THALAITE LEH INFORMATION TECHNOLOGY

Kum 25 kal ta mai pawh kha han thlir ila, khawvel a danglam chak zia kan hre thei mai ang. Chung zingah danglam chak zual bik ṭhalai nun leh Information Technology (I.T.) te hi kan chhui dawn a ni. Chak taka ṭhalai nun rawn sawi danglamtu I.T. hi kan hriat chian a va ṭul tak em!

I.T. hi ‘Thil inhrilh hriatna atana ṭangkai tur hmanrua pakhat aṭanga adang siam chhuah thar leh hman’ tiin sawi ila a sual tam awm lo ve. Chu chuan Telephone, Radio, Cinema, TV, Video Cassette, MP-4, Fax, Computer, Electronic mail (email) etc, te hi a huam a. He I.T. hmasawn chak dan hi sawi mai hian a umpha lo hial awm e. Kawlphekhawnvar (Torch Light) hmanga khaw dangte nen inbiak nan a (Signal) an hman hun kha a la rei lo a sin. Tun ah chuan I.T. hmasawnna zar ah, kan nu leh pa ten khawkhat leh khawkhat inbiak pawh nan signal an hmang tih hre lo kan tam ta. Tunah chuan mahni pindan aṭangin emaw, Cyber Café, a nei zual deuh te phei chuan cell phone aṭangin khawvel pang lehlama mite nan an in inṭhenawm biak ta. Kan khawtlangah pawh Computer, Internet, Chatting Cyber Café tih te hi foreign ṭawng an ni ta lo. I.T. zarah khawvel hi Global Village ‘Thingtlang khaw te’ a lo ni ta.

Siapsuap hria pawh kan tam ta lo: Tun hma a India tualchhuak Terry-cotton a er a kan er ṭhin kha tunah chuan a lo thing ta. Korean film, TV channel leh Trend channel zarah veng tlabirh a cheng te pawhin Bangkok, Hong Kong bazarte kan lam ri ve ta. Mahse kan va inthlau deuh ve! Miten kekawr zuih an chinga, kan hak ve meuh chuan a ṭhenin an ha emaw tih tura ‘arh over’ an lo ching leh tawh a. An tihdan kan han copy ve dek dek a, ‘parallel’ min lo tih san leh si. Kawrchung kilh 2 awm kan han hak ve meuh chuan, kilh 3 neiin an lo thlak leh tawh. A nghawng hlai an ti a, kan hak ve meuh chuan kamis nghawng designin an lo thlak leh tawh a, Miten bike a nula an rim laiin kei erawh chuan bicycle-te nen khaw ṭhenawma tuition pe in ka la in rap tiang tiang mai. Tunlai khawvel ah chuan bike ni lovin car lam a ni leh tawh!

Zirna lam ka han thlir changte hian: Ka naupan laia ka ṭhianpa Ramengmawia nena School compound a sephung kua kan laih lai te kha chuan pawlsawm kal thleng ten ngaihsan an hlawh tehlul nen, tun ah chuan pawl-10 pass te chu thiamna thutphah ang chauh a ni ta, a common lutuk. Kan khawtlang ah pawh hian Master Degree la te kut zungtangin a daih ta lo.

Ei leh bar lam han hawi lawk ila: Primary school ka kal ve lai a, school bana Kanan Zaupui mawnga bawng zawng tura ka kal apiang a, chawtlang lian tak chunga nghapih dum tlang lian tak ka chhuang vuah hun lai te kha chuan, puipun nikhua a chhang leh thiangpui an sem thin te kha Nauvai kan leh vaimin kanpuah te a ni ṭhin a, a nei deuhin kurtai. Tin, inlengte ei ah kawlbahra leh balte kan inchhawp a nih thin kha. Tunah chuan chungte chu kalsanin a aiah Pizza, Hamburger, Coffee etc. tih te a lo ni ta. Chhun thingpui hmeh atan ba chum leh chi inchhawp chu a zahthlak deuh reuh, chu ai chuan, Egg roll, chow-mein, special cake te kan lo ching ve ta. A nei deuh te phei chuan mahni a inchhum aiin fast food dawr, restaurant leh hotel te an choka hman ta.

