Kan Lalpa kum 2016 chhunga Nunna Tuikhur news chhuah hnuhnung ber tur pawh Pathian kaihhruaina zarah kan lo khawrpum ve leh thei ta! Kumpui lingleta bahlahna awm miah lova thla tin min tihchhuahsak avangin Lalpa hming chu fakin awm rawh se. News chhuah hi thil namai a ni lova, a bua khawrpum phei hi chu thil awlai lo tak a ni. A chang chuan thuchhuah tur chhuah sen loh a luh khawm ruih laiin, chhuah tur awm map loh ṭum, rilruin ziah tur a dap ruai pawha hul ṭhak chang, beidawn ram ram chang a tam a, thu lama inbuatsaih fel vek hnuah computer leh khawl thil lamin min nawrhsan tak tlat chang a lo awm leh thul. He Editorial pheka ziah sen loh sawi tur tam tak a awm. Chung zawng zawng karah khaihlak awm miah lova thla tin kan han chhuah thei hi a ni lawmawm em em chu!
Kumin hi uluk takin han chhut neuh neuh ila, kum dang zawng aiin a bikin thlarau lamah malsawmna kan dawng hle mai! Taksa lamah chuan hruaitute ngei pawh naupangte te, ringtu nunah leh thlarau lamah pawh puitling lo tak takte kan ni, keimahni pawh kan insit hle a, kan hruaitu puitling leh ṭha tak tak ten min kalbosan zel ṭhin bawk nen. Mahse kan sawi nin theih loh kumin kan beihrual program aṭang ringawt pawh khan kum dang zawng aia kan hlimzia chu a hriat theih mai awm e. Heng zawng zawng hi ṭawngṭaina rah kan ti lo thei lo ang. Chatlak awm miah lova inrinni ṭawngṭai inkhawm rah a ni kan ti lo thei lo; bang lova a mite ṭawngṭaina chu Lalpan a chhang ṭhin si a. Mei mit lova inrinni ṭawngṭai min kaihhruaitu Lalpa kan Pathian hming chu fakin awm rawh se. Kum thar lamah pawh member tam zawk inrinni ṭawngṭaia tel i tum ang u, midangte tana malsawmna thlentu kan nih piah lamah keimahni ngeiin a hlawkna kan tel si a.
Hei le a boruakin min tuam leh ta bawk a, ‘Rem Lal pian hun champha hmatiangah kan thlir’ kan tih mek laiin,
“Hmana miten lawm lo mah sela,
Lalpa, kan thinlungah lal ber ang che.” tia lungleng taka kan sak ṭhin hi ngaihtuah chiang lovin kan sa liam mai mai ṭhin em? Kum kha chen kha dam leh hlim takin Krismas kan lo hmang tawh a, Pathian khawngaihna zarah vawi tam tak kan la hmang zel bawk ang a. Krismas awm chhan leh kan lawm chhan hre chiangtu tan chuan khawvel taka lawm hi a rem thei lo va; Krista neitu dik tak tan zu leh sa, beer leh hlimhlawp bawla a piancham lawm hi a theih loh hulhual a ni. Chutianga hlimhlawpna nen mahni inthiam chawpa chhandamtu piancham Krismas kan lawm chhung chuan mi piangthar tak tak kan la ni lova, ringlo mite nen danglamna kan nei lo a ni tih hre thar lehin, Isua nen Krismas hlim taka hmang turin chhiartu zawng zawng duhsakna kan hlan a che u.
