Sakawlh (666) chanchin hi sawi a hlawh hle a, ringtu thenkhatte pawhin an hlauh thu an sawi nasa hle thin. Thupuan bua Johana’n “Sakawlh” a tih hi kan hre chiang lo vang tih a hlauhawm hlein ka hria. Thenkhat chuan sakawlh hlauh avangin kohhranah hming ziak luh an ngam lo va, kum 2011-ah India ram chhiarpui (census) lai khan hming ziak duh lote pawh an awm phah hial a ni. Tun hnai maiah pawh ringtu zaah za awmna, Mizoram ngeiah pawh India mi dik tak nih leh nih loh chhinchhiah nan thla lak niin finger print pawh tih nghal ani a. Sakawlh nambar 666 lo chhuahnaah ngaia ti duh miah lo, hlau tlat ringtu tam tak an awm bawk. He thil hi kan tunlai khawvel, mi firfiak (terrorist) te, mi bum hmangte leh Paula’n “Tha duh hauh lote” a tih pun chhoh zelna ramah hian mi dik tak leh dik lote hriatchhuah zung zung theih nan tih a ni. Thil hi a nihna dik tak kan hriat loh avanga hlauh mai hi thil awm thei a nih avangin indem ngawt chi pawh a ni hran lo. Shimla kan kal laia sakawr chungchuan hlauh vanga ke a kal mai duh, Pu Thangkima leh zun hial cheha, a aw khur atang ringawt pawha a hlauh zia hriat mai theih Pi Juliet-i te tan chuan sakawlh hi chu hlau hle mahse thil awm tak/thil ni thei tak a nih zia min hriat chiantir hle. Chuvang chuan sakawlh hi kan hriat chian loh chuan ringtu inti ve si hian zun cheh thawt khawpa hlauva khurin kan awm palh ang tih hi a hlauhawm em avangin, eng nge anih tih hi hailan ka tum ber chu a ni. Mahse U Sawmi chuan, “Bus chuan chu ka rui zela a hrehawm ka ti, sakawr chungchuan kha chu ka hlau ve lo, a lima, a insawh nasat poh leh a nuam ka ti zawk” a ti a. Hawlamah a sakawr chungchuan lai ka lo thlir reng a, nui ri miah lo hian a khi teh sung zel si a, a hlauh hmel loh hi ka tih rualin a nuam a tih hmel em avangin ka ngaih erawh a tha zan lo. Chuvangin ani hi chuan sakawlh chu a hlauh pawh ka ring phal ta lo hial a ni.
Kum 2000 vel kal tawhah khan Rom lal ber Domitiana chuan Kristiante a tiduhdah chiam a, mi tam takin an thih phah a ni. Apostol Johana pawh Patmos thliarkarah tantir anih lai khan Thupuan hi alo ziak a ni. Chutah chuan sakawlh chungchang a ziak a (Thup.13:18). Chu sakawlh chu mi tam takin an hlauvin vawiin thlengin buaipui berah an nei.
Ezekiela, Daniela leh Thupuan bu hi Chanchin Tha aimaha tuipui zawk an awm nual a, sawi pawh nuam an ti. Hetiang lehkhabu hi Apocalyptic an ti a, chu mi awmzia chu “Khuh hawnna” tih a ni. Hei hi Judate thuziak dan lar tak a ni. Thuthlung Hlui leh Thuthlung Thar inkarah te, Thuthlung Thar hunahte khan hetiang Apocalyptical Form-a thuziak hi an ching hle. Hetianga an chinna chhan hi tute tan emaw hriat thiam theih loh, an ziak chhante tan erawh chuan chiang hle si a ni. Chuvangin hetiang thuziak hrilhfiah tur hian fimkhur a ngai a, a ziaktu hun lai boruak en chunga chik taka zir a ngai hle.
