INRENCHEM

“Sum hmanzai” ti pawhin a sawi theih awm e. A thawh chhuah a harsat ngaihtuahin a hman dan lam hi kan thiam mawh tlang theuh a ni mai thei. “Sum lak luh aiin a hman dan thiam a pawimawh zawk” tih thufing an lo chherchhuah danah hian. Engpawh nise, vawksa tui zia kan sawi hian arsa kha a tui lo kan tihna a ni hauh lova. Tun ṭumah hi chuan a rethei, a hausaa kan mamawh tlan zawk nia ka hriat a awmsa (neihsa) renchem (hmanzai) thiam a pawimawh dan hi ka sawi uar zawk dawn a ni.

Inrenchem tih hian ṭul leh mamawh atan chauha sum hman thiam a kawk bik deuh. Zofate zingah inrenchem nachang hre lo, nei chuang bawk silo kan tam niin a lang. A khawsa thei deuhte ai hian a harsa deuhte hi kan la inren thiam lo zawk mah emaw tih mai tur a ni! Kan mamawh nilo, kan duh zawng leh awh zawng mai maiah te hian kan intlakral ni te hian a lang. Hmanraw changkang leh manto thil, neih thinglung khawnga lei mai kan ching te, kan neih loh pawh a kan khawsak ti bahlah chuang miahlo tur thil kan nei chuang rei rui te hi kan hna vawn leh lakluh, kan dinhmun leh nihna ten a phu a nih loh chuan mi nuih tih zatna mai a ni. Chutiang mite chu sum hman dan thiamlo leh mi inren thiam lo te khawsa zia a ni a, englai mahin an intodelh ngailo. Engemaw hlekah unau, ṭhian ṭha, ṭhenawm khawvengte an ban buai reng ṭhin. 

Tuna engmah neih neilo, thawhchhuah mila inkhawl kerh kerh, mahni dinhmun leh nihna anga lang ngam, mahni mamawh hria, duhzawng leh awh zawng lei kawnga insum theite chu, sum leh paiah hausa le lu lo mahse intodelh chu sawi loh rual an khum thuai mai thin a ni. “I duh zawng ni lovin i mamawh chauh lei rawh” tih thufing hi i hre reng ṭhin ang u. 

Tin, ral bei tur tan ralrel thiam a ṭangkai angin inrenchemna thilah pawh ruahmanna siam thiam a finthlak fo ang. Hman deuh a kan khawsakna thila bet tel lo, changkannain a ken tel, Bill leh Fee chi hrang hrang khel lova thlatin pek ngai a tam ta! Mifing felte angin sum lut leh chhuak ruahman lawkna (budget estimate) chu siamthiam ve thlip thlep kher mah suh ila, loh theih loh thila kan thlatin sum chhuak tal chu kan hre ve ngei ngei tur a ni. Chungte chu a takin han ziakchhuak la, chhungkua a hriat tlan theih turin bangah emaw a remchan berna ah han tar chhuak chhin teh, chhungkua a sum dinhmun hriat tlan zel hi sum hman dan thiamna bul a ni. Kan sum hmanna kawng chi hrang hrangah khan eng lamah nge kan insum a ṭul tih i hmu chhuak thei mai ang. Ar khawthim dai a sum kan hman thinna hian hriat loh karin leiba min lo siam ṭhin alo ni! Kan inenfiah theih nan a tlangpui hetiang hian han zam ta ila; A awl lai dahkhatin zawhna tin hi han chhang chhin la, a tawpah i belhkhawm leh dawn nia. Thlakhat tan:- 

