THALAI DAY : 2015 : SNAPS

VANSANGAH TUIPUI A AWM EM NI?!

Genesis 1:6-8 “Tin, Pathianin, ‘Tui leh tui inkârah chuan boruak zau tak awm sela, chu chuan tui leh tuite chu ṭhen rawh se,’ a ti a. Tichuan Pathianin boruak zau tak chu a siam a, boruak zau tak hnuaia tui awmte leh boruak zau tak chunga tui awmte chu a ṭhen ta a: chutiang chu a lo ni ta a. Tin, Pathianin boruak zau tak chu ‘Vân’ a vuah a. Tichuan tlai lam a awm a, zing lam a awm bawk a, a ni hnihna chu.”

He bung leh chang hi in chhiar fo tawh ṭhinin ka ring, kei paw’n ka chhiar fo tawh ṭhin. Mahse chiang zawkin han chhiar nawn leh chhin teh! Tui leh tui inkarah boruak zau tak a awmtir a, tui ṭhenkhat chu boruak zau tak hnuai lamah an awm a, tui dang chu boruak zau tak chungah! Chu boruak zau tak chu ‘van’ a vuah a.. ta deuh deuh chuan!!

Chuti anih chuan kei lungmawla hian ka mawl ang anga ka’n ngaihtuah mai pawh hian, “tuifinriat anga zau tui ṭhenkhat chu van chunglamah a awm ta daih tihna a ni dawn a ni maw?” tih hi a ni. Van sangah Rocket leh Satellite hei zat hi an kapchhuak tawh a, tun thlengin chu tuipui chu tuman an hmuhchhuah pawh chiang takin ka la hre lo. Mahse hei Bible-ah ngei a awm chiangin a lang bawk si a. Khawvel 70% khuhtu tuifinriat nen hian a inzat vel anih phei chuan a lian ve hle dawn bawk a..

Sam 148:4 lamah pawh “Van sangte u, amah chu fak ula, van chunga tui awmte u, amah chu fak ve rawh u.” alo ti reng mai! Chu tuipui chu em ni Genesis 7:11 a van tukverhte inhawngin leiah ruahpui vanawn ni sawmli leh zan sawmli rawn sur kha?

Heng thute hi rual u, vawkek rap pherh hmasa leh u-a-ma hmang hnem deuh tawhte chuan kan chhiar nin hleihlui hnu a ni ngei ang a. Theologian leh Bible zir mi te tan phei chuan tuna lo hre thar ve chauh chu min nuihzat zawk hial awm e! Mahse ka mawl ang anga Pathian ropuina hriat belh vetu ka nihna chu ropui ka ti hle si a ni. Thu inthupte chu Pathian ropuina anih si chuan, chu a ropuina va hmuhchhuah belh chuan a ropuina a tilang zual ting mai a ni si a.

Heti te hian ka zeldin a, hmanlai mihring la mawl lai ang kha chu ni se, ruah sur te hi van chung lama awm ta tuipui aṭanga rawn far thla ni te pawhin a rin theih mai ang a. Mahse tunlaiah chuan mimawl ber pawhin ‘water cycle’ te kan hre ṭheuh a, chhumin van hnuai zawka mi kan tuifinriata mi ngei hi tui a hip chhova, chumi chu lei lamah a rawn sur leh ṭhin a ni mai si a.

Hebrai ho sawi dan chuan van hi thil sakhat emaw inchung kumkulh ang a ni an ti a. Ruah te pawh hi van kumkulh aṭanga lo kal thla ṭhin tiin an sawi, chu chuan van chunglama tui awm chu a veng a ni an ti ṭhin bawk a. Chu chu Nova hun laia tuiletah khan van boruak chunga tui awm chu sahbuak a lo ni ta a ni!

Pathianin van a siam lai hian van chi thum a siam a nih hmel a; Tirhkoh Paula pawhin “.., van thumna meuhah khian lak chhohvin a awm a” (2 Kor. 12:2) a tih angin. Van pakhatna chu chhum awmna leh sava te lenna (Gen 2:19, 7:3, sam 8:8). Van hnihna chu thla leh arsi te awmna, solar system awmna hmun (Gen 1:17, Isaia 13:10; sam 8:3). Juda rinna aṭang leh theologian pawm dan aṭang chuan van hnihna hi Setana leh thlarau sual thuneitute chenna a ni tih a ni awm e. Vanram fang inti hoten “vanram ka fang” an tih hi vanram tak tak ni lovin he van hnihna zawk hi a nih hmel. Van thumna erawh chu mihring mita hmuh phak loh, boruak (space) leh ni leh thla leh arsite awmna piah ram daih, Pathian leh Angel te lenna hmun leh chhandamfate chatuan ram mawi chu a ni. (Deut. 10:14, 1Lalte 8:22, 27). Isua ngeiin, “Vanah tumah an lawn ngailo, van aṭanga lo chhuk chauh lo chu; mihring fapa, vana awm hi” a ti a ni (John 3:13). Isua’n he van a swi hi van thumna a nih hmel a, Paula chuan Isua ngei hi van thumnaah lak chhohvin a awm a ti a ni si a (2Korinth 12:2, Nehemiah 9:6, Luka 2:14, Hebrew 8:1, 9:24).

Chutichuan, mithiamte ziak aṭanga a lan dan chuan van chunglama tuipui awm ta chu van hnihna leh van thumna inkarah a nih hmel ta hle a ni.

Mihringte hi ropui inti hle ṭhin mah ila, Pathian ropuina lakah hi chuan kan va nep tehlul em! Mihring finna leh thiamna a san zawh poh leh kan Pathian ropuizia hi kan hmuchhuak hnem ting zel dawn chu anih hi!

“Vante khian Pathian ropuizia chu a hriattir a; Boruak zau tak khian a kutchhuak chu a lantir ṭhin a.” (Sam 19:1) tia kan Pathian ropuina fak a, “Hriatchian lehzual che hi ka va duh em” tih zaihla sak hi kan tihtheih tawk chu a ni mai e.

(He thu hi kan Fellowhsip facebook group lamah post tawh niin, comment-na lamah kan mithiam leh miril tak tak ten a hrilhfiahna leh a sawizauna an nei a, a ngaihnawmin a bengvarthlak hle. Comment-na zawng zawng nen khan a vaia han tihchhuah a chakawm viau nain, kimlo takin kan rawn tarlang a ni e. Sawizauna nei ve duh chuan facebook group lamah khan kan sawi ve mai dawn nia.)

- Nanaua Chawngthu

TUMRUH LEH CHHEL TAKIN AW

A ngaite bawkin tu ber nge ka ngaih pawh hre chuanglo chuan tlai ni tla tur eng sen ruih mai, inham tan tum ni awm tak leh peihlo deuhva kal bo tur ni awmang taka kawlkila tla riai riai chuan a ruktein khua a tihar leh ta tlat mai! Chu khawtlang lunglen ka ti dawn nge, ka naupan tet ata tawh natna tihdam theih loh ang maia ka vei tlat, tlai ni tlak rual vela lunglenna chuan a hun ngaiah chiah min rawn ṭhing leh chu ka tan chuan thil mak a ni tawh hran lo. Mahse vawiin tlai zet chu mi rawn tur dan a dang hle a, nidang ai ka zual deuh bik ni hian ka hria. Theihtawpin rilru lak pen ka’n tum ṭhin a, fb lamah te leh WhatsApp lamah te online-in ṭhian ṭhenkhat mual za kar dana mi te nen han inbiak/chat vel pawh chuan ka lunglen chu a hnem meuh lo.

Kan inhnuaia vaipa vaimim rawh puak ri ṭek ṭek te chuan rilru ala peng deuh mahna tiin ka’n dakchhuak a, chu ni tla tur eng sen rum mai chuan ka hminga min rawn kovin, “ka hriatthiampui lutuk che, mahse ka liam a ngai ta si,” ti niawm ang tak hian ka hmu a. Chutia khawhara ka van ka van lai mek chuan kan inhnuai kawngpuia Australia kal tur kan ṭhenawmte inthlah vel chu ka’n thlir pah bawk a, mahse engmah chuan ka lunglen chu a hnem thei thlawt lo a ni e.. ti ila chungho zawng zawng pawh chu ka lunglen tizualtu a ni leh lawi si! H. Lalchawimawii hlaa, “engkim mai hianin ka lung min len” a ti ang deuh hi ni berin ka hria.

Kan inhnuai kawngpuia kan ṭhenawmte Australia kal tur chu ka’n thlir leh ṭhin a. Chutia ka thlir reng lai chuan an inkuah a, ṭhiante nen an inchibai a, an hlim lutuk nge an inṭhen tur chu an ngaingamlo zawk tih pawh hriat lohva an mittui tla zawih zawih chuan ka rilru a la peng ta tlat mai! Ka ngaihtuahnaa lo lut ta chu, he kan ṭhenawmte hi engtia rei nge Delhi-ah hian an awm tawh ang le? He hlimna lo thleng tur nghak hian hrehawmna avangin an mittui hi vawi engzat nge a tlak tawh ang le? Vawi engzat nge mi sawichhiat te, rel te, vau te an tawrh tawh ang le? Delhi khawlum leh khawvawt an tawrh zozaiah te khan engtiang chiahin nge an phunnawi ve ṭhin ang le? tih hi ka rilruah zawhna lian tak a rawn lut a. Tunah chuan he khawvela an awm châkna, mumanga an hmuh ṭhin ram nuam leh ram hausaah chuan an kal dawn ta! Ni e, tuarchhel leh tumruh taka an lo nghah fat fat ram pan chuan an kal tawh dawn alawm.

