tak em ka ti rilru ta mawlh mawlh a ni. Chu mai a ni lo, Inneitupa hming ka theihnghilh nachhan pawh ka nikhualoh vang ni lovin, kan thlen tirha ka hmuh bak kha kan hmu tawh miah lova, haw dawnah kan hmu leh chauh va. A chhan chu, tui hman tur kha an indawh chhawk zel a, chu lamah chuan a lo buai chu niin! Sawrkar hnathawk an awm bawk si lova, in neitupa tui buaipuiin inah pawh awm ngai lova, nu ber eirawngbawlin a buai reng a, an fate tlangval nise inkhawm service ah usher hna leh zanrei tak thleng rawn thleng thar, mikhual buaipui reng nen. Aw.. an va’n buai tak em! Kum hnih dawn a ni tawh, lo pawh nei se hlo thlawhna hman a awm lo reng reng a, khatiang reng reng khan a khawtlangin an awm chu a ni si a, malsawmna dawng nasa bik tur chu an va ni em aw ka ti vawng vawng mai.

Zantin inkhawm a awm kan tih tawh kha, Pastor leh upaten an hruai chhawk a, sermon an nei a, inkhawm pangai angin ţantu, thupuan, sermon, ţawngţai rual a awm a, inkhawm banah mimal Bethel duh chu Bethel turin an kal a, Kohhran hruainaa a huhova kal chuan an remruat danin an kalho bawk a, kan kal dan azirin tlangah Bethelna neih ţheuh a ni.

Chhunah chuan Dar 10:30 ah hmun thianghlimah kan kal veka, Upa in hunserh tawite min neihpuia, kan vaiin kan ţawngţai ruala, ţawngţai thupui hi thehluh theih a ni a, mahse chhiarchhuah sen a nih loh avangin ţawngţai thupui chu mimal tinten kan hlan nghal mai a ni. Chuan Bethel in (hmun thianghlim bul) aţangin Upa min hruaitu chuan hun tawp a siam a, kan Amen hnuah Lalpa ţawngţai danin hun kan titawp a, a bak chu Kohhran, mimal inkaihhruai dan danin zalen takin kan ţawngţai tawh mai a ni.

Ţawngţaina tur hian hmun hrang hrang a awm a, hming an nei vek a, hmun thianghlim an I phawt a, heath hian a laiah Kross a varin an phun a, rin bial tak ang hian a zawl a, a lai takah Kross hi a awm a, thingtuaiin an hung bial pap a ni. He hmun thianghlim thlen hma pawh hian zawl, a laia Kross phun, ţawngţaina tur hmun hnihah a awm sa bawk a ni. Ţawngţaina hmun hmingte- (A indawt dan ka hre tawh lo) Hmun thianghlim, Peniel, Gilgal, Morih, Gethsemani, Paradise te an ni a, sawi hmaih palh a awm chuan ngaihdam ka dil nghal e.

Heng ţawngţaina hmuna hming inziah dan aţang hian a awmzia chu kan hre tlangpui awm e. E.g. Gethsemani = Harsatna tawpkhawk lo thleng tur lakah pawh ka thu ni lovin i thu ni zel rawh se tihna nun.

Khatiang zel khan Ringtuten kan nunah ţawngţai thupui kan hman dan tur tlangpui a ni deuh ber.

Kelkang kher kher a kal a ngailo tiin mi tamtakin sawi ţhin mah se, Naamana dam nana Jordan lui kher kher a pawimawh ang khan, Kelkanga kalte hlawkna em em chu, Thlarau Thianghlim inpuan nasatna, tlawmna nun zirtir ngai lova hman a ngaihna, thlei bik awm lova mi zawng zawng ang khata kan ei leh in za-na, officer leh Minister, mi hausa thliar hran theih loh tawpa in khatah kan chenza-na a ni tlat mai hi Kelkang kher kher a nihna chhan chu ni tain ka hria.

Kohhran, mimal Isua Krista ringtu zawng zawngte chuan thlarau pawl tharna, siamtharna, hlim tharna chu kan beisei vek a ni lawm ni?!! Mahse, Pathian Thlarau Thianghlim hian, a zalen theihna ah lo chuan ringtu intite pawlharh hi tul a ti vaklo aniang a!! tih te min ngaihtuahtir a.

Tunah hian Mizoram Kohhran hrang hrangte chu sum tamtak leh tha leh zung sengin Kelkangah an memberte, hruaitute an kal ta chur chur mai. Insen an hreh lo, an inpe phal em em a, a kal tawh an kal leh chaka, kal lo zawng zawngin kal an tum vek emaw tih mai tur lah ni! Kohhran member tam tak kalten an lo hawn hnu-ah anmahni kohhran theuhah harhna, hlimna an rawn hawn vek tlat a lawm!

Isua pawhin buh lem leh buh tak ţo za a phal ang khan, ennawm thilmak anga ngaitu, thlarau pawltharna beisei lemlo chu an kal ve ngei alawm. Mahse chungho chu sawi tham pawh an awm lo.

Khawi hmunah pawh Thlarau Thianghlim chu a awm kan ti ţhin. Mahse, kan ti teh ang, Thlarau Thianghlim pawl tharna chang tur hian e, a beiseitute hi kan lo pawimawh em a ni tih hi theihnghilh lo ang u.

Chhumlo chat lova Pathian dawr ţhintute dilna rahchhuah chu a par a mawi a, a tlantu pawh an tam a, peih leh peih lova, dan ang maia ţawngţai ve maitute hnenah chuan a thleng thei lo, thinlung taka Pathian kan zawn hi a ngai a ni.

