SOUVENIR TLANGZARH A NI TA

Khawvel awmtirh ata a vawikhat na’n kan Fellowship Souvenir lehkhabu chu Ni 28/12/2014 khan tlangzarh a ni ta! Lalpa kan lawm em em e.

Phek 119 a chhah niin, a hlai zawng hi 6x9 leh 7x10 inkar vel nitain ka hria. A5 Paper size bawrvel hi a ni ti ila hriatthiam a awlsam ber ang.

A chhunga thu awmte -

1. Rising Day Chairman Thuchah

2. Souvenir Chairman Thuchah

3. Editorial

4. MCF(D) Secretary Report

5. Rising Day Secretary Report

6. MCF(D) Hruaitu lo ni tawh te

7. MCF(D) Chanchin – F. Lalremruata

8. Thinghlimna – Rev. F. Pachhunga

9. India Myanmar Refugee leh Political Connection – Vanlalherliana

10. Hlimthla (Thlalak)

11. Kraws – Rev. C. Tlangchungnunga

12. Inpumkhatna leh Inhmangaihna – Upa Dr. K.C. Vannghaka

13. Isua Hringnun leh kan Kristian nun – Alex ZL. Hualngo

14. Delhi lamah aw! – Lalzuia Colney

15. Thlarau thianghlim Thiltihtheihna – H. Vanlalliana

16. Ringtu Nun – Rev. Vanlalmuanpuia Khiangte

17. Zoram Khawvel : Hnamdang mit atangin – L. Keivom

18. Nunkawng Dik – RL. Vohbik

19. Immanuela i sawm ang aw! – Hmingthanpuia

20. Hlawhtlinna tura thil mamawh pathumte – Lalthangkima

21. Tual kan lenna Delhi – Nanaua Chawngthu

22. Chhinlung leh Tawng chungchang – B. Lalthangliana

23. Rinawmna Chibai – L. Keivom

24. Bible Hriatzauna – F. Lalhmangaihzuala

25. ‘Mizo’ hi tute nge? – C. Chhuanvawra

Tlangzarhna ah hian kan Souvenir Secy. leh Layout Designer ni bawk Jerome Lalhruaitluanga’n @Jerome Lalhruaitluanga Ralte Cof zei leh nalh tak maiin Souvenir Preview-na ngaihnawm leh hlimawm tak mai a rawn nei phawt a. Chutah le kan Souvenir ngei mai chu plate in an rawn chawi chhuak a, a tlangzarhtu tur Rev. Vanlalmuanpuia Khiangte (Synod Delhi Mission Field Secretary) in tawngtaina tawi a hman hnuah, a tuamna ribbon chu pawt phelhin a tlangzarh ta..kutbeng ri in kan Biak In chhung chu a khat a. Ni e, hunrei tak chhung theihtawp chhuaha kan lo beih ve fat fat, kan Souvenir chu tlangzarh a ni ta a ni.

Preview-na neitu in a sawi ang khan, a chhungah hian Chairman thuchahte leh Secy. Report te i chhiar hnuah, he Fellowship lo din tan dan leh a kawngzawh chhoh dan ngaihnawm em em mai, lunglenthlak rum rum leh lungchhiatthlak tak ni bawk chu tawikim takin he Fellowship dintute zinga mi leh tuna kan Chairman ni mek F. Lalremruata’n a lo hrilh ang che.

Tichuan i keu zel anga, Fellowship puitling zawka din a nih (2009) atanga hruaitu lo ni tawhte hming intlar thla duat te i hmu ang a, tuna Dept. hrang hrang hruaitute thlalak mawi tak pawh i hmu ang. Hruaitu hluite thlalak awm ang ang pawh zeh tel kan duh laiin, vanduai thlak takin he lehkhabu kan design-na ber computer chu a bo a bang awm lovin, a set tawpin rukru in min lo rukbo sak avangin, a bul atangin kan intan tha leh a ni tih min hriatsak la. Hruaitu ni mek te pawh thla kan lak nawn leh vek a ngaih phah a, lang ve ta lo pawh an awm zeuh zeuh a ni tih te nen lam min lo hriatsak hram hram dawn nia.