Kum tam tak liam taah khan USA State pakhat, Kentucky khaw pakhatah chuan pa pakhat kum 60 ral kai tawh tih hriat tak mai hi a awm a. A hmel en ringawt pawhin mi hausa leh khawsathei chu a nilo tih amah hre ngailo tan pawh a hriat theih awm e. Mahse chu pa mitmengah chuan tumruhna a awm tlat a ni. Chu kum 65-a upa tawh chuan, “ka kum a tam tawh em mai” tiin chawlh hahdam zai a rel miahlo. A tum zawka chu “ka kum hi upa tawh mah se tih theih ka nei a ni” tih hi a ni. Thil chi hrang hrang ngaihtuahin arsa siam hi a rilruah a rawn lang ta tlat mai a, tichuan arsa chu siamin hmun hrang hrangah dawr hrang hranga kal kualin a arsa siam chu zawrhsak turin khawngaih ava dil tawp ṭhin a. Chutia dawr hrang hranga vawi 1000 chuang a kal hnuah pawh dawr hrang hrang aṭanga a chhanna a hmuh chu, “ka pu, i thil siam hi arsa ve mai a ni” tih hi a ni. Mahse chu chhanna chuan a rilru a tibeidawng hauh lo, engtik ni-ah emaw chuan ka la hlawhtling ang tiin he putar luhlul tak hian hnungtawlh duh miahlovin a bei ṭang ṭang a, vawi 1009 a zawrh hnuah chuan vawiin ni-a naupang te aṭanga pitar putar thleng pawhina an hriat, a hming sawi zawng pawha chil tiput thei KFC (Kentucky Fried Chicken) hi khawvel hmun hrang hrangah alo darh chhuak ta a ni. Vawiin hian he Putar Harland sanders (sipai alo ṭan tawh avanga Colonel Harland Sanders tia an hriat lar) KFC hmuchhuaktu hi he khawvelah hian awm tawhlo mah se, a hmel leh a hming hi a chuai thei tawh lo a ni.

Awle, he pa chanchin aṭang hian mahni chanchin ṭheuh chhui let ila, kan hun kal tawhah te leh tun hunah pawh ni se, kan thil tihah, kan tumah, kan zirlaiah, kan hnathawhnaah kan hlawhtlin mai loh hnuah pawh vawi engzat chiah nge kan beihnawn leh ṭhin le? Kan tumpuite laka kan tlawm hnuah pawh vawi engzat nge beidawng lovin kan hmachhawn leh ṭhin le? Kan dinhmun a lo chhe deuh a, sum leh pai kan tlachham a, kan dam theilo va, kan thawhchhuahsa pawh damdawi manah a ral zel si! Chutiang hunah chuan beidawng miahlovin Pathian hnenah vawi engzat nge rilru leh tihtak zetin puihna dila kan ṭawngṭai ṭhin le? Rom 12:12 ah chuan “Beiseina kawngah chuan lawm ula; hrehawm tuarna kawngah chuan chhel ula ṭawngṭai kawngah chuan ṭawngṭai fan fan ula” a ti a ni. Tirhkoh Paula chuan, ”Chutichuan tiam chin lam panin ka tlan ngat ngat a” a ti a, kan beih ṭang ṭang a, beidawng lova chhel taka kan tih ṭang ṭang loh chuan hlawhtlinna chu kan hmu dawn chuang lo. Ruahsur zawha chhimbal alo lang ang hian harsatna chi hrang hrang kan tawrh zawhah hlawhtlinna chu alo lang zawk dawn a ni.

Thufing pakhat chuan, “Lungpui pawh chheni leh tuboh chhutna a tawrh hrep loh chuan engtin nge milim mawi takah a lo chhuah theih ang, lei pawh bawngtawlailir leh thir hriamin a rah a, a tuai hrep loh chuan engtin nge buh leh thlai rah ṭha tak tak te a thar chhuah theih ang” a ti. Adolf Dassler khan, “Pheikhawk ṭha tak siam chhuah ka tum laia Indonaah te min kaltir daih chu le” tiin a rilru kha hnualin lo beidawng ta se, vawiin ni-a Footballer leh Sport timi lar tak tak ten a loa an awm theih loh, khawvel zaithiam lar tak tak ten an hak ṭhin, Adidas brand hi khawvelah a rawn piang miahlo ang le.

Christmas alo hnai a, kumthar kan lo chuangkai hnai leh ta reng mai! Kumin kumtira kan thu intiam kan Bible chang pawh te kha kan la hria angem le? Kan thu intiam ang khan kan la awm em le? Nge tun Christmas vuakvet chu nuam deuhin zu leh sa te nen Bialnu Bialpa te nen han hmang leh phawt ila, kum tharah ka intiam ṭha leh mai ang, Pathian hnenah ngaihdam kan dil chuan min ngaidam leh mai ang kan ti zawk dawn? Nge ni a kumtir aṭang khan tun kum tawp thleng min kaihruaia damna min petu hnenah hian lawmthu sawilo thei ka nilo tiin he hunpuiah hian Pathian tan ka inserh thianghlim dawn kan ti zawk? Thufing 29:1 ah chuan “Zilhhau fo pawha ring tikhawng tlat chu vawilehkhatah tihtliahin a awm ang a, tihdamna a awm lovang” a ti a ni. Kan hma lawka hunpui lo awm turah hian kan ring kan tikhawng leh tlat dawn nge min zilhhauna angin kan awm mai zawk dawn le? Kan ring a tihtliah ṭum a ni ang tih hi ava hlauhawm tak em, tihdamna a awm tawh dawn silova! Chuvang chuan eng thlemna pawh tawkin châkna chi hrang hrang paw’n min ko mah se, theihtawp chhuahin bei ṭang ṭang ila, Rom 2:7 ah chuan “thil ṭha ti fan fan a, ropuina leh chawimawina leh boral theih lohna zawngtu hnenah chuan chatuan nunna a pe ang, amawherawh chu kawhmawh bawla thutak zawm lova, fel lohna zawm zawktute chungah chuan thinurna leh thinrimna te a awm ang, mihring thil tih sual apiang te thlarau chungah a awm ang” a ti a ni. Chuvang chuan kawhmawh bawlin i awm lovang u. Sual chu do ṭang ṭang ila, tumruh leh chhel takin fel lohna zawm zawktu kan nih loh nan i bei fan fan ang u. He kan tana Lal lo piang tur hi kan thinlung ṭheuhah a pian theihna turin kan thinlung kawngkhar te hi ilo hawng zawk ang u.

Lalpan malsawm che rawh se.

- Valtea Chawngthu

CYRUS LALLAWMAWMA (2013 - 2015)

NEMTHIANMAWI (1985 - 2015)

“Lungduh lenna ramah chuan hlim ten han leng ula,

nangni kher in thleng chho ta chu phuisui leh nihlawh 

an va han inti dawn tak em!”

NUNNA TUIKHUR : OCTOBER 2015 : EDITORIAL

Kum khat a keini Mizo ten a thla nuam leh thlakhlelawm a kan lo sawi Awllen Khuangchawi Thla leh Thlahleinga thla kan lo chuang kai leh ta reng mai. Kum bul lam aiin kum tawp lam in rilru a luah ṭan a, Masi tur leh Kumthar hmuak tur in chhungkaw ṭhenkhat chu kan in puahchah leh ṭan tawh a, Delhi aṭanga kan seilenna hmun pan tum tam tak pawh in haw na tur ticket kan book leh ta sup sup mai.

Keini Fellowship pawhin kum bul hmachhawp tam tak chu tlak fel tawhin kum tawp lama kan inhnawhsarum loh nan Department tin pawhin kan tuang kan tichhah leh ṭan ta. Hun hi a in her a kum bul aṭanga kum tawp kan thleng ang chiahin lawm tak a Member thar te kan lawm luh laiin kan member hlun tak tak te mittui nen kan thlah hun alo thleng ṭhin. Kan la ui em em laiin chhungkaw thum in hmun ṭha zawk min pan san in, mi pahnihin van kohna chhangin hmun nuam zawk min pan san ta. Chupawh a karah thlakhat em pawh a liam hman lo!

Hei tun ṭum Nunna Tuikhur Issue pawh kan ṭhen tak Cyrus Lallawmawma leh Pi Nemthianmawi tan kan han hlan a, lokir a kan zinga rawng rawn bawl leh tur a kan au aw hi min chhawn tawh dawn lo mahse koh kan ṭhulh phah dawn lova nghilh kan bang dawn hek lo. Theih leh tih kan neih tlem nen nen kan tih theih chhun lah ala famkim lo zui emaw a ni anga khawhar chhungte tan chuan in hnemhnangna kan va awm lo rua dawn em!

Englekhawle! Liam tur chu hun in a her liam pui a, lo thleng tur pawh hun tho in a rawn her chhuah puina khawvelah hian cham hlen tum in inchhekkhawl ṭhin mahila kan chamhlenna tur hmun chu kan pan leh tho tho ṭhin. Kan ṭhen tak te han ngaihtuahin ṭhat lai leh phak lai te a theih ang tawk tawk a kohhran tan a ṭhatna thawh a phak ang tawk tawk a thawk ṭhin an nihna hian an ropuina a tizual a, zual leh zual zawk a ngaihban loh hla sak a ti ring bik ka ti lo thei lo! Lalpa’n amah bel tlat tu te a chawikang a, mawi tak in a siam ṭhin tih hi min kalsan ni a chawimawina an khum hian min hmuh tir a, ka tha ṭhum lek lek tawh chu min thawh tir leh ta!

Pakchheihkhah! Keini ṭhalai duhawm tak tak leh Lalpa duhlai tak tak te u, kan nitin eizawnna leh sum leh pai kan thawhchhuah dan lamah sawi tur ka nei lo mahse chiang ta em em chu sum kar nei lova eizawnna kan ngaihpawimawh a Kohhran kan thlauh thlak niah hian van kohna kan chhan a ṭul si palh ange!

CHHAWR THLAPUI LEH CHHAWR LOH THLAPUI

Khuangchawi thla kan lo chuangkai meuh chuan boruak lum lutukin kian zai min relsan a, vawt lutuk si lovin boruak nuam leh thiang karah hringnun han hman meuh chuan Khuangchawi thla (October) special bik zia a hriat theih nghal a ni. Kum khat chhunga thla en ber zan an tih pawh he thla ngeiah hian a lo chhuak dawn a ni. He thla apiangte hi an hmelthain an fel duh hle a, an rinawm mai bakah mi bik riau an ni duh phian. Tun kum chhunga thla eng ber zan hmu tur chuan he thla hi chuankai a ngai. October thla, thla mang zan atang chhiar tanin a ni 15-na zanah a rawn eng chhuak dawn. Ni 13 zan khian thla a mang tan ang a, ni 27 zanah tun kum chhunga thla en ber zan chu hmu turin i lo thlir ve dawn nia. Chu chu “KHUANGCHAWI THLA HLEINGA ZAN LALNU” an tih ngei chu a ni.

