INNEIH AWMZIA

Kan ram dung leh vang han thlir hian nupa tuak tam tak chuan “Innei” tih awmzia pawh hre lovin, hmel induh tawnna vang ringawtin, an in mu ar lak chawt thin a nih tak ber hi. Mahse chu hmel induhtawnna chuan rei a daih leh si lo. Hei vang hian alawm inthen te an tam em em ni. “Mi duh loh hnu kha duh te’n kan pawma, kan duh loh hnu pawh duh te’n an pawm thin” tih hla te sak a lo ngai ta hial mai a. A tam zawk phei chuan inneih an awlsam ang bawkin inthen an awlsam leh nghal. Dan anga inneih pawn awmzia a nei tawh lo. Biak ina lehkha tar, Pastor kutsuih, Pathian leh mihring hmaa mahni hming chhal meuhva innei te pawh an inthen leh tho mai. Aw! A va’n buaithlak thin tak em kan khawvel hi chu. Tak a, ‘Kawppui nei tawh ni awm takin hetiang thu te hi a rawn ziak ve a’ min lo ti anih pawhin ka dem lo che u. Mahse nupa tuak thar (ka thian) te tan liau liau ka rawn ziak a ni. A! Eng pawh ni se, Sap hovin “Innei” tih tawngkam an lo then hran dan atang hian inneih awmzia i han zir ho phawt mai teh ang u.

M = Meets (Intanpuitawn)

A = Agree (Inlungrual) 

R = Respect (Inzahtawn) 

R = Respond (Induhtawn) 

Y = Yoke (Ritphurh inchhawk)

Hetiang hian Sap ho chuan an lo then hrang thliah mai a ni. Khaile, ngundeuh zawka kan luhchilh dawn avangin i ngaihtuahna zawng zawng kha sawm khawm la, i thut hmun te kha han rem tha vel teh le. Nak ruh bo hmu tawh leh la hmulo tan a pawimawh dan a in ang vek a nia. 

1. Intanpuitawn (Meets) : Pathianin Adama hnena a nupui tur Evi a pek khan ama kawppui awm tak, amah tanpuitu tur ape a nih kha. Chuvangin nupa reng reng chu an thiltih engkimah an intanpui tawn tur a ni. Nupa an intanpui tawn loh phawt chuan nupa inpumkhatna a kehchhia a, inthenna a thleng thuai thin. Nupa inpumkhatna tha ve thung erawh chu thiltih engkimah an intanpuitawna an hlim em em thin a ni. Pa ber lal hlurna chhungkua a nuam ngai lova, mipa hna leh hmeichhe hna then hran thluahna chhungkua a nuam ngai hek lo. Intanpuitawn nupa ni tur chuan pa berin hmeichhe hna anga kan ngaihte pawh thawh a hreh tur a ni lova, nu ber pawhin hnathawh hreh a nei hek tur a ni lo. Pa ber thuk bula a thut reng chung pawha nu ber hna thawk lai, “Nu-i, i chawtui a so”.... han tih chu inhmeh lo tak a ni. Chawtui a so chuan pa ber pawhin a lo thlak ve mai tur a ni. Nu ber hnaah a dah bik tur a ni lo. Tunlai pa ho hian thaibawih nih an hlauh luat avangin hmeichhe hna anga lang te hi thawh an hrehin an thawk duh lo fo thin. Hei hi a tha lo hle a ni. A thu hrimin tunlai ah thaibawih an awm tawh lo, chhungkaw tangrual an ni zawk. Chuvangin thaibawih nih hlau miah lovin i nupui hnathawh kha han pui chhin teh, a lawm tur zia mai chu! In chhungkhurah nu ber an hlim chuan sawi ngai lovin mi dang chu kan hlim nghal vek a ni lawm ni? Nia, chuvang tak chuan a lawm nupa intanpuitawn a pawimawh na chu. Chutih rualin, pa berin thawhhreh pawh nei lovin nu ber hna pawh engkimah apuih thin hian chhiahhlawh ang mai a chhawr tum zui tlat leh a tih ve mai tur awmah pawh pa ber tih a tana khek tlat, thianrual leh inleng neih lai pawha pa ber hnehsawh nih tum ni awm taka tih tur kawhhmuh zut zut duh, nupui a tak an awm ve bawk. Nu zawk sum hai lut thei chhungkhuaah pa ber hmusitna leh pa ber thu engahmah ngaih duh lohna a thleng fo va, nu ber inchhungah an lal duh hle. Nu ber lalna chhungkuaah chhungkhat lainate leh thianrual, unaute an tlatlum thei ngai lo va, chhungkua nuam tak a ni ngai hek lo. Chhungkaw hlim thei tak din i duh chuan, tun atang khan in nupain thiam bik, thawk rim bik in tih bikna rilru nei lovin in hnathawhna apiangah intanpui tawn zel tawh ang che u. 

