JAIPUR TRIP : 2016

KRISTA NIHNA CHI SARIH

Lal Isuan anihna a sawi ni lovin tuntumah chuan Kolossa mite hnena tirhkoh Paula lehkha thawn atanga Lal Isua Krista nihna chi sarih (7) a sawi te kan thailang a nge.

1. Krista chu Pathian anpui a ni (Kol.1:15):

Heta, ‘Pathian anpui’ a tih tak hi Pathian hmel a sawina nih hmel loh. Achhanchu Pathian hmel hi mihring mai bakah Vantirhkohte tan pawh hmuh thiang loh a ni. A ropuina eng vangin Vantirhkohten an thla pahniha hmai khuhin chibai an buk thin. “Tuman englaimahin Pathian an hmu ngai lo” tiin Johana pawhin alo sawi kha (1 Joh.4:12). Tin, Lal Isua leia a lo kal chhan pawh hmuh theihloh Pathian chu mihringten kan hriatfiah theih nan a ni (Joh.14:9-11). John Wesley-a chuan, “a fapa mal neih chhun chauhin Pa ai a awh thei a, Lal Isua mihring nihna (100%) leh a Pathianna (100%) chuan hmuh theih loh Pathian chu a lo lang a ni,” tiin a sawi bawk. Krista chu Pathian aiawh mai ni lovin, angpui famkim a ni (2 Kor.4:4; Joh. 1:18; 1Tim.1:17). Isua Krista leh Pa Pathian inpumkhatna chuan a Pathianna a ti lang chiang a ni.

2.Krista chu thil siam zawng zawnga piang hmasa ber a ni (Kol.15):

Krista lalna chu thil siamteah alang chiang. Heta, piang hmasa a tih hi Krista mihringa a rawn pianna thu sawina a ni lo. Krista chu leilung pian hma, atir ata awm tawh, chatuan ata awmtawha, awm meka leh lo la awm tur Pathian a nihna sawifiahna a ni (Gen.1:1; Joh.1:1-2). Chuvangin thil siam zawng zawnga piang hmasa tih chuan:- i) Krista chu thil siamte chunga thu neitu a nihna te, ii) Thil siamte enkawltu a nihna te, iii) Thil siamte nena inthen (awm hrang) lova chenchilhtu a nihna te, iv) Thil siamte chibai buk lovin Krista chauh chibai buk (worship) theih a nihna te a sawifiah (Heb.1:6; Exo.20:4-5). Krista chu thil siam engkim hmaa awm leh thuneitu ber a ni. Juda danah chuan piang hmasa duhsak bikna te, zahawm bikna te leh thuneih bikna a kawk bawk (Exo.13:2-15; Deut.21:17).

3. Krista chu engkim siamtu a ni (Kol.1:16-17):

Krista chuan thil engkim hi ama tan, aman a siam a ni. Scientist-ho innghahna bul chu chhan leh vang (cause and affect) a ni. A awmzia chu, khawvela thil lo awm chhan hian vang a nei. Chutiang chuan scientist-ho chuan natna lo awm reng reng hi engvanga lo awm nge tiin an chhui thin. A awm chhan an hmuh chhuah chuan a enkawl dan an hmuchhuak thuai thin. Sikserh natna lo awm chhan chu those vang a ni a, thosi laka inven chu sikserh neih lohna a ni. Chutiang bawk chuan kawvela thil siamte chu Kristan ama tan a duh vangin aman a siam (Joh.1:3). Thil siamte (mihring chenin) chu Kristan ama tana a siam a nih avangin, ama tana nung leh awm tur a ni (Heb.1:2; Thup.3:14). Krista tel lo chuan thil zawng zawng hi engmahlo leh thil lothlawn mai a lo ni (Thuh.1:14). Chung thil siamte chu van leh lei chungah te hmuh theih leh theih lohah te awm an ni. Lalthutphahte, rorelnate, lalnate, thuneihna te tih hi vantirhkoh khawvel sawina a ni. Greek mite leh Rom mite hian vantirhkoh chi hrang hrang biak an ching a, chung zawng zawng chunga thuneitu chu Krista a nih thu Paulan a sawifiah a ni (Eph.1:21; 3;10; 6;12; Phi.2:9-10; Kol.2:10,15). Chuchuan thil siam engkim siamtu a nihna a ti nghet bawk.