Kan hlauh leh buaipui ber chu nambar 666 hi a ni a. Sakawlh nambar ni turah kan ngai a, chuvangin Bibul ram mite nambar hman dan hriat a tul a ni. Bibul ramah hian A AW B hi nambar chhiar nan an hmang thin. Chutiang nambar atanga mihring hming emaw thu awmze nei chhut chhuah dan chu “Gemetria” an ti a, hei hi Hebrai tawng chuan “Gimatripa” an tih atanga lo chhuak a ni. Hetiang gematria hmang hian mi tam takin sakawlh nambar 666 hi chhut chhuah an tum thin a, puh dan chi hrang hrang pawh a tam tawh hle. Chung an puh zinga langsar zualte chu: Martin Luther-a, John Knox, Nepolean, Hitler-a leh Stalin-a te an ni. Kum eng emaw zat kal ta atang khan Pope te, European Economic Community (EEC) te leh World Council of Churches (WCC) te pawh sakawlhah an puh mek bawk.
Sakawlh nambar chhutchhuaka tu nge a nih hre tur hian eng tawng nge kan hman? Hebraiho chuan alphabet hi nambar chhiar nan an hmang nghal a. Hebrai alphabet-ah chuan consonants 22 a awm a. A hmasa 10 chu nambar 1-10 chhiar nan an hmanga, a dawt 9 chu 20-100 chhiar nan an hmang leh a, a bak 3 chu 200-400 chhiar nan an hmang leh thung. Chubakah chuan Hebrai alphabet-ah hian hawrawp 5 chu thumal tawp bera a awmin ziak dan danglam a awm a, chutiang chu final forms an ti a, chu chu 500-900 chhiar nan an hmang bawk.
Hetiang hian: Aleph = 1, Beth = 2, Gimel = 3, Daleth = 4, He = 5, Vau = 6, Zain = 7, Cheth = 8, Teth = 9, Jod = 10,Kaph = 20, Lamed = 30, Mem = 40, Nun = 50, Samek = 60, Ain = 70, Pe = 80, Tzade = 90, Koph = 100, Resh = 200, Shin = 300, Tau = 400 (Final Kaph = 500, Final Mem = 600, Final Nun = 700, Final Pe = 800, Final Tzade = 900).
Hebrai ang bawkin Greek tawng pawh nambar chhiar nan hman nghal a ni. Greek tawngah chuan alphabet 24 a awm a. Mahse nambar chhiar nan Hebrai tawng ang bawkin 900 thleng an mamawh bawk si a, chuvangin an alphabet pangngai bakah hawrawp 3 an belh a. Chungte chu nambar 6 atan Stigma, nambar 90 atan Koppa, nambar 900 atan Sampsi an hmang. Hetiang hi Greek tawng hlut dan chu a ni: Alpha = 1, Beta = 2, Gamma = 3, Delta = 4, Epsilon = 5, Stigma = 6, Zeta = 7, Eta = 8, Theta = 9, Iota = 10, Kappa = 20, Lambda = 30, Mu = 40, Nu = 50, Xi (Ksi) = 60, Omicron = 70, Pi = 80, Koppa = 90, Rho = 100, Sigma = 200, Tau = 300, Upsilon = 400, Phi = 500, Chi = 600, Psi = 700, Omega = 800, Sampsi = 900.
Latin tawng chuan hmanlaiin nambar chhiar nan hawrawp 5 chiahan hmang. Chungte chu: C = 100, L = 50, X = 10, V = 5, I = 1. Hun eng nge maw ti atang khan M hi 1000 sawi nan an hmang leh ta a ni. Hei hi Millennium tihna a ni.
A chunga kan tarlan tak Alphabet bak hi Bibul ram velah nambar chhiar nan an hman hmuh tur a awm lo. Chutiang a nih chuan sakawlh nambar chhut chhuah nan English alphabet hman chi a ni lo. English alphabet hi nambar chhiar nan an hmang ve lo. Mizo alphabet lek phei chu hman chi hulhual a ni lo. Kan hman ber tur chu Johana tawng hriat Hebrai leh Greek hman a ngai tihna a ni. Latin tawng nambar an chhiarna lah chu 5 chauh a nih avangin hman chi a ni lo bawk. Hmanlai chuan nambar hmanga hming ziak hi an ching hle thin a ni. Pompei khawpui kulh bangah chuan tlangval pakhat chuan “Ka nula hmangaih hming chu 545 a ni” tih a ziak.