Thuhriltu leh zaipwl ho zawng zawng pawh an lo reh ţhuap tawh ang tih hun a lo thlen hunah chuan, dil eng ang mah ila sawt anga a lan loh hun a lo thleng ngei ang.

Mahni chhungkua ah lut ta ila, he Delhi khawpuia Mizo Kristian Fellowship, hruaitu hmasaten thi leh thau pawlha an lo din ka’n ti hial teh ang, a nihna takah chuan rethei leh kutruak taka an lo din (a chang chuan an ţahpui hial changte pawh a awm), he Fellowship ngei pawh hian Pathian malsawmna kan va’n dawng nasa tak em! Kan harsat lai hre ve ngailo ho chuan tlema kan changkang chho ve tate hi hmuh a har an lo ti mai em ni? Hruaitute dem leh diriam a, dimlo baksaka an sel ta hmiah hmiah mai te, Kohhran nghet sa mumal nei taka an kaihhruai nilo, Kohhran hrang hrang ngaihdan, thurin leh zirtirna hrang nei awmkhawm (Fellowship) kan nih hre lo ang mai a, mahni ngaihdan leh pawmdana hruaitu rawn sawisel ta vak vakte nun leh an ţawngkam chhuak han hriat fo mai te hian min va’n hliam nasa thin tak em!!

Mahse kan ti leh ţalh teh ang, he Delhi khawpuia ringtu pawh tlemte awmnaah hian ringtu hmasa chu sawilo law law ila. West Delhi-ah Mizo ţawng hmang ringtu inkhawmna hmasa chu kan lo ni reng tho a lawm. Fel famkim a theih lohva, sawiselna chu a lo thleng tur a ni. Mahse Thlarau Thianghlim aţanga hriattirna dawnga, inzilhhauna ni lo, Setana hmanrua chu a lo tel ve a nih pawhin, lo tel ve rawh se. Ţawngkam dengkhawng leh rapthlak pui pui a lo thleng a nih pawhin, Kohhrante tichak tura Pathian miruat a ni em? Setana huangtau thinrim, a kaw tawpa ţang a ni em? Tih te ngaihtuah chiang chungin Ţawngţaiin ţan i la thar zel ang u.

Kelkang khua, Pastor pakhat leh upa 8 (ni tain ka hria) awmna, mipui singtel, sangtel in an pan ruih ruihna hmuna Kohhran hruaitute hi an fakawm em em a, chutih rualin, a khaw mpui, a lian a te tumah in sawsel lo leh, “ka chau bik” tih awm lo va an Kohhran, khawtlang hruaitu ţangrual ţhap mai hi entawn a tan a va’n ţha tak em!

Tun hmaa ringtu hmasate tihduhdahna, nekchepna tuar nasa ber khuaa an sawi, Kelkang hi mihlim ţawngţai miten chhumlo chat lova an dilna avangin Lalpan mal a sawm an ti a, Keini pawh ţawngţai mei timit lova mi ţhahnemngaite dilna hi i chhawm nung chho zel ang u. Tichuan, Lalpa hnathawh ropui tak a lo thleng zel ang.

Chhiartute Lalpan a tharin malsawm che u rawh se. AMEN

- Fela Nu

LALPAN MALSAWM CHE RAWH SE

Phuahtu: J.L. Liana


1. Engmah ka hriat hmaa min enkawltu,
A chhia, a ṭha ka thliar thiam hma a ta;
Min pe, min duat, min veng ka nat phal lovin,
Min hrai puarin min zilhhau fo ṭhin a;
Ka pa, ka pa ka tan i lo va hlu em!

Thunawn : I hlutna tizual(belhchhah) turin hringnun piah ram,
Chatuan nun kawngah min hruai a;
A thu i zawm ṭhin Isua vangin,
Ka pa, ka tan entawntlak i ni.
[Last: Ka pa, Lalpan malsawm che rawh se.]


2. Rual ka pawl phak ve loh hlauh vangin e,
Mi neih ang ka neih ve theih nan tiin;
Ṭuan i rel ṭhin, a sur a sa hnuaiah pawh,
Min hmangaihna ka hriatthiam lohnaah;
Ka pa, min ngaidamin min zilh bang suh aw.


3. Tunah chuan ka lo puitling ve ta a,
I zar liau liau a ni ka pa duhtak;
Min chhawrin i duh ngen la, hlim rawh ka pa,
Min tirin chawl hahdam la ka lo chhawk ang che;
Ka pa, i tan enge ka tih ve theih le?

(He hla ṭha tak hi kan fellowship zaipawl conductor Tv. JL Liana’n Pate Ni (Fathers Day) pual liau liau atana zaipawl sak tur a min phuah sak a ni a, he hla hi Office hnathawk a, a awm laiin kan fellowship zaipawl tana a ṭhahnem ngaihluat vangin a han ziak ve rawih a, a hla thu chu phuah zo ve maiin amaherawhchu a thluk lam erawh duh angin a siam thei mai rih lo. Pathian hnenah te hlanin, ṭawngṭaiin a dil a mahse chhanna a hmu mai bik lo. Hun a liam zel a, Pate Ni lah a hnai tawh si, a thluk lah a siam mai thei silo. May ni 1, zirtawpni alo inher a, Pathian hnen aṭangin pawlna a dawng ta! Pathian aṭang chuan awlsam te in minute 5 chhung lekin a thluk a peih fel ta der mai a ni. Pathian chu fakin awm leh rawh se!)