4. Krista chu kohhran lu a ni (Kol.1:18):

Krista chu khawvel boruak zau taka (universe) lal ni mai lovin, kohhran lu pawh a ni (Eph.1:22-23; 5;23). Hmuh theih leh hmuh theih loh kohhranho chu Krista rinna an neih chiahin Krista taksa ni tura Thlarau Thianghlima baptisma kan ni (1 Lal.12:13). Chu chu Penticos nia lo thleng kha a ni (Tirh.1:5; 2:1-2; 11:15-16). Krista taksaah chuan Jentail leh Juda mite, mi hang leh mi ngo te an awm tawh lo (Gal.3:28). Kan vain Pathian thil siam tharte kan ni (Eph.2:25). Chu kohhran chu Pathian thuruk inthup mihringte hnena hriattira chu a ni (Eph.3:4-5; Rom.16:25-26; Kol.1:26).

5. Krista chu mithi zing ata piang hmasa ber a ni (Kol.1:18):

Krista chu thihna ata taksa chhe thei tawh lo leh boral thei tawh lova tho hmasa ber a ni (1 Lal.15:20; Heb.7:16; Thup.1:5). Thuthlung Hluiah leh Isua rawngbawl hun lain mithi kaihthawhte awm nual mahse an thin awn leh vek. Isua Krista chauh hi thawhlehna hmahruaitu chu a ni. Krista thawhlehna chuan thihna chunga a thuneihna leh a hnehna a ti lang (Heb.2:14; 1 Joh.3:8). Mithi zing ata a thawhlehna chuan Pathian fa a nihzia chiang takin a hriattir (Rom.1:14). Chutichuan, engkimah chungnung ber a lo ni ta a ni. Krista chu tisaah rawn changin, amah leh amah a intitlawm a, Pa Pathian chuan hmun sang berah hlangin, hming zawng zawnga chungnung bera dahinKrista chu a chawimawi ta a ni (Joh.1:14; Phi.2:8,9).

6. Krista chu famkimna tinreng awmna a ni (Kol.1:19):

Paula chuan famkimna tinreng chu amaha awm reng (Kol.1:19) tiin, “Amahah chuan Pathian famkimna tinreng chu taksa neiin a awm reng si a,” tiin a sawi bawk (Kol.2:9). Kolossa 1:19 hi Thuthlung Thar bua Krista Pathianna sawi chianna ber a ni (Heb.1:8). Heta, famkimna (fullness, pleroma) hi ‘kimchang’ tihna a ni a, Pathian nihna (Eph.3:19), hun bi (Gal.4:4) leh Krista khawngaihna (Joh.1:16) sawi nana hman thin a ni. Kristaah chuan Pathianna famkim chu kimchang takin englai pawhin a awm a ni. Ringtu ten Krista famkimna kan hriatfiah chauhvin atana engkim tuar huamin kan zui thei chauh ang.

7. Krista chu inremtirtu a ni (Kol.1:20-23):

Krista chu famkimna a ni ang bawkin, inremna leh inremtirtu pawh a ni. Krista chuan a kraws thisen kal tlangin thil engkim (all things) amah nen a inremtir (ch.20). Heta, thil engkim hian huap chin a nei a, vana vantirhkoh that e, mi thianghlim thi tawh te leh leia dam mihringte chauh a ni a sawi ni. Vana thlarau sual tw leh lei hnuaia seola tang chhandam lohte nen chuan remna a siam lo (Eph.6:12; Phi.2:10). An tan sual sim theih leh inchhir theih a ni tawh lo va, rorelna ni nghakin an awm tawp a ni. Chu chu Krista siam thar lehna leh inremna rawngbawl hna chu a ni (Rom.8:19:21; 5:10-11; 2 Kor.5:17-20). He inremnaah hian Pathianin mihring a rem leh ni lovin, mihringin Pathian Krista kal tlangin a rem leh a ni. Mirhing a nih ata, tluk chhiat hnuah pawh Pathianin a anpuia a siam mihring a kalsanin a thlahthlam ngai lo. Mihringte zawkin an tlukbo san zawk a ni. Chuvangin, Pathianin min rem leh ni lovin mihring chu Krista thisena Pathian nena inrem tura hruaikirleh a ni zawk. Krista thihna avangin khawvel chu chhandamin a awm ta a ni. Chu chu Pa Pathian lungnihzawng tak a ni si a. Tunhmaa, Pathian hmelma ni tawh thin te Krista rinna avangin Pathian thiante leh fate kan lo ni ta a ni (Rom.5:10; Kol.1:21; Eph.2:11-19).

