Isaia 40:31 “Lalpa nghaktute erawh chuan an chakna chu an siam ţha leh ang a; muvanlaite angin thlain an thlawk chho vang a; hah lovin an tlan ang a; chau lovin kein an kal ang.”
Lalpa ringtu leh Amah nghaktute an mualpho ngai lo. Mizo Bible hian mupui tiin a ziak a, mahse muvanlai a ni zawk. Thil engkim hi awmze nei veka siam an ni. Muvanlai tar tih nei lo an tih ţhin kha, chungleng leh hnuileng an indo khan chungleng lal chu muvanlai a ni a, hnuaileng lal erawh rulpui a ni. Hnuaileng an tlawm a, chunglengin an hneh. Muvanlai chu ringtu nun zirna atan awmze nei ril tak a ni.
Muvanlaiin kawppui tur a zawn dan chu thingţang a hmuia sehin sang takah a thlawhpui a. Kawppui atan a sawm hma zawnah chuan a lo hmuh ngei turin a thlak thla a. A sawma chuan a lo hmuh veleh a sawmtu chu a han en chho thuai a, a duh zawng a lo nih chuan thingţang chu lei a thlen hmain a zuk chhar a. A sawmtu hnenah, “min sawmna hi ka pawm e”, tih entirnan a pe kir leh a, tichuan chhungkua dinin bul an lo ţan ţhin a ni. Pathianin Krista mo atan thing Kros hmangin min rawn zawng a. A ringtu apiangte van khua leh tuiah min siam a, Pathian chhungte kan lo ni ţhin.
Muvanlaiin ran thisawn sa a ei ngai lo. A nung lai ngei a man a, a taksa leh a thisen lum lai takin a ei a, a fate chawm nan pawh a hmang ţhin. Isuan, “ka taksa leh ka thisen in ei a, in in lohvin nangmahniin nun nei hek lo che u”, min tih kha.
Muvanlaiin thlaler lungpui chungah te, hmun fianrial takah te rannung dang ten an chimbuai lohna hmunah, hling zum tak tak hmangin bu a chhep ţhin. A chungah chuan savun hmul dup nuam ţha tak mai a note sen laia an mut lum theihna turin a phah leh thlap a. A note an lo changkan deuh hunah chuan sahmul chu a paihsak a, hling zumah an awm ţhin. Muvanlai note chu a lo puitlin dawnin a puiin a bu ata a ţham a, thlawh zirtirin a paih thla ţhin a, an tlak nat loh nan lei an thlen hmain a thlain a chawi kang leh zel ţhin.
Ringtute kan lo pianthar tirh chuan lawm sawi hleihtheih loh khawpin kan hlim em em a, buzawl dup nuam takah chuan sa leh thisen lum lai ngatin min chawm a, inkhawm leh ţawngţai kan kham lo va, zai leh lamte a nuam em em mai a. Pathian thu sawi leh ngaihthlakte a nuamin thla a muang hliah hliah a.
Nun puitling nei tura min zirtir chinah meuh chuan, a chhandam hlim lawmna leh kan innghahna zawng zawng min ţhiahsak a. Ţhian ţhate pawhin min kawmserh a, chhungkuaa kan chenpuite ngei pawhin thatchhiat leh dawngdah vangah min puhsak a. Ramhuai thlarau changah te min puh a, (anmahni zawkin ramhuai thlarau an chang a ni si a) kan lo puitlina, Lalpa hmantlak kan nih theihna turin Ani chuan min zirtir a ni zawk si. Thilnung pali te ang khan a changin a hmaah ka sual min hriattir a, a changin a ding lamah malsawmna min vur a, a changin vei lamah sawichhiat min hlawhtir a. A changin hnung lamah chhelna min zirtir ţhin. Zum leh hriam karah min dah a, nimahsela, sual tuipuiin min chim pil loh nan amah Lalpa vekin muvanlai thla angin min chawikang leh ţhin.
