KAN NEP TAWH LO

Pu Mosi-an Genesis a ziah lai khan tu emaw ‘gene’ah chuan mizote min thlahtu kha a lo awm ve tawh mai thei a,Israel thlah(Ephraim/Manase-a thlah)kan lo ni ta a nih pawhin kei zawng ‘Mizo’ ka inti tho tho. Lo ni ta ila hnam bo nih hi ka zak deuh tlat nia mawle! Ka zah avangin ‘kan ni lovang‘ ka ti tlat pawh a ni chuang hek lo; mihring hi a bo theih em em mai si a.

Miin kum sangbi engemaw zat ziak leh chhiar hmanga hna an lo thawh tawh laiin leh an lo chhinchhiah tawh laiin keini alphabet neih ve chu chungho zinga mi min siamsak, kum 100 awrh a la ni a. Planet dang an pan vut vut tawh laiin keinin chungho thilsiam-Bike sen, eng, dum leh varte kan la in awhsiak mai mai thung a, kei tak phei chuan Bike pathum lai ka awt chhe thak tawh asin!! Tunah chuan Laptop ka awh ve tawh avangin nep tawh lo hle-ah ka inngai.

Ram vata hal leh tawrh, thla 8/9 hnu-ah phei chuan ‘Lo’ pawh ti duh tawh lova ‘chul’ ti leh mai, kum tina eizawnna mual thlak thin kan pi pute hun lai ngaihtuah chuan eizawnna nghet neih duhna rilru kan pu ta ringawt pawh hi nep tawh lo tak kan ni. Hmasawn kan tumdan leh a rahbi kan chheh dan inang lo hlawm mahse, mahni kalna tur chhep chhe duh kan awm ka ring lova, kawng hrang hranga Zofa hlawhtlingte chanchin hriat hi a nuamin kan nep tawh loh zia hriat hian a nep bik nih hlauvin tan kan la sauh sauh hlawm a nih hi.

Keimahni tan mai a ni lova, kan fate leh thlahte khawvela an nep bik loh nan mahni hmasial tak leh mahni hmasial rilru pu lemlo te pawhin mahni hma sial kuak kan tum theuh a nih hi. A thenin dan kan bawhchhia a, a thenin dan chhungah an eiru a, a then kohhranho zingah biru-in Bible leh Pathian thu inphen nana hmang tawk kan kat nuk bawk. Sakhaw dang pathian kan ngainep a, chu kan ngaihnepsak pathian lem avang a an nun an vawn thianghlimna tal erawh kan khum a ngai hle. Hnam dang kan chung en lutuk tawh bik hauh lo, kan tlukloh pawh kan hrethiam ve tan tawhin elna rilru kan nei lian sawt khawp mai. Ramhuai kan hlau tawh lo hi a ropui takzet a, Pathian tihna nei lian lehzual phei ila chuan hei ai hian kan neplo tlang ngeiin ka ring thin.

Ram leh Hnam sawi apianga British-ho ‘Divide and rule’ vanga kan inthendarh tak thu sawi tel ngai ziah thin hi a ninawm a, a thlak nana ‘Ram hran hrana then darh tawh Mizote chuan insuihkhawm duhna thinlung an pu ta,’ tih theih a chakawm tawh ngawt mai. Kan culture, society life leh kan ei/in, ze bulpui atanga ze ler thlengin la danglam lo mah ila kan chenna ram Bangladesh, India leh Burma ziate avang hian kawng tam takah kan danglam a ni tih lah hai rual a ni si lo. Hming takngial ah pawh kan lungrual hlei thei lo; Mizo, Zo, Chin, Zomi, Kuki….bakah mimal hming tawpa ‘i’ leh ‘a’ belh leh belhloh kawngah pawh mahni chenna leh seilenna hnaivaia kan inkoh than dan lo chu kan inpawmpui hreh tlang deuh vek a, hnamkhat kan inhre thei mumal tawhlo a hre tawh ang. Kei tak phei hi chuan zu hi fak tlakah ka ngai lova, sualah ka ngai tham lo hrim hrim.

Kan Mizoram leilung chhungril hausakzia hi an sawi thin a, a taka hmuh leh hlawkpui erawh a la awmlo. Kan pi pute luah thin Burma rama thil hlu tamzia pawh a ri fo mai, kan hnampuite luah chin Bangladesh erawh kan hre lutuk lo deuh nain a nep bik ka ring miah lo. Chutih laiin Chakma changkang deuhho lah chuan min chuhpui an tum tan ta a, an tawng ve ta fo mai. Mizo thalaite zu ruia kan chahthlak lai leh kan nula risk hlawhtlin tawh, kan tih hur tawh hovin hnam dang min um san dawr dawr lai hian heng chakma thalaiho erawh hi chuan zirna sang zawk umin min khum chho zel si. Kan hmusitate hian beih tham lovah min ngai thuai maia ang tih ka hlau hlel lo. Zofate leilung hausakna hi kei zawngin Burma, India leh Bangladesh sorkar inchhek muk nan mai chuan ka phal lo ve. Heti kawngah hian KAN NEP TAWH LO tih a chakawm tawh mang e aw.