C. Vansanga’n ‘Chhawr Thlapui’ tih thiam taka a sak han ngaihthlak meuh chuan lunglen a kaitho leh thin.

“Khuangchawi thla hleinga zan lalnu lo chhuak hian e,

Suihlung leng chun hring mite a rawn hawn e;

Nau ang inlawm ri leh nunhlui ngai zai sa te’n,

An ning lo, an phang lo tlai khawvar;

Van hnuai zaleng zawng ten i eng mawi lo lawmin,

Hriat rengna lunglen tin i rawn phun sak thin maw!”

Kan pi leh pu, nu leh pa, kan u te hun khan eng (Electric) hi an nei lo/nei tha lo hle a, thla eng an chhawr thei hle. Thla eng lawmin an hel lai ‘Dy’ run belin perkhuang tingtang nen tlaikhua hial varin hlimzai an vawr thin. Kei ngei pawhin thla eng lawmin lenrualte nen Letpanchaung-ah thla eng lawmin perhkhuang tingtang nen zai vawrin vangkhua kan fang kual a, thian ten an hel lai ‘Dy’ run in zawn an thlen meuh chuan an hla duhzawng chu ring takin an han sak khum thin te kha ka dawnkir a lunglen a kai tho leh thin. Letpanchaung nge nge a lo nuam ang reng khawp mai.

Mahse khua hmun loh vang leh tuantul vangin lenrual duhte nen inthen hrangin, dawt thu thang leh chun leh zua hrang vanga thlakhleh ngawih ngawih hmangaihte then a lo tul meuh chuan hman a ‘Chhawr thlapui’ kha ‘Chhawr loh thlapui’ ah a lo chang ta si! Lei mawina enin lo eng leh thin mahse nunhlui ngaia luaithlinul leh zankhua a sei vawng vawng tih mai loh chu tangbei tur dang reng an awm si lo, hlimlai ni ten hnutiang an chhawn zo ta. C. Vansanga hla ‘Chhawr loh thlapui’ tih hi sak a lo tul leh thin.

“Chhawr loh thlapui a lo eng leh ta,

Ka tan tahna a sei leh dawn mang e;

Aw vawi khat tal min chhang la, aw Mampui,

Nau ang nuia kan hlimlai te ka ngai thin;

Thinlaiah dawn ve rawh.”

Aw… nunrawng lunglian hun leh ni, thlei bik nei lovin, dawn lem nei lovin inngai ngawih ngawih leh inhmangaih, inthlahlel ngawih ngawih te samang thenna ni i rawn herchhuahpui si a maw! I dawn ve si lo maw hmangaih lungdi then hrehawm dan tur. Lo eng tawh lul suh tih mai kan nap zo ta.

Awle, keini Zofate zingah hian hmangaihna la na fal bik kan awm nuk mai. Hmana an nghahfak, thla eng hnuaia lenrual duhte leh hmangaih ber te nena zai vawra tlai khawvar pawh phang lova awm thin kha hun leh niin thenna ni a rawn herchhuahpui meuh chuan nunhlui ngaih vanga thil tha lo tih duhnain min rawn man leh chawt thin. Hmangaihte tan engkim huama an bulah hun leh ni hmang ral thin kha Lalpa fak nan leh a rawngbawl nan hunawl reng kan nei thei leh si lo. Thikthu chhiat vanga hmangaihte ngaihtuah reng thin khan Bible chhiar leh tawngtai kan mangnghilh leh lawi si. Kan hmangaihte tan kan neih rosum ui lova kan khawhral mai mai laiin sawma pakhat leh thawhlawm pek tur kan nei lo fo thin bawk. Ngaihtuah chiang ila Pathian rilru kan va tina dawn tak em.

Facebook, whatsapp leh viber etc.., hmangin kan hmangaihte zankhua tlaivar a kan biak theih laiin inkhawm hun chhung dar kar 2/1 leh pawh rei tiin kan ning hle thin. Lalpa aiin he khawvel thil leh kan hmangaihte hi kan lungkham zawkin kan dah lal zawk thin niin a lang. Khawvel thil kalsana Amah hmangaih turin min phut tlat asin. “LALPA in Pathian chu in thinlung zawng zawngin, in rilru zawng zawngin, in chakna zawng zawngin in hmangaih tur a ni” (Deut 6:5; Mk 12:30). Amah hmangaih turin min phut mai ni lovin keimahni a ‘zawng zawng’ hian Amah chu hmangaih turin thu min pe. Sawmna ni mai lovin thupek min pe a ni zawk. “…… zawng zawngin in hmangaih tur a ni” tiin thupek khauh tak min pe a ni tih kan hriat a ngai.

Inthen vanga hmangaihtuin sual lam kawng a zawh anih chuan nang, a hmangaihin i hmangaih ve tak meuh chuan nunkawng dikah hruai luh i tum tur a ni. “…. Hmangaihna erawh chuan mi a siam tha thin” (1 Kor 8:1). A thil tih sualah dema, sawisela rel zui mai lovin a sualnate a darhzau loh nan i thupsak hram hram a ngai bawk. “Hmangaihnain sual tam tak a khuh si thin a” (1 Pet 4:8). He thu hi Kohhran huangchhungah pawh kan sengluh a ngai. I member pui, i thian leh i unau chu an tlinlohna leh an thil tih sualah rel a, sawisel zui mai lovin kan siamthat theih loh pawhin kan thupsak hram hram a ngai. I sawi darh vak chuan amah chauh a mualpho dawn lo va, i sawina ten an rawn chhui zui ang a, an chhungkua, an community leh i hmangaih in lawina Kohhran thlengin tih mualphovin a awm dawn a ni tih hi i hriat, kan hriat a pawimawh hle.

Tunlai khawvel changkanna leh hmangaihna hian kan thalai nun a tichhe ta hle. Kan hmangaihte tan engkim kan huam thin a, he khawvelin changkanna a ken tel hmanraw tha tak tak te hmang tur hian hun kan neih theih hle laiin Lalpa tan hun awl nei thei lovin, a tan kan huamchin a tlem sawt hle. Kan thiam, kan finna, kan neih rosum leh kan hun leh nite, hmanraw changkang tak tak te hi Lalpa tan hlanin, amah fak nan leh a rawngbawl nana hman thiam zir hi kan mamawh hle a ni tih hi i hre thar ang u. 

Kan tet lai chuan pistol (silai) lem, kep hmanga kahpuah theih chi kha kan lawm tawkin thiante karah intihtheih nan kan hmang thin a. Tunlai naupang chuan an lawm ve tawh lo, Computer game an buaipuiin an lawm zawk. Keini an u te pawh hian hmana Chhawr thlapui eng lawm thin kha tunah chuan electric eng tam takin thlapui enna ngainep fahran ni awm takin a enna hmangin a hliah khuh ta si a. Thla chu lo eng leh thin mah se kan tan chhawr loh thlapuiah a lo chang ta thin a ni. Pathianin a hmangaih hringmite thiamna, finna a pek hi amah fak nan leh chawimawi nan hmang lovin amah dodal nan leh a eng mawi lo lanna tur hliahkhuh nan kan hmang ta zel niin a lang bawk.

Pathianin thiamna, finna a pek theologian thenkhat ten amah rinna kawngah dinngheh ahnekin Pathian a awm lo tih duhna rinna an rawn nei chho zel a. Kan Bible ngei pawh an leh dan a dik tawk lo tiin thudik zawk zawng niawm taka lang siin a eng emaw an selna chhe te a dik zawk nia an hriat an sawi thin te hian keini rinna nghet nei lo ten kan Bible hi rinhlehna min neihtir a, a dazat zawnga ngai hial lah kan bo bil lo anih hi! Ram hruaitute lah hian super power nih inchuh reng rengin englai pawhin an pheisen leh chengrang lekchhuah lah an hman reng ta. Ram leh ram inngeih lo te tana remna palai siamtu ram roreltute pawh hian anmahni huangchhung ngeiah anmahni opposite-tute chu an rem thei leh chuang si lo. Ngaihtuah an va titam tak em.

Tin, Lalpa tel lova awm aiin phone, laptop, computer leh networking tel lova awm a harsa kan ti ta zawk niin a lang. Biak In chhungah ngei pawh kan inkhawm chhan hi kan hre meuh lo a ang hle. Lalpa faka chawimawi a, a thu ngaithla tur kan ni a, mahse dan pangai mai leh kan thawh fuh changa inkhawm ve tawp angin Biak In chhung kan rap lut ve a. Chanvo neitute kan ei zawng a nih loh phei chuan kan inkhawm chhan Lalpa hre lek lovin, “saw pa saw/ saw nu saw ka ei lo, thu a sawi rei leh ngawt ang, hun an pe ve ziah mai” tiin, kan ning hle thin.

Chanvo neitute kha i inkhawm chhan anih chuan i hlawhtling ngai lo vang, mihring en lovin Lalpa fak duhna leh a thu ngaihthlak chakna thinlung tak tak i neih chuan i nunah hlawkna i nei ngei ang a, inkhawm leh hun tur pawh i nghakhlel viau ang. Inkhawmnaah Lalpa aiin phone etc. kan dah lal zawk fo thin. Biak ina Lalpa kan fak tui lai leh a thu kan ngaihthlak tui lai pawhin kan phone hian pawnah min ko chhuak fo mai. Mahse i hnathawh hah chang te, i tlaivar chang te leh tihtur tul i tih lai te emaw i muthilhtui lai te emaw in, kohhran thiltih tur pawimawhah emaw inkhawm turin sawmchhuah i theih leh si lo hi chu a buaithlak hle mai.