Thlarau lam chawm tur sermon tha tak tak te, Bible leh khawvel thil lamah pawh i hriatna nasa taka tipung thei tur thuziak ngaihnawm tak tak te, Myanmar leh India a Refugee te dinhmun leh political connection ngaihnawm leh pawimawh em em te, ram leh hnam hnuk khawih pha dawt dawt khawp thuziak ropui te, Zofate insuihkhawmna lam hawi te, I nunkawnga hlawhtlinna i neih dan tur leh nunkawng dik i zawh thiam dan tur thuziak te leh a dang dang awmna, he kan souvenir lehkhabu hi Mizo Khawvela lehkhabu te zingah hian uar takin, ‘A nep lo’ ka rawn ti ve duh a ni.

Chutih rual chuan…

## Famkim lo mihring kan nih zia hi alo lang leh thin. Vawi 10 chuang fe ka chhiarchhuak nawna ka hriat keima thuziak ngei ah pawh spelling mistake 1 alo awm hram pek a! Uluk taka edit nia kan inhriat laiin mit a lo vai tawh thin ni berin a lang.

## Thuziak dangah za ah za mistake awm lo te a awm laiin, Rev. F. Pachhunga sermon ziak kha quotation mark aiah nalh takin bold leh italic a rawn hman kha tidanglam lovin kan dah a, ‘marawhchu layout design-na lamah a nih ka ring a font kha tih normal vek a lo ni a, thusawi sawichhawnna (" ") awm lova a mam ta vek kha pawi kan ti takzet a, min hriatthiamna kan ngen e.

## Tin, U Mahera thuziak ‘Ropui’ tak kha ka edit ngei a. mahse ka chhiar lai khan editor mit fir tak atanga en lovin, a thu ah khan ka lo cheng thuk deuh a ni, ngaihnawm ti takin ka lo chhiar alei ah, mistake pahnih khat aia tam deuh(?!) a awm ta a. Tun hnua ka chhiar leh hian ka chek tlawk tlawk ringawt mai a ni! Tihtheih awm tawh silo..ngaihdam ka dil e. Tun hnu zel atan experience tha tak min pe thung a ni tih min lo hriatsak hram dawn nia.

## Thuziak tawpa Editor comment-na lamah khan U Ruata ziak comment-na ah “Khawtlang” tih tur kha “Khaw tlang” tiin space a lo inpe palh bawk a. Rev. Vanlalmuanpuia Khiangte thuziak comment-na tawp lamah khan, “Min hmui thin tura Synod phalna min dilsak thlaptu” tih turah, “Min hmu…” tiin, “Hmui” tiha “i” lai kha a lo bo ta daih bawk a. Tin, kan Facilitator F. Lalhmangaihzuala thuziak kha computer bo ah a lo tel avangin a hranin kan indil tha leh kha ania, editor comment-na a awm hman ta loa, thupha kan chawi bawk. Chutiang zelin Pu C. Chhuanvawra pawh press-a barhluh dawn zan tlai tawh ah a mail kan hmuh chauh avangin duh angin kan comment hman ta lo bawk. Tihsual dang pawh a la awm mai thei.

Kan tihsual awm zeuh zeuhah Editor lo chu mawhpuh tur an awm chuang lova, min puh bawrh bawrh zel mai a ni ang chu, mahse na lutuk lo sela…:-)

Eee…ka sawi hmaih tep, he lehkhabu buatsaih tur leh thuziak tur hian internet lamah luh nasat a ngai a, a then kan computer a lo bo, a then kan internet dongle a lo bo bawk…kan mamawh chang apiangin Foreign zem zen leh, foreign lam biak ngun vanga internet chak deuh nei, Puitei inah kan tlan lut thin a, an inchat tui lai leh a Korean film en laklawh lai pawh tlansana, phal taka a computer leh internet min hmantir thin avangin a chungah kan lawm em em a ni.

He kan Souvenir hi bukhat Rs. 100/- in kan zuar nghal a, kan hralh nghal nual. Copy tam tak siam a nih angin a duh tan lei tur a la awm reng e.

**Rising Day a tana pawisa thawhtu te leh Souvenir atana thuziak thawhtu te erawh chu Present tur an ni thung. Kar hla a leng te pawh a remchan dan anga thawn tum an ni.

A va sei leh ta em!!..duhtawk hrih mai ang.

- Nanaua Chawngthu

Souvenir Cover

Rising Day Tshirt