Nu Hlutna : Nute hi Pathianin a aiawh atan a siam a ni an lo ti hial a. Sap hla phuahtu hmingthang tak pakhat chuan,
“Pathianin nute tel lovin engkim a tithei lo,
Chuvangin a ni, nute hi a lo siam ni,”
a ti a. Mihring tungchhoa kal tawh phawt chuan nu kan nei vek a. Nu chu a fa lo piang tur atan a inbuatsaih a, a ei duhzawng leh chak zawng pawh nau tana tha lo tur a nih chuan a tlansan phal thin. A pum chhunga nau awm chu a hrisel loh hlauvin nau mamawh apiang a tihsak thin a. Upain, “Nau pai chu thalfang pai ang a ni,” an tih pawh hre rengin hreawm taka thla kaw chhung an pai hnuah, harsa takin nau an hring ṭhin a ni.
Mihringte hi tuamhlawm ngai leh enkawl ngai ber kan ni awm e. Ramsate chuan no an neih pawhin an note chu kar lovah an insaseng thei mai a, an dam khawchhuah theihna turin ei leh in pawh an inzawn thei mai thin a ni. Mihringte erawh hi chu khuanu’n min lo duan danah tuamhlawm ngai tak kan ni a, kan lo pian atanga mahnia kan insaseng theih thlengin engkimah tanpui ngai leh enkawl ngai kan ni. Khawvel eng kan lo hmuh atangin kan nunna chu nute kutah a awm a. Nute chuan an fate hnute tuiin an chawm a. Kuttualleichham leh bengngawng mitdel ang mai an nih lai pawhin an mamawh engkim an tihsak thin a, an zun leh ek pawh thinhrik hauh lova thian zotu an ni. Nu chuan an fate tap chu an eng lai nge na tih ngaihtuahin nin a hnehin an tuarpuina lamah an mittui an senpui hial thin.
Kan dam loh hunah pawh zan rei khawvawt leh thosi karah pawh chhuat laia min awi ngat ngat thintu chu kan nute chauh hi an ni. An chaknain a tlin tawh loh avanga an mal chunga nau hnute hnektir chunga an muthlu lup lup thinte ngaihtuah chang phei hi chuan fate chunga nu hmangaihna hi eng tiang chiaha thuk nge a nih tih hi sawi fiah thiam harsa berte zinga mi niin a lang. “A nau a hnute hne lai chu a theihnghilh thei em ni?” ( Isaia 49:15) tiin nu hmangaihna thukzia min hrilh. Keimahni avanga an dar lo insanhleih tate leh an el lo kun tate han hmuh hian thinglung chhungril ber a khawih lo thei lo a ni. Kawl thufing pawhin, “Nu hmangaihna chu chhawlhal lai taka zotui thiang dawn ang a ni,” a lo ti hial a. Hapui nei tawh mumal lovin nute chuan chaw min thial sawmsak a, kan puar loh hlauvin min fah thin. America President ropui, sal chhuahna dar a vuak avanga tun thleng pawha mi thenkhatten Pathian ang hiala an biak Abraham Lincoln-a pawhin, “Ka bat hi tlak dawn ila, ka nu laka ka bat hi ka tlak huphurh ber a ni,” a ti a. Nute hi kan taksa thanlen theihna tur atan an ei ai leh bar ai tak tak pawh min hlan phaltu an ni.
Mi kan an loh hlauvin zirna runah min kaltir a, in lamah kan ei leh in tur buaipuiin an hmanhlel a; mi zingah thawmhnaw tha lo leh tawp taka kan awm hlauvin, thawmhnaw tha pawh inbel phal lovin fate tan an engkim an hlan a ni. Spain thufing pakhat chuan, “Puithiam kawrfual aiin nu pawnfen tlang tet pawh a hlu zawk,” a ti a. Chuvangin, nute an pawimawhna leh an hlutna te, an fate chunga an hmangaihna thukzia te, fate tana an nun an hlanna te hi ngaihtuah zawh poh leh kan hriat tawk lohzia kan hre dawn chauh niin a lang. Nu hmangaihna hian chhung lam leh pawn lam a huap zo em em a. Kan buchip lai leh bawrhsawm lai zawng zawnga hmangaih kuta min dawmtu an nihzia hre chiangtu Pu Rokunga chuan,
“ I lenthla leh i kimtlangah,
Hmangaih eng zun, a lo zam a;
Rinawm takin rawng min bawl thin,
Hahthlak mahse phunnawi lovin.”
tiin a lo auchhuahpui hial a ni. Chhungkua zir tanna hmun, nun chan zir tana hmun, awptu leh enkawl hna thawhna hmun aia hlu zawk leh pawimawh zawk a awm lo tih a ni a, chu hmun chu nu leh paten anmahni in lum ngeia an fate an zirtirna hmun leh naupangte tana sikul hmasa ber chu a ni. Nute hi fate nena awmho tam zawk an ni a, an faten nun dan mawi leh tha an neih theihna tur te, finna leh thiamna ngaisanga midangte harsatna siam lo tur te leh mahni intodelh tura tan laa tanpuitu tha nih dan te zirtir thintu an ni a. Harbata chuan, “Nu tha pakhat hi zirtirtu za tluk a ni e,” a lo ti hial a ni. French hruaitu ropui Nepoleon-a hi, hmeithai fa a ni a, a nu enkawlna leh kaihhruaina avangin miropuite khawvelah a hming a dai tawh ngai lo a ni. United State-a President hmasa ber George Washingtona pawh hi a pain kum sawmpakhat a nihin thihsan mah se, a nu zirtirna a seilenpui a; mizia leh chetzia, a rilru put dan avangin khawvelin a ngaihsan berte zinga mi a ni.