Hmanah chuan chhawr thlapui tiin an au thin che a, tunah engah nge chhawr loh thlapui an tih tak che? A chhan chu Lalpa’n thiam leh finna a pek che i hmang thiam lo, malsawmna petu ni lovin a malsawmna i um avangin engkim siamtu aiin a thilsiam i buaipui zawk avangin rosum leh hausakna petu che hnena pekkir leh aiin i duhzawng (ruihhlo etc.) lei nan i hmanral thin avangin Jehovah Jire (a hun tea rah thin a hnah pawh uai ngai lo) ring lo va, harsat i tawh hunah i phunnawi leh thin avangin i khawhar hlauh vanga lenrual petu che aiin, i lenrualte ring zawkin humsual i dai fo thin vangin hmangaihtu i neih ve nan tiin hmangaihtu petu che hre chang lovin, nangmah hmangaihtu i chhas i buaipui zawk thin vangin leh mi hriatah leh mi hriat lohvah tihsual i ngaih lutuk vangin leh nangamah diklohna felhlel a awm vangin kohhran leh khawtlanga hruaitu tha ni thin kha inhnukdawk a ban hial i duh phah thin a, lungrualpui tur i zawng ruai thin a nih chuan, kohhran leh khawtlangah i tuitla thei lo anga, i kimki reng tho vang. Hmanah i eng lawmtu ten chhawr thlapui an tih thin che kha bansanin chhawr loh thlapui an ti tawh zawk ang che. Mahse nang leh kei hi sualin kan awm reng dawn em ni? Hnai lo ve, hun tha kan neih lai hian sawithiah ngaite sawi thiatin, siamthar ngai te i siamthar zel ang u.

Chutin kan thiam leh finna te hi Lalpa tan hlanin khawvel changkanna hi amah fak nan leh a thuhril darh nan i hmang tangkai zawk hlauh ang u. Chutin kum khat chhunga thla en ber zan, ‘Khuangchawi thlahleinga zan lalnu’ chu alo engchhuak leh ang a, i eng hnuaiah Lalpa faka a thu ngaihthlak nuam an lo ti tawh ang. Nang ngei pawh Chhawr thlapui tiin i sakhming an chawi tha leh ngei ang.

Chhiartute Lalpan malsawm che u rawh se.

-Alex ZL. Hualngo

MANGANNA TEN MIN CHIM HUNAH!

(Chhiartur: Sam 25:1-22)

Hemi bung leh changah hian Davida puitlinzia a lang a. A nunah harsatna, manganna lian tak takte a thleng a ni. Charles Spurgeon-a leh ziaktu thenkhat chuan he Sam hi Absalom-a’n Davida chunga helna nasa tak a neih lai a ni an ti. A dik viau pawhin a lang.

Absalom-a kha a naupan laiin a pa (Davida)-in a duat em em a, mipui pawhin an ngainat rawn hle a nih kha. A hmeltha a, mi aikaih thei leh mi lem thiam tak a nih avang pawhin a ni mahna. An chhungkuaah hetiang hian harsatna a rawn intan ta a; Amnon-a’n Absalom-a nau Tamar-i a pawngsual a, a pa Davida’n Amnon-a thiltih tha lo tak chunga a mit a chhin luih tlat avanga Absalom-a hi rawn hel ta leh chhungkuaa buaina rawn chawkchhuak ta ni berin a lang. Kum 2 a rawn vei meuh chuan Absalom-a’n a unaupa chunga a phuba lak duh chu a la thei ta a. Hremna pumpelh nan leh Jerusalema kir leh hma chu kum 3 a tlanbo ta a. Jerusalem a rawn kir leh khan a pa, Davida chungah a hel ta a, zuitu mipui pawh an tam hle a ni. Davida chu Jerusalem atang chuan a tlanchhe ta a. Hetiang harsatna, zahthlak tak leh manganna nasa tak a chunga a thlen lai khan Davida khan he ‘Sam’ hi a ziak a ni.

Chang 15-19:“Ka mitin LALPA lam a en fo thin; Ani chuan ka kete hi len ata a la chhuak dawn si a. Ka lamah hian lo hawi la, mi khawngaih ang che; khawhar leh hrehawm takin ka awm si a. Ka thinlung buainate hi a lo nasa ta a; Aw, ka manganna ata te hi mi hruaichhuak ang che. Ka hrehawmzia leh ka manganzia hi ngaihtuah la, ka sual zawng zawng ngaidam ang che. Mi dotute chu ngaihtuah teh, tam tak an ni a; Nasa takin mi haw si a.” Hetiang em ema harsatna leh manganna hi tu mahin kan la tawng ve lo pawh a ni maithei. Mahse, kan la tawng dawn, fanu leh fapa-te vang kher ni lo, harsatna, manganna tawk te pawh kan awm angin, kan nunah manganna dang dangin min tlakbuak ve hun chu a rawn thleng ngei dawn a ni. Chutiang harsat, manganna kan chunga alo thlenin engtia lo hmachhawn tur nge tih hi Davida hmachhawn dan atangin kan ngaihtuah ho dawn a ni. 

1. Lalpa-a mahni inrintawkna (by Strong confidence in God)

Davida hian LALPA-a a inrintawkzia a tlem berah vawi 10 chuang he Sam-ah hian kan hmu thei a ni. 

Chang 1-5, 15-20 “Aw LALPA, ka rilru hi I hnenah ka dah tlat thin… A ni, nangmah nghaktu reng reng chu tumah mualphovin an awm lo vang….I thutakah chuan mi hruai la, mi zirtir ang che, Nang chu mi chhandamtu Pathian I ni si a….” A ropui hle mai. Harsat, manganna kan tawh hunah Davida ang hian LALPA-ah mahni inrintawkna kan nei ve thei ang em? Kan LALPA hian thil thar min zirtir a duh thin, a zirtir che i duh em? Davida chuan zirtir turin a dil. Keini pawh hian kan dil ve thei a, kan zir ve thei. Davidan LALPA-a inrintawkna a nei ang hian keini pawh hian kan nei ve thei. Kan LALPA hi i tan ka tan a busy lutuk ngai lo. Kan tan hian a pumin a inpe thei reng a ni. Kan bulah mi tumah an awmloh hunah pawh LALPA hian kan tan a inpeih reng a ni. Manganna ten min chîm hunah LALPA-a inrintawkna kan neih tak zet a tul. 

2. LALPA hnena Sual dik taka puan (Sincere confession to God)

Harsat, Manganna kan tawh thin te hi sual kan lo tih tawh sulhnute a ni duh viau thin. Tam tak chu keimahni sual vang te pawh a ni duh khawp mai. 2 Samuela 12:10 “Chuvang chuan khandaih chuan i chhungte chu a kiansan tawp lo vang; nang chuan mi ngainepin Hit mi Uria nupui chu i nupui atan i chhuhsak ta si a.” Davida chhungte khandaihin a kiansan lohna tur chhan chu amah Davida sual lo khawih vang a ni. Thil pawi tak pakhat chu mi pakhat sual avang hian chhungkua, kohhran, khawtlang a khawih tel thin hi a ni. 

A tlem berah Davida manganna tawh pawh hi a LALPA duh loh zawng a lo tih vang a ni. Chuvang chuan LALPA hnenah a sualna chu a puang ta a ni. Vawi 3 Davida hian a sual a sawi lang a. Chang 7,11,18 “Ka thleirawl lai sualna te leh ka bawhchhiatna te….ka khawlohna ngaidam ang che….Ka sual zawng zawng ngaidam ang che,” tiin a tawngtai a ni. 

Davida hian a sual lo tih tawh te avang khan a nun-ah manganna a thlen a. Mahse LALPA chhandamna chu a ring tlat a ni. LALPAN a ngaidam ang tih pawh hi a ring tlat bawk. Keini pawh Isua Krista Kross-a a lo tawrhnate chuan LALPA ngaihdamna kan chang thei a ni. 1 Johana 1:8-9 “Sual ka nei lo’ kan tih chuan mahni leh mahni kan inbum a,…Kan sualte thupha kan chawi chuan, kan sualte ngaidam tur leh kan fellohna zawng zawng tleng fai turin, amah chu a rinawmin a fel a ni.” Manganna ten min chim hunah kan sualte LALPA hnenah puangin ngaihdam kan dil ve thei.

3. Midang tana ngaihtuah (Shifting our concern to other people)

Davida hian ama manganna leh harsatna chauh a ngaihtuah lo, midang harsatna leh manganna hre rengin a ngaihtuah tel. Mi tam tak chuan keimahni kan inngaihtuah ber thin, midang an leng thin lo. Kan LALPA hian midang ngaihtuah tur hian min duh. Chutia midang kan ngaihtuah chuan kan harsat, mangannate a lo zang thin. Chu nun chu i lo nei ve tawh ngai em? 

Chang 22-ah David chu heti hian a tawngtai a, “Aw Pathian, Israel-ho hi an manganna zawng zawng ata chhanchhuak ang che.” Davida hian he Sam hi ama tan chauha ziak a ni lo. Midang pawhin an lo hria ang tih rinna nen Pathian ropuizia leh thiltih theihzia chu a sawilang ta a ni. 

Chang: 8-10, 12-14 “Lalpa chu a tha in a dik a ni; Chuvangin, mi sualte chu kawng a entir ang. Thuhnuairawlhte chu rorelna felah a hruai ang a; thuhnuairawlhte chu ama kawng chanchin a zirtir bawk ang. A thuthlun leh a thu hriattirte zawmtute tan chuan, LALPA kalkawng zawng zawngte chu ngilneihna leh thutak vek a ni. LALPA tih mi chu tunge ni? Chu mi chu a kawng thlan tur chu a la entir ang. A nunna chu nuamsa takin a awm ang a; A thlahte chuan ram chu an la luah ang. LALPA thuruk chu amah tihtute hnenah a awm a, a thuthlun chu anmahni a hriattir ang.”

Davida nunah manganna lian tak awm mah se midang ala ngaihtuah thei leh Pathian ropuizia hriatpuitua ala tang thei hi a ropui hlein ka hria. Hei hi kan Pathian duhzawng tak pawh a ni. Kan chungah engpawh thleng se, Pathian ropuizia leh thiltihtheihzia hriatreng hi kan tih makmawh pawh a ni. Keini pawh midang kan ngaihtuahzia kan tihlan theih dan tha ber chu Isua Krista chanchin hriattir, kan tana a inpekna leh kan tana a tawrhnate hriattir ngamtu kan nih a tul tak zet zet a ni. 

