JERUSALEM TEMPLE PUANZAR ROPUI A THLER TA

(Chhiar tur: Matt. 27:51)

Lal Isua thih niah hian thilthleng ropui tak tak a awm a, a mal malin sermon dawn ila, sawisen rual a ni lovang. Vawiin Isua thih niah hian thil thleng ropui tak pakhat chauh han sawi ta ila, chhiartuten kan hlawkpui ngei ka beisei a ni.

1. Jerusalem temple puanzar thler hian thuthlung hlui inthawina zawng zawng a tibang tih a entir.(Rom 10:4)

Thuthlung hluiah khan Israel-ten an sual ngaihdamnan nitin kawla ni chhuak chhiarin puithiam kaltlangin sual thawina an lo hlan ṭhin a, chubakah inremna ni an buatsaih a, Pathian leh misualten inremna an neih theihna turin Puithiam lal ber chuan biakbuk puanzar chhung hmun thianghlim berah kum khatah vawi khat lutin inremna a lo siamsak ṭhin a ni.

Heng zawng zawng hian Pathian fapa Isua Krista, beram no, Kalvary tlanga sual aia a inthawina tur a lo entir lawk vek a, a tak tak lo thlen hmain a hlimthla, drama angin hun rei tak chhung an lo chang a ni. Tichuan a tak Krista ngei chu khawvelah lo kalin chatuan atan sual thawina chu cross ah a rawn thawk chhuak ta vek a, chu chuan a hlimthla zawng zawng kha a rawn tibang ta vek a, lei hmun thianghlim ber kha tihbo a ni a, Lalpa Thlarau nena kan awmna apiang chu hmun thianghlim a lo ni ta. Chuvangin biakbuk puanzar lo thler hian lei hmun thianghlim a ṭhiat a, lei rannungte hmanga inthawina a tibang vek a, chatuana inthawina nung a buatsaih a, chumi changtute awmna apiang chu hmun thianghlim a lo ni ta zel a ni. A van ropui em!

2. Puithiam bik nihna a titawp a, amah ringtu zawng zawngte chu chi thlan, lal puithiam, hnam thianghlimah min siam ta. (Thup. 5:9,10)

Thuthlung hlui hunah puithiamte kaltlang lovin, mahniin, mahni duhna hmun hmunah Pathian a biak theih loh. Puithiamin hmun bikah chauh mipuite aiawhin Lalpa hmaah an dinsak ṭhin. Sual thawina leh sual thuphachawina pawh puithiam thawisak vek an mamawh a ni.

Isua Krista thih nia biakbuk puanzar rawn thler hian Thuthlung hluia puithiam bik kaltlanga inthawina a rawn tibang vek a, tupawh amah ringtu apiangte chu chi thlan, hnam thianghlim, Lal puithiam nihna min chantir ta vek a, mahnia directa Pathian biak theihna, sual thupha chawi theihna kan lo nei a, mahni ngei hi Kristan puithiamah min siam ta a ni. Krista chu puithiam Lal ber niin, ama zarah keini pawhin puithiam hna kan thawk thei a, mite tan Pathian hmaah kan ding thei a, mite kan ṭawngtlṭaisak thei a, mite malsawmna kan pe thei a, mite tanah malsawmna kan lo ni thei ta a ni. I puithiam nihna kha Lalpan a ropuinan hmang chhuak turin a duh che a ni.

3. Khawi hmunah pawh, Jerusalem kher lovah pawh Pathian biak theihna kan lo nei a, amah nena kan awmna chu hmun thianghlim ber a lo ni ta.(John 4:20)

Thuthlung hluiah chuan Jerusalemah lo chuan Pathian an be thei lo. Thingtlang khaw te atang pawhin Pathian be turin Jerusalemah an kal vang vang ṭhin. An thilpek turte chu hla tak aṭangin an rawn keng vang vang ṭhin a ni.

