Thuthlungtharah hian ‘Thi tlak’ ti a, Pathian thuin a sawi leh a sawi fak si loh; mahse ‘Thi tlak’ a ngaih hi mi tlemte kan hmu a. Chung zinga sawi hmaih theih loh mi langsar pahnih kan hmuh te chu BARABA LEH ISUA KRISTA an ni. Baraba hi Chanchinṭha ziak hrang hranga an tarlan dan chuan:
1. Helte zinga mi, tualthattu (Mk. 15:7).
2. Helna leh tualthah avanga mi tang (Lk. 23:25).
3. Suam hmang (John.18:40).
4. Mi tang hming thang tak (Matt. 27:16). Hetianga mi tawrawt, Rome sorkarna duh lova helte zinga mi hi sorkar lai, thuneihna fawng vuantute tan chuan mi hnawksak, khawtlang leh ram tana hlauhawm tak a ni ngei ang. ‘Thi tlak’ tiin Bible hian tarlang fak lo mah se, Rome sorkar aiawh leh Juda mipui rorelna hmaa ‘Thi tlak’ ISUA KRISTA nen khaikhin anih danah hian ‘Thi tlak’ a ngaih tur zinga mi a nih zia a hriat theih bawk.
Thi tlak Isua Krista hi Chanchinṭha ziaka kan hmuh ve danah chuan Baraba ang lo takin heti hian a chanchin an ziak ve thung:
1) Pathian Fapa
2) Keimahni anga kawng tinreng a thlemna tawk tawh, sual erawh chu sual lo (Heb. 4:15).
3) Pathian Beram no (Joh. 1:29).
4) Tidamtu, sual ngaidamtu leh thilmak titu.
5) Mi fel tak (Matt. 27:19).
6) Sualna nei lo (Lk. 23:14-17). Thil mak tak chu Rome sorkar roreltute pawhin a chungchang thuah thiam lohna an hmuh loh; mi fel, sualna nei lo anga an hriat chu “Thi tlak a ni” tiin mipuite leh puithiamte khan THI TLAK (Misual) angin an chhuak kha thil mak tak chu a ni! Thi tlak an tih Isua Krista kha Rome sorkar roreltute, Pilota leh a nupuite leh Heroda ang khan keini pawhin mi fel, sualna nei lo leh thihna khawp a sual nei lo tiin kan ṭan ve ngei chu a rinawm. Mahse thi tlak a ni an tih kha thu dik tak zawk a ni. Amah aia thi tlak khan tumah an awm lo.
Tlarau lam zawnga ngaihtuahna neih loh chuan pawm a harsa viau ang, thlarau lam aṭanga hriatna, ngaihtuahna neite tan chuan amah Isua Krista aia thi tlak tumah an awm lo tih a chiang hle thung. Mi sual, ṭawmkai lo, Pathian rorelna hmaah thiamthu sawi tur pakhatmah nei lo, thi tlak dik tak nang leh kei vangin sualna nei lo Isua Krista chu min chhandam turin leh Pa ngaihdamna chang tura palai hna thawk tura rintlak leh thi tlak dik tak chu a lo ni zawk. Pa lungawina chu amah Kristaah a awm famkim si a. A chunga rorelna zawng zawng hi anchhe dawng, mi sual, nang leh kei aiawhna kha a ni (Isaia 53:5). Isua Krista chu remna palai anih zia alang chiang hle.