(Lehkhabu rawn: Lung in lehkhate by Rev. Jubilee Thanga)

-Alex ZL Hualngo

LAL NEIH DUH LEH LAL NIH DUH

I Samuela bung 8-ah khan Israel mipui ten lal neih an duhzia tilangin hma an la tih kan hmu a, an hmalakna chhan ber nia lang chu an puithiam Elia fapate mai nilo, Samuela fapate chena an chet khawloh vang a ni.

Nula thianghlim duh em em hnam puithiam fapate berin rawngbawltu hmeichhiate an lo mutpui pawh kha ngaihthiam a har dawn nen, Samuela fapa ten sum uma thamna an lo la phei kha chuan a vawrtawp a thleng ta a ni ber ang chu- upaho zawng zawng nen an rawn thawk ta a ni.

He roreltu thlak duhna lo lian ta hle mai hi tu pa thei fal lal nih duh vang emaw a ṭawngthei fal deuh politics khelh, “chu mi kha mi chu lal rawh se” tia lal khelhna rilru a nilo. PUITHIAM FATE KHAWSAK DAN ṬHALO LEH RORELTU CHHUNGKAW LAKA BEIDAWNNA LEH RAH CHHUAK A NI.

An Pathian leh a puithiam duhdan leh remruat ngaichanga ngahtuah nawnna pawh neilo lekin an thinurna chuan a chawk thova, an tana phurrit thlentu tur a nih thu hrilha an awm pawhin LAL NEIH an duh lui tlat a nih kha. Bible-ah an nawr dan ziak tlem hle mah se, Mob rule ang hialin an che a, a puithiam duhlai leh a ruattu Pathian pawh an duh lo ang hiala ngaih theih khawpin an che a ni. Pathian pawh thinur hialin an dil lal kha lawm takin a pe lo tih kan hre thei a ni.

Lal neih an duh chhan kha dem mai chi-ah ka ngai lo va; an thu tawp lam, chang 20 ah chuan, “hnam dang an leh raldopuitu” duhna kha Pathian tan a lawmawm hauh lo vang. Kha chen kha ral a lo dopui tawhin hnam dang aia sanga hlang theitu a ni si a.

An hunlaia an sakhaw biak dan ber, inthawina an ngaih pawimawhzia kha entawntlak an ni a, kan sakhaw biak dan ber- INKHAWM ngaih pawimawh min zirtir hle. Chutih rual chuan a mawihnai leh ṭha ṭha, tihdan leh thilpekah neih hi a sual lova, a THU AWIH ngaih pawimawh kha a duh ber zawk a ni tih kan hre thei thung. Pathian biak leh biakna, biak dan leh hmanraw ṭha hmang sia a thuawih lo chu hnawl a nih tak thu kan hmu zui a ni.

Lal tur dang a awm takah chuan lalthutthleng aṭanga a ṭhut hniam a ngai dawn ta. A lal hun chhung tawp hrim hrim chu ni se a pawm dam theiin ka ring deuh a, ‘hnar leh hnawl’ nih erawh kha chu a na hle ang. Duhloh nih a hrehawm vang nge thunei taka la awm zui zel a duh vang- a aia lal tur kha a kian ṭha hle hle phal tlat lo nia. LAL NIH LA DUH em em Saula khan a aia lal tur Davida kha a suangtuah ve ṭhin ngei ang a. “A naupang si, a chuti khati si..etc.” tihna tur lai leh ama mimal hmachhawp te, an chhungkua leh ṭhianṭha nawmsakna kiam dawrh tur te, a hmathlir tam tak te avang pawh a ni ang. ‘Davida’n lalna a chan vaih chuan’ tiin dah hniam tumin aienthiam a rawn ta hial a ni!