2. Inlungrual (Agree): A! Hei pawh hi a pawimawh hle mai. Inlungrual lohna chhungkua chu hrehawm tak a ni. Chuvangin in ngaihzawn lai atangin ka nupui/pasal tur nen hian kan inlungrual thei tak tak ang em tia in chik ngun a ngai hle. Inneih hnuah chuan thil apawi zo hman thin. I lungrualpui theih loh tur chu i thlah ngam bawk tur a ni. Dr. Kenneth Chaffin-a pawhin, “Chhungkaw din fuh loh tluka thiah leh harsa a awm lo,” a lo ti hial reng a ni. An mak mai mai khawpa, nupa han nih tawh chuan, rawng duh zawng in an lohna atang ringawt te pawn innghirnghona zu chhuak thei a maw le! Chuvangin kawr i lei dawn pawhin i nupui/pasal kha hei hi mawi i tih zawng a ni em? han ti la. Lungrual taka in nupaa in lei chu a than inang theuh theuhah pawh hak a nuam zaih bik mai ang. An tia lawm, pa ho phei chu mut dawn hian nu berin, pa ber lukham beng thak thak pahin, “I pa mutna tur hi a nuam lo palh ang e han ti sela, pa ho chu kan hnar nghal bawrh bawrh mai,” an ti. Hmeichhia in a nunna a pasal hnena a in pumpeka, a hnuaia zahtaka a intukluh a, a duhzawng a tih hian a pasal tan a duhawm zual a ni. Chhungkaw awh awm, chhungkaw hlim thei kan tih te hi, nupa inlungrualna atanga lo chhuak an ni. Engemaw puipun nikhuaah pawh, i thawmhnaw hak tur pawh kha ‘nu- i/pa-a ka in hmeh em?’ han ti la, i nupui/pasal duhzawng i hak ngat chuan miin a aia tha leh mawi pawh rawn ha mahse, in pa/in nu mitah chuan midang zawng zawng aiin i mawi ber tho vang. 

3. Inzahtawn (Respect): Mi tam tak chuan inneih ni atangin inzahtawnna hi a tul tawh lo emaw an ti a, anti sual chiang hle a ni. Nupa nunah inzahtawnna a awm loh chuan nupa nun a nuam ngai lo. Nupa chuan an inngaihzawn lai ai mah khan an inzahtawn thiam zawk tur a ni. Inzahtawn thiam tak te nun chu awhawm tak a ni. Tin, nupa pumkhat an nih tawh tlat avangin an zahawmna pawh an inhumhim sak thiam bawk tur a ni. Nupa thenkhatte chu an inneih ni atang an inzahtawnna a bo va, mi kara inhauh te pawh an ching hial thin. Hei hian chhungkua a ti khawlo hma hle. Mi kara inhauh ai chuan chetsual chang pawha in fak leh inhnem tal tal chin hi a tha hle. Leo R. Kinsell chuan, “Nu fel leh tha, hlim thei leh thil kal phungte thlir thiam mi chuan a pasal tlinlohna leh fellohnate pawm dan tawk a thiam a, a hlimawm zawnga thil lak a thiamin, thinrimna tur tam tak a pumpelh phah thei a ni,“ a lo tih hial reng kha. Hei, keini Mizo ho hi kan mak mai mai khawp a, mahni nupui/pasal te an hminga koh kan zak tlat mai pek a, “Hei = (Hey)” te kan inti kual vel mai mai thin a nih hi! Hei hi inzahlohzia lantirna a ni. Hming hian in ko nalh nalh mai ila a lawmawm dan pawh a thuah hnih bik asin. Hnampui ho phei chuan hming pawhin an inko phal ngai lova, “My Dear/Darling/Honey “ te an lo in ti hial thin asin. Nupa chu sawi loh kan hmelhriat satliah ringawt te pawn kan hminga min han koh nalh chuan kan nel nghal ringawt thin a nih hi maw. Nupa in karah phei chuan engtin tak thawk nasa ang maw. 