Muvanlaiin ran thisawn sa a ei ngailo a, mulukawlh erawh chuan ran thisawn sa rimchhe tak a ei ţhin a; nunna, vitamin a awm ve lo. Ringtute chuan nunna Pathian thu leh a thawkkhum Bible thunung chauh chhiarin chaw atan kan hmang a. Ringlo mite erawh chuan mulukawlh angin, khawvel leh mihring chanchin mai mai hi an mit leh beng tlaina tawk chauh an buaipui a. Thlarau tân nunna vitamin a awm ve lo.
Muvanlai chu van sanga khawsa a ni a, tuipuia chaw a zawn dawnin a mit aţangin tehna ţangkai tak mai chu hmangin, a ral beih tura taksa rih lam leh a thahrui chak lam a hriatsak hmasa ţhin. Hnuaileng, a hmelma laka a chetsual loh nan, ani chu chungleng lal a ni si a. Ringtute chuan Bible pawn lam thu kan chhiarin emaw, mi dangte thu sawi kan ngaihthlakin emaw, chunglam hriatna hmangin kan teh ţhin a. Thlarau nazawng pawh kan ring mai lo. Chunglam hrin kan ni a, kan hmelmapa, Setana lem channa mai a kalsual tur kan ni lo.
Muvanlai chu a lo upa a, a mit a chak tawh lo va, a thla leh a mei te pawh lo bulin, a hmui leh a ke tinte pawh a lo bil a. A hmulte tla kawlhin, a vun hial pawh a ngawt zo ta. Hetih hunah hian a siamtu thiltihtheihzia chu hre rengin a pianna hmun fianrial, thlaler lungpui chungah kumkhat pumhlum chawnghei ţawngţai a hmang a, nitinin zinga ni lo chhuak chu tlai lama a tlak thlengin a en reng ţhin a. Chutianga kumpui sul a lo vei meuh chuan ni zung chakna chu a mitah lo lutin, a mit chu a tleirawl lai anga siam ţhatin a lo awm leh ţhin. Thlasik vur leh dai khawvawt chuan a taksa pumin a hmet zawr vek a, ţhal khawlum leh ni sen-sain a em ût leh rum mai a, fur thlichhe hrâng leh ruahtui nasa em em chuan a rawn tleuh fai duak mai a. Chutianga kumpui lingleta hun ţhen zawng zawngte a tuarchhuah vek hnuah, favang hun thengthaw nuam tak maiah chuan a taksa pumin siamţhatin a lo awm ta a. Ringtute ang maiin muvanlai chu tar tih nei lovin siam ţhatin a awm zel a ni.
Thing tinrengte pawh hian fur, ţhal, thlasik leh favang te hun ţhen zawng zawng kumpui lingleta an tuar chhuah hnu chauhin rah an chhuah thei chauh a ni. Ringtute kan lo puitlinin, Lalpa chuan a rawngbawl turin min duh a, mahse Kros paltlang lovin Lal rawng a bawl theih loh. Hrehawm tam tak tuarin vanah khian ro kan khawlkhawm a ni zawk.
Muvanlai chu a thlawh san poh leh leia a chaw, a hmelma chu a hmu fiah ting mai a. Ringtute Krista lama kan san poh leh sual leh a hnathawh kan hmufiah tual tual mai a ni. Lalpa ringtu leh amah nghaktute chu, thlemna leh fiahnate tuarna hmunah pawh Lalpa zawkin a lo nghak ţhin. Meipui aţang te, sakeibaknei puk aţang te, tuipui mawng nghapui kawchhung aţangtein.
Lalpa nghak lova mihring lam lo chet hmasaknaah tisa mi Ismaela a lo piang a. Abimaleka chuan Lalpa a nghak lo va, Moab ramah ţam tlanin muk takin a pem a, ţam tlanna hmunah a fapa te pahnih nen sengin an awm a, a mote pahnih leh a nupui hmeithai kutbengin an kir leh. Pathian finna erawh chuan a mite ţam tlanna hmunah bawih a chantir a, a thiltihtheihzia an hriat theih nan amah vekin a hruai chhuak leh thin a ni.
- Baby Naomi Pa