- JL Liana

RINGTUTE CHAKNA THURUK

A hmasain ringtute awmdan tur hi kan hriat a ngaiin kan damchhan kan hriat hi a tul a ni. Kan nulat tlangval laia kan hmangaihte kha kan damchhan te kan ti thin ti rawh u? Mi thenkhat chuan kan damchhan kan hre lo a, he khawvelah hian engvangin nge kan pian ve tih te hi kan inngaihtuah ngai em? I ngaihtuah nasa ve thoin ka ring. Entirnan, fa i nei a i lawm em em a, chu i fa chu i duhdanin awm se i ti a, lian thuai thuai se i thachhang dawltu a tan lo thang lian thuai thuai se i ti thin tiraw? Kan Pathian pawhin chutiang chiahin a ni min duh ni. A fa a tan min siam a, a duhdana awm turin min duh a, kan lo thanlen hnuah a thachhang dawltu, a duh dan a awm a, a chanchin tha hril turin min duh a ni.

Tin, a duhdana awm phawta, chu mi hnuah a chanchin tha hril turin min duh a ni tih kan hre tawh em le? Tin, thalaite u eng vanga piang nge i nih in inngaihtuah ngai em? I bialpa i bialnu tan chauhin i piang lo a nia! Thih hnuah chuan nupui pasal an hre tawh lo a, chatuanin Pathian fak chauh an hre tawh dawn a ni! Chuvang chuan he leia kan awm chhung hi chuan mahni tana chakai khawrh a ngai a ni! He leia chakai khawrh ni lovin Krista tana chakai i khawrh khan i tan chatuan a tan nunna chu a ni. Mahni hmasial lovin i khawrh tur a ni. Engtin nge i khawrh ang tih chuan mi te tana malsawmna nih te, mi te tana i tawngtaina te, rethei i tanpuite, i mihringpui i hmangaiha, an thlarau kalna kawng i hrilh te etc. kha a ni chatuan a tana nunna chu ni.

Hei kumin chu Pathian zarah, inrinni zing tawngtai ka kal ve thin a, mahse thalaite ka hmu ngai tlat lo che u. Hnathawk te chu ka ti lo a, a tam zawkte hnathawk lo kan ni awm e, kan hetih vang a nih hi kan chak lo kan tih thin ni! Kan tawngtai ngai lo a, a duh danin kan awm theih lohna chhante kha han ngaihtuah teh, hei chiah hi a ni! Chak kan duha, chatuan roluahtu nih kan duh chuan tawngtai fan fan ila, mahni tan chauh ni lovin mite tan tawngtai ang u, chu chu mite hmangaih theihna a ni! Tichuan i lo chak tual tual a nga, i nun a hlim tual tual bawk ang a, mi ten i hlimna hmel eng an lo hmu thei dawn a ni tih hi ringhlel suh la tawngtai nasa rawh, chu chu a ni ringtute kan chakna thuruk chu.

Inkhawm ringawt hi a tawk lo a nia! Sam ziaktu pawhin “ka kawchhunga awm zawng zawngte u Lalpa chu fak rawh u”, tih a lo ziahte hi englai pawha fak tur a ni tih a rawn tihchianna a nih kha. Chawlhni chauha kan fak hi a tawk lo hle a, tawngtaina pawhin kan fak thin tur a ni tih hi i hre thar leh ang u. Kan Pathian hi kan damchhungin chawl lovin tawngtaina leh zaitein fakin chawimawi mah ila, kan fak tawk lo hle a ni. Chuvang chuan ania van mi te pawhin vanah an fak cheu ni! In ngaihtuah ve ngai em? Eng vanga van miten an la fak cheu ni? He laia an awm laiin an fak a, a tan an nun an hlan tawh te chuan vanah awm hle hle tawh awm tak an nia ti rawh u! Han ngaihtuah mah teh, he leia kar 1 ah vawi 1 chauh ka fak theih chuan chatuan ram ah phei chuan, chhumlo chatlovin fak a ngaia i fak thei ang em? In enlet teh mah, kar 1 ah vawi 1 zing tawngtai pawh kan kal peih lo ania! A malsawmna chauh kan duha ti ru! A malsawm tlakin i awm em? A malsawm tlakin a tan i nungin fakna chhiarsen loh i hlan tawh em, a duhdan chhiarsen loh angin i awm tawh em? Mi te tih a tana kan dah thin kha hnawl hmak i la, mite aia ka tih tur bik an ni han ti la, chutianga tih chu Lal Isua hnungzuitute chuan ka tih tur a ni. Nung ve tawp suh, kan hun tam zawk Lalpa tan i hmang ang u.