Don Wilton-a’n heti hian a ziak, “Billy Grahama team ten Korea-a crusade an neih torah ka tel ve a. Platform chungah Billy Grahama bulah ka thu a. Kohna siam hun lai tak chuan Dr. Grahama chuan a tin (nails) a lo enkual vel a. Khatiang khan Dr. Grahama chuan a ti lo torah ka ngai! Tichuan, hmeichhe pakhat hi counselor be turin hmalam a rawn pan a, Dr. Grahama chuan, ‘saw hmeichhia saw i hmu em?’ min ti a, ‘hmu e’ ka ti a, ‘vawiin khan ka tin (nails) hi aman min siamsak a, Isua hnenah ka hruai theih phah ta a ni,’ a ti” tiin. Amen! Hmeichhiain Dr. Grahama tin a siamsak khan ani chuan Isua chanchin a lo hrilh a, a lo pianthar phah ta a ni. 

Kan harsat, manganna ringawt ngaihtuah lo va midang ngaihtuaha Isua chanchin tha hril hi kan damna, manganna chi hrang hrang laka zalenna min pe theitu a ni. Lal Davida manganna hnuaia a awm laia a tawngtaina hi a ropui hle mai. Keini pawh harsat, manganna kan tawh chang hian Davida tihdan hi zui i tum ang u. Tichuan engkim tithei Pathian chuan kan phurritte min chhawk zangkhai ang. Lalpan malsawm che rawh se. Amen. 

(Source: 1. Joseph Bayly in Psalms of my Life. Christianity Today, Vol. 33, no. 14 – Found on Bible Illustrator for windows Topic: Fatherhood/Subtopic: Of God/ Index: 1246-1247 Title: A Psalm of Praise, 12/10/2015.)

-Pastor F. Lalhmangaihzuala

DAR TUI ANG KAN LUANG RAL TUR HI!

Tun hnaiah a zâwn deuh zatin khualkhaw hlaa kan laichin unau 3 in mual min liamsan thu kan lo hria a. Chumi rual vel vek chuan hetah kan ţhenrual, kan member-te chhungkaw thum bawkin a inzâwn deuh zatin chhiattawk an lo awm leh a, lungduh, thisen zawmpui, hmangaihte chânin dan rual loh thihna kutvawt chuan a rawn mansak ta mai si. A zawn lutuka lusunnain min den vang nge, lusun chhungte nen kan inzawm thûk vang zawk, an tawrhna leh feeling hi thûk takin ka zuk ţawmpui ve tak zet a. Mihringten kan sawibuai phak lohin nangchingin pawn lam landanah ţhenrualte hmaa insumin pangai taka awm luih hram hram ka tum a, mahse thinlung chhungril lamah erawh an rum tlawk tlawk rite chuan ka lairil hi a fan a. Inhnît feih feih leh ţap rawi rawi ri te chu ka mitthlaah châmin ka bengah hian a la thangkhawk ta fo a ni.

Boruak thiang nuam tak hnuaiah thlifim rawn thaw heuh heuh chuan thing hnahte chu a rawn chhem phe hlep hlep a, ka tihdan pangaiin chhun chawfak zawhah park nuam takah chuan rilrua vei nei chung chuan ka tei lut a. A hma ni lawka khawhar ina kan hla sak, “Lungduh zawng zawng chatuan ramah kim leh ni a awm ang em?” tih chu bengah a rawn ri nawn leh det det a. “Aw ka vul lai ni hi pialleiah a la zal ang maw dairiala chang turin,” tih hla te chu ngaihtuahna ramah a rawn lut a. He kan hringnun hi nakinah chuan a la ral ve ang a, eng tikah tak famkhua chu thleng ve ang i maw? Lenrual lungduh thlafam chang tawh hnute nen rauthlain eng tikah tak dar ang tawh leh ang i maw? Keini ngei pawh hi nakinah chuan famkhuaah lawiin kan hringnun hi kan la hmang liam ve dawn chu a ni si a.

Ka kal zel a, thing hnah hring dep mai te leh pangpar lo vul chiai te, a ţhen lai laiah pangpar buk hnuaia nula leh tlangval inhaw lo taka lo inkuah vawng vawng te han hmuh chuan suangtuahna thuk zawkah min luhpui ta zel a. ‘Engkim tân hun ruat a awm’ tih angin keini hringfate mai ni lovin heng thing hnah hring dup mai te leh pangpar vul chiai te pawh hi an vul hun chhung a zawh hunah siamtu duan angin an vuaiin an la ţil ang a, ţhalah hnah hlui ţilin hnahtharin an rawn thlak leh dawn a ni. Chutiang zelin vanglaini chena chhailai di ţanga lo bei mek te pawh an vullai nite chu chuaiin piallei daia luang ral tur tho chu an ni si a. Keini lamina kan duh vang reng pawh ni lovin Khuanu ruat angin tar leh zur hun emaw, thlana zalh hun emaw chu hunin a la rawn her chhuahpui ngei ang a, kan hreh em em thilte chu loh theih lohvin kan la tawk ve ngei dawn a ni.

Hmanah, kum tam tak liam tawhah khan, Pathian thilsiam mawizia leh hlutzia hmu chiang a, mi naranina kan suangtuah phak loh hlutzia pho lang a, mittui sur zung zung khawpa lung tilengtu a nih theih dan suangtuaha hla thu mawi elkhen hmanga phuah chhuaktu, Mizo hla kungpui Damhauhva (a hming tak Lallianchhunga), a nausen laia a awmtuin a dam a hauh avanga “Damhauhva” tih hminga an koh hlen tak chuan hun kaltate leh hun lo la awm turte a suangtuah lawkin mihringte heti maia kan la luangral leh tur hi lungawi har a ti a, “Zun phur thing tin par leh khawtlang lii liai” tih hlaah chuan a tawp khar nana hmangin,

“Hnu tiang hma tiang ka dawn changin,

  Dar tui ang ka luang ral tur hi lung a awi lo ve,”

tiin, hringnun leh nun hlui heti maia an liam leh tur hi a lo ţahpui thlawt tawh a ni. Chu a hla lungrun tak mai chu vawiin thlenga kan hla sak chul theih loh, Zofate lunglai kuaitu a la ni ta fan a, school lamah pawh zirlai sang telin an la zir vut vut ta zel chu a nih hi!

A ni, mihringte hi Pathianin ama anpui ngeia a siam, vantirhkohte meuh ai pawha chungnung, duhsaknaa a thuam ni siin, engati nge kan nunkhua hi a tawi em em mai si le?

Thilsiam dangte laka ţha chungchuang, chhia leh ţha hriatna nei leh hmang thiam kan ni a, kan thluaka hriatna cell/neurons phei chu Tluklehdingawn (tda) 3000 vel lai a awm a, kan dam chhung hian tluklehdingawn 100 vel lek kan hmang hman niin mi thiamten an sawi. Chutiang zat lek kan hmang chung pawha khawvel mihring thil tihtheihzia hi a va nasa em! Tda 3000 chu a full in hmang ta ila, hringfate hi engtiang fakaua thiltithei tak ni ang i maw? Mahse, “Kan dam chhung kumte chu kum 70 a ni a, chakna avangin kum 80 pawh a ni thei e,” tiin kan Bible berin min hrilh mauh mai si. Kan thluak bura cell/neurons kan hman tak loh tluklehdingawn 2900 lai chu hman lohin kan liampui ta ţhin a nih chu.

Watchman Nee-a (1903-1972), Chinese Pastor leh thuhriltu lar tak thukhawchang an sawite hi i’n bih thuak teh ang u. Mihring hi bung thumah (trichotomy) a ţhen a, thlarau (spirit), nunna (soul) leh taksa (body) tiin. Job 27:2-3 pawh hi chumi sawina chu a ni an ti.

(1) Thlarau (Spirit): Pathianin thu ngawta mihring a siam kha thlarau hi a ni an ti a. Hebrai ţawngah hian Mizovin ‘siam’ kan tih ang chi hi chi li zet a awm a, hmanraw hmang lova siam (Sap in create an tih) sawi nan ‘bara’ an hmang a. Hmanraw hmanga siam sawi nan ‘asah’ (made) an hmang thung. Gen 1:27 hian ‘asah’ (made) hmang lovin ‘bara’ (create) a hmang a. Chu chu hmuh theih loh mihring taksa chhunga awm, thlarau siam thu sawina a ni. He thlarau hi thi thei lo leh chatuan mi, vaivuta tisa siam a nih hma pawha awm tawh a ni. Vantirhkohte anga mipa leh hmeichhe awm chuang lo (sexless) a ni a. Thilsiam zinga Pathian anpui awm chhun a ni bawk. Pathian thaw a nih avangin thil nung tinreng, vana Vantirhkohte ai pawha chungnung zawk a ni a ti.

(2) Nunna (Soul): Hei hi lei nunna, rannung dangte pawhin an neih ang hi a ni a. Taksa tinungtu a ni. Leia hmuh theih lam thil, lei lam mamawhte dawrtu ber a ni a, thil dum leh varte thliar hran theihna leh duh thlan theihna te awmna a ni. Chatuan nunna ni lova lei nunna a nih tlat avangin lungphu chawlh rualin a boral ve nghal ţhin a ni a ti.

(3) Taksa (Body): Mihring taksa chu vaivut hmangin Pathianin kutin a siam a. Mihring leh rannungte taksa chu vaivut atanga siam a nih avangin siam nihnaah mihring ngei pawh ramsate aiin a chungnung bik lo. An chunga khuarel chu a thuhmun vek a ni. Taksa chu vaivuta siam a nih angin leiah bawk a kir ang. ‘Marawhchu, vaivuta siam ni mah sela, thlarau leh nunnain an chenchilh chhung chuan vaivut mai a ni tawh lo va. Hmuh theih mihring niin a pawimawh em em a, Pathian hmel lanna a ni bawk. Mi piangtharte chuan kan taksa ngei hian Pathian kan chawimawi theiin kan tivui thei a ni.