Awle, kan khawvel changkang leh hmasawn zelah hian NEIH leh NIH kan duhna kawngah Pathian thu awih hi kan tluanna leh hmuingilna tur ber a ni tih zirchhuak ila, AWHNA LEH DUHNA avanga Pathian hnawl a awm theih a nih tih i hre thar zel ang u.

-JL Liana

VALENTINE’S DAY LEH HMANGAIHNA

Duh takte u, I inhmangaih tawn ṭheuh ang u; hmangaihna hi Pathian laka chhuak a ni si a; mi tin hmangaihna nei apiang Pathian hrin an ni tawh a, Pathian an hre bawk a. Hmangaihna nei lo chuan Pathian a hre lo; Pathian chu hmangaihna a ni si a. (I Joh 4:8-9)

Chutichuan, heng pathum, rinna te, beiseina te, hmangaihna te hi a awm reng ang; tin, hengahte hian a ropui ber chu hmangaihna hi a ni. (I Kor 13:13) (I Kor 13:4)

Inhmangaih tawnna ngawt lo chu tuma engmah ba suh u. Rom 13:8

Kum 2016 Valentine’s Day chu thlengin kan lo hmang liam leh ta a, he ni hi kan hriat ṭheuh angin khawvel pumah ‘hmangaihna ni/hmangaihte ni’ atana hmangin, thilpek chi hrang hrang- card, pangpar, chocolate leh thawmhnaw te thlengin hmangaihte hnenah an pe ṭhin. Nula leh tlangval inngaizawngte tan phei chuan hun nghahhlelhawm tak a ni kan ti thei ang. Nula leh tlangval te chauh ni lovin nu leh pa ni tawhte pawhin an kawppuite hnena thilpek hlanna hunah an hmang ṭhin.

Kohhran hrang leh rindan hrang hrang kan nih angin leh mize hrang hrang nei mihring kan nih angin Kristiante zingah pawh he ni hi hman ve tur nge hman loh tawp tur tihah inhnialna a awm thei fe a. He Valentine’s Day lo chhuah chhan leh a ṭobul te zuk chhui chuan ngaihdan pawh phir ve thei a ni reng a.

Kan hriat ṭheuh tawh hnu thu chu ni mah se, zir miten an zirna aṭangin a ṭobul chu a tlangpui talin i’n luhchilh zawr zawr lawk teh ang -

Valentine’s Day

Valentine tih thumal hi Latin ṭawng Valentinus tih aṭanga lak a ni a. Valens tih chu chak, thiltithei leh ropui tihna a ni a, chutiang mite chu Valentine tia koh an ni ṭhin. Bible-ah pawh hetianga mi chak leh sa kap thei, Valentine tih hming han puttir theih pawh kan lo nei ve reng mai; a hming chu Nimroda a ni. Nimroda chu tunge a nih tih Genesis 10:6-8 kan chhiar chuan kan hmu ang, Nova fapa Hama thlah a ni a, Hama thlahte chu Nova’n anchhia a lawh te kha an nih nghe nghe kha. Tin, Ezekiela 8:13-14 ah Tammuz-a, Nimrod-a fapa chungchang pawh kan hmuh kha.

Pawm dan tlanglawn berah chuan Valentine’s Day hi hmasang Rom hunlai aṭanga hman leh neih ṭan nia ngaih a ni a. Hmasang Rom mite ni chhiar danah February 14 hi an pathian lalnu Juno an zah entirna atana an ni serh niin, Feb. 15 ah kût, ‘Feast of Lupercalia’ an tih chuan a zui ṭhin. Lupus hi Latin ṭawng ‘chinghnia’ tihna a ni a, Lupercus hi Rom-ho pathian, nupui pasal zawnna leh chi thlah kawnga an pathian biak leh an thlaite venghimtu anga an ngaih a ni. Lupercalia kut chhung hian mipa leh hmeichhiate chu room hranah dahin, hmeichhe hming chu lehkha themah an ziak a, mipa ten an pawh fuh apiang kha an kawp zui ta ṭhin a. Sex te pawh an hman khawloh phah nasa hle awm e.

