KA LO DAWN TAWI LUA A NI

“Ngaihni banglo panlai kan nun, Zotui ianga thinlung thianghlim leh nun mawi, hawktui iangin an liam ta si…” an lo tihte hian ka hringnuna ka hlimna leh ka lawmna, ka muanna zawng zawng te kha hawktui iangin an liam zo vek ni te hian ka hre ṭhina, he thumal hian ka nun hi a chhiar chhuak hle a ni.

Panlai kan nun hawktui ianga liam tawh hnu dawna, suangtuahna vak vel chung chuan hmun sangah te chuan ka han kai chhova, tlangsang tak tak te leh lentupui ianga tukloh ram buk ni awm tak tak te, tlai ni tla turin a han chhun en sut mai te chu ka thlir vawng vawng a, Sam ziaktu in “Tlang lamah te khian ka mit ka len chho vang” a tih thu te min tihrechhuaka, ‘Awi a leng e.. a leng vawng vawng’, a ni ber mai, ti hian ka han chham chhunzawm leh ta a -

“Khawi lama mi nge mi ṭanpuina tur lo thleng ang? 

Mi ṭanpuina tur chu Lalpa lei leh van siamtu hnena mi alo thleng ang. .” tiin ka thamral a ni ber mai. 

Lusun zo hlim inchhung ang maiin ni chu a eng dul ruih mai a. Thlasik rimten an lalram an rawn luah ṭana, khawlum huam huam leh boruak uap cherh churh te pawn kian zai an rel ṭan tawh tih hriat tak mai hian boruak pawh a thengthaw nuam tak zet a, thlifim rawn thaw heuh heuh te pawh chuan lung rualpui takin boruak chu an vawng dai raih mai a ni. Ka piah mual hla tak mitthim tlin tawk chu ka han thlira, hmarchhak zawnga tlang inkham ruih mai leh Shillong khawpui thenkhat te bak chu hmuh ka nei lem lova, van dumpawl ruih mai chu chhum varin a chawih mawi em em mai bawk nen. 

“Aw kan nunhlui hmanlai thlirin suihlunglen kim ten a tho, 

Lungkham chhailai ‘D’ zun a chamlo, saisena chun chawiin; 

Kumsul lamang her zel, sakhmel ṭha sensiar kan tawng, 

Thinlaiah ‘D’ zun a lo cham a, lungleng kan kiu vawng vawng.” ti a fam Lalzoa’n alo tuar iang hian ka tawna’n a nem bik chuan hlei lo’ng e! Awi a leng e, a leng e mai..! Ka insawi tui lutuk dawn tlat mai, mi te aia mittui leh hnaptui ngah nafam hi ka nia. 

Chutia lungleng leh khawhar thifahnukchat hiala ka thlir vauh vauh lai chuan, suangtuahna ata suangtuah lehchhawnna rama min hruaitu atan ka piah maia kan ṭhiante FM Radio aṭang chuan John Mayer-a sak, “Your Body is a Wonderland” tih ngei mai kha an rawn thlawh veng veng mai a. Ka thamral delh delh ni mai hian ka inhria!! A hla hnihna ah chuan ‘Pitbull ft Christina-i’ ten, “Feel This Moment” an rawn sa ṭang leh at phei chuan, tuifim nge ka pai tuinu tih pawh hre lovin ka suangtuahna vak vel chuan kan hring channa khawvel (Earth) hi vawisarih thlawt a helchhuak hman hialin ka hria. He hla ngei mai hi Gurgaon lama ka thiante, ka nau ni bawk- Mazuali, Sarah-i leh Maengi te ho nena kan thiam ang tawka Pepper Club a lampuia kan nuihpui bawk bawk lai te, hremhmun dawttu ka tih mai ka chen mekna a ka awm chhante leh hun tam tak liam tawh hnu aṭanga vawiin thlenga thil ka lo tih sual hrang hrangte ka hrechhuak uar uar a; min tuam veltu leh boruak ‘External Factor’ kan ti mai ang chu, hengte hian kan nun leh mizia hi an thunun tlat ziate min ti hre chhuak a, thawk la halh chungin “Ka lo dawn tawi lua a ni” ka ti ta vawng vawng a ni. 