Temple puanzar lo thler hian hmun bika Pathian biakna a tibang vek a, Lalpa chu Thlarauvin khawi hmunah pawh biak theih a lo ni ta! Hmun bika kal vang vang angai tawh lo va, a mah be turin sum sen angai hek lo. Kalkawng man senral ngai a awm lo. Tunah kan awm hmunah ṭhingṭhi a biak mai theih a ni ta!

Awle! Heng thilthleng ropui tak aṭanga thil inthlak thleng hi a ropui hle mai. Amaherawhchu kan nunah tihtur mawhphurhna min rawn thlen nghal tih kan hriat a ṭul. Puithiamte nitin kawla ni chhuak chhiara inthawina anhlan ṭhin angin nitin Lalpa hnena Krista thisen ringa sual thupha chawi turte chawi fo turin a ni. Mite tana i puithiam nihna hmang chhuak turin a duh che. Khawi hmunah pawh Pathian kan biak theih avangin englaipawh a ṭawngṭai fo turin min duh a ni. Hetiang taka Lalpa duhdan a i nun theih nan Lalpan malsawm che rawh se. Amen.

- Alex ZL. Hualngo

NUNNA TUIKHUR : MARCH 2018 : EDITORIAL

Mizote kút zinga ropui ber Chapchar kút thla alo thlen meuh chuan whatsapp leh fb group hrang hrangah mit titlai tur hmuh tur a tam ngei mai. Chutih rual chuan he hunpui lawm ve ni awm taka a mawina tinreng lo chhuah ‘Ṭuahpui’ leh ‘Vaube’ an lo vul ve chûk mai ṭhin te, chu mai pawh a la ni lo, chhawkhlei par mawi em em mai a lo vul chûk mai bawk nen. Phawngpui tlang leh Buannel rama chhawkhlei par mawi em em te thlalak group hrang hranga an post te han hmuh phei chuan siamtu ropuizia ngaihtuah thleng hauh si lo va lunglenga van ruai táwkte pawh kan awm mathláwn lo awm asin! 

Mitthlâa suangtuahna kawm vel mai loh chu he kan vairam khawpui aṭang hian kan zobawm parmawi tinrengte hmuh ve tur a awm si lo. Mahse ka’n ti ṭalh teh ang aw, he Delhi khawpui khawlum tur rawn her chhuak muai muaiah hian e, khawpui chhung te han hawi zau deuhvin i chhingmit han lèn thui deuh the; Pâng kung lian ṭhuau mai te, hmun ṭhenkhatah phei chuan mit titlai theihtawpa tamin par sen mawi em emin an lo vul chuai mai ka ti! 

Kawngpui zau nuam tak tak sirah te leh building sâng pui pui kara a par mawi tak mai han hmuh te chuan hah a tidam sawng sawng thei hialin ka hria. Panlai nun te min hriat chhuahtir rum rum mai, dâi velah Pâng par tla chhar turin ṭhianzaho nen dai kan vel thuak thuak laite mitthlaah a lo lang zut zut mai ka ti! He Delhi khawpuiah pawh chuti khawpa tam na na na chu hnathawhna bul maiah te pawh an lo par vul chek chuk mai chu lo niin. Mahse kan hla thu pakhatah, “ka chhar ngam lo zaiin ka pèl mai dawn e” ti ni àwm taka kan pelh mai mai a ngai ta si. 

Heng zawng zawng hian siamtu Pathian ropuizia min hriattir lo thei lo va, thilsiam zawng zawngte chunga thu nei tura mihringte kan chungnunzia leh vanneihzia te, kan ropuizia erawh kan ngaihtuah chiang lo fo em ni tih te rilruah a lo lang zut zut a; hmu thei, hre thei leh ei in thei, che thei te leh thawk theia kan awm te hian kan vanneihzia min hriattir nawn fo se la, pangpar te mai paw’n min tihlim a nih si chuan min siamtu Pathian fak chung zelin hlim takin i hmabak, i rawngbawlna kha hlen zel rawh le.