4. Induhtawn (Respond): Kan pi leh pu te hun lai kha chuan induh vak mang lote pawh an lo inneih tir thin a. Mahse keini hunah ve thung erawh hi chuan duh leh duh a ni tlangpui ta. Innei kan tih hian mipa leh hmeichhia chu thlarau, rilru, taksaah an innei (pumkhat) tawn tih hria ila. Nulat, tlangval lai a induh deuh anga langte pawh hi an han inneih meuh chuan, a zawng zawngin an innei thin lova, a tawpah chuan nu in, a ekna ngaia a ek a lo tul leh ta thin a ni. Chuvang tak chuan alawm induhtawnna hi a pawimawh ni. Tlangvalin nula a hmangaih lutuk avanga a neih hian nulain a duh ve si loh chuan engtikah mah an hlim thei ngai dawn lo a ni. Mipa in a rilru ngaihtuahna zawng zawng leh taksa, a nupui hnenah a hlan vek ang a, chutiangin hmeichhia pawhin a hlan vek tur a ni. Keini, Mizo te chu kan hnam naupan zia a lanna chu kan nupui/pasal te kan hmangaih hle pawhin, kan hmangaih zia kan lantir ngam tlat thin lo hi a ni. I nupui/pasal kha i hmangaih zia a takin han lantir la chuan a ni chauh ni lovin nangmah pawh kha i hlim viau ang. A zawng zawnga induhtawnnaah hian nupa nun chu a nuamin a hlimawm thin. 

5. Ritphurh in chhawk (Yoke): Nupa chu a nuamah pawh, a hrehawmah pawh an in tuarpuiin an hlim dun tur a ni. Chu chu inneihin a tum bulpui ber pawh a ni. Pa ber khumlaizawlah chhungkaw thila rilru hah avanga muhil thei lova a hui piap piap laia, a bulah nu ber a lo hnar thlawrh thlawrh chuan chum tawk a chakawm mai dawn a ni. Chuvangin nupa chuan an rilru hahna zawng zawng an in hrilh tawn ang a, an in tuarpui tur a ni. Pakhat zawk rilru a hah chuan pakhat zawkin a hnem thiam a ngai. Phurrit in chhawk tawn thiam lo nupa nunah chuan in hauhna a tam duh hle a ni. Ritphur zawng zawngah, rilru a ritphur hi mihringin kan chhiatpui berin kan chauh pui ber leh nghal. Chuvangin nupa hlim thei tak nih induh chuan tun atang khan inrilru hahna te inhrilhtawnin, inhnem thin ang che u. Pasaltha nih i duh em? Ram chhuaka sa kap kher lo pawhin tunah chuan pasaltha nih dan kawng a awm tawh a nia. Chu chu in nu thu kha awihin zawm zel la, pasal tha i ni mai dawn a lawm. Nangteh, nupui tha nih i duh em? I duh chuan in pa thu kha awih la, zawm la, zah bawk la, chu aia nupui tha leh pasal tha nih dan kawng awlsam chu a awm tawh lo.

A hmawr bawk nan: Nupui/pasal i zawng dawn anih chuan i mitin zawng lo la, i bengin zawng zawk rawh. Tin, inneih zunbun kual chhungah hian hlimna chauh ni lovin, harsat manganna leh lungngaih tahnate a leng/a lo awm tel a ni tih kan hriat reng apawimawh hle. Nunnawmna leh hlimna chauh thlir a, umtute an innei rei ngai lova, inthen lah an hman reng a, an chhungkua an hlim tlang thei tak tak ngai lo bawk. Hlimna, nunnawmna chauh thlir lova, inneihnaa an thu tiam anga a hrehawmah pawh, a nuamah pawh ka tuar chhuak tur a ni tih rilru pu tlattute chu an inthen ngai meuh lova, an chhungkua pawh an hlim tlang bawk thin. Kan Editor ka tihchhan pawh ni lovin, nupui kan neih dawn chuan Korean ho anga nau puak dan lo zir lawk te hi atangkai thei viau ang, nau lian chi pawh ni mahsela. Nangni, nakruh bo la hmu lo te, zawnglai leh mi zawnlai te u, ‘Hei ha, hui ha’ tih tawng lo turin fimkhur hle ang che u. 

- Alex Z.L Chhunga Hualngo

CHHURA NUN LEH KAN KRISTIAN NUN

Chhura chanchin chu kan hre bel viau tawh ngei ang. Chuvangin a kim chang chuan ziak duah lo mai i la. Tunlai kan Kristian nun hi Chhura nun nen a inang hle. Chhura chanchinah hian zir tur tam tak kan nei a, atlangpui chauh kan thai lang a nge.