Media lam ve thung aw: Media changkanna pawh hi IT hmasawnna in a ken tel tho a ni. Media chuan computer, internet, Video games te, tin, chanchinbute a huam tel vek. Amaherawhchu, kan hman dan a zirin ralthuam tluk zetin a hlauhawm si. Entirnan 1997 a Scottish nu, J.K Rowlingi’n ‘Harry Potter’ a tihchhuah kha (Setanic Website sawi danin) nuapang mtd. 14 chuangin kohhran an chhuahsan an ti hial. Dan Brown-a lehkhabu, Da Vinci Code te khan ṭhalai nun a va tichhe nasa em!

TV hi han luhchilh lawk teh ang: TV hi French ṭawng ‘Telematigue’ atanga lakchhuah a ni a, Sap ṭawng tlukpui chu ‘Informatics’ a ni. Kum 1926 khan London-ah John Logie Baireda’n a siam chhuak a, tichuan January 27 ah chuan vantlang lei theihin a pho chhuak a. Burmaah hian engtikah chiah nge kan hman tan ka hre lova, India ah erawh chuan 1959 a lo lut tawh. Kan khawtlang ah te pawh a tam zawk chuan an lo hung ve ta, a mak hle mai. Rory Allec leh Wendy Allec te khan 1995 khan God TV channel an din a. 2004 khan Satellite 10 hmangin ram 112 chuangah rawngbawlna neiin mipui mtd.170 zetin an thlir a nih kha. Pathian ram a va zau phah nasa em. July 20, 1969 Neil Armstrong-an Apollo 11 hmanga thla leilung a rah lai khan mtd. 600 vel zetin an thlir a nih kha. Tin, World Cup te meuh pawh mahni in bulum atangin live in kan lo thlir ve ta. Mit a titlaiin beng a tivar hle. Mahse kan ṭangkai pui vei nen, a lehlamah nghawng a nei chhe thin em a ni. Abik takin, TV phei chu Media zingah pawh thiltithei ber a nih avangin zirchian a ṭul zual a ni. Tin, naupangah nghawng nasa lehzual bik. R-Tech System (Business Process Oversourcing, International call centre, US process) a agent ka thawhlai a, Dish network channel pay as you view zuara US state hrang hranga zankhua khua ka phone thin te kha changkanna tenawm a va tling tak em!

Internet lam han hawi leh teh ang: 1960 vel lai kha chuan network turin thlun zawm (connection) a la ni lova, chu chuan hnathawh ah harsatna a thlen tam hle. A hnu kum 7 na ah Association for computing Machinery (ACM) te dinin hma an la a, kum 2 pawh a vei hmain an hmu hlawl mai. A hmingah Advanced Research Project Agency Network tiin hming a vuah a. Chu hmalakna kal zel chuan ARAAN hmangin Internet Relay Chat (IRC) te, BSNL (Bharat Sanchar Nigam Limited) te, tin, 1999 aṭang khan Broadband connection te hial min chhim tir tawh. Kan vawiin khawvelah hian mtd. 1600 chuangin internet kan hmang ta.

Banking lam ve aw: IT hmasawnna zelin bank a pawisa deposit leh draw thuah awlsam taka tih nan credit card, ATM, te an rawn chhawp chhuak a, mahse credit card ringawt chu million chinah a buaithlak avangin March 2, 1999 khan USA- Patent Bibliographic Database Company in electronic bank account an siamte khan khawvel a tibuai hman hle. Kan hnung lawka India ram hmun thenkhat a, Air ticket black a aman zatve aia tlem a an zawrh thin te kha computer hackers ten mi credit card leh account atanga an ruk vang a ni. Chutianga computer hacker lakah a him tawk loh avangin Info-Pet, Motorola Company chuan Micro-chip or Bio-chip in lm-7x0.7.5, battery hmang, mihring temperature fluctuation hmanga recharge theih tura an han siam leh mai te hian I.T. chak zia a tilang a ni.