1. Inluah man

2. Electric Bill

3. Tui Bill

4. Telephone Bill or Topup 

5. T.V. hman man

6. Gas man

7. Inkhawm thilpek

8. Pathian ram

9. Bazar kaina

10. Ṭuldang or Reserve

11. Belhkhawm

Tin, kan khawsak dan a zira sum a ral tam loh theih dan chi hrang hrang a awm bawk. Kan hman loh tur Electric Switch Off zelte, inkawm nan a phone hman loh te, chawhmeh kanna sahriat a tawk chauha hman thiam te, tui ren (hman) thiam te hi a pawimawh em em a ni. Sahbawn ral tep tawh, te tak te pawh hi paih mai lovin a tharah khan han bel ila a ral thak thlengin a hman theih a ni. Ha siai pawh hi a zo tawh emaw tih hnuah han keu phel ila vawihnih thum hman daih chu alo la awm zel thin zu nia! Chaw kan khawrh te hian a lai aṭanga lawk mai lovin a sirah a mawng thleng rat zelin a hmatiama khawrh ṭhin tur a nia, a nawi kha khawm fai nghal zel bawk tur a ni. A hing paih tur a ven bakah ei hnuhnungte tan ei a chakawm bik. Ṭhenkhat chuan chaw ṭhing paih mai te hi an serh lova, chin loh tur a ni. Pi pu chenah an duh ngai lo, mal a sawm lo an ti. Han kang lum ila tui takin a ei theih mai a ni, kan nunna a ni a, kan zah tur a ni, chhuanchhamte i hre reng ang u. Lal Isua paw’n Pathian hnen aṭanga malsawmna kan dawn te hi engmah lo mai maia luan raltir a phal lo. Tam taka tipung theitu ni mahse sangha leh chhangper eina bang nawi te pawh kha a chhar khawm tir leh vek a nih kha! (John. 6:12). 

Kan Bible hian puar leh fanna ni si lova sum leh tha sen vak vak hi tha a ti lo hle. Chhungkaw khawsakna paw’n a mamawh hauh loh khawvel nawmsip bawlna lama kan insengso ṭhinte a nih phei chuan tunah sim nghal ila, ngai kan awh leh thuai mai ang. Hlawh nei ve lote tan pawh hlawh kan neih ve theih dan chu a awmsa renchem thiam leh mamawh tih tlem thiam hi a ni. Lakluhna dang nei lem lo mah ila a awmsa kan renchem thiam chuan tam tak lakluh ang a ni thei. A ṭul lova intlakral loh hi Bible min zirtir dan a ni e. (Isaia 55:22). 

(Note: Pastor K. Lalpiangthara buatsaih “Fianrial” tih bu a mi behchhana ziak a ni.)

- R.L. Vohbik

KA LO DAWN TAWI LUA A NI

“Ngaihni banglo panlai kan nun, Zotui ianga thinlung thianghlim leh nun mawi, hawktui iangin an liam ta si…” an lo tihte hian ka hringnuna ka hlimna leh ka lawmna, ka muanna zawng zawng te kha hawktui iangin an liam zo vek ni te hian ka hre ṭhina, he thumal hian ka nun hi a chhiar chhuak hle a ni.

Panlai kan nun hawktui ianga liam tawh hnu dawna, suangtuahna vak vel chung chuan hmun sangah te chuan ka han kai chhova, tlangsang tak tak te leh lentupui ianga tukloh ram buk ni awm tak tak te, tlai ni tla turin a han chhun en sut mai te chu ka thlir vawng vawng a, Sam ziaktu in “Tlang lamah te khian ka mit ka len chho vang” a tih thu te min tihrechhuaka, ‘Awi a leng e.. a leng vawng vawng’, a ni ber mai, ti hian ka han chham chhunzawm leh ta a -

“Khawi lama mi nge mi ṭanpuina tur lo thleng ang? 

Mi ṭanpuina tur chu Lalpa lei leh van siamtu hnena mi alo thleng ang. .” tiin ka thamral a ni ber mai. 

Lusun zo hlim inchhung ang maiin ni chu a eng dul ruih mai a. Thlasik rimten an lalram an rawn luah ṭana, khawlum huam huam leh boruak uap cherh churh te pawn kian zai an rel ṭan tawh tih hriat tak mai hian boruak pawh a thengthaw nuam tak zet a, thlifim rawn thaw heuh heuh te pawh chuan lung rualpui takin boruak chu an vawng dai raih mai a ni. Ka piah mual hla tak mitthim tlin tawk chu ka han thlira, hmarchhak zawnga tlang inkham ruih mai leh Shillong khawpui thenkhat te bak chu hmuh ka nei lem lova, van dumpawl ruih mai chu chhum varin a chawih mawi em em mai bawk nen. 