Chengkek : Chengkek rawng hi a sen tai tek a, a kawr en chuan a thlum hmel hle. Han ei i la thil dang ei pawh chakawm tawh lo khawpin ha a ti tim thei. La ei ngai lo tan chuan a kawr sen dan atang chuan a thlum hmel bawk si a, mit a lain ei a chakawm thei hle. Mahse a kawr atanga a thlum rin vanga ei tan chuan pum khat pawh ei zawh hmaa paih daih a awl viau ang.

Tunlai kan Kristian nun pawh pawnlam lan dan chuan sen tai tek, thlum hmel tak, mahse thil dang ei pawh chakawm tawh lo khawpa thur leh ha ti tim vek thei kan awm ta nuk mai. Mithenkhat ruihhlo ti ngai lo, Kohhrana inhmang em em leh tawngkam tha ui lote zingah hian ruihhlo an tih lohna te, kohhrana an inhmanna te leh an tawngkam tha te hi an chhungril thur tak khuh nan leh thlum hmel taka an lan nan an kawr (pil) chauh an ti sen tai chawk thin. Mahse belhchiana, rinrawla han neih meuh chuan an thur zia kan hre tho tho thin. Chutiang mi chu tlakchham laia belh chi an ni lo, min hlau leh mai thin. Tin, thuruk hrilh chi pawh an ni meuh lo, an puang chhuak leh mai thin. Innghah nan an tlak lova, chhawr rim chi pawh an ni hek lo. An duh loh zawnga thu kan vuak thlak rualin an thur zia an rawn hai lang nghal mai zel a, an thur em avangin thil dang ei pawh tui awm tawh loh khawpin ha an ti tim hial thei. Kohhranah pawh nise chutiang mi an awm a, an thur zia hriat anih tawh chuan midang an rawn tlatlum thei tawh lo. ‘Keitein a zia a thup thei tak tak lo’ tih a nih kha. 

Chu tih rualin “It’s My Life”, “Ka nun a ni, tuman min sawisel suh se”, “An chawm, an hrai pawh ka ni lo” tih changvawna nei bur te pawh, mi nun sawisel peih hlei hlei an ni duh phian! Kohhran hruaituten an nun dan veiin zilhhau deuh se, hruaitute tlin lohna an hmu thei em em a. An hnunglamah deusawh takin an kawk sawk sawk a, an diriam a, engmah a ni bik lo an ti zui leh nghal mai thin. ‘It’s My Life’ an tihah khan duh tawk ve mai se, a ziaawm deuh tur. Mi chanchin thalam aiin a chhelam sawi nuam an ti a, an tawng thei phian bawk. Mi nunah inrawlh tam lovin mi chanchin chhelam aiin a thalam sawi uar tawh zawk se. Engtikah tak mi chanchin sawi aiin Lal Isua chanchin sawi hi nuam ti zawk tak ang i maw? “Mi sawichhetu chu hmelma a ni si lo; ni sela chu, ka tuar thei zawk tur: ka chunga intiliana chu mi hawtu a ni hek lo; ni sela chu, ka bihruksan tur: nimahsela nang, ka mi anpui, ka thian, ka thian kawm ngaih i ni miau si a. Kam thlum taka kan inbiakrawn thin a, mipui zinga Pathian biak ina kan len thin kha” (Sam. 55:12-14) tiin Davida chuan rilru na takin a lo au chhuakpui tawh a nih kha. Kei ngei pawh he thu au chhuahpui tur khawp hian hetiang thil hi ka lo tawng ve tawh a, ka tawng mek bawk. Chuvangin thian kawm i fimkhur ang u.

Chhura Chengkek Lo : Chhura khan chengkek a lo dawna a hum reng tawh, pawh thlawn mai awm tak, “Naa chu nise, a lo mai tur a” a ti. A hum reng tawh a pawh thlawn mai chu thil harsa pawh a ni lova, tharum thawh vak pawh angai hek lo. Mahse a thian Naa tihah a khek tlat.