Lal nunrawng tak Claudius II Rom emperor a rawn nih khan sipaia ṭang tur tlangval a duhkhawp a hmu zo ṭhin lo va. A chhan nia a hriat chu, chutianga nula leh tlangval inhmangaihna vel vang chu a ni. A lalram pumpuiah inneih leh inhual vel chu a khap ta bur mai a. Mahse Valentine-a, Rome puithiam pakhat chuan a ruktein nupa tuak a lo inneihtir ṭhin a. Vanduai thlak takin an manchhuak a, nasa taka nghaisak a nih hnuah Feb 14, AD 270 khan a lu tansak a ni ta a ni. ‘Marawhchu, Catholic kohhran chanchinah Valentine tih hmingpu hi mi 3 an awm a, tu ber nge tih a chiang lo an ti bawk. Mahse an thih ni erawh mak tak maiin a inang vek thung, February 14 ah kher an thi vek a ni an ti.

AD 325 ah Emperor Constantine-a (Kristian) chu a lo lal ta a. Kristian sakhua chu Rom ram sakhuaah (official religion) a puang a. Chu Christian sakhua leh hmanlai an milem biak chu a inkalh tak tlat si avangin an kût ropui tak tak te pawh hman phalloh a rawn ni ta a. Mahse kohhran hruaituten mipui an hlauh si avangin, mipui tlawn lungawi nan an hmanlai kût hluite chu a hmingte thlakin mipui rilrem theih tur zawngin Kristiante kûtah an rawn la lût ta zel a ni. Chung zinga mi Lupercalia Kût chu Valentine’s Day, February 14 a hman ṭhin hi a lo ni ta a ni. Puithiam Valentine-a, a lu an tansak pawh chu mithianghlim (saint) ah puangin, Roman Catholic-ho chuan St. Valentine’s Day an ti deuh kher ṭhin.

Bible-ah Valentine’s Day a awm em?

Lupercalia, Rom miten an pathian pakhata an biak hi Greek ho chuan ‘Pan’ pathian (êng pathian) tiin an be vethung a. Bibleah pawh Baal (Ni pathian), Lupercalia tlukpui chiah hi Phoiniki miten an be ve tho a ni. Baal tih hi ‘lalpa, hotu’ tihna a ni a. Kan Bible-ah hian ringlo mi, Jentailte pathian anih thu vawi duai lo kan hmu. Pathian chuan a mite chu Baal be lo tur leh chawimawi lo turin min chah.

Tin, Valentines day card/valentine-a lem kan hmuh fo Cupid (naute vantirhkoh thal keng hi) Latin ṭawng cupere tih aṭanga lak niin ‘to desire’ (tichâktu) tihna a ni. Greek-ho hmasang thawnthuah chuan cupid hian a thal hmuhtheih loh hmangin a duh duh a kap a, a kahte chu an inthlahlelin an inngai ngawih ngawih ta ṭhin a ni. Mahse cupid hian a tum ber chu inhmangaihtir a ni ringawt lo an ti lehzel a, a kahte inngai leh inthlakhlelh luat avanga harsatna an tawk hmuh a, an hrehawm tuar lai nuihsawh chu a tum ber a ni an ti. Chu’ng ringlo mite thawnthu, Bible-a awm lo chu kan lo lak urhsun ve nachhan tur ringawt chu a awm lo a, kan Bible chuan Lev. 18:3,24-29,30 ah te pawh milem be mite tihdan zir lo turin min ti nasa a ni.