Mahse maw, ngaiteh, hman dik loh chuan changkanna rapthlak a va ni tak em! A tangkai zawnga i hman chuan tupuiral library lehkhabu pawh i chhiar thei a. I hriat duh chanchin thar tha ber ber pawha hrilh thei che. A, a tam mai, mahse website ah hian zahmawh lam (Pornography) chi hrang hrang nuai 7 aia tam a awm a, mtd. 1.5 velin an computerah an dah (download) bawk tiin Internet sex chuan 1999 khan a sawi. Tunah chuan hemi let zet hi a awm tawh ngei ang. A chhan chu Sex website master te hian an dah luh (upload) thar zel vang a ni. Tin, Video/blue film te pawh awlsam takin a download theih mai. A tha lo zawnga i hmang duh a nih chuan Sekibuhchhuak aiin a duhthusam awm zawk a ni.

Fimkhur a tul: IT zara kan ṭhalaite incheina hi mak tih tur nge nuihzat zawk tur. Mipa sam mak pui pui, incheina mak sak tak tak, hmeichhe kekawr kawng lam leh ke lam tawng chham lutuk, tawt lutuk, a pawng lai leh a khuar lai hriattheih vek; lai lang kawr, chhing em em, khel zawng zawng lang vek silhfente hi khawilam a mi nge? Hengte hi I.T. hmasawmna in internet leh TV hmanga a rawn chhawm te an ni.

I.T hmasawmna in a ṭhalai te thlipui anga a rawn nuai lai hian khawtlang nu leh pa, sum leh pai lama hma la thei te leh thutlukna siam thei chin lal leh upa te u, kan khawtlang hmasawmna tur hi midang min tihsaknaah leh pawisa faia min puihna ah a innghat lo tih hriat ava hun em! He ti mai hi chuan kan thatlaite kaihza a phet zo mai dawn!

I.T. hmasawnna in kan hnam, khawtlang leh society a thil ṭha leh ṭha lo min rawn thlen mek lai hian a lo dawngtu chauh (beneficiary) emaw, midangte chunga innghahna (dependency) rilru hi bansan in; hmasawnna tur thil ṭanpuina a lo awm pawhin a thawh dan tur chu keimahni ngei tel ve na (participatory) a ni tur a ni.

Tihsak ni lovin, ṭanpuitu zawk nih tum a tha, chu chu hmasawmna dik leh tlo a ni. Chu rilru kan put chuan thawhchhuah kan tum ang a, kan thawhchhuah sa hman dan pawh kan fimkur dawn a ni. Khawvel chuan ei zawh zel, hman zawh zel, bat hial pawh min zirtir ṭhin. Lal Isua zirtirna erawh chuan mahni intodelh leh midangte tana malsawmna ni tura taimak chhuah zel turin min zirtir.

- Vanlalherliana, Kuala Lumpur

(He article hi ka ṭhianpa Ramengmawia S/o Velthanga, Kanan, 1994 a van kohna chhanga min kalsantu hriatreng nan ka hlan e.)

INNGAIHTLAWMNA LEH CHAPONA

Zawhte upata upa ve tawh ta na chu mahni tawkah tawn hriat pawh kan lo nei ve ta nual mai le! Ṭhenrual chapo leh inngaitlawm thei tak tak te pawh eng emaw zat kan lo pawl ve tawh ṭhin a. Kei ngei pawh hian tawngkam chaltlai leh dengkhawng tak tak te hmanga ka sai ruh den tliah te chu bawm rang sawm pahnih ah pawh kan rut leng tawh hial awm lo ve! Mi chapote kianga awm chu nun a thawpik a, inngaitlawm te kianga awm erawh a engthawl thlak thung. Inngaitlawm tih hi inngaihnuai tih nen ngaihfin loh tur a ni ang. In uanglo, chapo lo sawina a ni a, mi ropuite thuam mawi a ni. Inngai hnuai tih erawh chu engmah ti ve thei lo a inngai, mahni inring tawk lo sawina a ni a, rualbanlo te thuvawn a ni ve thung. Inngaihtlawmna leh chapona chu mihring hian phir angin kan pai a, a khawi emaw zawk zawk hi kan leklam apiangin kan khawvel nun a nuamin a hrehawm ṭhin alo ni. Chapona thu hi han chingpawr hmasa ila a sakal a dik zawk awm e.