Chutiangin kawvel hriat thama mi ropuite hi nute zirtirnaa seilian an ni deuh vek a. Nute chuan an fin an thiam ang tawkin nun dan mawi leh kawng dikah min hruai a, mihring khawsak phungte min zirtir thin a ni. Thomas Edison-a (Tommy-a) pawh hi naupang bengngawng deuh hlek a ni a. Sikula an zirtirtuin, Tommy-a nu hnenah, “ I fapa hi thil han zir thiam awm chi pawh a ni lo,” tiin lehkha a thawn a; chuta tang chuan a nu chuan sikul ban tirin in lamah a zirtir ta a ni. Tommy-a chuan a pa room pakhatah Laboratory a siam a, khawvela Industrial Research Laboratory din hmasa bertu a ni. Chu naupang chu khawvelin ‘Scientist ropui’ tia a hriat lar, Thomas Edision-a a ni tlat mai. “Ka nuin min damreipui lo hle mah se, khawvela ka mamawh ang zawng zawng chu min zirtir hman a ni,” tiin a sawi hial a nih kha!
In chhung ti inchhungtu chu nu an ni ber a, nu tel lohna in chhung chu a lum zo lo an ti thin. Naupang leng hawngte pawhin, “Khawnge ka nu,” an ti deuh zel a. Miin natna hreawm tak an tuar lai leh an thih dawn thleng pawha thei leh thei lova an auchhuahpui thin chu, “Awi ka nu,” tih hi a ni. Naupangte chuan pem emaw, bawl emaw chhe te pawh nei sela, an nute an entir thuai thin. Chutiang bawkin an lawmnaah pawh an nute an hre hmasa ber thin a ni. Chhungkaw nu ber chu tar te pawh ni se, tapchhaka an tawl hreih hreih theih chhung chuan inchhung an uap lum a, chhungkaw tinuamtu ber leh tihlimtu ber an ni. Nu nei tawh lote hlei hlei hian nute hlutzia sawi tur an nei tam ting a, Nepoleon Bonaparte-a pawhin, “Nu tel lo chuan khawvel hi thlaler ram ro, tui awm lohna ang a ni,” tiin a sawi a. Saphoin thumal pathum: rilru khawih leh mi hneh thei ber tur an thlan chhuah pathum zingah, nu (Mother) tih hian mi a hneh ber an ti. Pianna ram sawi nana ‘mother-land’ an tih te, pianpui tawng sawi nana ‘mother tongue’ an tih te leh hringtu kohhran sawi nana ‘mother church’ an tih atangte hian hnampui zawkte thinlungah pawh nuten hmun an chan thukzia a tichiang hle awm e.
Nu hmangaihna hi tawp chin nei lo a ni a. Thih hnu piah lam, chatuan rama min hruai thlen tumin Pathian thu leh tawngtainain min chawm thin. Pathian thu kan hriat theih nan sande sikul min kaltir a; Baibulte min chhiarsakin min vawntir bawk thin. Ziaktu pakhat chuan, “Ka nuin, chawei dawna tawngtai dan te leh mut dawna tawngtai dan te min zirtir kha, tun thlengin ka la theihnghilh thei lo,” a ti a. A vawikhat sermon-ah pawh mi tam takin piantharna an chan phah khawpa thuhriltu ropui D.L. Moody-a pawh hian, a nu Betsey Holton-in pa tel lova harsa taka a lo enkawlna avang leh an unauza lu chungah kutnghata a tawngtaisak thin avanga Pathian hmangaihna dawng a nih inhriain, “Khawvel nu zawng zawng hi ka nu ang ni vek selang chuan tan in a awm a ngai lo vang,” a ti a nih kha!
Nute hlutzia sawi apianga an sawi lar pakhat chu Augustina nu Monica-i hi a ni. Augustina chu a naupan laiin a pain a thihsan a, a nu chuan theihtawp chhuahin a enkawl a. Nimahsela, Augustina chu a sual ta tual tual mai a, a nu mangang chuan ‘beidawng hauh lovin a tawngtaisak zel a.’ Mahse, Augustina chu Kristian atangin sakhaw dangah a inlet a, a nu chu ram hla takah a tlanbosan ta daih mai a. Vanneih asiamin, Augustina chu Rome 13:13 thu, “Chhuna awm angin mawi takin i awm ang u…,” tih a chhiar atangin a piangthar ta hlauh mai a; a nu tawngtaina rah a nihzia hriain, a nu hnenah lawmthu sawi turin an khua, Africa rama Thagaste-ah chuan a haw ta nal nal a. An khua a thlen ni chu a nu thih ni a lo ni ta si a, Augustina mangang tihngaihna hre lo chuan, “Ka nu hi tunhma lam khan lo hre chiang ila chuan hmanah khan Lalpa ka fak ve tawh tur a ni a; nute hi min han pe teh u, anmahni hmangin khawvel hi ka han tidanglam teh ang,” tiin a sawi ta hial a ni. Augustina chuan a nu chu lawmthu hrilh duh mah se, awmzia a nei tawh lo. Hun tha kan neih lai hian kan nute hi an phu tawk chuan enkawl zo lo mah ila, tha taka enkawl leh an dam chhung hun hlim taka hmantir hi faten nute laka kan tihtheih awm chhun a ni.
“Chawimawiin awm zel ang che, chun nunnem,
Khawvel entu varparh arsi eng mawi chu;
Chhung tin run in thim en zel la, dam reng rawh."
tia Pu Rokunga hla phuah hian nute hlutna a phawrh chiang hle a ni.
- Naomi Pa