Latin tawng Roman Empire sawina chu LATEINOS tih a ni a. Hei hi Greek hawrawp anga ziak chuan a nambar belhkhawm chu 666 chiah a ni thei. A chhan chu: L = 30 + A = 1 + T = 300 + E = 5 + I = 10 + N = 50 + O = 70 + S = 200. Heng namber te hi belhkhawm ila namber 666 chiah a lo chhuak ang. Rom lal Vespasian, Titus leh Domitian te kha Titus chhungkua a mi vek an ni a. Titus hi Greek tawng ziakah chuan TEITAN tia ziak a ni a, hei hi nambar 666 chiah a ni bawk.
Rom lalte kha pathiana inchhal an ni a. Mipuite anmahni pathiana be turin an phut bawk. Rom lalte chu KAISAR tih an ni thin. “KAISARA pathian” tihna chu Greek tawng chuan KAISAR THEOS a ni. Hei pawh hi a chhunga alphabet kan tarlan leh an hlutna nambar nen chhut chuan nambar 666 tho kha a lo chhuak leh a ni.Heta tang hian sakawlh chuan Rom lal Kaisara hming pu kha a kawk hle a ni.
Rom lal Nero kha lal sual tak a ni a, a thih hnuah mi tam tak chuan mihringa lo chang leh turah an ngai. Domitiana a lo lal khan a nungchang leh chet danah Nero thi tawh kha rawn tho lehah an ngai hmiah. Nero kha Kristian nasa taka tiduhdahtu a ni a, chutiang bawkin Domitiana khan Kristiante a tiduhdah nasa hle. Rom hovin Nero a tho leh tura an ngai ang khan Kristiante pawhin anmahni tiduhdahtu Nero leh Domitiana chu mi thuhmunah an ngai ve hial a ni. Judai ram thlaler, tuipui thi kam, hmun pakhat Murabba’at hmuna Aramik tawng an hmuhchhuahah chuan Rom lalber Nero-a kha NRWN QSR tiin an ziak. Aramik leh Hebrai hian kum AD 800 hma lam khan an hawrawpah vowels an nei ve lo. Hebrai thuziak danah chuan Yahweh tih hi YHWH tia ziak a ni thin. Chuvangin Nero Kaisar tih pawh NRWN QSR tia ziak a ni. NRWN QSR tih hi Hebrai nambar ziak dan zuiin kan chhut chuan nambar 666 chiah a ni. N = 50 + R = 200 + W = 6 + N = 50 + Q = 100 + S = 60 + R = 200, belhkawm ila nambar 666 chiah a lo chhuak ang. Neron Kaisar tihah hian Neron tiha a tawpa N hi kan paih chuan 616 chiah a ni. Hmanlai kutziak Baibul thenkhatah chuan Sakawlh nambar hi 616 tiin an inziak ve bawk.
Johana hian tihduhdah a tuar laiin thupuan bu hi a ziak a, chunglai chuan Nero, hmana thi tawh tho leh tura rinna kha a lian si a, Domitiana kha mi tam takin Nero-a chiah chiah niin an ngai a. Chuvangin Johana’n sakawlh a sawi hi tu dang ni lovin Domitiana chiah kha niin a lang. Hei hi Baibul thiamte pawm dan tlanglawn ber a ni.
Hetiang hi a nih avang hian sakawlh puh tur kan zawn buai vak a ngai lo vang. Hmana thil thleng tawh kha a ni si a. Thupuan ziaktu hian a hunlai mila a ziak a ni tih i hre thar ang u. Tlai khaw hnua keinin kan duh duh puh tura ziaktuin a ziak a ni lo tih hre bawk ila a tha ang. A thu hrimah Lal Isua ringtu dik tak tan chuan tunah pawh rawn chhuak dawn tehreng pawh nise hlau tur kan ni lo. Mi dawihzepte hian hmuhsitna leh velh an tawk duh bik. Chutiang chiah chuan a hlau apiang chu sakawlh hian a seh zawk dawn a nih hmel. Kan Lalpa ber pawh, “Sakeibaknei, Juda hnam a mi” tih a nih kha. Sakawlh chu a ni ber zawk e. Sakawlh hlauva awm te u, thlamuang takin lo awm tawh rawh u.
(Lehkhabu rawnte: Adolf Deissman, Light from the East, Rev. B. Lalrinawma, Tunlai huna ringtute tibuaitu.)
- Alex Z.L. Hualngo