Thinurna leh inhau-na chawkchhuaktu chu chapona hi a nih thu leh chu chuan mualphona, chhiatna, boralna a thlen thu thufing bu chuan min hrilh a, nasa takin a dem zui nghal bawk a ni. He thu zulzui hian H.W. Beecher-a chuan, “Buaina tinreng lo chhuahna bul chu mahni inngaihsanna vang a ni”, tiin alo sawi ve bawk. Chapona hian chungnung ber, ropui ber dinhmun leh nihna a hauh tlat avangin amah khumtu leh a aia chungnung zawk an awm chu a chapona leh a ropuina tur daltu an nih angin a itsik lo thei lo va, chu chuan buaina leh chhiatna a thlen ta ṭhin a ni. Van indona pawh kha Lucifera’n Pathian ropuina a itsik vanga lo chhuak a nih tak kha mawle! Mi tam tak chuan kan ṭhen leh rual ten hamṭhatna leh duhsakna an chan te hian lawmpui tak aruangin kan itsika, kan sawichhia a, an hmasawn zel tur dodalna kawng tinreng ngaihtuahin kan rilru a hmanhlel zawk mah thin. Mi chhiatna ngawt ngaihtuah hian a letling zawngin a thawk fo ṭhin a ni. Belvawtu pakhat pawh hian a thawhpui puan su tu hi a itsika, a pu hnenah kalin “Ka pu, i sai hi bual fai rawh” a ti a, a pu chuan a lo rem ti ve mai a, puan su tu chuan “bel lian tak a ṭul a nih chu” a lo ti ve then a, a tawpah sai len theihna khawp bel lian vuak chu belvawtu ko a innghat a lo ni leh ta a. A bel vuaksa apiang saiin a rah keh tak zel avang chuan belvawtu chu a pu chuan a ban ta a ni. Chapona chuan midangte fak leh chawimawina pek a harsat bakah an sualna a ngaidam thei tlat lo. Entirna pakhat han sawi leh lawk ila; Evangelist pakhat hian ram dang kal a duh a, sawrkara ṭul pawimawh engkim chu a ṭhianpa, Bible School Founder thawk mek puihna a peih fel vek a nih hnuah, a ṭanpuitu hming chu thup bo ta hratin ama puala sual chhuah angin a chapo ta a, chu chuan a puitu inngaihtlawmna thinlung a tai thler ta a ni. Bible School Founder meuh chuan “Pathian in engkim a hria” ti a lo ngawih bo pui ve mai mai awm a nih laiin, ‘a thiltihtheih zia entirnan tuipui luang a chawltir’, tih hla ang mai khan a kal leh theih lohna tur ngaihtuahin thil fel sa chu a ching pawr tha leh vel a, a tawpah kan Evan. forein kal tur chu hrilhhai takin ‘A kut chi lo hawi’ vel ve ta vu vu mai zu nia!

He chapona hian tuan leh mang a ta tawh kha ramchhungah intualvuakna, kohhranah buaina, ṭhenawm khawveng innghirnghona, thlahkhat unau inhmuhmawhna, chhungkhat laina intuithlarna, ṭhian leh ṭhian inkawm serhna chenin a thlen ṭhin a ni. Kan pi pu ten, “Ṭhenawm khawveng do chu khaw sarih do aiin a hahthlak zawk” an lo ti mathlawn lovin, inremna a awm loh chuan khawi hmun mah hi nuam a awm thei lo. In veng tawn ṭheuh kan nih avangin intawn nikhua awm lo thei a ni lova, hawina lam apiangah hmel huat, ngei zawng, doral hlir in min hual vel a, lung a zingin thaw a ipik a, damlai hremhmunah thih kan sual a ni ber mai!

