CHANCHIN THA

(I Kor. 15:1-18)

Beram pute beram venga phula an riah laiin Lalpa vantirhkohin mitin ta tur Chanchin Țha lawmawm em em a rawn thlen a. Chu chu Beram pu tak, Chhandamtu Lal Krista lo pian thu a ni (Lk. 2:8-11, Joh. 10:14-15). Beram pu tha chuan a mite an thiltih sual lak ata a chhandam dawn si a (Mat. 1:21).

SUAL BUL (Juda 6; I Pet. 2:4; Isaia 14:12,15; Ezk. 28:11-19)

Sual bul hi Eden huan aţanga inţan a ni mai lo va, Eden huan leh mihring awm hma daih atang khan a lo awm tawh reng a ni.

Pathian chu, chunung ber, engkim siam a, engkim chunga thuneitu a ni a, vantirhkohte pawh ama siam an ni. Ama siam loh reng reng a awm lo. A thilsiamte chu an nih dan tur a thlansak a, chu dinhmuna awm tur chuan a thawhsak bawk a ni.

Vantirhkohte pawhin an nihna dinhmun hi an thlan leh an tih hlawh a ni lo va, Siamtu Pathianin a thlansak leh a thawhsak rengin a tirhkoh an ni.

Siamtu thlansak duh tawk lova, Pathian aia chungnung zawk nih duhna sual vantirhkoh Lucifera rilruah a lo awm a. Țha famkima siam, mawina tinrenga thuam ni siin, a siamtu remruat duhtawk lohna avangin siamtu lamah hmun a chang tawh lova, paihthlakin a awm ta. Vana chhoh tum Lucifera chu hremhmunah paihthlakin a awm ta zawk a, amah aţang ngei hian alawm sual bul chu a lo inţan ni.

EDEN HUAN (Gen 3:1-6)

Pathianin mihringte a duh dan takin a siam a, an dinhmun tur a thlansak a, Lalpa thawhsakna ringin hlim takin amah nen an leng dun ţhin. Pathian chuan, ama siam, ama remruat leh ama tih chauh ţha a ti. Ngaiteh a thilsiam tinrengte chu a en a, ţha a ti hle a.

Pathian thlansak leh thawhsak tleipui-a hlim taka an len laiin, Pathian in a hnawl tawh Setana chu Eden huanah lo kalin fing vervek takin a rawn bum a. Pathian in ama anpuia a siam chu, Setana chuan amah ang zawk tawh turin thudik hmangin a bum ta a.

Pathian thianghlimna kawnga ama anpuia a siam mitvar nei sa ni siin, Setana bumna avangin a chhia leh a ţha hria a, mitvar nei a, Pathian an tumin ei loh tur theirah chu an ei ta a. Thuawih lohna sualah an tlu a, sual lamah an mit a lo var a, an bawhchhiatna avang chuan Pathian lamah thi an lo ni ta reng mai. Pathian thu an pensan avangin an mit var sa chu Felna Pathian lamah a lo del ta. Pathian an tumin Setana an ang ta zawk a, mitvar neih tumin an mit a lo del ta. Heng mite hian rawk leh suam an tawk a ni. Samari mi tha an mamawh ta hle mai (Isaia 42:22).

*Pathian nen hlim taka an lendun ţhinna Eden huan atanga hnawhchhuahin an awm a, an luh leh mai theih lohna turin Cherub ten mei khandaih virtawn zawk zawkin an veng a, Eden kawngkhar chu khar tlat a ni.

TLUCHHE TAWH MIHRING DINHMUN

Pathian in theirah ei lo tura thu a pek chu an ei avangin, mihring chu Pathianah chuan thi an lo ni ta.

Tluchhe tawh mihringte chuan Pathian a beisei thiam tawh lo va. Thi, bo, chhandam ngai an nih pawh hre lovin, theipui hnah insiam chawp aţanga ţanin, mitinin mahni thiltih ţheuh kan tleipui a. Pathian hmaa tlin hram hram tumin ţhahnemngai takin kan tling lo va, phur takin kan ţhelh a, taima takin kan hlawhchham a. Chuti chung pawhin tumahin kan hlawhchham zia pawh kan inhre thei tawh lo a nih hi.

Mi tam takin taima taka inkhawm leh ţawngţaiin kan hlawhchham a, ţhenkhatin Bible chhiar leh zir ţeuh chungin kan pensan bawk a. A thutak zir si lovin a thu chanchin chiah kan hria a, chhandamna chu beisei siin a khawngaihna erawh hrethiam lovin, mahni ţha tih zawng chauh kan tuipui avangin, Lalpa lak ata Setana lemchanna chuan min hruai bo a ni.

PATHIAN BERAMNO KHAWVEL SUAL KALPUITU (John. 1:29)

Sual bawiha tang mek, thim hnuaia ţhute chhanchhuak tura Pathian fapa Lal Isua khawvela lo kal hi Chanchin Țha a ni.

Isua Krista chu misualte kuta mantirin a awm a, keini misualte hi a mal mala min man lovin, Isua zawk misualte aia manin a awm a. Keini a mal theuhva min tihlum lovin, Pathian lehkha thu angin Isua chu Kross chunga khenbehin a awm a. A thihna chu Pa in kan thihnaah min lo pawmsak a, thi min ti tawh lo, “in pa Diabola” min titu khan, a pa chu, “In Pa” min ti tawh (II Kor. 5:14; Gal. 2:20).

Sual man chu thihna a ni titu khan, keini Eden huana nun hlauh tawh ama lama thi a min puan tawh kha, sual lam kawnga thi tawhin felna lama nungah min pawm a, van khua leh tuiah min chhiar ve ta.

Baptisma tak changin Isua rualin thlanah phumin kan awm a, mitthi zing ata Krista ruala kaihthawhin kan awm leh a. Adama thlah, kan nihna sual zawng zawng Isua’n a thihpui a, Pathian lamah Krista in min hring thar a. Kan chanchin chhia zawng zawng thihpuitu khan, ama rual veka min thawhpui lehin, van hmunah pa angchhung muanna-ah min chawlhtir ta. Krista leh khawngaihna avangin thiam loh channa reng ka hlau tawh lo’ng.

-Baby Naomi Pa