Chutiang khawpa thilsiam dangte laka danglam leh ţha chungchuang chu kan lo ni. Lal Davida pawh khan van lam hawi chhova Pathian thilsiam leh kutchhuak ropui takte a thlir chuan heti ema mihringte min dah special bik hi mak a ti a, “I van, i kutchhuakte, thla leh arsi i ruathote khi ka ngaihtuah chang chuan, Mihring hi eng nge maw a niha i hriat reng ţhin ni? Mihring fapa pawh hi eng nge maw a niha i kan ţhin ni?’ ka ti ţhin,” (Sam 8:3-4) a lo ti thlawt reng a ni.

Chu zai chu zawmpui vein amah P.S. Chawngthu pawhin hla mawi tak hmangin heti hian a lo auchhuak a.

Engahnge hringmi reng hi, thilsiam chungah lenga, 

Mal tin sawmsakna par tawnin; 

I kutchhuak sulhnu para lal lai nuam tin chenin, 

Duh te’n i lo siam ni ang le?”

tiin Zoram khawvela hla mawi chul thei lo tur a lo phuah chhuak hial a ni.

Mahse, chuti khawpa duhsakna sang tak dawnga danglam bik leh hlu bika duan hringfate vul lai ni chu a va pamhmai ţhin si em! Joba 14:1-2 “Hmeichhe hrin mihring tawh phawt chu reilote dam, buainaa khat a ni. Pangpar angin a lo chhuak a, a vuai leh a, hlimthla angin a thlawk bo va, a awm hlen lo.” a lo ti lek chauh a. Sam 144:4 lamah te pawh, “Mihring hi engmahlo mai ang a ni a: A dam chhung nite chu hlim ral ţhin ang hi a ni.” a ti! Engati nge Pathianin ama anpui ngeia a siam, vantirhkohte ai pawha chungnung zawka a siam chu, ‘engmahlo mai ang a ni’ tih a nih leh si? Chu zawhna chu zawhna atthlak tak a ni maithei e. Amarawhchu, Pathian laka mihringte nepzia leh a rorel kan hriat thiam phak ve lohzia tihlanna a ni thung a. Chu chuan Pathian ropuizia a tilang chiang hle niah ka ngai a, chuvang chuan chutiang zawhna atthlak, ka zawh phak tawk lek zawttu nih pawh chu ka zak chhe te lo.

Eng pawh ni se, keini ngei pawh kan khawvel dam lai ni kan zawh tawp hunin thlanah kan la liam ang a, lei hnuai thimah chuan kan ruang chu zalhin leia vur pil kan la ni ve dawn chu a ni si a. Kan vanglaia kan taksa mawina leh kan vun mar nalh tak, no ve chik chek ţhin tak te kha lak boin a la awm ang a. Mahni tawka khal ţha ve tawk tak, sek phiar ve fat te chu a lo zurin a la vuai ang a, ruang ţawih lungte chawah ţangin a zavai mai chuan leiah a la luang ral dawn chu a ni si a.

Chu chu a ni, kan hla kungpui Damhauhvan hun kal tawh leh lo la thleng zel tur a’n mitthla lawkin, ‘Pathianin mihring nunna hlu tak a pek chu ţawih ral mai atan chuan a uiawmin a hlu em mai’ tiin a ţahpui ni. A ni tak a, thilsiam dangte chu an mawi dan pangngai rengin kan hmu a, an hun pangngaiah mawi takin an lo par chhuak leh mai ţhin reng a. Keini thilsiam zawng zawng zinga ropui ber si hi kan vul lai a rei lovin kan chuai hma ţhin em a ni. Chuvang chuan dar tui ang kan luang ral leh mai tur ui em ema ring taka ţahpui ngamtu a nihna chu a demawm lul lo ve. Pathian ruahmanna a dodal tihna lam ni lovin a thilsiam ropui tak chuti maia luangral leh mai tur chu a lo uipui zawk a ni si a.

“Zawtin hrilh theih chang se chungleng huiva, 

Berhva hramthiam tlangtin awi lelte nen; 

Zun ngai chhawl ang uai ve ang maw hril za ila lunglen hi,”

Thangvan zawlah thla zara leng delh delh leh thingzar bela sirva khawhar hram kerh kerh te, lelte kiu veng veng te nen lam chuan lunglenga kur ve an ni mai lo’ng maw? Chutianga vul lai ni ral mai tur ngaia sawt si lova lunglenga au te an nih ve chuan kan lunglenna thute hril zain han inkawm ho ila a chakawm hial reng a ni. Chu’ng mai bakah, lusun chhungte rilru tur dawnpuiin hmangaihte châna lusunte chu zawt vel ila, an lunglenna hi engtin tak min hrilh ang maw tiin, ‘Fam zun ngaih leh khawtlang lunglen hi ka phur zo lo ve’, a lo ti thlawt mai a ni.

Amah Laithangpuia’n, “Hnâm ka len nuam mang e, hmuh theih se doral angin..” a lo ti mathlawn lovin chu thihna nunrawng chu hmelma anga hmuh theih niin chemsei nena beih rep rep mai a chakawm rum rum hial ţhin reng a ni.

Khawimaw, chuti fakauva kan ţahpui chu keini chauh hian kan tuar a lo ni hlei nem, Sappui  lungfing mingo valte meuh pawh hian an lo tuar hlei hlei a, tihngaihna tak an hre bik lo, an tuar ve tlawk tlawk mai niin a lang.

If tears could build a stairway, 

and memories a lane. 

I’d walk right up to heaven 

and bring you home again.

te an lo ti ve thlawt mai a. A phuahtu phuah chhan leh a thiltawnte chu zuk hriatpui sise mah suh ila, a tuar ve hle ni chuan a rin theih. Awithangpa lunglen hla runthlak,

“Puini chu lem ang zu der mai la, 

Nang chu Awithang, ka tuai lungrun, 

Hring lamah lo kir leh rawh.,”

tih te nen pawh khan an chan ram a inang viau awm asin.

No farewell words were spoken, 

No time to say “Goodbye”. 

You were gone before I knew it, 

And only God knows why.

Bible-ah thi tur kan nih thu hmun tam takah hmu mah ila, kan chunga a lo thlen meuh chuan tuman ‘a hun’ kan ti ngai lo va. Chu ‘hun’ chu eng tika lo thleng tur nge tih lah kan hre hek lo. Pathian chauhin a hria.Ţhenna thu hlan kan inrin hmain kan inliamsan a, Pathian chauhin thutawp a siam thei si!

Mihringte dan rual loh chu a lo thleng dawn a, kan dam rei leh rei loh chu Pathian thu thu a ni. Amahah chuan engkim a inţan a, amahah vek chuan engkim hi a tawp leh si a. Chumia innghat ringtute tan chuan mihring mihrinna aţangin dar tui ang kan luang ral leh mai tur chu uiin ţahpui ţhin mah ila, Pa angchhunga kan chawlhhahdamna zawk tur a nihnaah ve thung chuan a hlu hle si a ni. Mahse, ka’n ti ţalh teh ang, hringmi kan la nih angin mihring rilru chu kan la pu lo thei lo va, mihring rilru pu tura siam kan nih miau avangin. Heti maia kan vul lai nite a chuai leh tur hi chu lungawi har kan ti a nih pawhin demawm ka inti phal lul lo ve.

Eng pawh ni se, heti zawng hian thu i han kai her dawn teh ang. Kan Pathian thu angin hmangaihte kan chân ang a, keini ngei pawh kan la ral ang. Thil nghingte sawn bova an awm hun pawha nghing ve lo tur, ram tihnghin rual loh changtute (Hebrai 12:26-28) kan nihnaah hian i chawlin i inhnem ţhin ang u. Tin, Thuhriltu 7:1-2 “A ţha zawk e hming ţha, hriak to aiin, pian ni aiin thih ni, lusun ina kal a ţha e, ruaiţhehna ina kal ai chuan; chu chu mi zawng zawng tawpna a ni si.” a lo tihah hian mi zawng zawng tan pian ni aiin thih ni a ţha vek tihna a ni kher lo vang. Ringtute tan thihna chu paradise-a chawlhna ni a ni a, a ţhat hle rualin ring lo mite tan chuan chatuan hremhmun inţan ni a ni thei ve thung a, an tan anchhia a ni thung ang. Chuvang chuan, keini ringtute tan chuan thihna chu malsawmna a lo ni.

“Pian hun a awm a, thih hun a awm; Phun hun a awm a, thil phun phawi hun a awm;… Hlim taka awma, an nun chhunga thil ţha an tih aliama an tana ţha zawk eng mah ka hre lo.” (Thuhriltu 3:2,12) tih a ni a. Thuhriltu-in min hrilh angin chutiang khawpa Siamtu’n a duan ropui, hlutna neia a siam mihringte zingah chuan he kan lei khualzinna reilote kan zawh chhunga kan hlutna kan inhman ţangkai hleihzia te hi i chhut ve ngai em? Ţhenkhat chuan siamtuin a duan chhan ang ngeiin an hlutna chu midangte tana ţangkai takin an hmang chhuak a, he kan khualzinna ram khawvela an sakhming dai leh tawh ngai lo tur an hnutchhiah a. Ţhenkhat thung chuan kan lei taksa hlu tak mai chu phurrit thlentuah hmangin mite tana ţangkaina neih loh chu sawi loh, hnawksakah te kan chhuah zawk chu a nih hi.

Chu i hring channa khawvela i rawn inlar ve chhung tawi te, hlimthlâ ang leka ral leha dar tui anga kan luan ralsan leh mai tur hun i hman chhung chuan, i hlutna chu i mihringpuite chungah emaw khawvelah hian eng emaw ti kawng talin i lantir ve zawk dawn lawm ni?

- Nanaua Chawngthu

RAWNGBAWLNA HLEN

II Timothea 4:5 “Nang erawh chu engkimah fimkhur la, hrehawm tuar la, Chanchin Ţha hriltu lam hna thawk la, i rawngbawlna kha hlen rawh.”

Kan Bible chang tarlan hi Paula’n khawhar taka a hun tawp lama lung in aţanga a ziah a ni a. ‘Ka fa’ tia a koh, Timothe-a hnenah thuchah hnuhnung leh fuihna ni fawma a ziak a ni. Paula hian Chanchin Ţha hril hi a ngai pawimawh hle mai a, “A hunah te, a hun loah te hril rawh,” a ti hial! Chu hna chu vawiin thlenga ringtute hna pawimawh ber a la ni ta zel a, Pathian khawngaihna avanga chhandamna changtute tih tur, kan duty a ni.