Chapona hian ringtu nuna bu alo khar nghet tlat hi a huatthlala leh a hnawksakna lai ber chu a ni. Ringlotu te chuan eng ang pawn lo nunpui se an thlarau tan awmzia a nei thui teh chiam lova, thil pawi vak pawh niin a lan loh vei nen! Ringtu tan erawh chuan Pathian thinurna berhbu tawng buakna a ni a, thlemna lian tak a tling hial a ni. Setana mizia leh a hmanraw ṭha tak a ni a, Pathian huat zawng leh ten zawng tak a nih avangin kei phei chuan “Hnawmtin phuri nu” tiin a hming ka vuah ngawt mai a ni. Heti khawpa hnawksak hi Pathian pawh hian min lakbo sak daih mai awm a nia, a zuah tlat mai hi hriatthiam har lai tak chu a ni. A chhan niawma lang chu H.W. Beechera bawkin, “Buaina hi thil tha zawk atana Pathianin mi chher a tumna hmanrua chu a ni” a lo tih angin, ‘Kan nun intahhriamna atan leh min fiahna hmanrua atan Pathianin a duh a nia nge’ tiin ngai ila kan hlawkpui zawkin a rinawm. Awle, kan thu a sei lutuk loh nan chapona leh a hnathawh chu heti zawng hian ka kalsan rih anga, tunah chuan inngaihtlawmna leh a hnathawh lam ah ilo pakai ve tawh thung ang u.

Inngaihtlawm hi inremna rahbi hmasa ber a ni. Inremna siam tur chuan ngaihdam theih a ṭul a, ngaidam thei tur chuan tlawm hmasak phawt a tul a ni. Mi i ngaihdam theih loh chuan ila tlawm tawk lo tihna a ni ang. Pathian leh mihring inremna tura Isua Krista hnathawh dan hi han en mah teh, “Ani zawngin Pathian anga awma, Pathian tluka awm chu thil thlakhlelh hleih theih ah a ruat lova, mihringte anga lo piangin bawih angah a insiam a, amah leh amah a inti tlawm ta zawk a.” (Philipi 2:6). A Pathianna kha inhnukhniam thei ta lo se mihring hian a ngaihdamna kan chang thei lovang. Tin, kan khingpui ten min rem thei lo a nih pawhin keimahni lam tal chuan thuhnuairawlh leh inngaitlawm taka remna thu kan sawi hmasak chu Pathian thu chuan min phut leh pek a. Hei pawh hi chapona thinlung nen chuan tihrual a ni lo. Mahatma Gandhi-a tunu chu a pasal nen an inthen hnuah a tu ve ve mah inchukha tawh lovin an “In mu leh ar” ta reng a ni maithei, chu chu Gandhi-a chuan tha a ti lova, a tunu chu England rama Conference palaia a kal hma ngeia a pasal chhungte nen inrem turin a fuih a, a tunu chuan, “An hnenah thupha chawia ngaihdam dil turin an chungah engmah tihsual ka nei lo” tiin alo hnial a, mahse remna siam tura thil pawimawh hmasa ber chu mahni chapona tlangsang a ta inhnuhhniama, inngaihtlawm hmasak phawt hi a ni tih hretu a pu chuan, “Nangmah lo chuan tuman an tithinur thei lo che, va kal la han rem hmasa phawt rawh”, tia a ngen luih avangin hreh chung chung chuan a han kal a, chibai a han buk te te a, chutah an tapchhak zawlah a titi pui a, rinai takin anni chhung pawh chu an lo tha phian mai a, ama sawi danin alo hawnglam chu “Phurrit lak bo ang huai ka ni e” a ti thei ta a ni awm e.