“Aw kan nunhlui hmanlai thlirin suihlunglen kim ten a tho, 

Lungkham chhailai ‘D’ zun a chamlo, saisena chun chawiin; 

Kumsul lamang her zel, sakhmel ṭha sensiar kan tawng, 

Thinlaiah ‘D’ zun a lo cham a, lungleng kan kiu vawng vawng.” ti a fam Lalzoa’n alo tuar iang hian ka tawna’n a nem bik chuan hlei lo’ng e! Awi a leng e, a leng e mai..! Ka insawi tui lutuk dawn tlat mai, mi te aia mittui leh hnaptui ngah nafam hi ka nia. 

Chutia lungleng leh khawhar thifahnukchat hiala ka thlir vauh vauh lai chuan, suangtuahna ata suangtuah lehchhawnna rama min hruaitu atan ka piah maia kan ṭhiante FM Radio aṭang chuan John Mayer-a sak, “Your Body is a Wonderland” tih ngei mai kha an rawn thlawh veng veng mai a. Ka thamral delh delh ni mai hian ka inhria!! A hla hnihna ah chuan ‘Pitbull ft Christina-i’ ten, “Feel This Moment” an rawn sa ṭang leh at phei chuan, tuifim nge ka pai tuinu tih pawh hre lovin ka suangtuahna vak vel chuan kan hring channa khawvel (Earth) hi vawisarih thlawt a helchhuak hman hialin ka hria. He hla ngei mai hi Gurgaon lama ka thiante, ka nau ni bawk- Mazuali, Sarah-i leh Maengi te ho nena kan thiam ang tawka Pepper Club a lampuia kan nuihpui bawk bawk lai te, hremhmun dawttu ka tih mai ka chen mekna a ka awm chhante leh hun tam tak liam tawh hnu aṭanga vawiin thlenga thil ka lo tih sual hrang hrangte ka hrechhuak uar uar a; min tuam veltu leh boruak ‘External Factor’ kan ti mai ang chu, hengte hian kan nun leh mizia hi an thunun tlat ziate min ti hre chhuak a, thawk la halh chungin “Ka lo dawn tawi lua a ni” ka ti ta vawng vawng a ni. 

Awle, hring kan chan chhunga min tuam veltu engkim mai kan tawn aṭang te hian kan nun leh mizia kan thunun dan kawng hi a inthlak fo ṭhina, kan beisei ngai miah loh te kan beisei thara, kan tih ngai miah lohte kan ti thar fo ṭhin a ni. Naupang mai kan nih lai chuan sweet (chithlum) hmuam tur kan neih chuan kan lungawi em ema, mahse tlangvalte leh val u deuh te chuan sweet thlum mai mai ei/hmuam chu tui/nuam ti ve tawh lovin chhailai ‘D’ run an bel sap sap thin. Khatih hun lai khan keini naupangte chuan ‘chhass’ lo neih ve te chu a ngaihna pawh kan hre lova, a nawm dan turte pawh kan bangbo in kan awt ngai reng reng lo. Sweet leina tur nu leh pa te dilin sweet kan hmuama kan lungawi hle. Mahse min hual veltu boruak tlangvalte tih dan zirin kan naupang rualpuite nen kan in ‘D’ der ve hlawm thin a nih kha. Chung chu min tuamveltu leh min hualveltu te vang mai alo ni. Kumsul lamang her zelin kan kum leh pumrua te chuan puitlinna ramah min hruai thleng ve ta a, tichuan ṭhenrual kan kawm tam zela, mi ten hlawhtlin nana an hmante chu kan tan pawh a nih ve ringin kan han tulpui ve lawp lawp a mahse kan tan erawh chuan, “Ava pawi em.. Ka lo dawn tawi lua a ni” kan tih phah vawng vawng ta ṭhin a ni.