Tunlai kan Kristian nun hi Chhura chengkek lo tum ang kan tam lutuk. Kan hum reng tawh, tharum thawh ngai lo, pawh thlawn mai theihah pawh kan thian Naa tihah kan khek leh tlat thin. A chhan chu, keimahni aiin kan thian Naa kha ti thang zawk, zei zawk, thiam zawk leh fing zawka kan dah tlat vang a ni. Kohhran huangchhungah pawh hruaituten kan tihtheih tawk ti turin chanvo min pe a, mahse kan ti ngam lo fo mai hi chu Chhura nau ni awm hliah hliah kan niin ka hria. Keimahni aiin kan thian Naa kha thiam zawk, fing zawk leh inhmang thang zawk ni mahse, i chanvo i hum tawh chu hlen chhuak rawh. Chuti lo zawng, i thian Naa ang khan mi thiam tak, mifing leh Kohhrana an rinrawl ber i ni thei ngai lovang. Tithei lo, thiam ve lo, fing lo, fel lo ni a inhriatna, mahni insitna leh midang dahsan bik vanga kan chanvo kan hlen chhuak theih lohna te hi Setana hmanrua, a dawibur pakhat a ni tih kan hriat apawimawh hle. ‘I rah chin apiang i ram a ni ang’ tih ziak ang khan kan rah, kan dai leh kan tih ve phawt angai a ni.

Chhura khan chengkek lawh dan a thiam lo niin a lang. Keini pawh Pathian hmangaihna leh Lal Isuan kan tan a tuarna leh min tlanna te, rinna leh thil tha tih dan te kan hre bel hle. Mahse kan nuna neih dan leh hman dan kan thiam lo deuh em aw! Pathian thu hian min awmpuiin min chenchilh reng chung hian thil tha ti thei lo angin kan inhre fo thin hi chu bansan a ngai. John Stanley-an, “Ringtu puitling nun awm dan an ziak ka chhiar a, ka nun atan ka awh em avangin Pathian hnenah thingthia tawngtaiin ka dil a, Pathian chuan min chhang thuai a, ‘Stanley, i awh em em nun kha tunah hian ka pe che, i neih ngam chuan nei nghal rawh’ min ti a,” a ti. Pathian chu a ringngam leh a ring duhtute hnenah a takin a inpuang thin. Isua vana a lawn dawn khan “Khawvel tawp thleng pawhin inhnenah ka awm zel ang,” (Mat.28:20) a ti. Pathian thu hi a rinhleh awm lova, miten an felna, finna, thianghlimna atan an hmang thin. Keini pawh chutiang tura koh kan ni a sin. Tithei tura a kohten kan tihtheih lohna chhan chu “I tithei meuh lovang” titu Setana aw kan awih zawk vang a ni. Petera tui chunga kal thu petu kha Isua a ni a, a rinhleh hma zawng a kal thei a, a rinhleh ve leh apil dawn ang khan, thu min petu Pathian aw ringhlelin Setana aw kan ring zawk thin. Mosia, Joshua leh Gideona te hnena thiltihtheihna petu Pathian kha kan Pathian a ni. A chakna leh thiltihtheihna ringa, hmang ngamtute an mualpho ngai lo.

Mawngping Khuaah : Mawngping khuaah a zin khan naupang, mawng ping vanga e thei lote chu turthir rawh lingin a verh saka, tam tak an thih phah a, an khua atangin Chhura chu um chhuah nghal a ni.

Keini zingah pawh kan thiamna, kan finna leh kan theihna ten a phak loh thilah pawh mi chunga len kan duh vang leh tithei, ni ve taka awm kan duh luat vang hian kan thiam loh pawh thiam anga lan duhna leh kan tihtheih loh pawh tithei anga awm duh tlat an awm ta zeuh zeuh mai. Kan tlin lo a ni tih hre reng chung siin hruaitu nih loh hlau em em, mahse kan nihnain mawhphurhna a ken tel, hlen chhuak thei leh si lo hmuh tur an awm ta nuk bawk. Eng emaw rauin a awmpui vanga ‘Pathianin a ti’ ti ve si, a nuna hmuh tur awm chuang lo leh a dawngsawngtu tan damna ni lo, natna thlentu mai ni leh si angte hi an bo bil lo a nih hi! Mipui, khawtlang huat leh um chhuak kan nih hmain bansan a tha hle. 

Sava Channa : Naa nen sava an chan laiin Phungpuinuin Naa chu a tih theih a, Naa hlau lutuk chuan a thian Chhura nen an channa inthlak turin a ngen. Naa khan a awmna kha a him lo, a hlauhawm tih a hriat khan a thian Chhura kha hrilhin hmun him zawkah kalpui zawk awm tak, amah pawhin a hlauhnaah chuan a thian Chhura chu thilawmzia hre reng chungin a awm tir a, amah Naa zawk chu hmun him zawkah a awm thung.