Thufing pakhat chuan phuba la tu nih aiin ngaidamtu nih a pawimawh zawk a lo ti a. Inngaihtlawm hi mi ropuite mizia a ni. Shakespeare-a chuan “Tlanga tuihawk chu chapo takin a rawn luang thla hawr hawr a, a hnuaiah chuan tuifinriat zau tak chu alo inphah cham duai a” tiin miropuite dinhmun a hrilhfiah a, a phawk zo hlein ka hria, Mi tam tak chuan phuba lak thuah hian Pathian kut an nghak hman lova, kan lo hmakhalh mai ṭhin, hei vang hian kan khawvel a buai zo ta thin a ni. Phuba reng reng chu Pathian lak tur a nih thu kan Bible chuan min hrilh si. Josefa ngaihdamna chu a unau te tan chuan zahthlak leh tlawmna, mualphona rapthlak tak a tling ang a, Josefa tan erawh hnehna ropui tak a ni vethung ang. Mother Teresa chuan, “i inngaihtlawm zawh poh leh tuman an tibuai thei lo ang che” a lo ti a, a pawmawm hle. Kan buaina tam tak hi chu ropui, chawimawi, ngaihsan kan duh vang a ni a, chu tak chu mi inngaitlawmte chuan midangte hnena an pek theih avangin buaina tur an nei ve lo a ni. England literature khawvela mi lar Heorge Bernard Shaw chuan a chapo ber laiin, “Shakespeare-a chu kei ai chuan a ropui zawk, mahse a koki ah ka chuan avangin khua ka hmu zau zawk” a ti mai a ni.

Kan hmanlai Mizo lal ropui te leh an pasalṭha chhuanvawr te kha an chapo ngai lo tiin an sawi ṭhin. An rilru a zauin an kianga awm te hi a nuam a, ṭawngkam te hi an fimkhur thei em em a ni an ti. Mipui hma a an thusawi nikhua ah te leh an beng hriata mi ten an fak chang pawh hian, “An zarah hmingṭhat ka hlawh ve mai a ni e” an ti ṭhin zuk ti tlat a mawle! An nun hona ah pawh khan an thupui ber chu “Inngaihtlawmna” hi a ni an ti.

Inngaitlawmte hnenah chuan remna a awm a, mitin an hlim ṭhin. Mahni ṭanghma sialna te, inhnuaichhiah leh inhmuhsitna te, mahni insawitheihna te, sual inthungrulh duhna te, ṭawng chaltlai te, hre ber leh fing bera inngaihna te, mahni nihna dik tak baka lan mawi tumna te, itsikna te, intuithlarna te leh thildang, Kristian nunmawi tihmelhem thei thil te hian mi inngaitlawm te nunah lalna an chang ve lova, a zalena a zahawm bawk ṭhin. “Inngaihtlawmna leh LALPA ṭih man chu sum te, chawimawina te, nunna te a ni.” (Thufingte 22:4).

- R.L. Vohbik

KAN THINLUNG KAWNGKHAR HAWNSAKIN A LAM I HAWI ANG

“Chumi hunah chuan Lalber chuan a dinglama mite hnenah chuan, ‘Ka Pa Vohbikte u, lokal ula khawvel siam tirh ata in tana ram buatsaih chu chang rawh u. Ka ril a tamin nangnin eitur mi pe a; ka tui a halin in tur mi pe a; mikhual ka nihin mi thlenga. Saruak ka nihin puan mi sin tir a; ka dam lohin mi kan a; tan ina ka tanin mi tlawha’, ala ti ang. Chumi hunah chuan mifelte chuan, ‘Lalpa engtikah nge riltamin kan hmuh che a chaw kan pek che? Tuihalin kan hmuh che a in tur kan pek che? Engtikah nge mikhuala kan hmuh che a kan thlen che? Saruaka i awma puan kan sin tir che? Engtikah nge damlo in emaw taninah emaw i awma kan hmuh che a kan tlawh che’, tiin an la chhang ang. Tin, Lalpa chuan an hnenah ‘Thudik ka hrilh a che u, heng ka unau te ber te zinga pakhat chunga in tih chu ka chunga ti in ni’, tiin a la chhang ang.” (Mathaia 25:34-40).

