ZE NGHET

Ziaktu pakhat in, “Mizote kan nghehna ber chu kan nghehlohna hi a ni” a ti tawp mai! Thing chhia leh ṭha, rannung leh ramsa tinrengte pawh hian ze nghet leh nihphung danglam theilo an nei a, nang leh kei pawh hian kan nei chiang a ni. Midangte zia kan sawi hian an ze nghet emaw leh kan hmuhdan nghet tak hmangin emaw kan sawi tlangpui thin. Sawi dan ni mai lovin nel leh nel loh turte, hmangaih leh lainatna rilru thlengin he kan ngaihdan hian min hruai hle a ni.

Thlahtute atanga inthlahchhawn zia a awm a, pianpui zia a awm bawk a, ṭhanhnan zia kan nei bawk. Engemaw thil danglam bik in min khawih leh nghawng avanga ze thlak hlawk, rilru leh mihrinna danglam dawrh khawp tawn chang kan nei a, awmna leh chenna avanga ze danglam deuh bik neih pawh thil awm thei a ni. Dinhmun in a zir loh avanga ze pangngai lan tir theih loh a awm thei a, khuahkhirhna hnuaia awm vang leh thil tum leh beisei neih vanga ze thup leh ze chhuah ngam loh pawh hi awm thei tak a ni.

Thil hlimawm an tawnlai leh an thinrim lai hian midangte zia hi hriat a awl hle a, harsatna an paltlang laia an zia chu rilru ropui nei mi an nih leh nih loh hriat nan a ṭha hle. An zu ruih lai zia phei chu a nazawnga an sawi duh loh an sawichhuah hun leh zah hre lek lova an nungchang an tarlan lai a nih avangin, an mizia ka hriat duh chu zu ka inpui mai a, midangte chungchang an sawi dan leh anmahni an insawi dan hi mi ṭha an nih leh nih loh teh nan ka hmang ṭhin. Mizote hian ze ṭha lo nei mite sawi nan, “Ani chu ze nei a nia, zepui leh zete nei, aipui leh aite, mi kawi, tih nghet nei, ti zel zul, lehlama awr sena lehlama awr dum etc.” te kan nei ṭeuh mai. A ṭha lam pawh “Mi ngil, mi ṭha, mi puitling, taima, thawkrim, rilru nei etc.” kan nei teuh bawk.

Ram leh hnam zia, sakhaw zia, khawtlang zia, chhungkua leh mimal zia kan ti ṭhin a, an ze nghet nia kan hriat danin kan sawi ber thin. Pawnlanga ṭha viau, belhchiana hrawn hrehawm tak a awm theih a; at hmel deuh khawsakpui nuam zet mai an awm bawk. Kawng ṭhenkhata ropui deuh pawh hi nawina lai riau nei an ni theiin hruaitu en a an en ho zingah pawh hriatthiam ngai an awm bawk ṭhin. Midangte zia hi kan sawi peih viau naa mahni zenghet ngaihtuah ngai manglo hi kan tam hle awm a nia!

A bik takin keini khualzin tang khang, in leh lo, hmun lo ram, hna nghet leh eizawnna ngialnghet neilo ho hian rilru nghet kan nei thei thin lova, kan ze nghet tam tak chu kan nghehlohpui emaw tih mai tur a ni. Kan chhuahsan tawh ram kan ngaih chang a awm a, kan thlen tumna ram kan thlir bawk thin a, a lai laklawhah rilru nghet lo zet leh mumal nei mang lovin kan khawsa mai mai ṭhin. He hun laklawh leh nun danglam han kal tlang chiah hian kan ze nghet chhia leh ṭha hi a lang chhuak ṭhin a, mi tam takin an chhiatphah laiin he hun laklawh hi a ṭhen tan chuan hun lo kal tur atana inbuatsaihna leh inchherna hun tha a ni hlauh thung.

Dawt sawi, ruk ruk hreh lohna, Pathian tih leh taimak/thatchhiat thleng hian zenghetah a neih theih a. Mahni kawng lo leh tui vak loh zawnga hmantlak loh pawh a chemkalna lama chungchuang tak a ni thei bawk. ‘First impression is last impression’ awmzia hre vek mah ila tunlai ze thup khawvelah hian in teh dik leh midangte chunga ngaihdan nghet neih nghal mai hi a fuh loh chang a tam ta.

Keimahniah ṭheuh eng zia kan neih mek hi nge KAN ZE NGHET ATAN kan duh le?

- JL Liana