Keini, Kristiante zingah pawh mi thenkhatten an awmna, an thiltih a him tawk lo, a hlauhawm tih hre reng chunga midangte tih atana duh tlat khawpa rilru chhia an awm chawk hi a mak ti rawh u maw! Hnatlang leh ruaithehnaah pawh a hau tak lai hre rengin abul tantu leh atawp khartu ni duh si lo, a nawm lai leh awlsam laiah chiah inrawlh peih chauh kan awm bawk. Mahse hemi kawngah chuan Chhura kha i entawn tlat ang u. Naa’n a hlau a ni tih a hre lova, Naa channaah chuan a kala, mahse Naa hlauh em em chu a lo thleng meuh pawhin tlanchhia lovin a lo bei let a, sekibuhchhuak hial a hlawh chhuak a nih kha. Kan thiltih khawmnaah a hahthlak zia hre hmasa lo mah i la, kan tih tawh hnuah chuan hahthlak hle mahse Chhura angin i bei let fan fan ang u. Mi thenkhatten phakar takin thawk thin mahse keini chuan huaisen tak leh rim takin Lalpa rinchhan tlatin bei thin ila, sekibuhchhuak kan hlawh chhuak ve mai ang. Kan thawhrim rah chu kan la seng dawn si a.

Sekibuhchhuak : Mihrang huaisen, Phungpuinu pawh hlau lova achhip samah tham ngam, Chhura khan Phungpuinu atangin sekibuhchhuak a hlawh chhuak a. A that teh lul nen a hman tangkai hmain Naa’n a neih sak leh daih.

Pathian hmangaih, ama anpui a siam mihringte hian Talent fahrah te te kan neih theuh. Thusawi thiamna leh zai thiamna e.t.c..., neiin kan Talent neih erawh a inang lo nuk mai. Min hmangaihtu kan Pathian faka chawimawi nan leh a rawngbawl nana hman vat loh chuan Naan min chuhsak daih ang tih a hlauhawm khawp mai. Keiini, Zofate hi Pathian thu kan dawng nasa in kan hre tam tawh em em a, mahse kan thu dawn hi mahniin kan tangkaipui hmain midang zawkin an lo hmang tangkai hman deih zelna chhan pawh keimahnia Pathian thu lo thleng kan rinhlel vang leh kan hmanchhuah ngam loh vang a ni. Khawvel thilah chuan huaisen takin mualpho pawh huamin kan theihna, kan thiamna kan hman ngam laiin Lalpa tan erawh kan dawizep a, mualpho huamin kan theihna kan pho chhuak ngam leh meuh thin lo. Kohhranah chanvo kan neih kan hlen chhuak ngam lova, kan zak anih chuan kan Lal Isua pawhin a Pa hmaah min la zahpui ve dawn a ni tih hriain keimahni sekibuhchhuak theuh hi Naa pe mai lovin Lalpa faka chawimawiin, a rawngbawl nan i hmang tangkai theuh zawk ang u.

Pathian thu chu duhamna, hlemna dik lo laka min veng theitu, felna, finna leh thianghlimna min neih tirtu a ni. “I ni e” min tihna, kan chanvo hi nih ngam a pawimawh. Ringtu dawizepin hnehna achang ngai lo. Hnehna changtute an hlima, an lawm thin. Kan Kristian nun hi Chhura chengkek lo leh Sekibuhchhuak nei ang chauh ni lo turin, rinna nung nen i kal ang u. Pathian thu hi hman tangkai tur a ni a, Utawk tur vawn ve mai mai tur a ni lo. Van mite khian Pathian faka hlim taka kan zaite hi hmuhnawm an ti. Chu aia hmuhnawm an tih zawk chu Lal Isua avanga thu tlukna dik tak kan siam lai hi a ni. 

Lehkhabu rawn te :

1. E.M.C Palai: Vol.10. No.19,P-20,May, 2013

-Alex Z.L Chhunga Hualngo

TITANIC LAWNG LIAN KHA

Titanic lawng lianin Southampton a chhuahsan dawn khan, Pi Albert Calwell-i chuan lawng a luh pahin khualchhawn hnenah, “in lawng hi a pil thei lo tak tak ang maw?” tiin a zawt a. Khualchhawn chuan, “ka pi, Pathian meuh pawhin a tipil thei lo vang” tiin a lo chhang an ti.