Chutia kan Lal Isuan kan natnate phur a, lei lalte hmaa a din hmu chuan kan khawlohnate avanga vuak thitlina a awm hma hauhin remna palai hna chu lo thawk ṭanin, Heroda leh Pilota te pahnih inbe tawh ngai reng reng lote pawh an lo inngaih leh ta a. Lei leh van inkhar khip hnan tlat tawh chu Chhandamtu thisen chuan a hawng leh a. Pathian leh mihring inkar chat tawh chu Kros hmangin a zawm leh a, a laiah ISUA KRISTA a lo ding ta a ni. Lalpa chu fakin awm rawh se. Tunge chhuahsak che u ila induh? Baraba nge Isua Krista an tih a chu? (Matt. 27: 17). He zawhna hi kan chhan tur ni se, Baraba aiin Isua Krista kha chhuah rawh kan ti vek a rinawm. Mahse Isua Krista kha lo chhuah tir ta zawk se tiin ngaihtuahna han pu ila; Pa hmelma, Pa nena inrem lo, chhandamna chang lo kan ni dawn a kan chan tur chu kan hrethiam nghal mai ang. Mitthlain ‘Hremhmun/Meidil’ a lo lang nghal a ni. Baraba kha tu vanga chhuak nge? Pilota leh mipuite leh puithiamte vanga chhuak a ni tih mai a awl hle ang. Mahse anni vanga chhuak a ni hauh si lo. Chhuah zalentu chu Baraba bula ding Isua Krista zawk kha a lo ni reng si. Isua Krista bulah khan ding lo se chhuah zalen a ni hauh lovang. Tualthattu, mi sual turu, suam hmang kha Isua Krista nen an din dun meuh chuan zalenna a lo hmu ta zawk a ni. Lalpa chu fakin awm rawh se.
Tualthattu, mi sual turu leh suam hmang Baraba pawh Isua bula a din meuh chuan chhandamna achan ang khan, nang leh kei pawh sualin, lo tlu ve ṭhin mah ila Isua bulah kan awm/kan din tlat chuan chhandamin kan awm ngei ang. Amah a awm tlat te chu a hnar ngai lo ‘Keimah awm reng rawh u, keipawh Pa hnena awm ang khan’ a ti si a. Ama hnena awm ṭhin te chuan sual an kalsan ṭhin a, an sualna te chu hriat reng sak a ni tawh ngai lo. Baraba chanchin ziahnaah chuan amah an chhuah zawk thu a hriat khan Baraba chu khi vur vur leh hlimin, lawm viau awm tak Isua hmel a hmuh khan inthiam lohna in a khat a, Isua a hmuh hnuah leh Isua aia chhuah zalen anih hnuah vawi khatmah thilsual a ti leh tawh lo va, Isua Krista tan hian a nung chhunzawm ta zawk a ni an ti. Isua Krista hmutute chu an in uang lo va, an tlin lohna leh an sualna an in hmu ṭhin a, thilsual an tih ṭhin chu ti chhunzawm zel tawh lovin an kalsan zawk ṭhin a, an hmuh Isua Krista tan an nung tawh zawk ṭhin a ni. Kan sualnate phur chunga kan sual a thihpui hma hauh pawhin remna leh zalenna a lo siam reng tawh a ni (Pilota leh Heroda inrem lo an lo inrem phah a, Mi sual turu tan in a tang mek Baraba chu chhuah zalenin a awm kha). A thih a, a thawhlehna phei hi chuan sual bawi ata min chhuah a, zalenna min pe a ni. Lalpa chu fakin awm mawlh rawh se.
Mi sual turu lutuk, thi tlak ngawih ngawih Baraba ang khan sualin, nunhlui rapthlak tak tak lo nei tawhin, thi tlak khawpin sual lo khawih tawh mah ila, Baraba angin i sual bulah dingin a hmel hmu turin a hnaih lai hian amah Isua Krista chu i zawng ang u, i hnaih tlat ang u. Chu chu kan sal tanna, sualin min bawi betna ata tlanchhuahna leh kan zalenna tur kawng awlsam ber chu a ni. Amah hnaihtu leh amah hmutute chuan an tlin lohna leh an sualna an hria a, chumi hriatnaah chuan tawp mai lovin an inngaitlawm a, an sualte kalsanin an sim ṭhin. Anmahni a thil hluite chu a ral a, thil thar a thuamin an lo awm leh ṭhin. Lota nupui angin hnunglam hawikir tawh lovin an dam chhung atan Lalpa rawngbawlin, Krista tan an nun a hlan tawh zawk ṭhin a ni. Mi sual turu Baraba, nang leh kei atan hian sualna nei lo, Pa lung tiawi zotu, Isua Krista ngei mai chu ‘Thi tlak’ a lova ni tak em.
Chhiartu te, he thu hmang ngei hian khawih nawn inngaihna lai chu khawih nawn in lo awm se, sawi ṭhiat ngai chu sawi ṭhiat lo niin, siam ṭhat ngai chu siam ṭhatin lo awm sela, Lalpan malsawm mawlh che u rawh se, Amen.
-Alex ZL. Hualngo