Awle, hring kan chan chhunga min tuam veltu engkim mai kan tawn aṭang te hian kan nun leh mizia kan thunun dan kawng hi a inthlak fo ṭhina, kan beisei ngai miah loh te kan beisei thara, kan tih ngai miah lohte kan ti thar fo ṭhin a ni. Naupang mai kan nih lai chuan sweet (chithlum) hmuam tur kan neih chuan kan lungawi em ema, mahse tlangvalte leh val u deuh te chuan sweet thlum mai mai ei/hmuam chu tui/nuam ti ve tawh lovin chhailai ‘D’ run an bel sap sap thin. Khatih hun lai khan keini naupangte chuan ‘chhass’ lo neih ve te chu a ngaihna pawh kan hre lova, a nawm dan turte pawh kan bangbo in kan awt ngai reng reng lo. Sweet leina tur nu leh pa te dilin sweet kan hmuama kan lungawi hle. Mahse min hual veltu boruak tlangvalte tih dan zirin kan naupang rualpuite nen kan in ‘D’ der ve hlawm thin a nih kha. Chung chu min tuamveltu leh min hualveltu te vang mai alo ni. Kumsul lamang her zelin kan kum leh pumrua te chuan puitlinna ramah min hruai thleng ve ta a, tichuan ṭhenrual kan kawm tam zela, mi ten hlawhtlin nana an hmante chu kan tan pawh a nih ve ringin kan han tulpui ve lawp lawp a mahse kan tan erawh chuan, “Ava pawi em.. Ka lo dawn tawi lua a ni” kan tih phah vawng vawng ta ṭhin a ni.

Ningzu dawnin rual kan han pawl a, a tir chuan inlungrual takin, “Vanram tlafual a nih hi le” ti bai bai chungin hlim kan tum a, mahse a tawpna chu lu lam leh mawng lam hre lek lova luak ho bawrh bawrh te, hmingchhiat leh innghirnghona mai a ni. Tichuan tleitir lanu hmeltha lama hrat khawkheng te pheikhai rualpui lehin kan lengkual vel leh ta zar zar a, chhas pali nga neih chu ava har lo leh ta em! Chung zawng zawng chu min hualveltu boruak vangte hi an ni ṭhin, thil nih phung ve rengah kan ngai ṭhin a, thlemtute an nihna hi haider lui hram hramin kan sawi mawi zel chu a nih hi. Kan hmelma kumhlunte chu hmun hlaah an awm silova, kan kiangah, kan bulhnai maiah an intawktarh reng a ni tih hi i hria ang u. 

Kum 1954 khan William Golding-a chuan thawnthu tha zet mai ‘Lord of the Flies’ a tichhuaka, chu thawnthu ah chuan sap naupang rual hi Aircraft in an thlawkchhuak a, thuife an thlawh hnu chuan vanduai thlak takin an accident ta a, an vanneih a siamin thliarkar pakhat ah an tla ta hlauh mai a, an him dam tlang a ni. Mahse vah chhuah dan awm tawh heklo, chu hmunah chuan an thiam dan danin nun an sual ve ta a ni. chhungkaw changkang tak tak aṭanga seilian, sikul ṭhaa kal phak vek tih takah an inrelbawl thiam hle. Hruaitu te inthlangin dan leh hrai fel tak an siama, kalphung pangai thlapin an kal a ni. Mahse hun a kal zela chung chuan a daih reilo hle, khaweng an hmulo rei tial tial a, anmahni pawh an hniam tial tial bawka, alo rei phei chuan mak tak a ni, hnam mawl ber te khawsak dana bul ṭan ṭha leh in saruang hmaah te hial an inthawi ṭha leh kut kut mai a ni. Chu thawnthu chuan mihring nuna pawnlam thil in hmun a chan thukzia te, min hualveltu ten hmun an chan thukzia te a tarlanga, min hualveltute hian kan nun leh mizia hi a thunun tlata, kan mizia pawh a siam hle a ni tih thu mawi takin phuah chhuak a ni.

London naupang sikul ṭhaa zirte leh thu ṭha zirtirna ṭha dawngte mah anmahni hualveltu boruakin a zir em avangin kan ti zawk dawn em ni? Sakawlh hmaah leh thingbul lungbul hmaa an bungbut ṭhat leh theih chuan keini pawh hian kan Film en aṭangte, kan thil tawn leh hriatna aṭangte hian kan bungbu tha veleh thei ang tih hi a rinawm a, a hlauhawm mai nilovin keimahah ngei hian a chiang a ni. Min hualveltu sum leh pai hmangaih luat vangin, duh leh chak vang ni hauh lovin ‘Shillong Jail’ run belh zai rel alo ngai ta a ni. Chuvangin ‘Ka lo dawn tawi lua a ni’ kan tih hma ngei hian siamṭhat ngai kan nunah a awm chuan siamṭha thuai ila, sim ngai kan nun leh mizia ah a awm chuan sim thuai hi a finthlak a, a hlawk thlak hle bawk dawn a ni. “Min hualveltute hi ka tan thiltha an ni em? Ka nun kaihruaitu atan an ṭha tawkin an tling tawk em? Heng thil hi ti ve ta ila ka tan chhiatna lo thleng thei eng thil nge awm? Emaw, ka tan hlawkna leh ṭhatna eng thil nge awm?” ti a uluk tak leh fimkhur taka kan rinna kan belhchian a ngai tak zet a ni.

“Sum tam tak aiin hmingṭhat hi thlan zawk tur a ni, tangka leh rangkachak aiin duhsakna a ngainatawm..”. 

- Shillong Tlangval