England aţanga New York pan tur chu tuifinriata pil thei lo tura siam a ni a, mihring thilsiam zingah chuan a ropui bera ngaih a ni. Atlantic tuifinriat lai, New York aţanga mel 1,600 velah chuan April ni 15, 1912 khan vur tlang suin a hnuai lam chu feet 300 zet a kaw ta huau mai a, a pil ţan chu a ni ta der mai! Vawiin thlenga thil thleng rapthlak taka sawi la ni zel turin chu Titanic lawng ropui chu a chesual ta a ni. Chhanhimna lawngte chu a awm ve nain, lawnga chuang mi 2200 zatve lenna daih pawh a awm si lo. Vur a sut aţanga darkar hnih leh a chanve velah chuan mi 1500 dawn lai chu tuifinriat vawt takah chuan a pilpui ta a. A damchhuak chu hmeichhia leh naupang deuh hlir an ni.

Chu zan rapthlak takah chuan patling eng emaw zat chu midang ngaihtuah hauh lovin mahni himna zawngin an phi ruai a. A tam zawk erawh chuan an nupui fanaute chu an hmuh leh tawh dawn loh avangin an fawp ngawih ngawih bawk a, an thi ngei dawn tih hre chungin midang himna ngaihtuahin an inthiarfihlim thung a. An chhungkhat lainate chu thlahlel ngawih ngawih mah sela, an nunna chu hmeichhia leh naupangte tana hlanin chhanhimna lawng an hnuchhawn a, thihna lo thleng tur chu an hmachhawn ta a ni.

Titanic lawng lian kha millionaire special an ti a. Block lian tak tak pali-a ţhen a ni a, chhawng sawm pakhat a sang a ni. A tikaltu atan pawh propeller pathum lai a hmang a, a himna thu-ah pawh a tunlai thei ang bera thuam a ni bawk. Nuam leh mawi kengkim thei awmchhun niin an ngai hial a, khawvel mak tih leh ngaihsan a ni. A zin vawikhatna atan April ni 10, 1912 khan Southampton aţangin New York a pan a, a chhuah aţanga ni nga-naah chuan vur tlang lian zet mai suin, a hnuai lam chu a kaw ta huai mai a, vur tui vawt takah tuifinriat mawng ber feet 12,000 zeta thukah a pil ta a ni.

A dik tak chuan, Titanic lawng kha an ngaihdanah chuan lawng lian a ni satliah mai lo va, mihring thiltihtheihna ropuizia entirnaah an ngai deuh ber bawk. ‘Ropui, zahawm, mak, pil thei lo’ tih a ni. Mahse, chu “Pil thei lo” chuan a pil rual khan eng emaw a pilpui tlat. Khata ţang khan tumahin mihring thiltihtheihna hi innghahna tlak tak takah an ngai thei tawh lo.

Mihring nunphung hrilhfiahna atan hei aia ţha hi a awm thei tawh chuang awm lo ve. Mihring chapona te, finna leh thiamna te avang hian Isua Krista kan ngainep a, a thiltihtheihna a taka a lo thlen chuan Titanic lawng chhiatna ang hi kan chungah a la rawn thleng ngei dawn a ni.

Isua neih ka duh zawk,

Thil dang zawng aiin;

Khawvel zawng ai pawhin.

Note: “Nitinin a thlum tial tial” tih bua mi lakchhuah a ni.

- Pastor Seikunga

KAWNG DIK

Thufingte 3: 5-6 “I thinlung zawng zawngin Lalpa ring la, Nangma hriatnaah innghat suh; I kawng zawng zawngah Amah hre reng la, i kawngte chu a kawhhmuh zel ang che.”

Thumahruai

A hmasa berah chuan heta kan chang thlanin-a a sawi ‘ring’ tih awmzia chu ‘innghat, rinchhan’ ti ila a sual lem awm lo ve. ‘Innghat suh’ tih chu, pianpui hriatna/finna, rilru pianken-a innghat loh tur tihna a ni thei bawk awm e. ‘Amah hre reng’ tih chu ‘kan dam chhunga Pathian nena inpawlna (fellowship and intimacy) neih hi a ni awm e. ‘Kawhhmuh’ tih chu ‘ngil/tluang/mam’ tihna te pawh a ni thei awm e. Hringnun kan zin kawngah hian “Kawng” dang dang zawh tur a awm a, kawng nuam deuh, tlema har deuh, har lutuk, etc…a awm a. Tuna kan kawng zawh mek hian zawh theih tawh loh (tawp) hun min hruai thleng dawn ta ang se kan zawhzel duh ang em? Ka zawng zawh hi a dik a ni tia kan inrin ve-na keimahni ngaiha dik ve mai a ni ang em? Kohhran leh Bible-zirtirna nen teh ta ila a la dik thei tho ang em? Tv. Vanlalsailova hla “Simna tel lo pianthar a tawk lo ve? tih hian kan kawng zawh mek min enfiahtir thei ngei ang.