Engpawh chu ni se, kan hmang ve ngei ngei tur a ni tih lam emaw, ringtute tan chuan hengte hi Setana hmanrua a ni a, hman ve miah loh tur a ni tih lam sawi ka tum lo va, mimal ngaihdan ni tawh se la. Social thil a ni a, khawvel changkang zelin a ken tel ve pakhatah ngai mai ila a ṭha awm e. Hmangaihna chu kan Bible-ah pawh kan hmuh angin ringtute nun nen hian a inhmeh a, kan zui kan Pathian pawh hmangaihna Pathian a ni si a. Chumi avang zawk chuan heng ni te hi khawvel miten khawvel taka an hmanna karah thianghlim takin midang hmangaihna tihlan nan kan hmang ve thei turah ngai ila. Hmanlai Rome mite milem biakna chu kan va ṭawmpui tihna ni lovin. Khawvel changkannain a ken tel zinga pakhat angah ngai ila a hahdam awm e.

Khawvel changkannain a rawn ken tel hi chu keinin lo dan tum mah ila, kan hah thlawn mai ṭhin a, heng information technology ṭhang chak lutuk te pawh a chhe zawnga hmang lovin a ṭha zawnga kan lo hmanthiam hlauh chuan rawngbawlna changkang leh ṭangkai taka kan chhuah thei tlat ang hian.

Hmangaihna

He thumal pakhat tein thil a tihtheih zia hi! Thunun zawh rual lohvin thinlung a sawi nghing thei a, mi sehhel ber pawh a tizawr hnâp thei a, patling ṭhankin tawhte pawh a ṭahtir thei a, hlim avangin mi a zuantir thei bawk.

‘Hmangaihna’ tih hrim hrim hi Mizo Bible-ah vawi 347 vel a lang a. Khawvel pum hi hmangaihnain a luah kan ti thei ang. Pathian pawh hmangaih Pathian a ni a, Bible pawh hi Pathian hmangaihna lehkhathawn (God’s Love Letter) kan ti thei awm e.

Hmangaihna chu chi hrang hrangin a ṭhen theih ang a- nula leh tlangval inhmangaihna (inngaihzawnna), chhungkua inhmangaihna, Ram leh hnam hmangaihna, ṭhian inhmangaihna etc. Greek-ho hmangaihna sawifiah dan lar tak, heng- Agape (Pathian hmangaihna), Phileo (thian hmangaihna/ngaina), Eros (ngaihzawng inhmangaihna) tih te hi kan hre ngun hle awm e. Bible pawhin I Korinth 13:4 thlaah hmangaihna chu chiang takin min hrilhfiah bawk.

Aw! HMANGAIHNA

Mi zawng zawng hian hmangaihna chu kan mamawh a, hmangaih kan mamawh a, hmangaihtu kan mamawh bawk. Chutiang tura mihring te hi Siamtu Pathianin a duan leh a siamte kan ni si a. Hmangaihna pawimawhzia chu tlemte lo tarlang ila:-

*Hmangaihna erawh chuan bawhchhiatna zawng zawng a khuh ṭhin. (Thuf. 10:12, I Pet. 4:8)

*Hmangaihna erawh chuan mi a siamtha ṭhin (I Korinth 8:1b)

*Hmangaihna chu thlarau rahte zinga pakhat a ni. (Galatia 5:22)

*Kan inhmangaih tawn chuan Pathian keimahniah a awm reng ang. (I Joh 4:12)

*Hmangaihna chu dan zawh famkimna a ni. (Rom 13:10)

Engtin nge kan inhmangaih ang?

Lei chauh ni lo, thil tih leh tih tak zetin inhmangaih tur (I Johana 3:18) kan ni a. Vervekna tel lo, lemderna kawra inthuam lemchang nun ni lovin, thinlung chhungril ber aṭanga chhuak a ni tur a ni tih thu te pawh kan hmu (Rom 12:9).

He bung thlaah hian kan hriat tur pawimawh tak mai chu, “hmangaihna chu a mit a varin hriatthiamna a nei tur a ni” tih hi a ni awm e. Sual lam a huain ṭha lam a pawm tlat tur a ni a, thil sual leh ṭha chu a hrefiah thiam bawk a ni. Pathian thuah sual leh ṭha a awm tlang thei si lova. Kan hmangaihna pawh chu ṭhenkhat chuan ‘love is blind’ te lo ti mah se, Pathian thu erawh chuan a fiahin a chiang a ni a ti thung (I Timothea 1:5).