Thu mai mai hman kan ni tawh lo a nia! Khawngaihna hun a liam mek a nia! Khawngaihna hun a liam chuan Martarna lo chuan ram kan lut thei dawn tawh lo! A hmasa te a hnuhnung ten min lehkhalh mek zel a nia! Kan tih theih bak chu Lalpa’n a ti mai ang, Tanpui tur chein a nghak reng che asin!

Tin, chak i tum chuan i chak thei a, i tum loh erawh chuan i chak thei dawn lo bawk. Chak chu tu te pawhin kan duh vek a, mahse engtin nge tih erawh kan ngaihtuah lo. Tawngtai tam hi a ni kan chakna chu, kan duh dan danin i awm lo ang u! Mahni ta emaw kan inti a, kan nunah Pathian reng a awm thin lo. Eng vang nge tih chuan kan tawngtai tam loh vang a ni a, a thianghlimna leh a ropuina kan hre thei lo thin hi eng dang vang a ni lo, kan pawl tam loh vang leh kan tawngtai tam tawk loh vang a lo ni.

Tin, a thianghlim angin keini pawh kan thianghlim ve a ni tih kan hriat nan, I Petera 1:13-25, 2:1-10 ah te kan hmu. Kan pian a tangin mi bawlhlawh kan ni a, tunah zawng Lal Isua zarah mi thianghlim kan nih tawh hi. Thianghlim lo lam kan ngaihtuah tawh tur a ni lo va! A ropuina leh a mi hma ngaihna thu hi kan puang chhuak tawh zawk tur a ni. I mi huat deuhte pawh kha Lal Isua zarah a thianghlim tawh a sin, lo haw tawh reng reng suh ang che. Lal Isua hmangaihte an ni a, nang paw’n i hmangaih ve tur a ni. Engtin nge i hmangaih theih ang tih kan in zawt a ni mai thei, i tawngtai sak ang a, a tana thil tha tur i kawhhmuh khan i lo hmangaih reng tawh tihna a ni.

Unaute u, kan mi huat te, kan chunga thil tisualtute kan tawngtai sak tawh ngai em le? I mihring puite i hmangaih theih dan chu tawngtai sak te, an hamthatna tur ngaihtuah pui te, kan chatuan hmunah thleng thei ve se tih te hi a ni a, hmangaihna chu i hre tlang ang u. Kan mihringpui te kan hmangaih dawn chuan kan chak that a ngai, eng nge kan chakna chu? Kan tawngtai hian kan chak thin a, kan dil phawt chuan min tihsak thin a ni. Tin, a duh zawnga kan dil chuan kan lo hmu tawh reng a ni tih kan hre thei tawh thin a lo ni.

Keimah ah pawh hian ka chiang a ni, zing dar 3 ah pawh mu mah ila zingah thawh har hi ka hlau em em a, ka thawh duh hun ka hrilha a hun takah min tiharh hlawl thin. Kan ngaihtuaha kan ngaihven ve hi a tul a, min lo tihsak thin a lo ni tih hi i hmu thei ang. Kan dila kan ngaihtuah zui thin loh vang a nia kan beidawn thin ni.

A tawp ber a tan chuan, II Korinth 4:16, 5:1-10 thu hi i ngaihtuah leh ang u hmiang. Thil hmuh theihte en lovin, thil hmuh theih lohte chu kan en zawk si a; Thil hmuh theih lote chu eng nge kan tih chuan kan tawngtaina te, mipui hriat loh a thil tha kan tih te an ni! “Thil hmuh theihte hi rei lote a tan a ni a, Thil hmuh theih lohte erawh chu chatuan a tan a ni si a”, tiin, tirhkoh Paula pawhin Korinth khuaa mite lehkha a lo thawn hial a nih kha.

I chhiar zel ang u, a thu hi a va tha tak em? Kuta sak loh chatuana awm tur Pathian hnenah in kan nei tih kan hre si a, nangni pawh in in hriat tawh ka ring, chutah thlen ve chu kan duh theuh ti rawh u! Kan thleng theuh dawn a ni, Lalpa ringtute chu kan va’n vannei tak em! Lawm rawh u, van ata kan awmna tur sin thuah chak em emin hemi inah hian kan rum tak meuh si thina; Chutianga sinin awm ila saruakin kan awm lo vang.

Keini heta awmte hi rit phurin kan rum tak zet si a; sin lova awm kan duh vang a ni lo va, sin thuaha awm kan duh vang a ni zawk. Thi thei hi nunna lem zawhin a awm theih nan.