1. Kawng dik zawh a ngai

Thutak kan tih Pathian thu hi kawng dik leh hlun chu a ni reng mai. Nunna leh thianghlimna, hlimna leh zalenna kawng a ni a, a pangai reng. Chumi kawnga kalte chu an hmaa Isua leh an chhunga Thlarau leh Bible thu (beitham tak pawh nise) nung reng chu zuiin, harsatna hnuaiah pawh chau lovin an thleng thin. Intihhmuh leh chin thar hlimpui mai a ni lo va, zeldin harhna phurnaa thlen theih a ni lo bawk. 

Kan mi ropui kaltate Abrahaman fa neih theih lohna thim hnuaiah Pathian thu a ring ve tawp mai, A hriatna leh khawvel finna a ring lo. Josefa’n Pathian a hrereng, retheihna nasa tak atanga dinhmun tha a chan (luah) hnu pawh khan a la hrereng. Mosia’n harsatna tinreng a tuar a, Pathianah innghatin Pathianin a kawng a kawhhmuh zel. Tirhkoh Paula’n kawng dik a zawh chinah a hun zawng zawng hmang thain engkimah lungawina thutak a dawng a, a tirah rethei pawhin a tawpah hlimna leh chawimawinaah chawlhna an chang. Kawng dik zawh chu hahthlak chang awm mah se a tawpah an lawm thin hi a ni ‘kawng dik zawh rah’ chu.

2. Kal dan dik a ṭul

Rinna kawngah Pathian thu leh Kohhranho kawng dik duansa zawh hi a him duh chawk, chumi zui loh chu chhiatna/harsatna a thlentir thei. Harhna a lo thlen hian Kohhran leh Bible-in a ti tih lam hi kan hlamchhiah duh chawk thin, hei hi chin loh a tha. “Kal sualna laka min veng turin Kohhran hi min dinsak” tih hi hriat nawn fo a tha awm e. Kohhran piah lama kan kal chuan chu chu “Kal dan dik lo” kan ti thei awm e.

Thil pakhat awm thei ve chu; tunlai Kohhran tam takah “Bible-in a ti” tih aiin, Kohhranin a ti (Bible thu aia Kohhran thu dah lal tum), Sap ramah pawh “tunlai tih dan a lawm” tih avanga zui tum ta mai. Kan tih ve dan tih hi dah lal tum Kohhran kan thahnem chho zel bawk, Kohhran lu, Isua Krista thu kan hre chang zo thin lo. Nupui, mahni pasal thu engahmah ngai lo kan ang hle a ni. Hetiang chhungkua chu a nuam tak tak thei lo, a hmu leh hretuten an zah lo bawk. A chhan chu a kal dan tur angin a kal loh vang a ni. “Lu” nihna hi nupui (Kohhran) chan a ni lo va, pasal (Pa/ Isua Krista) chan a ni. Kan hriatnaa innghat lovin Pathian thu Bible-a innghat ngam ringtu, Kohhran, chhungkua, etc… kan nih chuan chu chu “Kal dan dik, kawng dik” kan ti thei awm e.

Thutlangkawmna

Nun hi Testimony a ni a, chuan “nun hi Krista” a ni bawk. Testimony dik nei tur chuan kawng dik lo atanga kawng dika kal a tul takzet mai; chu chu nunah a lang tur a ni bawk. Nuna lang Testimony chu Chanchin Tha bu Panganaah an vuah lem hial thin a ni. Thufingte ziaktu hian Kawng dik zawh hlutzia chu a man chiang hle niin a lang. Kawng dik lo atanga kawng dikah, Kawng dik atanga kawng dik loah pawh hringnun kawng hi a khalh theih a ni. Tuna kan kawng zawh mek hi a dik ber em? tih kan hriat theih nan tehfung atan “Pathian thu (Bible)” hi hmang fo ila a tha ber awm e. Pathian thu nen Amah pawl reng chunga kan kal chuan kan kawngte chu a hmuingil (ngil/tluang)-zel dawn a ni. Chu chu a hlawkna leh Pathian thu rintlakna ber a ni. Lalpa’n Malsawm che rawh se. Amen

- Pro. Pastor Lalhmangaihzuala