RINGTUTE RINNA LEH TUARNA

(Philippi 1:27-30)

Tirhkoh Paula chuan tan in-a a dinhmun te, Philippi-a ringtute a ngaihtuah zia te, an tawngtaisak a mamawh zia te, an tana a tawngtai thin dan te leh ama dinhmun sawiin, “kei atan zawng nun hi Krista, thih pawh ka tan hlawkna” tiin a sawi a.

Kan changthlan thu hlawmah hian Philippi khuaa Kohhrante dinhmun, awmdan leh hmabak a rawn sawichhuak a. Amah ngeiina a tawn tawh ram atanga a hriat chian tawh te, Krista rinna in a kentel ‘tuarna’ chu an pumpelh loh tur thu hrilhin, fuihna thu tlang takin a sawi ta a ni.

1. In awm dan chu Krista Chanchin Tha nen inmawi phawt rawh se:

Philippi khua a ringtute chu an rinna ah nghet taka ding turin Paula’n a fuih a, chumi fuihna atan chuan “engpawh ni sela”, a han ti kher a. He ‘engpawh ni sela’ tih hian awmzia thuk tak a nei thei awm e. ‘Tiduhdahtu an awm emaw awm lo emaw, hun khirh a ni emaw hun nuam (lawmawm) a ni emaw, tibuaitu an awm emaw awm lo emaw, miten an fak emaw fak lo emaw, hrisel emaw bawrhsawm emaw etc.. eng dinhmunah pawh’, a tihna a ni thei awm e.

Chuvangchuan, eng dinhmuna an din paw’n Krista Chanchin Tha nen inmawia awm turin a fuih a ni. Krista Chanchin Tha chu an nundan zirtirnate zawma, nun chhuahpui ve hi a ni a, “in awmdan” a tih hian mihring nun pumpui a huam a ni. Kan chet vel dan zawng zawng hi Krista nun leh zirtirna nen a inmawi a tul tihna a nih chu.

2. Mihring vang ni lovin:

Heta Paula fuihna tawngkam hi a ropui hle. Mihring mithmuha rawngbawl lova, Pathian rawng bawl turin a fuih a, an zingah a awm emaw awm lo emaw, danglam hauh lova Krista ringtu anga nung turin a fuih a ni.

Tunlai ringtu thenkhat rinna chu rawngbawltu thenkhatah a innghat thin. Rawngbawltu awm lova piangthar thei lo, rawngbawltu awm chauh a piangthar ringtu a awm theih bawk awm e. Thenkhat erawh chuan an ei loh zawng rawngbawltuten tichak lo niin an inngai thei bawk. Chuvangchuan, Paula fuihna hi a thupui hle mai. An ei zawng rawngbawltu in an tlawh emaw tlawh lo emaw, Pathian ram mi an nih vang zawkin chanchin tha nun chhuahpui chu an tihmakmawh a nih thu a hrilh. Tunlai ringtute paw’n he fuihna hi kan mamawh hle niin a lang. Mahni kea ding thei ringtu leh mite duhthlan rawngbawltu nih kan tum theuh a ngai a ni.

3. Inpumkhatna:

Paula Chanchin Tha sawi hi ‘inpumkhatna’ hian a khaikhawm viauin a lang bawk. Ringlo mite kara Chanchin Tha nen inmawia kan nun theihnan thlarauah leh rilruah inpumkhat that hle a tul a ni. Ringtute tan ral hi chakna a ni tih a zirtir uar hle a, chu chu Krista ringtute ralthuam neih that ber a ni. Kohhran chu do nei a ni a, a chhunga ringtute chu raldo sipaite kan ni. Indona chu tharum leh hriamhrei hmanga indona ni lovin, thlarau leh rilru lama indona a ni.

‘Dotute’ tih hian a huam zau hle a, Isua dotute, Paula dotute, Pathian leh mihring doral Setana te, Krista ring duh hauh lotute etc., heng doralte hi hlau lova do zel tura fuihin, hnehna an chan ngei tur thu pawh a hrilh a. ‘Hmelma te chu boral tur an nih hriattirna, ringute tan chhandam an nih tur hriattirna fiah tak’ tiin, hriattir kan nih ve ve dan tur a danglam ta a ni. Chu hriattirna chu Pathian laka mi ala ti zel zui a.

Chuvangchuan ringtuten rinna ah leh rilruah inpumkhata hmelma kan do chuan kan hneh ngei ang tih chu Paula hian min hrilh chiang em em a. A hma aia nasa zawka inpumkhat kan nih a tul hle a ni.

4. Tuarna:

Paula hian Isua zirtir dan a chhawm nun that em em chu, ringtute dinhmun leh nihna tur tlang taka a sawi thin hi a ni. Isua pawh khan amah zuitu tur chuan, “mahni hrehawm pawisa lova zui” (Luka 9:23-24) leh a tawpa an chan tur hamthatna tinreng leh chatuan nunna pawh a sawi hmaih ngai lo.

Ringtu piangthar chuan tuarna leh indona a hmachhawn nghal a. Chu chu Paula chuan Philippi khuaa ringtute hmuh theih turin fiah takin a phochhuak ta a ni. “Krista avanga amah inrin chauh ni lovin, amah avanga in tuar pawh phal a ni”, a ti a. Chu tuarna leh indona chu ama nun ngeia hmuh theiha a awm thu sawilang nghalin, a tuarna leh indona chu ringtute nun hrilhfiahnan a hmang ta a ni.

Eng vang leh tute emaw vang pawh nise tuarna hi chu tuman kan duhin ka ring lo. Mahse Krista rin avanga thiam channa leh ringtu tuarna chu thenhran theih loh, mihring taksa hnunglam leh hmalam thenhran theih loh ang hi a ni. Krista’n a sipai tha chu tuar turin ral ramah a thawn thin. Khawvel sipai hotute paw’n an sipai tha leh chhuanvawrte chu ral ramah, ral bei tura an kaltir thin ang hian. Krista tana tawrh chu chawimawina sang tak angin a sawi bawk.

Indona chu a la kal mek a, Krista sipai tha zingah i tel ve em? Eng nge i do thin? Do i nei ve em? Do nei lovin i thlir liam mai em ni? Naktuk, karleh, thlaleh leh nakkum atan dah i nei em? Tun hun hi a ni hun lawmawm chu. Krista avanga tuar ngam Krista’n sipai huaisen a mamawh a ni.

Ringtu diktak tan rinna leh tuarna hi a kal dun reng tih i hre thar leh ang u. Chu tuarna chu rinna tifiahtu a ni a, tuarchhuaktu tan lawmman dahin a awm reng a ni. Krista kan rinna chu amah avanga tuarna lanchhuahpui ngamtu kan nih theuh theih nan Lalpan mal min sawm sak rawh se, Amen.

- Pastor F. Lalhmangaihzuala