Ningzu dawnin rual kan han pawl a, a tir chuan inlungrual takin, “Vanram tlafual a nih hi le” ti bai bai chungin hlim kan tum a, mahse a tawpna chu lu lam leh mawng lam hre lek lova luak ho bawrh bawrh te, hmingchhiat leh innghirnghona mai a ni. Tichuan tleitir lanu hmeltha lama hrat khawkheng te pheikhai rualpui lehin kan lengkual vel leh ta zar zar a, chhas pali nga neih chu ava har lo leh ta em! Chung zawng zawng chu min hualveltu boruak vangte hi an ni ṭhin, thil nih phung ve rengah kan ngai ṭhin a, thlemtute an nihna hi haider lui hram hramin kan sawi mawi zel chu a nih hi. Kan hmelma kumhlunte chu hmun hlaah an awm silova, kan kiangah, kan bulhnai maiah an intawktarh reng a ni tih hi i hria ang u. 

Kum 1954 khan William Golding-a chuan thawnthu tha zet mai ‘Lord of the Flies’ a tichhuaka, chu thawnthu ah chuan sap naupang rual hi Aircraft in an thlawkchhuak a, thuife an thlawh hnu chuan vanduai thlak takin an accident ta a, an vanneih a siamin thliarkar pakhat ah an tla ta hlauh mai a, an him dam tlang a ni. Mahse vah chhuah dan awm tawh heklo, chu hmunah chuan an thiam dan danin nun an sual ve ta a ni. chhungkaw changkang tak tak aṭanga seilian, sikul ṭhaa kal phak vek tih takah an inrelbawl thiam hle. Hruaitu te inthlangin dan leh hrai fel tak an siama, kalphung pangai thlapin an kal a ni. Mahse hun a kal zela chung chuan a daih reilo hle, khaweng an hmulo rei tial tial a, anmahni pawh an hniam tial tial bawka, alo rei phei chuan mak tak a ni, hnam mawl ber te khawsak dana bul ṭan ṭha leh in saruang hmaah te hial an inthawi ṭha leh kut kut mai a ni. Chu thawnthu chuan mihring nuna pawnlam thil in hmun a chan thukzia te, min hualveltu ten hmun an chan thukzia te a tarlanga, min hualveltute hian kan nun leh mizia hi a thunun tlata, kan mizia pawh a siam hle a ni tih thu mawi takin phuah chhuak a ni.

London naupang sikul ṭhaa zirte leh thu ṭha zirtirna ṭha dawngte mah anmahni hualveltu boruakin a zir em avangin kan ti zawk dawn em ni? Sakawlh hmaah leh thingbul lungbul hmaa an bungbut ṭhat leh theih chuan keini pawh hian kan Film en aṭangte, kan thil tawn leh hriatna aṭangte hian kan bungbu tha veleh thei ang tih hi a rinawm a, a hlauhawm mai nilovin keimahah ngei hian a chiang a ni. Min hualveltu sum leh pai hmangaih luat vangin, duh leh chak vang ni hauh lovin ‘Shillong Jail’ run belh zai rel alo ngai ta a ni. Chuvangin ‘Ka lo dawn tawi lua a ni’ kan tih hma ngei hian siamṭhat ngai kan nunah a awm chuan siamṭha thuai ila, sim ngai kan nun leh mizia ah a awm chuan sim thuai hi a finthlak a, a hlawk thlak hle bawk dawn a ni. “Min hualveltute hi ka tan thiltha an ni em? Ka nun kaihruaitu atan an ṭha tawkin an tling tawk em? Heng thil hi ti ve ta ila ka tan chhiatna lo thleng thei eng thil nge awm? Emaw, ka tan hlawkna leh ṭhatna eng thil nge awm?” ti a uluk tak leh fimkhur taka kan rinna kan belhchian a ngai tak zet a ni.

“Sum tam tak aiin hmingṭhat hi thlan zawk tur a ni, tangka leh rangkachak aiin duhsakna a ngainatawm..”. 