Rawngbawlna chu engnge?

A chunga Tirhkoh Paula’n a sawi, ‘Chanchin Ţha hril’ khi chu a pawimawh ber a nih rualin, tun ţumah erawh chuan, ‘Rawngbawlna hlen’ tih lai taka hi tawite talin han luhchilh dawn chhin teh ang.

‘Rawngbawlna Hlen’ tih chu a ţawng tluang pangaia kan dah dawn chuan, ‘mawhphurhna hlen’ te pawh kan ti thei tho awm e. He khawvelah mihringa kan lo pianchhuah tawh tawh chuan mawhphurhna kan nei nghal a, chumai bakah chhandam kan nihnaah pawh mawhphurhna kan nei nghal a ni. Rawngbawl tura chhandam kan ni si a.

Mihringa kan lo pian ve avang leh ringtu kan nih tawh chuan tih tur nei ve lova awm mai mai thei kan ni ta tlat lo mai. Mawhphurhna nei, rawngbawl tur vek kan lo ni ta. Kohhran huangchhungah kherlo pawh, mahni tihtur hlenchhuak thlap thlap mi chu mi puitling leh parawn kai an ni nge nge ţhin. Chhungkuaa mawhphurhna te, ţhian zaho zinga kan tihtur te, hnathawhnaa kan duty te, khawtlanga mawhphurhna kan neih hlenchhuak zat zat thei mi nih hi thil ropui tak a ni.

Mawhphurhna leh tih tur nei reng reng lo mihring chu hrin man awm lo, khawvel êng hi lo hmu lo zawk se a tan leh midang tan pawh a ţha zawk ang tih hial tur a ni.

Kan Lalpa Isua Krista ngei pawh leia a rawn kal chhan, a mawhphurhna hlenin keini hi chhandamin kan lo awm phah ta a nih hi.

Harsatna awm mah se mawhphurhna chu a ngai reng tho va. Harsatna tawk lo rawngbawltu an awm ngai lo. Harsatna hi mawhphurhna hlen ţulzia lantirtu zawk a ni a, i hlutna tibotu ni lovin i hlutna lantir zualtu zawk a ni.

Engvangin nge kan hlen ang?

Mawhphurhna neih leh hlen hi mihring dam chhan lian leh min tihmihringtu kan ti thei ang. Hlutna nei vea min siamtu zawk a ni. Winston Churchill-a chuan, “Ropuina lawmman siamtu chu mawhphurhna hlen a ni,” a lo ti a. Nêp i duh chuan mawhphurhna relhrûksan la, ropuina lawmman dawn i duh chuan mawhphurhna hlen ang che.

Rawngbawlna hrang hrangah kan phak ang tawkin nihna leh mawhphurhna kan chelh ve ţhin a, mahse chung kan mawhphurhnaah chuan ţhahnemngaihna leh hlenchhuah duhna kan neih si loh chuan ‘Sual’ a ni thei hial awm e. Engvangin maw? E le, mawhphurhna kan hlen loh khan kan insawifiah a lo ngai a, midang puh tur zawn a ngai bawk. Dawt sawi a ţul a, inhnialna a chhuah phah ţhin. Kan mawhphurhna hneh taka kan hlen erawh chuan ‘hnehna’ a ni thung. Chu chuan min tihuaisen a, hmasawnna leh changkanna a ni a, hlimna a ni bawk.

Mawhphurhna hlen lo mi te hian chhungkua, khawtlang leh kohhran an ti ţhuanawp fo ţhin. Chhungkaw tana thawk ve tur kan nih laia chhungkaw tana hnawksak mai nih te, kohhran member ni ve si inkhawm leh kohhran thil tih ngaipawimawh hauh si lo te, hruaitu ni ve si mahni tihtur ngaihsak miah lo nih te hi zah nachang hriat a hun ta hle. Mawhphurhna kan la peih lo a nih chuan nihna aţanga inhnuhdawh ngam mai te hi a huaisen thlak phian zawk awm a sin. 

Ţhahnemngai taka mawhphurhna hlen hram hram ţhin te avang hian chhungkua, khawtlang leh kohhran pawh mualpho lutuk lovin a kal thei ni te hian a lang ţhin. Eng pawlah pawh member kan nih chuan mawhphurhna kan kova tla eng emaw tal chu a awm ngei ngei a, midang tih ngawt lo ral thlir kan tamna hmun a piangah pawl a chak lo mai ţhin. Mahni dinhmun ţheuh inbihchiang ila, pawl tichaklotu nge tinungtu kan nih i inenchiang ang u.

Engtinnge kan hlen ang?

Mawhphurhna (rawngbawlna) hlen tur chuan Kohhran aw hi Pathian aw-ah kan ngai ngam tur a ni. Kohhranhote’n chanvo hrang hrang min siamsak te hi Pathian ruatah kan pawm thiam a, kan ngaihhlut thiam a, rinawm leh dik taka kan hlenchhuah a ngai. Tin, eng pawlah pawh hruaitu chuan a hruai Pawl thiltum leh nihna a hrechiang tur a ni a, mahni ţha tihdan leh tuina zawng chauh kalpui a tum tlat tur a ni lo.

Hruaitute leh rawngbawlpuite an hriatah leh an bulah chuan kan fak a, an awm loh leh hriat loha kan sawi duhdan te, mahni thu kan duh lutukna te, kan rinawm dan leh ţhat dan pawnlawi lutuk te hi kan rawngbawlna hian ţhansan thei se la, kan rawngbawlna hian rah duhawm zawk a chhuah ngei ang. Inngaitlawma rawngbawltu rinawm takte hi Pathianin mal a sawm ţhin si a.

Miin an tih ve loh vang te, thurualpui tur i neih loh vangte emaw, I ţhiante an tel ve dawn loh avang te emaw khan i mawhphurhna kha ţhulh phah tum ringawt suh. Vanah ţhiante nen emaw, a huhovin emaw lawmman a lak theih dawn loh, mimal tan chauh a ni, mimal tan chauh. I ţhiante emaw, I committee member puite emaw, I rawngbawlpui tute emaw an tel ve dawn loh avang te, miin an hmuh loh che avang emaw khan ke pen loh tum ringawt suh la, bei hram hram ţhin zawk ang che.

Mawhphurna hlen zo lo mi chu mi fello kan ti mai a, mahni mawhphurhna hria leh hlenchhuak theite chu MI FEL, Kohhran leh khawtlang pawhin kan tih te an ni. Kan mawhphurhna chu Kohhranah emaw chhungkuaah emaw khawtlangah pawh ni se, a lian emaw a te emaw, mahni zawn ţheuha hlenchhuah hi mi puitling zia a ni. Pawnlam landana fel deuh tura ngaih, mahni mawhphurhna ngai pawimawh miahlote hi kan lo ni palh ang tih a hlauhawm hle a, chutiang mi kan nih chuan miten kan hnung lam aţangin kan chanchin sawi tur an ngah ve tawh ngawt ang.

Engpawh ni se, kan rawngbawl chhan hi Pathian tan a ni tih hria ila. Kohhranah kan phak ang tawka mawhphurhna kan neihte kan hlenchhuah khan kan rawngbawlna kan hlen a lo ni tih hi i hre thar leh ang u. Lalpa tana I RAWNGBAWLNA KHA HLEN RAWH. (Compiled)

-Nanaua Chawngthu

NUNNA TUIKHUR : SEPTEMBER 2015 : EDITORIAL

Leonardo da Vincy-a’n Lal Isua leh a zirtirte zanriah kil lai lem a ziah lai vel khan, vawikhat chu a ţhianpa nen an inhnial hrep mai a, an inhau nasa hle a ni awm e. A lemziak chhunzawm leh tura a inbuatsaih pawh chuan a hma lawka an inhnial hrepna khan a rilru a luah tlat mai a, a lemziah pawh chhunzawm thei ziazang a ni ta lo. A tum ngial pawha a chhunzawm theih ngang siloh avangin a ţhianpa chu a va zawng chhuak leh a, ngaihdam a va dil hnuah rilru thawl huaiin a lemziak chu a chhunzawm leh thei ta niin an sawi.

Mi huat kan neih emaw, thinrimna kan neih hian kan nun a hlim lo va, keimahni ngei kha kan intihrehawm ţhin. Thinrimna chu tihdam vat a nih loha kan pai reng phei chuan a nghawng a na duh hle mai. Rei tak inbual loh nen te an lo tehkhin ţhin a ni. Kan ngaihtuahna leh chumi aţanga lo irh chhuak chu a kha-in a rimchhia a, a puakkehin a hrinchhuah chu thil duhawmlo tak a ni thei ţhin.

Mihring mihrinnaah hian lungawi taka awm reng a theih loh va, tum vang ni miahloah te pawh midang nen inhnial tak chiam chang te a awm thei. Tin, ţhianho ah te, pawlho, khawtlang leh kohhranah te pawh ţhahnemngaih vang ni ţheuh chung siin, ngaihdan inan lohna vangin inhnialna nasa tak pawh a chhuak thei. Keimahni chuan thil ţha duh leh ţhahnemngaiah kan inngai tho, chutiang chiah chuan midang pawh an ni.

Tunlai kan Delhi khawtlanga community buaina te pawh zep tur a awm lo. Zep tum mah ila kan hre vek tho. Hetianga kan kal tlang lui zel dawn anih chuan kan la tuar zel ang a. A bikin, tlawm duhlo te ngei khan a ni mite hriatpui lohva tuar nasa tur chu! Keimahni lam thiamah kan indah a, midang khenbeh kan tum chhung chuan remna hi a awm thei ngai lovang. Keimahni ţheuh kha inkhengbet ngam ila, chutah chuan remna chuan min lo hmuak dawn zawk a lo ni.

Kan mihring puite nena inrem hi a pawimawh hle a. Inrem loh chuan khawvelah hian nuam taka khawsak theih a ni lo. Kan Lal Isuan van leh khawvel inrem lo a Kraws thisen hmangin inremna min siamsak a. Amah ringtute chu mi dang rem ve thei tura beisei kan ni. Mi dangin min rem theih loh pawhin keimahni lam talin kan rem theih a pawimawh. “A theih phawt chuan nangmahni lam tal, mi zawng zawng nen inremin awm rawh u”, (Rom 12:18) tiin min chah hial a nih hi.