Tin, chumi ngei atan min buatsaihtu chu Pathian a ni. Zakhamna min petu kha Amah ngei a ni asin unau nu/ unaupa, i ngaihtuah ngai em? Chutichuan, taksaa kan awm chhung hian Lalpa hnenah kan awm lo tih kan hriain, kumkhuain muang takin kan awm thin. Hmuh theiha kal lovin rinnain kan kal zawk si a; muang takin kan awm kan ti a, taksaa awm lova Lalpa hnenah awm kan duh zawk. Chuvangin, awm ila, awm suh ila, ama lawm zawng mi nih kan tum tlat thin a ni.

Mi tinin taksa a thiltihte, a chhia a thain, kan tih ang zela kan hmuh theuh theihna turin, Krista rorelna thutphah hmaah chuan tihlanin kan awm ve tur a ni si a. Kan Pathian hi hmuhtheih loh a nih angin thil tha tih pawh chapona tel lo, mihringte hmuh loh lama thil tha tih kha a ni a duh ni!

Lalpan a hmuh che chuan a tawk a ni. I tawngtai pawh kha a hria a nia! I tawngtaina ngaithla turin a nghak reng che a ni! Inrinni zing tawngtai tur pawhin a nghak che a sin!

Lalpan kan za vai atan malsawm rawh se, Amen!

- Lalthanzami

PATHIAN RAM TANA THAWK KAN NI

"A rulhna roluah tur chu Lalpa hnen ata in hmu dawn tih hriain, in tih apiang chu mihring tan anga ti lovin, Lalpa tan anga ti zawkin, chak takin ti rawh u; Lalpa Krista rawng in bawl a nih hi.”

Ringtute he leiah kan theih ang tawk theuhin Lalpa rawng kan bawl. Kohhrana mawhphurhna/ chanvo kan neih ang zawn theuhah kan phak tawk theuhin taima takin kanthawk. Chumi mawhphurhna/ chanvo kan thawh mek chu eng rilru puin nge kan thawh tih hi a thupui hle a ni. Kolossa kohhran ho hnena Paula’n, “In tih apiang chu mihring tan anga ti lovin, Lalpa tan anga ti zawkin,” a tih ang khan.

Kohhran/ fellowship-a kan mawhphurhna- kohhran upa, Women lamah hruaitu, Thalai ah hruaitu, Naupang sunday school zirtirtu leh hruaitu, rawngbawltu, Biak in vengtu leh a dang dang mawhphurhna kan neihte. Heng mawhphurhna te hmang hian “Kohhran tan kan thawk/ti tih rilru pu lovin Pathian ram tan kan thawk ve” tih rilru zawk nei turin Pathian thuin min duh a ni.

Kohhran chu Pathian din a ni a; chumi Kohhran hmangin Pathian rawng/hna kan thawk ve thei zawk chauh a ni. Kohhran tan kan thawk tih rilru kan put chuan kohhran mipui (members) ten min en that loh hunah, kohhrana chanvo tha kan neih loh hunah, kan beisei anga thil a kal loh hunah, rorelnaa kan ro a tlang loh hunah etc., “Engatinge kei pawh ka thawk ve alawm, ka pe ve a lawm, chhungkua hna kalsan ve meuhin ka thawk ve a lawm, engatinge... engatinge... engatinge...?” zawhna tam tak keimahniah a lo chhuaka, lawm lohna mualah kan liam thin.

Amaherawh chu, Kohhranah kan phak tawkin Pathian ram tan kan thawk a ni tih rilru kan put chuan, “Engatinge?” tih zawhna hi a lo lut tawh lo ang a. Engpawh kan chungah thleng se, “A rulhna roluah tur chu Lalpa hnen ata in hmu dawn tih hriain, Lalpan ka tan ro tha leh chanvo tha zawk chu vanah min dah sak a ni” tih rilru kan lo nei zawk ang. “Chung lama thil awmahte chuan in rilru nghat tlat rawh u, leia thil awmahte chuan nghat lovin...”

(Kolossa 3: 2).

Awle, Ringtu kan za hian keimahni leh kan awmna kohhran theuh-a Pathian ram tana kan thawhnaah eng rilru pu in nge kan thawh? Kohhran tana thawk/pe tih rilru kan put chuan vuina, lung nih lohna, lawm lohna, tauhna etc. hlir a chhuak ang. Amaherawh chu, Kohhran hmangin Pathian ram tan kan thawk tih rilru kan put vethung erawh chuan, lawmna leh hlim rukna kan nei thei ang a, chu chuan Pathian tana thawh theihna min pek belh zel zawk ang. “Ringtu chu kohhran tana thawktu ni loin, Kohhran hmangin Pathian ram tana thawktu kan ni tur a ni.”

- F. Zuala