Ṭum khat chu hmun pakhatah hian in sang tak mai hi an sa a, an thawk luih luih mai a, chutia an buai luih luih lai chuan a chhawng chungbera mi chuan tuboh a thlauh palh ta a, zuk chhuka chhoh buai leh vel ai chuan a hnuai atanga hnathawk rawn chho tur hnenah tuboh chu rawn ken chhoh sak mai tura hrilh a duh a ni. A hnuaia mi rawn chho tur chu a’n ko ṭhina, a bengchhen em avang chuan tuman an hre thei lo. Chutah a tihngaihna hrelo chuan a ipte a zen velna lamah cheng hnih thir hi a zen fuh a, “Hei hi ka thlak chuan a hnuaia mi ten an chhar ang a, a tlakna lam an lo hawi mahna” a ti a, a’n thlak ta a, lei a thlen chuan mi in an chhara, a rawn tlakna lam en lovin an kal bo ta daih maia. Chutah a ipte lehlam chu a zen leh a, cheng nga thir hi a zuk zen fuh leh a, “He cheng nga thir hi ka thlak chuan a tlakna lam an lo hawi tawh ngei ang, cheng hnih ai kha chuan a tam zawk si a”, a ti a. Beiseina sang tak nen a thlak leh ta a, mahse chu cheng nga thir pawh chu lei a thlen chuan mi in an char a, a rawn tlakna lam chu en lovin an kal liam leh ta mai a. Chutah a tihngaihna hre lo chuan, “Hetia pawisa ka thlak reng chuan ka lam an rawn hawi dawn lo” a ti a, a bula Cubic lung chu a la lawk a, a hnuaiah chuan a vawm thla ta a, a hnuaia mi pakhat lu chu a zu fuh a, a thi ta zawih zawih mai a, chu velah a rawn tlakna, chunglam chu an rawn hawi chho ta thup a.

He thawnthu ang chiah hian kan nunah pawh Lalpa kan Pathian chuan a lam hawia, a thu zawma ngaihthla turin min duh a ni. Malsawmna tam tak min vur a, sum leh pai te nupui/pasal fanau tha tak tak te min pe a, mahse chung min pek te avang chuan lawmthu sawia a lam hawina chang kan hre ṭhin lova, chung kan hriat loh avang chuan a thinrim chuan kan chungah harsatna a rawn thlentir thin. Chung harsatna te atanga amah kan hnaih a, a lam kan hawi theih nan Thupuan 3:20 thu ah, “Ngai teh, kawngkhar bula dingin ka kik hi; tupawh ka aw hriaa kawng a hawn chuan a hnenah ka lut ang a, a hnenah zanriah ka ei ang a, ani pawhin ka hnenah a ei bawk ang” a ti a ni.

Kan thinlung kawngkhar hi engtik lai pawn kan Lalpa Pathian chuan a kik renga, keimahni a rawn awma engtik lai pawha min pawl renga, a lama mi hip tlat a duh a ni. Mahse kan thinlung kawngkhar chu amah hawn duh lovin, heng zu leh sa, hmeichhiat mipat nawmsip bawlna te tan hian kan lo hawn zawk thin si a ni. Tun aṭang chuan kan vaiin i in en chiang ang u, heng malsawm kan dawn sum leh pai, in leh lo nupui/pasal fanau ṭha tak tak te min petu, tun hun thlenga damna leh hriselna min petu hi kan thinlung kawngkhar kan hawnsak em? A lam kan hawi em? Nge a thinrim lung rawn thlak tur, kan lu chunga na taka rawn tlaktu tur chu kan nghak zawk? Kum kal ta lamah te khan malsawmna tam tak dawng siin Ama lam hawina chang kan hre lo a ni mai thei.

Hawh u, kumin 2014 atang hi chuan heng malsawmna tam tak min vurtu, kan thinlung kawngkhar engtik lai pawha kik rengtu chu kan thinlung kawngkhar te hawnsakin, min ven tawhna ah te lawmthu sawi ila, a lam i hawi ang u. Chhiartu zawng zawng te Lalpa’n malsawm cheu rawh se, Amen.

- Vla (TJP)