Miin kan chungah thupawi an neih pawha ngaidamtu kan nihna zelah khan damna a lo awm a, chu chu hnehna pawh a ni. “Sawisel suh u, chutichuan sawiselin in awm lo vang; tumah thiam lovah ruat suh u, chutichuan thiam lohvin in awm lo vang; ngaidam rawh u, chutichuan ngaihdamin in awm ang;” (Luka 6:37). Mite ngaidama remtu kan nih ţheuh theihnan chhiartu zawng zawng Lalpan malsawm rawh se, Amen.

-Nanaua Chawngthu

TLAI, KAN THIL CHIN DAWKLAK

Thil engkim (meeting, hnatlang, inkhawm leh hna (office), etc…nupui neih tlai chu sawi lo i la; Tv. Liana kan hek nasa lutuk palh ang) apianga tlai chin dawklak hi kan inngaihtuah chian a ţul hlein ka hria. Tlai zeuh chu thil awm thei a ni tehmeuh mai a, tlai fo leh nghah ngai bik nih reng erawh hi chu a ching dawklak bik kan awm niin a lang. Zia (mizia) harsatna (problem) chi khat a ni ti ila a dik mai lo’ng maw? Tam tak chuan Delhi-zia an ti ngei ang! Tlai lo nih hlau fe fe te pawh a awm theih hial awm e, intihchangkan nana hmang pawh an lo awm mial mahna le! “Tlai” hi chin dawklak a nih tawh phei chuan addict ang maiin, sim leh tur chuan a siruk laa beih fe a ţul ngei ang. Hun vawn dik (punctuality) chungchang sai sa (thunawi) ka han chhawp chhuak ve mai mai e.

1. Tlai fo hi chu chhungkaw inkaihhruaidan ţha lo (disfunction) zia pakhat a ni.

2. Mi ţuanmuang apiang an tlai ţhin chuang lo va, mi ţuang rang fe fe tlai reng a awm theih tho.

3. Tlai/Nghah ngaih bik fo hi chu midang (thawhpui, rawngbawlpui)-te zah loh vang a ni thei.

4. Tih loh/ Kal loh hreh si kal peih bawk silo-te hi an tlai ţhin.

5. Tlai duh hauh lo hi chu an tlai lo mai ţhin niin a lang, tlai pawisa lo chu an tlai zel mai.

6. Ţan hun sawn tlai pawh hian a tlaia te chu an tlai reng tho ţhin.

7. Tlai lo turin hmanhmawh phili kher a ţul chuang lo va, mi hmanhmawh

phili chungte zingah tlai an awm tho. Hun manages thiam a ţul.

8. Chhuanlam chu a awm zel, mi sincere an tlai reng ngai lo.

9. Tlai reng maite hi mi rilru hrisel lo an ni thei bawk.

10. Tlai fo maite hi planning felfai tak nei lemlote zingah an chhiar tel theih tho awm e. 

Chuvang chuan, thil engkim tihna apianga tlai nih i tum lo ang u. Tlai loh hi hmasawnna kawngte zinga rahbi pawimawh tak pakhat a ni tih hi i hrereng ang u.

- F. Lalhmangaihzuala

HMING THAR

Thupuan 2:17, “Thlarauvin kohhranho hnena thu a sawi hi beng nei chuan hre rawh se. A hnehtu apiang hnen ngeiah chuan manna thuhruk zinga mi ka pe ang a, lung var pawh ka pe ang, chu mi lunga hming thar ziak nen; chu hming chu a changtu chauh lo chuan tuman an hre lo, a ti e’ tiin.”

Isua ringtute hian hunbi nei ni pawimawh bikte kan nei a, chumi ni lo thleng tur chu kan nghakhlel em em ţhin a, nasa takin kan lo inbuatsaih ţhin. Chawlhkar tin Pathian ni te, kum thar te, tumkau ni te, Isua sun ni te, Isua thawhlehna ni te, Isua pian ni te, leh Thlarau Thianghlim lo thlen ni te hi hlim taka kan hman ţhin te a ni. Ni ropui tak lo la thleng ngei tur erawh chu; kan la nghak mek rih a nih hi. Mahse, a rei tawh lo vang, kan hma lawkah khian a awm a, a lo thleng ngei dawn a ni. Sual leh ramhuaite tlawmna ni tur chu, chhandam fate kan zalenna ni a ni ang a, sual leh thihna ngei pawh hi a thi ve tawh ang.

Lal Isua a lo kal hmasak khan a lo pian tur thu zawlneiten an hril lawk a. A lo kal vawi hnihna tur hun erawh Pa chauh lo chuan tuman an hre lo. A lo kal hmasak khan khualbuk a hnawng a, Bethlehem dai reh bawng in tlawm a nghak. A lo kal leh hunah chuan leilung pumpui hi a nghawr nghing ang. A lo kal hmasak khan puan senduk an sintir a, a lo kal leh hunah chuan puan var a rawn sin tawh ang. A lo kal hmasak khan ‘Judate lal’ tia tielin nuihza siamnan an hmang a, a lo kal leh hun chuan a hmingah Pathian thu-a an ti tawh ang a, hnamtin chawimawiin a awm tawh ang.

A lo kal hmasak khan Rom sipaiten an veng a, a lo kal leh hunah chuan puan zaisin var tak, fai tak sin van sipaiten sakawr var chunga chuangin an rawn zui ang. A lo kal hmasak khan sabengtung no chungah a chuang a, a lo kal leh hunah chuan sakawr var chungah a rawn chuang tawh ang. A lo kal hmasak khan hling lukhum an khumtir a, a lo kal leh hunah chuan Lal lukhum khumin a lo kal ang. A lo kal hmasak khan luang tiang an kentir a, a lo kal leh hunah chuan thirtiang a rawn keng ang. Uain thur an tulh luihna ka aţang ngei khan a lo kal leh hunah chuan khandaih hriam tak a lo chhuak ang. A lo kal leh hunah chuan hnamtin chitina mite ro a rel dawn a ni.

Lal Isua lo kal leh hunah chuan amah ringtu leh nghaktute chu kan lawm a kim tawh ang. Lungngaih thlaphan leh buaina a awm tawh lo vang a, mangan leh buaina a bo tawh ang. Riltam tuihal a awm tawh lo vang a, lungchhiat mittui tlak a reh tawh ang. Damchhung buainate pelin lungngaihna zawng hnutiang kan chhawn ang a, Setana vanga kan rumna hi min hmangaihtu kan hrilh ang.

Khawngaihna hun hi a liam a, Jentailte ni a kin hunah chuan Lal Isua a lo kal leh ang. Vantirhkoh chungnung bera aw nen, Pathian tawtawrawt rite nen van aţangin chhum ropui takin a lo kal ang a. Thlâna awm zawng zawngte pawhin a aw an hria ang a, lei taksa ni tawh lovin van taksain an tho leh ang. Nungdama la awmte pawh tihdanglamin kan awm ang a. Chumi hunah chuan nupui pasal inneih a awm tawh lo ang a, rilţam tuihal pawh a bo tawh ang. Intihnat a awm tawh lo ang a, kan zain hmeichhe hmelţha tak angin kan awm tawh ang. Mipa chakna thahrui kan nei ang a, vana vantirhkohte ang kan ni tawh dawn a ni.

Kan Lalpa Isua lo kal leh hunah chuan leia a kohhran a rawn seng ang a, he lei hrehawm kan khualzinna ram leh, kan cham chhunga kan chenna bawkte, kan lei in (taksa) hi chhuahsanin, van khawpuia Pa hnenah kan haw tawh dawn a ni. Tihduhdahnate awm tawh lovin rangkachak tual kan leng tawh ang. Krista ringa a khawngaihna chhuangtute chu chatuanin kan nung reng ang.

Mi pakhat thuawih loh avangin khawvelah sual a lo lut a, lei hi anchedawngin a awm a, thihnain thilsiam zawng zawng a fan chhuak vek a. Fuliafate leh nungcha tinrengte pawhin nau vei leh rum tlawk tlawkin, Pathian fate lo lanna chu nghakhlel takin an thlir ve reng a ni.

Mihringah hian Setana chi tuh lo ţo ve hi a awm a, mahse Lalpan a phun loh chu a pawt phawi vek ang. Kan hming leh kan chanchin chhia zawng zawngte chu Isuan a thihpui vek tawh a. Kan felna chenin thlanah a phum bo vek a, rul thlah hming pawh Rom sipaite khan an khengbet tel vek tawh. ‘In pa Diabola’, min titu khan a faah min pawm tawh a. A awmna vanah khian min kohna tur hming thar, Ama ka ngeia sak hming chu min kohna turin a lo ziak sa diam tawh a. Chu chu manna thuhruk zinga mi lungvar thianghlim takah chuan ziakin a dah a, mahse chu hming chu a hnehtu apiang hnen ngeiah chuan min pe ang a. A changtute chauh lo chuan tuman an hre lo vang.

Lal Isua chu a lo kal hmain a hming puan lawk a ni a. Keini erawh a changtu chauh hriat turin lung vara ziak manna thuhruk zinga mi hming inthup, hming pakhat kan inţawm dawn a ni. Lalpa ka ngeia a kohna tur hming thar changtu leh hnehtu ni turin, Isua tel lova kan ţhahnemngaihnate leh kan inpeknate hi Isua rualin invui liam phal ang u. Chuti lo chuan kan inpek zawhna leh kan ţhahnemngaihnate hi kan hlawhchhampui hlauh dah ange. Hringnun hi indona rapthlak tak mai a ni a, hnehtu kan nih theih nan Lalpan mal min sawm rawh se, Amen.

Isaia 62:2, “Tichuan hnam tinin i felna chu an hmu ang a, lal zawng zawngin i ropuina chu an hmu bawk ang; tin, hming thar, LALPA kain a vuah tur chuan an ko vang che. LALPA kuta mawina lallukhum leh i Pathan kuta ropuina i ni bawk ang.” Lalpan malsawm che rawh se, Amen.

- Baby Naomi Pa