Valentine’s Day a nih avanga hmangaihna chhuanlama humsual dai kher tur a ni lo, chhuanlam chu Pathianin a pawm lo. Ringlo mi, ramhuai biate tih tawk lek a ni. Keini ringtute chuan thianghlim takin kan inhmangaihna chu kan lantir tur a ni.

Tin, hmangaihna chu unau chhulkhat kual inhmangaihna anga inngainatna thuk tak leh lainatnaa inhmangaih tur a ni. He laia Paula ṭawngkam hman pakhat an sawi, ‘Philadelphia’ (brotherly love) tih hi Greek thumal pahnih philos leh adelphos inbelhbawm a ni awm a. Philos tih chu dimdawi taka lainat leh hmangaih tihna niin, adelphos chu unauah pawh chhul khat kual, chhual khat chhuak unau tihna a ni. Tichuan ‘Philadelphia’ tih awmzia chu unau chhulkhat chhuak inlainatna leh hmangaihna thuk tak sawina hi a ni. Chutiang chiah chuan, ringtute hi Kristaah chuan chhulkhat chhuak, unau vek kan lo ni ta a, kan inhmangaihna pawh chutiang inhmangaihna chu a ni tur a ni.

TUTE NGE KAN HMANGAIH ANG?

Bible in hmangaih tura min tih zinga ṭhenkhatte chu:-

1. Lalpa in Pathian chu in thinlung zawng zawngin, in rilru zawng zawngin, in chakna zawng zawngin in hmangaih tur a ni (Deut. 6:5), Joshua 23:11, Sam 31:23). Chu chu thupek ropui leh pawimawh ber a ni (Matthaia 22:38). Pathian kan hmangaihna chu a thupekte kan zawm hi a ni a, a thupekte chu a khirh lo bawk (I Johana 5:3).

2. Ram dangmite chu hmangaih ve rawh u (Deut. 10: 19).

3. Hmelmate hmangaih tur (Mathaia 5:44, Luka 6:35).

4. Nangmah i inhmangaih angin i vengte hmangaih rawh (Mathaia 22:39).

5. Unaute hmangaih tur(Rom 12:10, I Petera 1:22, I Petera 2:17)

6. Nupuite hmangaih tur (Ephesi 5:25-33).

7. Mahni mihringpuite hmangaih tur (Rom 13:8).

PAWIMAWH DANG

“Ram leh hnam dinchhuahna” tih hla Sanglianthanga phuahah chuan a chang tawp bernaah, “Ram leh hnam hi I hmangaih a nih chuan, Krista Chanchin ṭha hril mai rawh; Ram leh hnam hmangaihtu tak takte chuan, Krista Chanchin hi hrilh zel rawh se.” a lo tih angin, Lalpa rawngbawl duh lo ram leh hnam chu an boral dawn thu Isaia 60:12 ah pawh kan hmu. Ram leh hnam chu kan hmangaih tur a nih rualin, kan hmangaih dan tur chu Biblein min lo hrilh reng mai!

Tunlaiin facebook group ṭhenkhatah te thlahtu bul chhuia a hnam chibing ang zawnga inhnialna hmuh tur a awm leh ṭhin, a pawi hle! Heng hian hnam a siam ṭha lo va, insuihkhawm sa pawh a tidarh zawk a ni. I Timothea 1:4-a kan hmuh angin heng hi kan sim hmak a ṭha ang. Ram leh hnam hmangaihtu tak tak chuan Krista chanchin ṭha hi hrilh mai zawk tur a ni.

Engpawh ni se, mihring aṭanga chhuak hmangaihna chuan tawp chin a nei a, innghahna tlak a awm lo. Pathian aṭanga chhuak hmangaihna zawk, Bible in min hrilh hmangaihna dik tak chu nunpui ila, he khawvel hi Pathian ram dik tak chu a lo ni mai dawn si a (Luka 17:20-21, I Johana 4:12).