- Shillong Tlangval

MIZO CHRISTIAN FELLOWSHIP (DELHI) 2014

FELLOWSHIP UPA TE -
Upa Lalrivunga
Upa Laldinga
Upa Hrangauchhunga
Upa Nochhuna

KOHHRANPUI -
Chairman : Tv. F. Lalremruata
Vice Chairman : Upa Lalrivunga
Secretary : Tv. C. Lalchharliana
Asst. Secy. : Tv. Lalrinawma
Treasurer : Pi Juliet Zamveli
Fin. Secy. : Upa Laldinga
Executive Committee Members :
Upa Hrangauchhunga
Upa Nochhuna
Pu Hmingthanzaua
Pu Sikuldinthanga


WOMEN DEPARTMENT -
President : Nl. TBC Lamthangpuii
Vice President : Pi Lalengliani
Secretary : Pi Juliet Zamveli
Asst. Secy.: Pi Mimi Lalhmangaihi
Treasurer : Nl. Malsawmtluangi
Fin. Secy.: Pi Lalrinsangi
Executive Committee Members :
Pi Lalrosepari
Pi Lalthanzami
Pi Nemthienmawi
Pi Vanlalhuali


YOUTH DEPARTMENT -
President : Pu Lalzuiliana (March thla aṭangin Pu Rocky Chunga)
Vice President : Pu Rocky Chunga (March thla aṭangin Pu Lalhminghlua)
Secretary : Pu Jerome Lalhruaitluanga Ralte
Asst. Secy.: Nl. Parthangi
Treasurer : Nl. Jenifer Parvuli
Fin. Secy.: Tv. Lalhmunliana
Journal Secy.: Pu Gin Lalthianghlima
Executive Committee Members :
Nl. Lalmuanpuii
Pu C. Lalṭanpuia
Pu Lalhminghlua
Pi Lalrinengi Ralte
Tv. Malsawmdawnga
Tv. Alex Ch. Zanghakliana (May thla aṭangin ruat a ni)


NAUPANG SUNDAY SCHOOL DEPARTMENT -
Superintendent : Pu Jerome Lalhruaitluanga Ralte
Secretary : Pu Gin Lalthianghlima
Treasurer : Nl. Parthangi
Zirtirtu te :
1. Pu Rocky Chunga
2. Nl. TBC Lamthangpuii
3. Upa Hrangauchhunga
4. Pi Mimi Lalhmangaihi
5. Pi Lalrinsangi
6. Pi Lalpianthari
7. Pi Nemthienmawi
8. Pu C. Lalṭanpuia
9. Nl. Jenifer Parvuli
10. Nl. Lalmuanpuii
11. Tv. Lalrinawma
12. Tv. Malsawmdawnga
13. Tv. Lalremruata


Department hrang hrang Adviser te -
Women Dept. : Pu Sikuldinthanga
Youth Dept. : Tv. C. Lalchharliana
Naupang Sunday School Dept. : Upa Lalrivunga

Youth Department: 2014 E.C

KEIMAHNI

He Fellowship hi Ni 15/07/2007 aṭang khan Rev. Aichhunga Inah inkhawmna neih ṭan ani a, Rev. H. Vanlalsiama'n thusawina a nei a ni. Hun lokal zelah mi kan lo ṭhathnem tak chinah, Ni 28/12/2008 -ah hmingte neiin puitling zawkin din a ni. A din chhan leh tum ber pawh keini Mizo ten kan ṭawng ngei a Pathian fakna leh chawimawina zalen taka kan neih theih nan leh Taksa leh Thlarau intuai tharna neih leh theih nan a din a ni.

He Fellowship hi mahni a inawp, engkawngah mah Church leh Fellowship thuhnuaiah awmna a nei lova; amaherawh chu, khawvel ram tin a Kristian te nen a tih dan hmun khat leh rinna leh rochun thuhmuna inṭawm tlang vek a ni.

He Fellowship hi Department pali (4)-ah ṭhen a ni a, Kohhranpui, Women Department, Youth Department leh Naupang Sunday School Department te a ṭhen a ni.

Mi tupawh he Fellowship inkaihhruaina dan leh thurin te pawm a, a thiltumte ti hlawhtling tura theihtawp chhuah duh apiangte chu englai pawha member a pawm theih a ni.

Hetianga mi ṭhahnem ngai ten pawl din nachang an hria hi a ropuiin a fakawm hle a ni. Ringtu kan nih chuan kan kalna apiangah Lalpa kan Pathian biakna maicham kan din zel tur a ni a, kan chenna vela mite awm angin kan awm ve mai mai tur a ni lo tih kan Bible pawhin chiang takin min zirtir a ni.