Ni te a ṭhata Lalpa zarah kan dam chuan, Valentine’s Day te pawh kan thleng leh ṭhin ang. Khawvelin ‘Hmangaihna Ni/Hmangaihte Ni’ atana a hman hi keini ringtute pawhin Kristian taka inhmangaih nan leh hmangaihna nunpui nan i lo hmang hlauh ṭhin ang u.

-Nanaua Chawngthu

NUNNA TUIKHUR : FEBRUARY 2016 : EDITORIAL

“Lehkhabu chhiar ngai lo rawngbawltu chu a rawngbawlna aṭangin bang mai rawh se.” -John Wesley

“Lehkhabu awm lohna In chu, In tukverh nei lo ang a ni.” –Horace Mann

“Kawr hlui ha la, lehkhabu thar lei rawh.” –Austin Phelps

“Mel 50 bial chhunga lehkhabu awm chu chu ka chhiar zo ta.” -Abraham Lincoln.

Lehkhabu chhiar hlawkzia hi inhrilh nawn ngai lovin kan hre ṭheuh awm e. Chhiar tam chu hriat tamna a ni a, hriatna chuan finna a lo keng tel mai a ni zawk. Kan phak tawkah finna nei tur chuan harsa taka beih chiam ngai lovin Pathianin kan tan rem a lo ruat fel diam mai hi a lo ni a. Keini mi rethei leh mimawl berte pawhin kan ban phak mai-ah chu chu a lo dah a ni. Chu thil chu eng dang ni lovin ‘lehkhabu chhiar’ tih te mai hi!

Kumin chu Fellowship Executive Committee in Fellowship Library din a rel a, lehkhabu ṭha chhiar tur nei ve lote pawhin awlsam takin chhiar tur kan hmu thei turah ngai ila, a lawmawm hle a ni. Kan Fellowship hian kumpuan nei ve lem lo mah ila, kumin chu lehkha chhiar kumah kan puang emaw tih mai turin, Youth Dept. lamin Bible chhiarchhuakte hnenah lawmman ṭha tawk tak pe turin ruahmanna an rawn siam ve leh chiah bawk a, a ropui hle mai!

Ṭawngṭai leh Bible chhiarte hi Pathian nena kan inpawlna ber a ni a, ṭawngṭainain keini’n Lalpa kan bia a, Ani’n Bible kan chhiar hmangin kan hnenah thu a sawi thung. Nitina Bible chhiarte hnenah kan hriatpui phak loh leh a chhiartute ngei pawhin kan inhriatloh kar hian Pathian thlarau thianghlim pawlna hi nasa takin kan lo chang daih tawh ṭhin a lo ni. Heng Library din leh Bible chhiarchhuahte hi keimahni tan a ni a, kan ruahman chhan anga a taka tihlawhtlingtu kan nih chuan kan inchhir lo hlawm viau ang le.

Tunlai khawvel technology ṭhang chak tak, electronic age/information age-ah hian lehkhabu hlutna te pawh a tlahniam deuh em ni chu aw a tih theih! Mahse, zirchiangtuten an sawi dan chuan, Newspaper copy a pung deuh deuh a, Magazine hralh a kal telh telh a, lehkhabu zuartute pawhin hralh a har phah chuanglo an ti ve tlat! Khawvelah hian chuti mai maia nek bo chi niin a lang lo. Pathian pawhin lehkha ziak chungchang a ngaih pawimawhzia chu heng- Exodus 17:13, 31:18, II Timothea 4:13 leh Thupuan 21:5 aṭang te pawh hian kan hmu thei awm e.

Internet-ah lehkha chhiar tur engkim a awm ti ṭhin mah ila, lehkhabu kan chhiar anga rilru fim taka chhiar a awl lo hle. Fianrialah lehkhabu keuva chhiar keuh keuh nge nge chuan ngaihtuahna ril leh thuk zawk min neihtir a, chu chuan hriatna thar leh finna min chhartir ṭhin a ni. Mi fing kan lo nih theih nan leh kan nun kaihruaitu atan Bible bakah lehkhabu ṭhate i’n chhiar tak tak mai teh ang u.